Pagbantay sa Panong sang Dios sing Mahigugmaon
“Bantayi ang panong sang Dios nga yara sa inyo pag-atipan.”—1 PEDRO 5:2.
1, 2. Ano ang nagapangibabaw nga kinaiya ni Jehova, kag paano ini nagapadayag sang iya kaugalingon?
SA BUG-OS nga Balaan nga Kasulatan, ginapakita sing maathag nga ang gugma amo ang nagapangibabaw nga kinaiya sang Dios. “Ang Dios gugma,” siling sang 1 Juan 4:8. Sanglit ang iya gugma ginapabutyag sa buhat, ang 1 Pedro 5:7 nagasiling nga ang Dios “nagaatipan sa inyo.” Sa Biblia, ang pag-atipan ni Jehova sa iya katawhan ginapaanggid sa mapinalanggaon nga pag-atipan sang isa ka mahigugmaon nga manugbantay sa iya mga karnero: “Yari karon! Ang Soberano nga Ginuong Jehova mismo . . . magabantay sa iya panong. Tipunon niya ang mga kordero sa iya butkon; kag dalhon sila sa iya dughan. Tuytuyan niya sing mahalungon ang mga may tinday.” (Isaias 40:10, 11) Daku gid nga kasulhay ang nabatyagan ni David nga sia nakasiling: “Si Jehova amo ang akon Manugbantay. Wala sing makulang sa akon”!—Salmo 23:1.
2 Nagakaigo nga ginapaanggid sang Biblia ang katawhan nga ginakahamut-an sang Dios sa mga karnero, kay ang mga karnero mahidaiton, mapinasakupon, matinumanon sa manugbantay nga nagaatipan sa ila. Subong isa ka mahigugmaon nga Manugbantay, ginaatipan gid ni Jehova ang iya tulad-karnero nga katawhan. Ginapakita niya ini paagi sa pag-aman sa ila sing materyal kag espirituwal nga mga butang kag paagi sa pagtuytoy sa ila sa mabudlay nga “katapusan nga mga adlaw” sining malaut nga kalibutan padulong sa iya nagapakari nga matarong nga bag-ong kalibutan.—2 Timoteo 3:1-5, 13; Mateo 6:31-34; 10:28-31; 2 Pedro 3:13.
3. Paano ginlaragway sang salmista ang pag-atipan ni Jehova sa iya mga karnero?
3 Talupangda ang mahigugmaon nga pag-atipan ni Jehova sa iya mga karnero: “Ang mga mata ni Jehova yara nayon sa mga matarong, kag ang iya mga dulunggan bukas sa pagpangayo nila sing bulig. . . . Nagtuaw sila, kag si Jehova nagpamati, kag ginluwas sila sa tanan nila nga kalisdanan. Si Jehova malapit sa mga buong sing tagipusuon; kag ginaluwas niya ang mga nadugmok sa espiritu. Madamo ang kapipit-an sang matarong, apang gikan sa sini tanan ginaluwas sia ni Jehova.” (Salmo 34:15-19) Daw ano ka daku nga kasulhay ang ginaaman sang Bug-os Uniberso nga Manugbantay para sa iya tulad-karnero nga katawhan!
Ang Huwaran sang Maayong Manugbantay
4. Ano ang papel ni Jesus sa pag-atipan sa panong sang Dios?
4 Ang Anak sang Dios, nga si Jesus, nakatuon sing maayo gikan sa iya Amay, kay ginatawag sang Biblia si Jesus nga “maayong manugbantay.” (Juan 10:11-16) Ang iya importante nga pag-alagad sa panong sang Dios ginapatalupangod sa Bugna kapitulo 7. Sa bersikulo 9, ang mga alagad sang Dios sa aton adlaw ginatawag nga “isa ka dakung kadam-an . . . gikan sa tanan nga pungsod kag mga tribo kag katawhan kag mga hambal.” Nian ang bersikulo 17 nagasiling: “Ang Kordero [Jesus] . . . magabantay sa ila, kag magatuytoy sa ila sa mga tuburan sang tubig sang kabuhi. Kag ang Dios magapahid sang tagsa ka luha gikan sa ila mga mata.” Ginatuytuyan ni Jesus ang mga karnero sang Dios sa mga tubig sang kamatuoran nga nagadul-ong sa walay katapusan nga kabuhi. (Juan 17:3) Talupangda nga si Jesus ginatawag nga “Kordero,” nagapakita sang iya tulad-karnero nga mga kinaiya, kay sia ang panguna nga huwaran sang pagkamapinasakupon sa Dios.
5. Ano ang ginbatyag ni Jesus tuhoy sa katawhan?
5 Sang sa duta, nagkabuhi si Jesus sa tunga sang katawhan kag nakita niya ang ila makaluluoy nga kahimtangan. Ano ang nangin reaksion niya sa ila kahimtangan? “Naluoy sia sa ila, kay napilasan sila kag nag-inaplaag kaangay sang mga karnero nga wala sing manugbantay.” (Mateo 9:36) Ang mga karnero nga wala sing manugbantay nagaantos sing daku sa mga kamot sang kawatan, kaangay sang mga karnero nga may pabaya nga mga manugbantay. Apang maatipanon gid si Jesus, kay sia nagsiling: “Kari sa akon, tanan kamo nga ginabudlayan kag ginabug-atan, kag papreskuhan ko kamo. Itakod ang akon gota sa inyo, kag magtuon kamo sa akon, kay ako malum-ok sing panghunahuna kag mapainubuson sa tagipusuon, kag makasapo kamo sing kapreskuhan para sa inyo mga kalag. Kay ang akon gota mahulas kag ang akon lulan mamag-an.”—Mateo 11:28-30.
6. Ano nga konsiderasyon ang ginpakita ni Jesus sa mga ginapigos?
6 Gintagna sang isa ka tagna sa Biblia nga si Jesus magapakig-angot sing mahigugmaon sa katawhan: “Si Jehova naghaplas sa akon . . . sa pagbugkos sang buong sing tagipusuon, . . . sa paglipay sa tanan nga nagakasakit.” (Isaias 61:1, 2; Lucas 4:17-21) Wala gid pagpakanubua ni Jesus ang mga imol kag mga walay palad. Sa baylo, gintuman niya ang Isaias 42:3: “Ang tabun-ak nga basag indi niya pagbalion; kag ang pabilo nga nagapuog, indi niya pagpalungon.” (Ipaanggid ang Mateo 12:17-21.) Ang mga nasit-an daw kaangay sang basag nga mga tabun-ak, daw kaangay sang mga pabilo nga malapit na mapalong bangod kulang sing gatong. Bilang pagkilala sa ila makaluluoy nga kahimtangan, nagpakita sa ila si Jesus sing kaluoy kag ginhatagan sila sing kusog kag paglaum, gin-ayo sila sa espirituwal kag sa pisikal.—Mateo 4:23.
7. Padulong kay sin-o gintuytuyan ni Jesus ang katawhan nga nagsunod sa iya?
7 Ang tulad-karnero nga katawhan nagpanong sa pagsunod kay Jesus. Tuman ka makagalanyat ang iya pagpanudlo sa bagay nga ang mga opisyal nga ginpadala agod dakpon sia nagreport: “Wala pa gid sing tawo nga nagpamulong sing subong sini.” (Juan 7:46) Ti, ang salimpapaw nga relihiosong mga lider nagreklamo: “Ang kalibutan nagsunod sa iya”! (Juan 12:19) Apang wala ginhandum ni Jesus ang dungog ukon himaya para sa iya kaugalingon. Gintuytuyan niya ang katawhan padulong sa iya Amay. Gintudluan niya sila nga alagdon si Jehova bangod sang gugma sa Iya dalayawon nga mga kinaiya: “Dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga kusog kag sa bug-os mo nga hunahuna.”—Lucas 10:27, 28.
8. Paano ang pagkamatinumanon nga ginapakita sang katawhan sang Dios sa iya tuhay sa ginapakita sang iban sa ila kalibutanon nga mga manuggahom?
8 Nagakalipay si Jehova nga ang iya bug-os uniberso nga pagkasoberano ginasakdag sang iya tulad-karnero nga katawhan, bangod sang ila gugma sa iya. Kinabubut-on nga ginpili nila nga alagdon sia bangod nahibaluan nila ang iya hiligugmaon nga mga kinaiya. Daw ano ini ka tuhay sa mga lider sang kalibutan karon nga ginasunod lamang sang ila mga sakop bangod sang kahadlok, ukon sing paganot, ukon bangod may likom sila nga motibo! Indi gid masiling kay Jehova ukon kay Jesus ang ginsiling anay sa isa ka papa sang Iglesia Katolika Romana: “Gindayaw sia sang madamo, ginkahadlukan sang tanan, wala ginhigugma sang bisan sin-o.”—Vicars of Christ—The Dark Side of the Papacy, ni Peter De Rosa.
Mapintas nga mga Manugbantay sa Israel
9, 10. Ilaragway ang mga lider sang dumaan nga Israel kag sang unang siglo.
9 Indi kaangay ni Jesus, ang relihiosong mga lider sang Israel sang iya adlaw wala sing gugma sa mga karnero. Kaangay sila sang unang mga manuggahom sa Israel nga ginsilingan ni Jehova: “Kailo ang mga manugbantay sang Israel, nga nagpakaon sang ila kaugalingon! Indi bala ang panong ang dapat pakan-on sang mga manugbantay? . . . Ang mga balatianon wala ninyo pagpabakura, kag ang masakiton wala ninyo pag-ayuha, kag ang nabalian wala ninyo pagbugkusi, kag ang nag-aplaag wala ninyo pagpabalika, kag ang nadula wala ninyo pagpangitaa, kundi sa pakusog kag sa kapintas naggahom kamo sa ila.”—Ezequiel 34:2-4.
10 Kaangay sadtong politikanhon nga mga manugbantay, ang Judiyong relihiosong mga lider sang unang siglo matig-a sing tagipusuon. (Lucas 11:47-52) Sa pag-ilustrar sini, may ginsugid si Jesus tuhoy sa isa ka Judiyo nga ginkawatan, ginsakit, kag ginbilin nga halos patay sa higad sang dalan. Naglabay ang isa ka Israelinhon nga pari, apang sang makita niya ang Judiyo, nagtabok sia sa pihak sang dalan. Amo man ang ginhimo sang isa ka Levinhon. Nian, nag-abot ang isa ka di-Israelinhon, isa ka ginatamay nga Samariahanon kag nagbatyag sing kaluoy sa biktima. Ginsamburan niya ang iya mga pilas, ginpasakay sia sa isa ka hayop kag gindala sia sa isa ka dalayunan, kag gin-atipan sia. Ginbayaran niya ang manugbantay sang dalayunan kag nagsiling nga mabalik sia agod bayaran ang dugang pa nga magasto.—Lucas 10:30-37.
11, 12. (a) Paano ang kalautan sang relihiosong mga lider nangin dayag gid sang adlaw ni Jesus? (b) Ano sang ulihi ang ginhimo sang mga Romano sa relihiosong mga lider?
11 Tuman gid kalaut ang relihiosong mga lider sang adlaw ni Jesus nga sang ginbanhaw ni Jesus si Lazaro gikan sa minatay, ginsapol sang puno nga mga saserdote kag sang mga Fariseo ang Sanhedrin kag nagsiling: “Ano ang himuon naton, kay ini nga tawo [Jesus] nagahimo sing madamo nga tanda? Kon aton lang sia pabay-an, magatuo sila tanan sa iya, kag magaabot ang mga Romano kag kuhaon ang aton duog kag ang aton pungsod.” (Juan 11:47, 48) Wala nila gin-apresyar ang kaayo nga ginhimo ni Jesus para sa napatay nga tawo. Nabalaka sila sa ila mga posisyon. Gani “kutob sadtong adlaw nagsinapol sila nga patyon [si Jesus].”—Juan 11:53.
12 Sa pagpadaku pa sang ila kalautan, ang puno nga mga saserdote “nagsinapol agod patyon man si Lazaro, kay bangod sa iya madamo sang mga Judiyo ang nagkadto didto kag nagtuo kay Jesus.” (Juan 12:10, 11) Wala sing kapuslanan ang ila makagod nga mga panikasog nga amligan ang ila mga posisyon, kay ginsilingan sila ni Jesus: “Ang inyo balay ginabayaan sa inyo.” (Mateo 23:38) Bilang katumanan sadtong mga pulong, nag-abot ang mga Romano sa sadto nga kaliwatan kag ginkuha ang ‘ila duog kag ang ila pungsod,’ subong man ang ila kabuhi.
Mahigugmaon nga mga Manugbantay sa Cristianong Kongregasyon
13. Sin-o ang ginsaad ni Jehova nga ipadala sa pagbantay sa iya panong?
13 Sa baylo sang mapintas, makagod nga mga manugbantay, magaaman si Jehova sing Maayong Manugbantay, si Jesus, agod mag-atipan sa Iya panong. Nagsaad man sia nga magatangdo sia sing mahigugmaon nga kabulig nga mga manugbantay agod mag-atipan sa mga karnero: “Magabutang ako sa ila sing mga manugbantay nga magabantay gid sa ila; kag indi na sila mahadlok.” (Jeremias 23:4) Sa amo, subong sang sa unang-siglo nga Cristianong mga kongregasyon, sa karon man, ‘ang pagtangdo sing mas gulang nga mga lalaki sa tagsa ka siudad’ ginahimo. (Tito 1:5) Ining mas gulang sa espirituwal nga mga lalaki nga nakatuman sang mga kalipikasyon nga ginasambit sa Kasulatan dapat “magabantay sa panong sang Dios.”—1 Pedro 5:2; 1 Timoteo 3:1-7; Tito 1:7-9.
14, 15. (a) Nabudlayan ang mga disipulo sa pagpalambo sing ano nga panimuot? (b) Ano ang ginhimo ni Jesus agod ipakita sa ila nga ang mga gulang dapat mangin mapainubuson nga mga alagad?
14 Sa pag-atipan sa mga karnero, ang mga gulang “labaw sa tanan nga butang” dapat may “mainit nga gugma” para sa ila. (1 Pedro 4:8) Apang ang mga disipulo ni Jesus, bangod sang tuman nga interes sa kadungganan kag posisyon, dapat magtuon sini. Gani sang ang iloy sang duha ka disipulo nagsiling kay Jesus: “Isugo nga ining duha ko ka anak maglingkod, ang isa sa imo tuo kag isa sa wala, sa imo ginharian,” naakig ang iban nga mga disipulo. Si Jesus nagsiling sa ila: “Ang mga manuggahom sang mga pungsod nagapakaginuo sa ila kag ang kadalagkuan sa mga tawo nagauyat sing awtoridad sa ila. Indi mangin subong sini sa inyo; kundi ang bisan sin-o sa inyo nga luyag mangin daku mangin alagad ninyo, kag ang bisan sin-o sa inyo nga luyag mangin nahauna mangin ulipon ninyo.”—Mateo 20:20-28.
15 Sa isa pa ka okasyon, sa tapos ang mga disipulo ‘nagbinaisay kon sin-o ang mas daku,’ si Jesus nagsiling sa ila: “Kon ang bisan sin-o luyag mangin nahauna, dapat sia mangin ulihi sa tanan kag alagad sang tanan.” (Marcos 9:34, 35) Ang mapainubuson nga hunahuna kag kahanda sa pag-alagad dapat mangin bahin sang ila personalidad. Apang nabudlayan ang mga disipulo sa sadtong mga ideya, kay sang gab-i gid antes mapatay si Jesus, sa iya katapusan nga panihapon, natabo ang “mainit nga kasuayon” sa tunga nila sa kon sin-o ang labing daku! Natabo yadto walay sapayan nga ginpakita na sa ila ni Jesus kon paano ang isa ka gulang dapat mag-alagad sa panong; ginpaubos niya ang iya kaugalingon kag ginhinawan ang ila mga tiil. Sia nagsiling: “Kon ako, nga walay sapayan nga Ginuo kag Manunudlo, naghinaw sang inyo mga tiil, dapat man kamo maghinaway sang inyo mga tiil. Kay naghatag ako sa inyo sing sulundan, agod nga, subong sang ginhimo ko sa inyo, amo man ang dapat ninyo himuon.”—Lucas 22:24; Juan 13:14, 15.
16. Sang 1899, ano nga mga komento ang ginpabutyag sang Watch Tower tuhoy sa labing importante nga kinaiya sang mga gulang?
16 Pirme ginatudlo sang mga Saksi ni Jehova nga ang mga gulang dapat mangin subong sini. Halos isa ka siglo ang nagligad, ang Abril 1, 1899, nga Watch Tower nagpatalupangod sang mga pulong ni Pablo sa 1 Corinto 13:1-8 kag dayon nagsiling: “Maathag nga ginapakita sang Apostol nga ang labing importante nga mga pagtilaw wala napasad sa ihibalo kag sa hambal, kundi nga ang gugma nga nagadulot sa tagipusuon kag nagapabilin sa bug-os nga kabuhi, kag nagapahulag kag nagapahikot sa aton mamalatyon nga mga lawas, amo ang matuod nga pagtilaw—ang matuod nga pamatuod sang aton kaangtanan sa Dios. . . . Ang nagapanguna nga kinaiya nga dapat pangitaon sa tagsatagsa nga ginabaton subong isa ka alagad sang iglesia, sa pag-alagad sa balaan nga mga butang, dapat una sa tanan amo ang espiritu sang gugma.” Ginpatalupangod sini nga ang mga lalaki nga indi sing mapainubuson mag-alagad bangod sang gugma “makatalagam nga mga manunudlo, kag mahimo gid nga magahimo sing kapin nga kahalitan sangsa kaayuhan.”—1 Corinto 8:1.
17. Paano ginapadaku sang Biblia ang mga kinaiya nga dapat huptan sang mga gulang?
17 Sa amo, indi dapat “magpakaginuo” sa mga karnero ang mas gulang nga mga lalaki. (1 Pedro 5:3) Sa baylo, dapat sila manguna sa ‘pagkamainayuhon sa isa kag isa, malulo nga pagkamainawaon.’ (Efeso 4:32) Ginpadaku ini ni Pablo: “Sul-ubi ang inyo kaugalingon sing mapinalanggaon nga pagkamainawaon, pagkaayo, mapainubuson nga panghunahuna, pagkalum-ok, kag pagkamainantuson. . . . Apang, luwas pa sa sining tanan nga butang, sul-ubi ang inyo kaugalingon sing gugma, kay amo ini ang himpit nga higot sang paghiusa.”—Colosas 3:12-14.
18. (a) Anong maayong huwaran ang ginpahamtang ni Pablo sa pagpakig-angot sa mga karnero? (b) Ngaa indi dapat patumbayaan sang mga gulang ang mga kinahanglanon sang mga karnero?
18 Nakatuon si Pablo nga himuon ini, nga nagasiling: “Nangin malulo kami sa tunga ninyo, subong sang kon ang isa ka nagabatiti nga iloy nagaatipan sa iya kaugalingon nga mga anak. Gani, subong may malulo nga pagpalangga sa inyo, nahamuot kami nga ipaambit sa inyo, indi lamang ang maayong balita sang Dios, kundi man ang amon mga kaugalingon, bangod nga nangin mahal gid kamo sa amon.” (1 Tesalonica 2:7, 8) Nahisanto sa sina, sia nagsiling: “Maghambal sing malugpayon sa ginapung-awan nga mga kalag, sakdaga ang mga maluya, mangin mainantuson sa tanan.” (1 Tesalonica 5:14) Walay sapayan sang sahi sang problema nga mahimo dalhon sang mga karnero sa ila, dapat dumdumon sang mga gulang ang Hulubaton 21:13: “Tuhoy kay bisan sin-o nga nagapabungol sa nagareklamo nga singgit sang isa ka kubos, sia man mismo magapanawag kag indi pagsabton.”
19. Ngaa isa ka pagpakamaayo ang mahigugmaon nga mga gulang, kag ano ang reaksion sang mga karnero sa sina nga gugma?
19 Ang mas gulang nga mga lalaki nga nagabantay sing mahigugmaon sa panong isa ka pagpakamaayo sa mga karnero. Ang Isaias 32:2 nagtagna: “Ang tagsatagsa dapat mangin subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.” Nalipay kita sa paghibalo nga madamo sang aton mga gulang karon ang nagahikot nahisuno sa sinang matahom nga laragway nga makarepresko. Natun-an nila nga iaplikar ang masunod nga prinsipio: “Sa gugma nga utudnon magpakita sing malulo nga pagpalangga sa isa kag isa. Sa pagpakita sing dungog sa isa kag isa manguna kamo.” (Roma 12:10) Kon ang mga gulang nagapakita sini nga sahi sang gugma kag pagkamapainubuson, ang mga karnero nagasunod paagi sa paghatag sa ila sing “labaw sa kinaandan nga patugsiling sa gugma bangod sang ila hilikuton.”—1 Tesalonica 5:12, 13.
Tahura ang Paggamit sa Hilway nga Kabubut-on
20. Ngaa dapat tahuron sang mga gulang ang hilway nga kabubut-on?
20 Gintuga ni Jehova ang mga tawo nga may hilway nga kabubut-on sa paghimo sang ila kaugalingon nga mga desisyon. Bisan pa ang mga gulang dapat maglaygay kag magdisiplina pa gani, indi nila dapat pagkontrolon ang kabuhi ukon ang pagtuo sang iban. Si Pablo nagsiling: “Indi nga kami ang mga agalon sang inyo pagtuo, kundi nga kami mga masigkamanugpangabudlay para sa inyo kalipay, kay paagi sa inyo pagtuo nagatindog kamo.” (2 Corinto 1:24) Huo, “ang tagsatagsa magadala sang iya kaugalingon nga lulan.” (Galacia 6:5) Ginhatagan kita ni Jehova sing daku nga kahilwayan sa sulod sang mga dulunan sang iya kasuguan kag mga prinsipio. Busa, dapat likawan sang mga gulang ang paghimo sing mga pagsulundan sa kon diin wala sing Makasulatanhon nga mga prinsipio nga ginalapas. Kag dapat nila pamatukan ang bisan anong huyog nga itanyag ang ila kaugalingon nga personal nga mga opinyon subong nga daw doktrina ukon tugutan ang ila bugal nga mangibabaw kon may isa nga wala nagaugyon sa sina nga mga pagtamod.—2 Corinto 3:17; 1 Pedro 2:16.
21. Ano ang sarang matun-an gikan sa panimuot ni Pablo kay Filemon?
21 Talupangda kon paano si Pablo, samtang bilanggo sa Roma, nakig-angot kay Filemon, isa ka Cristiano nga agalon sa Colosas sa Asia Minor. Ang ulipon ni Filemon nga si Onesimo nalagyo sa Roma, nangin isa ka Cristiano, kag nagabulig kay Pablo. Nagsulat si Pablo kay Filemon: “Luyag ko kuntani nga hawiran sia para sa akon kaugalingon agod subong salili mo padayon sia nga mag-alagad sa akon sa mga higot sang bilangguan nga akon ginabatas bangod sa maayong balita. Apang kon wala sang imo pahanugot indi ko luyag maghimo sing bisan ano, agod nga ang imo maayo nga buhat mangin, indi sa pilit, kundi sa imo kaugalingon nga hilway nga kabubut-on.” (Filemon 13, 14) Ginpabalik ni Pablo si Onesimo, nagapangabay kay Filemon nga kabigon sia subong isa ka Cristianong utod. Nahibaluan ni Pablo nga indi iya ang panong; iya yadto sang Dios. Indi sia ang agalon sini kundi ang alagad sini. Wala gindiktahan ni Pablo si Filemon; gintahod niya ang iya hilway nga kabubut-on.
22. (a) Ano dapat ang mahangpan sang mga gulang tuhoy sa ila posisyon? (b) Ano nga sahi sang organisasyon ang ginapalambo ni Jehova?
22 Samtang nagadaku ang organisasyon sang Dios, dugang pa nga mga gulang ang ginatangdo. Dapat nila mahangpan, subong man sang mga gulang nga may kapin nga eksperiensia, nga ang ila posisyon isa ka mapainubuson nga pag-alagad. Sa sining paagi, samtang ginapahulag sang Dios ang iya organisasyon padulong sa bag-ong kalibutan, magapadayon ini sa pagtubo suno sa luyag niya—organisado sing maayo apang wala ginasakripisyo ang gugma kag pagkamainawaon sa baylo sang pagkasangkol. Sa amo, ang iya organisasyon dugang pa nga mangin makagalanyat sa tulad-karnero nga mga tawo nga makakita sa sini sing pamatuod nga “ginapahanabo sang Dios nga magbuligay sa isa kag isa ang tanan niya nga binuhatan para sa kaayuhan sang mga nagahigugma sa Dios.” Amo sina ang paabuton gikan sa isa ka organisasyon nga gintukod sa gugma, kay ang “ang gugma wala nagauntat.”—Roma 8:28; 1 Corinto 13:8.
Paano Mo Sabton?
◻ Paano ginalaragway sang Biblia ang pag-atipan ni Jehova sa iya katawhan?
◻ Ano ang papel ni Jesus sa pag-atipan sa panong sang Dios?
◻ Ano ang una nga kinaiya nga dapat huptan sang mga gulang?
◻ Ngaa dapat binagbinagon sang mga gulang ang hilway nga kabubut-on sang mga karnero?
[Piktyur sa pahina 16]
Si Jesus, ang “maayong manugbantay,” nagpakita sing kaawa
[Mga piktyur sa pahina 17]
Ang malaut nga relihiosong mga lider naghimbon sa pagpatay kay Jesus