Ginbanhaw ni Jesus si Lazaro

May tatlo ka suod nga abyan si Jesus sa Betania. Sila amo si Lazaro kag ang iya duha ka utod nga babayi nga si Maria kag si Marta. Isa ka adlaw, sang ara si Jesus sa tabok sang Jordan, may ginpadala si Maria kag si Marta sa iya nga importante nga mensahe: ‘Grabe ang masakit ni Lazaro. Palihug magkadto ka dayon sa amon!’ Pero wala dayon nagkadto si Jesus. Pagligad sang duha ka adlaw, nagsiling sia sa iya mga disipulo: ‘Makadto kita sa Betania. Nagatulog si Lazaro, kag pukawon ko sia.’ Ang mga apostoles nagsiling: ‘Kon nagatulog si Lazaro, maayo ina para mag-ayo sia.’ Gani gin-athag sa ila ni Jesus: “Patay na si Lazaro.”

Sang nag-abot si Jesus sa Betania, apat ka adlaw na nga nalubong si Lazaro. Madamo nga tawo ang nagkadto para paumpawan si Marta kag si Maria. Sang nabal-an ni Marta nga ara si Jesus, nagdalidali sia sugata sa iya. Si Marta nagsiling: “Ginuo, kon diri ka lang, wala kuntani mapatay ang akon utod.” Si Jesus nagsiling sa iya: ‘Ang imo utod mabuhi liwat. Nagapati ka bala sini, Marta?’ Nagsabat sia: ‘Nagapati ako nga mabuhi sia liwat sa tion sang pagkabanhaw.’ Nagsiling si Jesus sa iya: “Ako ang pagkabanhaw kag ang kabuhi.”

Dayon ginkadtuan ni Marta si Maria kag ginsugiran sia: ‘Ara si Jesus.’ Nagdalidali si Maria kadto kay Jesus kag nagsunod sa iya ang mga tawo. Naghapa sia kag indi mag-untat sa paghibi. Sia nagsiling: ‘Ginuo, kon diri ka lang, buhi kuntani ang amon utod.’ Nakita ni Jesus nga nasakitan gid si Maria, gani naghibi man sia. Sang nakita sang mga tawo ang iya luha, nagsiling sila: ‘Palangga gid ni Jesus si Lazaro.’ Pero ang iban nagahunahuna: ‘Ngaa wala niya gin-ayo ang iya amigo?’ Ano ang himuon ni Jesus?

Nagkadto si Jesus sa lulubngan nga natakpan sang daku nga bato. Nagsugo sia: ‘Paligira ninyo ang bato.’ Si Marta nagsiling: ‘Pero apat ka adlaw na! Mabaho na ang iya lawas.’ Pero ginpaligid gihapon nila ang bato, kag nangamuyo si Jesus: ‘Amay, salamat gid nga ginapamatian mo ako. Kabalo ko nga pirme ka nagapamati sa akon, pero nagahambal ako sing matunog para mahibaluan sini nga mga tawo nga ginpadala mo ako.’ Dayon nagsinggit sia sing matunog: “Lazaro, gua ka!” May makatilingala nga natabo: Naggua si Lazaro sa lulubngan nga nasamburan pa sang tela. Si Jesus nagsiling: “Hubari ninyo sia kag palakta.”

Madamo sa nakakita sini ang nagtuo kay Jesus. Pero ang iban nagkadto sa mga Fariseo para manugid. Sugod sadto, gusto na patyon sang mga Fariseo si Lazaro kag si Jesus. Ang isa sa 12 ka apostoles nga si Judas Iscariote sekreto nga nagkadto sa mga Fariseo kag namangkot: ‘Pila ang ibayad ninyo sa akon kon buligan ko kamo nga makita si Jesus?’ Nagsugtanay sila nga bayaran sia sing 30 ka bilog nga pilak, gani nangita na si Judas sing tsansa nga mahatag niya si Jesus sa mga Fariseo.