Kapitulo 21
Napasag-uli ang Katamnan sang Eden—Sa Bug-os nga Duta
ANG KATAMNAN sang Eden isa anay ka “paraiso sang kalipay,” kag sa sina nga kahulugan ipasag-uli ini. (Genesis 2:8, Douay Version) Ang orihinal nga Paraiso nagkobre sing limitado nga bahin sang globo. Apang gintuyo ni Jehova nga ang mga dulunan sini pasangkaron sang nagadaku nga pamilya sang tawo tubtob ang Paraiso magalikop sa bug-os nga duta kag panaptan ini sing kinaugali nga katahom. (Genesis 1:26-28; 2:8, 9, 15) Ang mga pulong ni Jesus sa simpatetiko nga manughimo sing malaut nga napatay sa tupad niya sa Kalbaryo nagpasalig sa tawo nga banhawon sia kon mapasag-uli na ang Paraiso, kag nian matalupangdan niya ang makalilipay nga pagbalhin sa duta. (Lucas 23:43) Ano ang dagway sang napasag-uli nga bilog-globo nga Paraiso? Ano ang kinatuhayan sini sa orihinal nga katamnan sang Eden?
2 Sa makalilipay nga mga tagna sang mahimayaon nga mga butang nga yara lamang sa unhan, makakita kita sing butang nga wala sa napasag-uli, bug-os-duta nga Paraiso. Ano ina? Amo “ang kahoy sang pagkilala sa maayo kag malain” nga yara anay “sa tunga sang katamnan.” (Genesis 2:17; 3:3) Maathag nga isa lamang ini ka kahoy. Makatarunganon bala hunahunaon nga sa tunga sang napasag-uli, bug-os-duta nga katamnan sang Eden may yara sing subong sina nga isa ka kahoy nga dumilian sang Dios? Indi. Malayo ang lakbayon sang katawhan sa malayo nga mga pamusod sang duta sa pagkadto sa lokasyon sina nga kahoy sa Natung-an nga Sidlangan agod mahimo magkaon sing bunga gikan sa sini bilang paglalis sa Labing Mataas nga Dios.
3 Dugang pa, wala sa sina nga lokasyon sing “nagahambal” nga man-ug sa pag-agda sa mga nagapalapit sa kahoy agod magkaon sa makagalanyat nga bunga bilang paglalis sa mga mando sang Dios. Kag wala na sing dimakita nga malaut nga espiritu nga magamaniobra sa man-ug kag daw magpahambal sini kag agdahon ang nagatan-aw sa pagrebelde batok sa Dios paagi sa pagpili sang dalanon sang pagkamalalison sa Manunuga, nga may makamamatay nga mga resulta.
4 Indi, ang dimakita nga espiritu nga amo ang sa likod sang “nagahambal” nga man-ug didto anay sa katamnan sang Eden indi mangin presente sa tion sang Milenyo nga Paggahom sang “Prinsipe sang Paghidait,” si Cristo Jesus. Inang malauton, si Satanas nga Yawa, punggan sing bug-os sa tapos sang Armagedon. Ang Bugna 20:2, 3 nagasugid sa aton nga ang “Prinsipe sang Paghidait” magadakop sa “orihinal nga man-ug, nga amo ang Yawa kag Satanas,” kag gapuson sia kag itagbong sa kadadalman sa isa ka libo ka tuig.
Matuod nga Paghidait kag Kalig-onan sa Napasag-uli nga Paraiso
5 Daw ano nga paghidait kag kalig-onan ang magasunod! Wala na ang impluwensia kag paggahom ni Satanas sa ibabaw sang katawhan subong “manuggahom sang kalibutan”! (Juan 14:30) Bangod ang mga demonyo ni Satanas itagbong man sa kadadalman, ang duta sa katapusan mangin hilway sa tanan nga sahi sang espiritismo, okultismo, kag itom nga mahiko—huo, ang tagsa ka porma sang demonismo, nga ginakangil-aran ni Jehova.—Deuteronomio 18:10-12.
6 Ang mga sapat indi na magahalit ukon mangin peligro sa mga pumuluyo sa napasag-uli nga Paraiso. Ibalik sang Dios sa manubo nga mga tinuga ang nadula nga pagkahadlok sa mga tawo. Sa amo mapaabot naton ang literal nga katumanan sang makalilipay nga paglaragway sa mga sapat nga narekord sa Isaias 11:6-9 sa tion sang Milenyo nga Paggahom sang “Prinsipe sang Paghidait”:
7 “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila. Kag ang baka kag ang oso magahalab; ang ila mga tinday magaluko sing tingob. Kag ang leon magakaon sing dagami kaangay sang baka. Kag ang bata nga nagasuso magahampang sa ibabaw sang buho sang dalitan nga man-ug; kag ang nalutas nga bata magakuot sang iya kamot sa palanaguan sang man-ug nga dalitan. Indi sila maghalit ukon maglaglag sa bug-os ko nga bukid nga balaan; kay ang duta matugob sang pagkilala kay Jehova subong nga ang mga tubig nagatabon sang dagat.”
8 Wala nagasinanto sa bahin sang Dios nga ipasulat ini nga tagna nga may espirituwal lamang nga kahulugan kag indi magapakita sina nga mga butang sa aktuwal nga kabuhi sa duta. Sing kaanggid, ang Isaias 65:25 nagasugid sa aton: “Ang lobo kag ang kordero magakaon sing tingob, kag ang leon magakaon sing dagami kaangay sang baka nga lalaki; kag ang yab-ok mangin kalan-on sang man-ug.” Nagakahulugan bala ini nga ang pamilya sang man-ug malaglag sa bilog-globo nga katamnan sang Eden? Indi, kay ang pagsiling sang tagna nga ang mangin kalan-on sang man-ug amo ang “yab-ok” nagakahulugan nga ang mga katapo sang pamilya sang reptilya indi na mangin makatalagam sa kabuhi kag maayong panglawas sang mga tawo. Kilalahon nila nga ang tawo amo ang ila agalon nga nagagahom sa tanan nga butang nga nagagiho sa ibabaw sang duta, subong ni Adan anay sa katamnan sang Eden sang ginhingalanan niya ang tanan nga sapat nga wala sing kahadlok.—Genesis 2:19, 20; Oseas 2:18.
9 Indi naton mahanduraw ang katahom kag kabuganaan sa sinang bug-os-duta nga katamnan sang Eden. Apang ang Biblia nagahatag sa aton sing matagnaon nga laragway sini sa ika-65 nga salmo, nga ginapatuhoy sa Dios. Sa bahin, ining salmo nagasiling: “Ginaduaw mo ang duta, agod nga pabuganaon mo ini; ginapamanggad mo ini sing daku. Ang suba sang Dios puno sing tubig. Nagatigana ka sa ila sing uyas, kay ginaaman mo ang duta sa sina nga paagi.” Wala, kon amo, sing tigpalamangag kundi “mabunok nga ulan”! (Salmo 65:1, 9-13) Magabugana ang kalan-on para sa tanan nga pumuluyo sang duta.
10 Ining kabuganaan gintagna man sa Isaias 25:6: “Sa sining bukid si Jehova sang mga kasoldadosan magahimo sa tanan nga katawhan sing piesta sa matambok nga mga butang, piesta sa mga alak sa labod, sa matambok nga mga butang nga puno sing utok sa tul-an, sa mga alak sa labod nga pinatin-aw sing maayo.” Ang mga pumuluyo sang napasag-uli nga Paraiso magakaon sing matambok nga mga butang nga magapabaskog sa tagipusuon kag magapakinang sa nawong. Magainom sila sing alak, nga ginpadalisay sa mga labod kag pinatin-aw sing maayo, nga magapahalipay sang ila tagipusuon. (Salmo 104:14, 15) Wala sing kakulang sing kalan-on sa idalom sang Milenyo nga Paggahom sang “Prinsipe sang Paghidait”! Sa baylo, may ‘kabugana.’—Salmo 72:16.
Pagbalhin sa Hambal kag sa Tiempo
11 May kagamo pa bala sa bug-os-duta nga Paraiso bangod sa madamo nga hambal? Wala, bangod ang “Prinsipe sang Paghidait” ginapatuhuyan subong “Dios nga Gamhanan.” (Isaias 9:6) Sa amo sarang niya mabaliskad ang pagkagumon sang hambal nga nagsugod sa Torre sang Babel. (Genesis 11:6-9) Ano ang mangin isa ka hambal sang tanan nga dutan-on nga mga anak sang “Dayon nga Amay”? Amo bala ang orihinal nga hambal sang nahauna nga Adan, ang hambal nga ginhatag sa iya ni Jehova? Mahimo gid. Ano man ang matabo, ang tanan nga hambal nga mga sablag pagadulaon. Sarang ikaw makalakbay bisan diin kag makakomunikar sa katawhan. Mahangpan mo sila, kag mahangpan ka man nila. Mangin isa ang hambal para sa tanan nga katawhan, kag nagakaigo nga ang bug-os nga Biblia matigayon sa sina nga hambal. (Ipaanggid ang Sofonias 3:9.) Sa sina nga hambal ang bug-os nga duta mapuno sang pagkilala kay Jehova “subong nga ang mga tubig nagatabon sang dagat.”—Isaias 11:9.
12 Matuman nian ang mga pulong sang Zacarias 14:9: “Sa sadto nga adlaw si Jehova mangin isa kag ang iya ngalan isa.” Si Jehova lamang ang pagasimbahon subong ang isa ka matuod nga Dios. Sa “sadto nga adlaw” sang Ginharian ni Jehova paagi sa “Prinsipe sang Paghidait,” ipahayag sang Dios ang eksakto nga pagmitlang sang iya ngalan. Nian mangin isa lamang ang pagmitlang sinang balaan nga ngalan sang tanan sa duta. Ang iya ngalan mangin isa.
13 Kon ano nga mga pagbalhin sa tiempo kag sa palibot ang matabo, interesado man ang mga nagapaabot sa tugob-globo nga Paraiso sang “Prinsipe sang Paghidait.” Isa ka butang ang pat-od: Ang bug-os nga duta himuon nga isa ka makalilipay nga duog nga puy-an. Indi na pagtublagon ina nga Paraiso sang malaglagon nga mga unos, tornado, dalagku nga mga balod, hurricanes, ukon bagyo. Ang madlos, mga balod, kag ang tiempo magatuman tanan sa “Prinsipe sang Paghidait.” (Marcos 4:37-41) Ang tiempo sa tugob-globo nga katamnan sang Eden kontrolon sing bug-os. Ang bug-os nga duta patahumon agod mangin isa ka paraiso sang kalipay, nga sa diin ang tanan nga katawhan makatigayon sing makalilipay nga pribilehiyo sa pagpuyo nga may kalig-onan tubtob sa tion nga wala sing katapusan.
14 Wala na sing rason para sa mga luha sang kasubo sadto nga tion! Ang matagnaon nga Pulong ni Jehova nagapasalig sa aton: “Ang kayangkayang sang Dios upod sa mga tawo, kag magapuyo sia kaupod nila. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.”—Bugna 21:3, 4.
15 Ang langit amo ang trono sang Dios, kag ang duta amo ang palatungan sang iya mga tiil. (Isaias 66:1) Gani indi makapuyo ang Dios sa duta sa literal nga kahulugan. Apang magapuyo sia sa kayangkayang upod sa katawhan. Sa tion sang Isa ka Libo ka Tuig nga Paggahom, si Jehova magapuyo sa kayangkayang upod sa katawhan paagi sa iya tiglawas nga amo ang ginhimaya nga Anak, si Jesucristo. Daw ano ka nagakaigo nga ang presensia ni Jehova representaran sang iya “Prinsipe sang Paghidait”! Ginapahanumdom sini ang mga pulong sang Isaias 7:14 nahanungod sa ngalan nga gin-aplikar sa Mesias—ang Emanuel. Ina nga ngalan nagakahulugan sing “Ang Dios Kaupod Naton.” (Mateo 1:23) Daw ano ka makakulunyag nga, paagi sa iya ginahigugma gid nga Anak, ang Dios “magapuyo” upod sa katawhan! Nian ang mga luha sang kalipay mahimo gid nga magatulo sa aton mga mata samtang ginatan-aw naton ang makatilingala nga mga milagro nga himuon sining “Dios nga Gamhanan,” labi na kon ang mga hinigugma banhawon sa Paraiso nga mga kahimtangan. (Binuhatan 24:15) Ina nga mga milagro mangin dalayawon nga pamatuod nga ang Dios upod sa katawhan kag nga ginapahiran niya ang tanan nga luha sang kasubo gikan sa aton mga mata sing dayon.
Isa ka Matahom nga Duog sa Wala sing Latid nga Uniberso
16 Ang nahauna nga si Adan gintudluan kon paano sugdan ang proyekto sa pagpasangkad sang Paraiso gikan gid didto sa katamnan sang Eden. Matuman ang orihinal nga katuyuan nga pasangkaron ini sa bug-os nga duta. Apang magahulat bala ang pagbanhaw sa mga patay tubtob ang Paraiso magalikop sa bilog nga globo? Indi. Halimbawa, una nga banhawon ang mga patay sa mga bahin sang duta nga sa diin may yara mga nakalampuwas sa Armagedon kag ina nga mga duog nahimo na nga isa ka paraiso. Samtang nagapadayon ang pagbanhaw sa katawhan, ining Paraiso nga mga duog magasangkad tubtob magabuylog sila sa pagporma sang bug-os-duta nga Paraiso.
17 Ang Paraiso nga magaabot magalabaw sa tanan nga matahom nga parke ukon katamnan karon. Ang bug-os nga duta magapamulak subong isa ka matahom nga paraiso, nga indi lamang makalilipay sa mata sang mga tawo kundi bisan sa mata sang Manunuga. Mangin isa ini ka tugob-globo nga katamnan sang Eden nga napunihan sing mga tanom kag mga kahoy—matahom tulukon kag nagapatubas sing kalan-on sa pagsakdag sang kabuhi sang mga tinuga sa kahimpitan. Ang duta magapabilin sing dayon nga isa ka matahom nga duog sa wala sing latid nga uniberso ni Jehova. Kag ang bug-os nga nahiusa nga katawhan may walay katapusan nga obligasyon kag pribilehiyo nga tipigan ang duta nga mangin isa ka matahom nga duog.
18 Ang tanan nga katapo sining diosnon nga tawhanon nga pamilya magapuyo sing tingob nga may paghidait subong mag-ulutod nga mga lalaki kag mga babayi sa bug-os nga pagkaputli, kay sila aktuwal nga mangin mga anak sang “Dayon nga Amay,” ang “Prinsipe sang Paghidait.” Gani wala na sing matinaastaason nga pagdominar sang mga lalaki sa ibabaw sang mga babayi, ang ila utod nga mga babayi. Ang nahimpit nga mga babayi mangin subong sang ginatuyo ni Jehova nga Dios, subong nga amo man ang iya gintuyo para kay Eva nga mangin “kabulig” sang iya himpit nga bana, si Adan.—Genesis 2:18; tan-awa man ang 1 Pedro 3:7.
19 Nian ang danyag sang paraiso nga duta nga puno sing himpit nga mga lalaki kag mga babayi sa panulok sang mga tinuga sa dimakita nga kalangitan mangin mas mahimayaon kag mas matahom sang sa dagway anay sang duta sang una ini nga gintuga, nga sadto nga tion “nag-ambahan sing tingob ang kabituonan sang kaagahon, kag naghinugyaw sa kalipay ang tanan nga anak sang Dios.” (Job 38:7) Nian, ang Labing Mataas nga Dios, si Jehova, mabindikar sing bug-os subong ang Isa nga ang iya mahimayaon nga katuyuan indi gid malutos. Sa iya ang tanan nga kadayawan!
[Mga Pamangkot sa Pagtinuon]
1. (a) Sa anong kahulugan ipasag-uli ang katamnan sang Eden, kag ngaa indi ini magakobre sang limitado lamang nga bahin sang globo? (b) Ano ang ginapakita sang mga pulong ni Jesus sa manughimo sing malaut?
2. (a) Ano ang yara sa orihinal nga katamnan sang Eden nga wala na sa bug-os-duta nga Paraiso? (b) Ngaa makatarunganon nga indi pagtilawan sang Dios ang pagkamatinumanon sang katawhan paagi sa isa ka kahoy?
3. Ano pa ang wala na sa napasag-uli nga Paraiso?
4. Ngaa indi presente si Satanas nga Yawa sa tion sang Isa ka Libo ka Tuig nga Paggahom sang “Prinsipe sang Paghidait”?
5. Sa napasag-uli nga Paraiso, ngaa magaluntad ang matuod nga paghidait kag kalig-onan sa bug-os nga duta?
6, 7. (a) Ngaa indi na mangin peligro sa mga tawo ang sapat nga tinuga? (b) Ano nga tagna tuhoy sa sini ang literal nga matuman?
8. Ano ang kahulugan sang matagnaon nga pinamulong nga ang kalan-on sang man-ug mangin “yab-ok”?
9, 10. Ano ang ginatagna sang Salmo 65 kag Isaias 25:6 nahanungod sa duta sa idalom sang paggahom sang “Prinsipe sang Paghidait”?
11. Ano nga pagbalhin sa hambal ang mahanabo, kag paano ini magaapektar sa katawhan?
12. Paano ang Zacarias 14:9 makaeksperiensia sing katumanan?
13. Ngaa ang tiempo, madlos, kag mga balod indi mangin makatalagam sa mga pumuluyo sang duta?
14, 15. (a) Ano nga saad nga narekord sa Bugna 21:3, 4 ang matuman? (b) Paano ang Dios magapuyo sa kayangkayang upod sa katawhan? (c) Ano nga sahi sang mga luha ang pahiran sing dayon?
16. Magahulat bala ang pagkabanhaw sang mga patay tubtob mapasangkad ang Paraiso sa bilog nga globo? Ipaathag.
17. Ano nga laragway ang ginhatag tuhoy sa tugub-globo nga Paraiso?
18. Paano naton mahibaluan nga ang tanan, mga lalaki kag mga babayi, magapuyo sing tingob nga may paghidait subong mag-ulutod nga mga lalaki kag mga babayi?
19. Ang Paraiso nga duta magapresentar sing ano nga danyag sa mga tinuga nga nagapuyo sa dimakita nga kalangitan?