12. (a) Ano gilayon ang ginhimo ni Daniel sang mahibaluan niya ang tuhoy sa bag-o nga sugo? (b) Sin-o ang nagapanilag kay Daniel, kag ngaa?

¹² Wala magdugay, nahibal-an na ni Daniel ang sugo nga nagadumili sang pagpangamuyo. Sa gilayon, nagsulod sia sa iya balay kag nagsaka sa iya hulot sa atop, diin bukas ang mga bintana nga nagaatubang sa Jerusalem.b Didto si Daniel nagsugod sa pagpangamuyo sa Dios “subong sang iya pirme ginahimo antes sini.” Ayhan nagdumdom si Daniel nga isahanon sia, apang ginapanilagan gali sia sang mga manughimbon. Sa hinali lang, “nagtinumpok” sila, walay duhaduha sa pareho nga paagi sang magpalapit sila kay Dario. Karon nakita gid ini sang ila mga mata—si Daniel “nagapangabay kag nagapakiluoy sa atubangan sang iya Dios.” (Daniel 6:10, 11) May ebidensia na ang mataas nga mga opisyal kag ang mga satrapa agod masumbong nila si Daniel sa atubangan sang hari.