Walay Nadampigan nga mga Cristiano sa Namantsahan sing Dugo nga Kalibutan
“Ang bisan sin-o nga magpaagay sang dugo sang tawo, tungod sa tawo ang iya dugo paagayon, kay ang tawo ginhimo sang Dios sa iya dagway.”—GENESIS 9:6.
1. Ano nga mga hitabo sa kalibutan sugod sang 1914 ang naghatag sing kabangdanan sa pagkabalaka?
MGA dagat sang dugo, sang kapin sa isa ka gatos milyones ka tawo, ang ginpaagay sa inaway kutob sang 1914. Kag ano ang palaabuton? Ang paghapay sa duha ka siudad sang Hapon sang 1945 nagkutol sing mga 200,000 ka kabuhi kag sang ulihi nagdul-ong sa isa ka bag-o nga doktrina, nga gintigbato sang mga superpower kag nagakaigo nga gintawag “MAD” (Mutually Assured Destruction). Amo ini ang nangin sadsaran sang balanse sang kakugmat, nga napasad sa tinipon nga nuklear nga mga hinganiban nga sarang makalaglag sang aton duta sing madamo nga beses. Gindala sang mga submarino ining mapintas nga mga hinganiban sa mga oseano, kag labi nga nagdaku ang katalagman bangod sang peligro kasan-o lang nga mag-inaway sa kahawaan. Bisan ang balanse sang kakugmat ginauyog karon sa mga sadsaran sini. May yara bala dalan paguwa sa sining kabuangan?
2. Ano ang gintagna ni Jesus tuhoy sining mga tion, apang ano ang pasalig sa mga Cristiano?
2 Huo, may yara. Apang indi ang mga pungsod ang magapili sini. Si Jesus nagtagna tuhoy sa ila karon palaligban: “May mga tanda sa adlaw kag sa bulan kag sa mga bituon, kag sa duta kalisang sang mga pungsod, nga wala nakahibalo sang dalan paguwa bangod sang dinaguhob sang dagat kag sang mga balod, samtang ang mga tawo nagakapunaw sa kahadlok kag sa kalangkag sa magaabot sa napuy-an nga duta; kay ang mga kagamhanan sang mga langit uyugon.” Ginhinakpan ni Jesus ina nga tagna paagi sa pasalig nga ang mga Cristiano nga ‘nagabantay . . . mahimo nga magmadinalag-on sa paglikaw sining tanan nga butang nga mahanabo.’—Lucas 21:25, 26, 36.
Pagtinguha sa Pagpakighidait sa Dios
3. (a) Paano ang mga pungsod nagaalagad sa mga intereses sang “dios sining kalibutan”? (b) Paano ni Jehova husayon ang hulusayon?
3 Ang mga pungsod, labi na ang mga naarmasan sing nuklear nga mga hinganiban, nakandadohan sa isa ka paindisanay para sa paggahom sa kalibutan, nga makadul-ong sa kalaglagan sang kalibutan. Isa ini ka pagsakdag sa intereses sang “dios sining kalibutan.” Ang mga pungsod “naghilisapol sing tingob batok kay Jehova kag batok sa iya [Cristo],” nga karon nagalingkod sa trono sa langit. Kon ihatag na ni Jehova ang sugo, buungon ni Cristo ina nga mga pungsod sa bilugon nga salsalon. Nian matuman ang saad: “Ang Dios sang paghidait magadugmok sa madali kay Satanas sa idalom sang imo mga tiil.”—2 Corinto 4:4, King James Version; Salmo 2:2, 6-9; Roma 16:20.
4. Paano naton matinguhaan ang pagpakighidait sa Dios? (1 Pedro 3:11)
4 Kita, sa aton bahin, dapat magtinguha sa pagpakighidait sa sina nga Dios. Paano naton mahimo ina? Una, dapat naton handumon nga matigayon ang pagtamod sang Dios tuhoy sa pagkabalaan sang kabuhi sang tawo kag sang hamili nga dugo nga nagailig sa aton mga arterya kag mga ugat.
5. Anong mga halimbawa ang nagapakita nga ginatimalosan ni Jehova ang mapintas nga pagpaagay sing dugo?
5 Si Jehova amo ang Manunuga sang tawo kag sang makatilingala nga dugo nga nagadala sing pagkaon sa lawas sang tawo, sa amo nagahupot sa aton nga buhi. Wala gid pagtuyua sang Dios nga ang dugo sang tawo paagayon sing mapintas. Sa tapos mahimo ni Cain ang una nga pagpatay, nagsiling si Jehova nga ang dugo ni Abel nagasinggit agod itimalos. Sang ulihi, ang isa sang mga kaliwat ni Cain, si Lamec, nangin manugpatay kag naghambal sing mabinalaybayon nga kon sia mapatay, ini nga sala sa dugo dapat timalosan. Ang isa ka malaut nga kalibutan napuno sing kasingki. Nagpadala si Jehova sing anaw agod laglagon yadtong una nga kalibutan sang katawhan. Ang pamilya lamang sang mahidaiton nga si Noe ang naluwas, nga ang iya ngalan nagakahulugan sing “Pahuway.”—Genesis 4:8-12, 23, 24; 6:13; 7:1.
6. Ano ang sugo sang Dios tuhoy sa dugo, kag kay sin-o ini naaplikar?
6 Nian ginpahibalo sadto ni Jehova si Noe sang Iya kabubut-on tuhoy sa dugo. Ginhinakpan niya ini paagi sa pagsiling: “Ang bisan sin-o nga magpaagay sang dugo sang tawo, tungod sa tawo ang iya dugo paagayon, kay ang Dios naghimo sang tawo sa iya dagway.” (Genesis 9:3-6) Ang tanan nga katawhan karon mga kaliwat ni Noe; busa, ining balaan nga sugo nga nagapadaku sing pagtahod sa kabuhi naaplikar sa tanan nga tawo nga nagahandum sang kahamuot sang Dios. Ang ikan-um sang Napulo ka Sugo nagsiling man, “Dili ka magpatay.” Ang sala sa dugo nagakinahanglan sing takus nga aksion kag silot.—Exodo 20:13; 21:12; Deuteronomio 21:1-9; Hebreo 10:30.
7. (a) Ngaa nagakaigo nga suguon ni Jehova ang Israel sa pagkadto sa inaway? (b) Sa ano nga pagpakig-away nagapakigbahin karon ang mga Cristiano?
7 Sanglit ang pagpaagay sing dugo maathag nga gindumili, ngaa gintugutan ni Jehova kag ginsugo pa gani niya ang pungsod sang Israel nga magpakig-away? Dapat naton dumdumon nga isa ini ka balaan nga inaway nga paagi sa sini ginlaglag ni Jehova, nga Hukom sang bug-os nga duta, ang nagasimba sa demonyo nga mga pungsod. Ang mga Canaanhon, halimbawa, mga dumuluong sa Ginsaad nga Duta kag ang ila pagkabuhi demonyohanon kag imoral nga mahimo magabutang sa balaan nga katawhan sang Dios sa katalagman. Ginpahanabo ni Jehova nga ‘isuka’ sang duta yadtong manubo nga mga tawo gikan sa ila teritoryo, nga ginagamit ang teokratikong inaway sa paghimo sini. (Levitico 18:1-30; Deuteronomio 7:1-6, 24) Ginapakamatarong sini ang espirituwal nga pagpakig-away karon sang mga Cristiano.—2 Corinto 10:3-5; Efeso 6:11-18.
8. Ano ang nagapakita nga wala ginakahamut-an sang Dios ang pagpaagay sing wala sing sala nga dugo?
8 Apang, wala ginkahamut-an ni Jehova ang wala sing pili nga pagpaagay sing dugo. Sa amo, nasulat ini tuhoy sa hari sang Juda: “Labot pa si Manases nagpaagay sing madamo gid nga dugo nga wala sing sala, tubtob nga natugob niya ang Jerusalem kutob sa isa ka ukbong tubtob sa isa.” Bisan pa naghinulsol sang ulihi si Manases kag nagpaubos sang iya kaugalingon sa atubangan ni Jehova, yadto nga sala sa dugo nagpabilin sa iya kag sa iya dinastiya. Ang mahinadlukon sa Dios nga apo sa tuhod ni Manases, si Hari Josias, positibo nga naghikot sa pagtinlo sang duta kag sa pagpasag-uli sang matuod nga pagsimba. Apang wala niya mapanas yadto nga sala sa dugo. Sang paggahom sang anak ni Josias nga si Jehoiakim, ginpahulag ni Jehova si Nabokodonosor batok sa Juda, sa paghimo sing paghukom batok sa sadto nga pungsod. “Sa sugo lamang ni Jehova nga natabo ini batok sa Juda, sa pagkuha sini gikan sa iya itololok, tungod sa mga sala ni Manases, suno sa tanan nga ginhimo niya; kag subong man tungod sa dugo nga wala sing sala nga ginpaagay niya, kay gintugob niya ang Jerusalem sing dugo nga wala sing sala, kag si Jehova indi buot magpatawad.”—2 Hari 21:16; 24:1-4; 2 Cronica 33:10-13.
Ang Talaksan Para sa mga Cristiano
9. Ano nga talaksan ang ginpahamtang ni Jesus para sa mga Cristiano tuhoy sa pagpaagay sing dugo?
9 Dapat naton paabuton nga si Jesus, ang Tagtukod sang Cristianismo, magpasad sing talaksan para sa mga Cristiano tuhoy sa pagpaagay sing dugo. Ginhimo bala niya? Bueno, sa tapos niya ginpatok ang Memoryal sang iya kamatayon, ginpat-od ni Jesus nga ang iya mga disipulo magdala sing duha ka espada. Para sa anong katuyoan? Agod palig-unon ang isa ka importante nga prinsipio, nga dapat sundon sang tanan nga Cristiano. Sang mag-abot ang mga soldado agod dakpon si Jesus sa Getsemane, ang padasudaso nga si Pedro naggabot sing espada kag ginilangan niya ang tuo nga dulunggan ni Malco, isa ka ulipon sang Judiyong mataas nga saserdote. Indi bala yadto isa ka dungganon nga butang nga magpakig-away tungod sa Anak sang Dios? Indi subong sadto ang ginhunahuna ni Jesus. Gin-ayo niya ang dulunggan sang ulipon kag ginpahanumdom si Pedro nga ang Iya langitnon nga Amay sarang makapadala sing kapin sa napulog-duha ka legion nga mga anghel sa pagbulig kay Jesus. Ginpamulong sadto ni Jesus ang sadsaran nga prinsipio: “Ang tanan nga nagagamit sing espada sa espada mapatay.”—Mateo 26:51-53; Lucas 22:36, 38, 49-51; Juan 18:10, 11.
10. (a) Anong importante nga prinsipio ang ginpalig-on sa Juan 17:14, 16, kag 18:36? (b) Ano nga dalanon ang nagresulta sa kaluwasan sang unang-siglo nga mga Cristiano?
10 Ang mga Cristiano sang unang siglo nakadumdom sang hanuot nga ginpangamuyo ni Jesus kay Jehova, nga sa diin nagsiling sia tuhoy sa iya mga disipulo: “Sila indi bahin sang kalibutan, subong nga ako indi bahin sang kalibutan.” Nadumduman nila ang paathag nga sabat ni Jesus kay Poncio Pilato: “Ang akon ginharian indi bahin sining kalibutan. Kon ang akon ginharian bahin sining kalibutan, ang akon mga alagad makig-away kuntani, agod nga indi ako ikatugyan sa mga Judiyo. Apang, subong amo, ang akon ginharian indi gikan diri.” (Juan 17:14, 16; 18:36) Sadtong mga adlaw, ang nabahinbahin nga mga grupo sang mga Judiyo nagailinaway, paagi sa pulong kag paagi sa pagpaagay sing dugo. Apang ang mga disipulo ni Jesus wala magbuylog sa sadtong rebolusyonaryo nga mga kampanya. Sa mga 30 ka tuig naghulat sila sa Jerusalem. Nian gintuman nila ang matagnaon nga tanda ni Jesus nga “magpalagyo sa mga bukid.” Ang ila wala sing nadampigan nga tindog kag ang ila pagpalagyo nagresulta sa ila kaluwasan.—Mateo 24:15, 16.
11, 12. (a) Ano nga desisyon ang dapat ginhimo nanday Cornelio kag Sergio Paulo sang mangin mga tumuluo sila? (b) Sa diin sila makabaton sing bulig sa paghimo sing husto nga desisyon? (c) Ano ang ginapakita sini sa aton karon?
11 Ang iban mahimo mamangkot, ‘Kamusta si Cornelio, ang senturyon, kag si Sergio Paulo, ang ginsakdag sang hangaway nga proconsul sang Cipre? Indi bala may kaangtanan sa militar ini nga mga tawo?’ Huo, sang tion nga ginbaton nila ang Cristianong mensahe. Apang, wala ginasugid sa aton sang Kasulatan kon ano ang ginbuhat ni Cornelio kag sang iban pa sa tapos sila makombertir. Wala sing duhaduha nga si Sergio Paulo, nga isa ka maalam nga tawo kag “naurongan sa pagtolon-an ni Jehova” nag-usisa sa indi magdugay sang iya sekular nga kahimtangan sa kapawa sang iya bag-o masapwan nga pagtuo kag naghimo sing nagakaigo nga desisyon. Mahimo nga amo man ang ginhimo ni Cornelio. (Binuhatan 10:1, 2, 44-48; 13:7, 12) Wala sing rekord nga ginsugiran sila sang mga disipulo kon ano nga aksion ang dapat nila buhaton. Makita nila ini gikan sa ila pagtuon sang Pulong sang Dios.—Isaias 2:2-4; Miqueas 4:3.
12 Sing kaanggid, indi dapat pagtudloan sang mga Cristiano ang iban sing personal kon ano nga tindog ang dapat nila pilion sa mga hulusayon may kaangtanan sa Cristianong pagkawalay nadampigan. Ang kada isa dapat maghimo sang iya kaugalingon nga desisyon nahisuno sa iya paghangop sa mga prinsipio sang Biblia.—Galacia 6:4, 5.
Sa Modernong mga Tion
13. Ano ang natabo sa mga Estudyante sa Biblia sa pagtinguha nga maglikaw sa sala sa dugo sa tion sang Inaway Kalibutanon I?
13 Natabo ang bug-os nga inaway sa kalibutan sang 1914. Ang bug-os nga manggad sang mga pungsod, lakip ang gahom sang ila mga tinawo, gingamit sa inaway. Madamo nga Estudyante sang Biblia, subong amo ang pagtawag sadto sa mga Saksi ni Jehova, ang naghimo sing dalayawon nga mga panikasog agod malikawan ang sala sa dugo. Mabaskog sila nga ginhingabot, subong amo ang ginsiling ni Jesus.—Juan 15:17-20.
14, 15. (a) Paano si Jehova nag-aman sing gabayan sa tion sang Inaway Kalibutanon II? (b) Anong maathag nga tindog ang ginpili sadto sang mga Saksi ni Jehova? (c) Paano ini tuhay sa ginhimo sang kalibutanon nga mga relihionista?
14 Sang magdabdab liwat ang bug-os globo nga inaway sang 1939, si Jehova nag-aman sing maathag nga gabayan para sa iya mga alagad. Sa sulod sang duha ka bulan nga gindeklarar ang inaway, ini nga gabayan nag-abot sa porma sang materyal nga tolon-an tuhoy sa Biblia nga natig-ulohan “Neutrality” sa Nobiembre 1, 1939 nga guwa sang The Watchtower. Naghinakop ini paagi sa dinalan nga: “Ang tanan nga yara sa bahin sang Ginuo mangin walay nadampigan sa nagainaway nga mga pungsod, kag bug-os nga mangin para sa dakung TEOKRATA kag sa iya Hari.”
15 Ano ang nagresulta? Subong isa ka katilingban sang mag-ulutod sa bug-os nga kalibutan, ang mga Saksi ni Jehova naglikaw sa pagpaagay sing dugo sang wala sing sala nga mga tawo, lakip ang ila kauturan sa iban nga mga pungsod. Samtang ang mga Katoliko, mga Protestante, mga Budhista, kag ang iban pa nagpatyanay, ang matuod nga mga disipulo ni Jesus nagtuman sa iya bag-o nga sugo: “Subong nga ako naghigugma sa inyo, . . . maghigugmaanay man kamo.”—Juan 13:34.
16. (a) Paano ginpakita sang mga Saksi ni Jehova ang ila kaugalingon subong matarong nga mga banwahanon? (b) Paano ang mga Saksi nagpadayon sa pagbayad sa Dios sang mga butang sang Dios, kag kon kaisa ano ang nagresulta?
16 Ining mga Cristiano nagpadayon sa pagbayad kay Cesar sang mga butang nga iya ni Cesar. Gintuman nila ang kasugoan sang pungsod subong matarong nga mga banwahanon. (Mateo 22:17-21; Roma 13:1-7) Apang labi ka importante, ginbayad nila sa Dios ang mga butang nga iya, lakip ang ila dedikado nga kabuhi kag Cristianong pagsimba. Busa, sang ginpangayo ni Cesar ang mga butang sang Dios, naghikot sila nahisuno sa mga prinsipio nga nasambit sa Binuhatan 4:19 kag 5:29. Kon bala ang hulusayon amo ang pagpaagay sing dugo, pagpakigbahin sa militar nga wala nagadalahig sing aktuwal nga pagpakig-away, tal-us nga serbisyo, ukon pagsaludo sa isa ka laragway subong sang bandera sang pungsod, ang matutom nga mga Cristiano wala magkompromiso. Sa iban nga mga kaso ginpatay sila bangod sini nga tindog.—Mateo 24:9; Bugna 2:10.
Wala Sila Magkompromiso
17. (a) Suno sa isa ka libro, paano gintratar sang mga Nazi ang mga Saksi ni Jehova? (b) Sa pag-atubang sa hangkat, paano ang mga Saksi ni Jehova kon ipaanggid sa iban?
17 Ang isa ka bag-o nga libro nga natig-ulohan Of Gods and Men nagsiling nga sang Ikatlo nga Paggahom ni Hitler, ang mga Saksi ni Jehova amo ang relihioso nga grupo nga nag-antos “sing labing mabaskog nga pagpamatok.” Wala magkompromiso ang mga Saksi ni Jehova. Ang iban nga relihion sa Alemanya nagsunod sa ila militar nga mga kapelyan, kag sa amo naghatag sing relihioso nga serbisyo sa estado sang Alemanya kag nagbaton sing “pat-in” sang politikal nga sapat nga mapintas “sa ila tuo nga kamut ukon sa ila agtang.” (Bugna 13:16) Naghatag ini sila sing aktibo nga pagsakdag sang tuo nga kamut sa politikal nga sistema sang Alemanya kag ginpakita nila sing maathag ang ila tindog paagi sa pagtamyaw kay Hitler nga may pagkumpas sang kamut kag pagsaludo sa swastika nga bandera.
18. (a) Ano nga rekord ang nagapakita kon bala ang mga Saksi ni Jehova “‘wala sing nadampigan’ sa politika”? (b) Paano ining maragtason nga kasaysayan dapat mag-apektar sa aton sing indibiduwal karon?
18 Ano nga tindog ang ginpili sang matuod nga mga Cristiano didto? Ang ginsambit nga pagtuon nagsiling: “Ang mga Saksi ni Jehova lamang ang nagpamatok sa pagginahom. Nagpakig-away sila sing lakas kag subong resulta katunga sang ila kadamuon ang nabilanggo kag ikap-at nga bahin sa ila ang ginpatay. . . . Sila, tuhay sa [iban nga mga relihion], indi kalibutanon sa kahulugan nga wala nila gintinguhaan ang kahamuot ukon ang mga padya sang materyal nga kalibutan kag wala nila ginkabig ang ila kaugalingon subong mga katapo sini. Sila ‘wala sing nadampigan’ sa politika bangod lain ang ila kalibutan—ang iya sang Dios . . . Wala sila nagatinguha ukon nagatanyag sing pagkompromiso. . . . Ang pag-alagad sa armada, ang pagbotar, ukon ang pagsaludo kay Hitler nagkahulugan sing pagkilala sa mga pangangkon sining kalibutan subong labaw sa mga pangangkon sang Dios.” Ang pagtinguha sang mga Saksi ni Jehova sa paghidait kag wala sing kasingki ginkilala bisan sa sulod sang mga kampo konsentrasyon. Paano? Bangod “ang mga Saksi lamang ang gintugutan sa pagbarbas sa S.S. nga mga guardia nga ginagamit ang matalom nga mga labaha, kay sila lamang ang masaligan nga indi magpatay.”
19. Paano ginsunod sang mga Saksi ni Jehova ang maisugon nga huwaran ni Jesus, kag ano ang resulta?
19 Sa tion sang ikaduha nga inaway kalibutanon, ang mga Saksi ni Jehova nangin talalupangdon nga huwaran sang Cristianong pagkawalay nadampigan. Sa bug-os nga duta, maisugon nga ginsunod nila ang huwaran ni Jesus nga “indi bahin sang kalibutan”; gindaug nila ining nakasala sa dugo nga kalibutan subong sang ginhimo ni Cristo.—Juan 17:16; 16:33; 1 Juan 5:4.
Pagpangita sing Dalangpan Gikan sa Sala sa Dugo
20. (a) Ngaa hilingagawon nga magpalagyo gikan sa dimatuod nga relihion? (b) Sa diin lamang masapwan ang matuod nga dalangpan karon?
20 Ginpapula sang relihioso nga mga organisasyon ang mga pahina sang maragtas paagi sa pagpaagay sing wala sing sala nga dugo sa mga krusada, “balaan” nga mga inaway, kag mga inkisisyon. Nakigsugot sila sa uhaw sa dugo nga mga diktador. Nag-ugyon sila sang ginpanglupot sadtong mga diktador ang mga Saksi ni Jehova sa mga bilanggoan kag mga kampo konsentrasyon, nga sa diin madamo sa ila ang napatay. Ginsakdag nila ang mga führer (mga lider) nga nagpatay sa mga Saksi paagi sa pagluthang kag pagpugot sing ulo. Ining relihioso nga mga sistema indi makalikaw sa matarong nga paghukom ni Jehova. Indi ini magpalantang. Indi man dapat magpalantang ang bisan sin-o nga nagahigugma sa pagkamatarong sa pagguwa sa dimatuod nga relihion—ang namantsahan sing dugo nga “Babilonia nga Daku”—kag magpangita sing dalangpan sa organisasyon sang Dios.—Bugna 18:2, 4, 21, 24.
21. Ano ang ginlaragway sang kahimusan sang Dios tuhoy sa mga siudad nga dalangpan?
21 Madamo sa aton, sa wala pa magtuon sang Pulong sang Dios, ang mahimo nagpaagay sing dugo sang tawo ukon nangin mga katapo sang nakasala sa dugo nga relihioso ukon politikal nga mga organisasyon. Mahimo nga mapaanggid naton ini sa indi hungod nga nakapatay sa Israel anay. Makapalagyo sia sa isa sang anum ka siudad nga sa diin makasapo sia sing dalangpan kag, sa ulihi, makaguwa kon mapatay ang mataas nga saserdote sang Israel. Sa karon, nagakahulugan ina sing pagbaton kag pagpabilin sa idalom sang mga benepisyo sang aktibo nga pag-alagad sang Mataas nga Saserdote sang Dios, si Jesucristo. Paagi sa pagpabilin didto nga nagapakig-upod sa hinaplas nga katawhan sang Dios, mahimo nga maluwas kita kon ang modernong-adlaw nga “manugtimalos sa dugo,” si Cristo Jesus, maghikot sang paghukom sang Dios batok sa mga nakasala sa dugo. Ang “dakung kadam-an” nga nagapalagyo karon padulong sa organisasyon sang Dios dapat magpabilin sa sina nga dalangpan tubtob si Cristo, sa iya katungdanan subong Mataas nga Saserdote, ‘mapatay’ kon tuhoy sa pagtapos sang iya hilikuton sa pagtubos.—Numeros 35:6-8, 15, 22-25; 1 Corinto 15:22-26; Bugna 7:9, 14.
22. Tuhoy sa Isaias 2:4, paano ang mga pungsod tuhay gikan sa balaan nga pungsod sang Dios?
22 Sa pader sang plaza sang NU, sa Nueva York, E.U.A., mahimo nga mabasa ninyo ang masunod nga mga pulong nga ginpasad sa Isaias 2:4 (King James Version): “Ang ila mga espada salsalon nila nga mga punta sang arado. Kag ang ila mga bangkaw nga mga galab nga inughagbas: Ang pungsod indi magbayaw sing espada batok sa pungsod. Indi na sila magtuon sing inaway.” Apang sin-o ang nagasunod karon sining mga pulong? Wala sing isa sa mga katapo sang ginatawag nga Nasyones Unidas. Amo lamang ang nagatinguha sing paghidait nga bug-os globo nga “pungsod” sang tatlo ka milyon kag kapin pa nga mga saksi ni Jehova nga maathag nga nagpakita kon paano ang Cristianong pagkawalay nadampigan mahuptan sa isa ka namantsahan sing dugo nga kalibutan.
Repaso nga mga Pamangkot
◻ Paano naton matinguhaan ang pagpakighidait sa Dios?
◻ Paano ginatamod ni Jehova ang mapintas nga pagpaagay sing dugo?
◻ Ano ang kahulugan sang Cristianong pagkawalay nadampigan?
◻ Ano ang aton maayong mga huwaran sang integridad?
◻ Paano kita makakita sing dalangpan para sa kaluwasan?
[Kahon sa pahina 21]
Isa ka Rekord sang Pagtuo, Kaisog, kag Integridad
Ang libro nga New Religious Movements: A Perspective for Understanding Society nagahimo sing dugang pa nga mga komento tuhoy sa integridad sang mga Saksi ni Jehova sa pag-atubang sa paghingabot sang mga Nazi:
“Sa ila pagpangindi sa pagsunod, ang mga Saksi ni Jehova naghangkat sa totalitaryanhon nga ideya sang bag-o nga katilingban, kag ini nga hangkat, subong man ang pagpamilit sini nga magpadayon, nagtublag sa mga arkitekto sang bag-ong kahimusan. Sa dugang nga paghingabot sa mga Saksi, labi pa nga nagpresentar sila sing matuod nga hangkat sa ideolohiya. Ang ginakilala sadto nga mga paagi sang paghingabot, pagpaantos, pagbilanggo kag pagyubit wala magresulta sa pagkombertir sa bisan sin-o nga Saksi sa tindog sang mga Nazi kag sa kamatuoran nagbalandra sa mga nagsugyot sa ila. Nagsalasala ang mga Nazi bangod sining wala ginpaabot nga reaksion.”
“Sa ulot sining duha ka magkaribal nga grupo nga nagapangangkon sing katutom, ang inaway mabaskog gid, labi na bangod ang mas mabaskog sa pisikal nga mga Nazi sa madamo nga paagi indi sigurado, indi tanto nagakapanggamot sa kalig-on savg ila pagtuo, indi nakasigurado sang kaluwasan sang ila 1,000 ka tuig nga Paggahom. Ang mga Saksi wala magduhaduha sa ila mga gamot, kay ang ila pagtuo hayag sugod pa sang tion ni Abel. Samtang ang mga Nazi dapat magpugong sa pagpamatok kag magkombinse sa ila mga sumalakdag, sa masami nagapanghulam sang hambal kag laragway gikan sa sektaryanhon nga Cristianismo, ang mga Saksi sigurado sa bug-os kag indi mationg nga katutom sang ila mga katapo, bisan tubtob sa kamatayon.”
Mangin makalilipay gid nga adlaw kon ining pagdaug sang Cristianong katutom matapos. (Roma 8:35-39) Nian, sa idalom sang paggahom sang Ginharian sang “Prinsipe sang Paghidait,” ang ginhimaya nga si Jesucristo, “ang kabuganaan sang prinsipenhon nga paggahom kag wala sing katapusan ang paghidait.”—Isaias 9:6, 7.
[Kahon sa pahina 22]
Mga Pamatan-on nga Nagahupot sing Integridad
Ang masunod ginbalikwat gikan sa isa ka diary nga ginbalhag kasan-o lang sang isa ka manugpanilag sa isa ka pungsod sang Europa. Ginapakita sini kon paano ang pamatan-on nga mga Saksi maisugon nga nag-atubang sang hulusayon nga “indi bahin sang kalibutan.”—Juan 17:14.
‘1945, Marso 12: May kasaba sa idalom sang kasugoan marsial. Duha ka pamatan-on nga Jehovista ang akusado. Ang panumbungon: pagpangindi sa serbisyo militar (suno sa espiritu sang ila relihion). Ang mas lamharon, nga wala pa mag-20 anyos, ginpamatbatan sing 15 ka tuig sa bilanggoan. Apang, ang mas magulang, ginpamatbatan sing kamatayon, kag sa gilayon gindala sa iya natawhan nga banwa agod patyon didto sa atubangan sang publiko subong isa ka pangpahadlok nga halimbawa. Sia ang ika-14 nga biktima diri. Kabay nga magpahuway sia sa kalinong. Natandog gid ako sini nga kaso. Indi ikaw makahikot sa sina nga paagi batok sa mga Jehovista. Tuhoy sini nga pamatan-on, wala sila maghimo sing nagapaandam nga halimbawa kundi sing isa ka martir. Mapagros sia nga pamatan-on. Masubo gid ako bangod sa iya.
‘Pagkahapon, nabatian namon ang mga detalye sang pagpatay sa sining pamatan-on nga lalaki, nga natabo sa atubangan sang madamo nga tawo sa merkado. Ang isa sang soldado nga nagatindog sa kubay sang mga soldado nga magaluthang nagluthang sang iya kaugalingon bangod sang kahuya sa wala pa ang pagpatay. Ang kabangdanan sadto amo nga luyag sang koronel nga buligan niya ang tawo nga manugbitay. Apang nangindi sia. Sa baylo naghikog sia. Ang pamatan-on nga lalaki napatay bangod sang kaisog. Wala sia maghambal sing bisan isa ka pulong.’
Sa pagkabanhaw, daw ano ka malipayon ang subong sina nga mga pamatan-on nga nagpili nga maeksperiensiahan ang sudlot sang kamatayon sa baylo nga madula ang ila lugar sa bag-ong sistema sang mga butang ni Jehova!—Ipaanggid ang Oseas 13:14.
“Kabuangan sa Dag-on sang Megaton”
Si Ron Lowman, isa ka kolumnista sang The Sunday Star sang Canada, nagkomento sa polyeto nga gintawag World Military and Social Expenditures, nga ginsulat ni Leger Sivard. Gintig-ulohan niya ang iya artikulo sing “Ang mga Kamatuoran Tuhoy sa Kabuangan sa Dag-on sang Megaton.” Ang iban sini amo ang masunod:
◆ May isa ka soldado para sa kada 43 ka tawo sa kalibutan apang may isa lamang ka manugbulong para sa kada 1,030.
◆ Apat ka pilo ang napatay sa inaway sa sulod sang 40 ka tuig sa tapos sang Inaway Kalibutanon II sang sa sulod sang 40 ka tuig sa wala pa ini.
◆ Sa isa ka kalibutan nga nagagasto sing $800 bilyones kada tuig sa militar nga mga programa, isa sa kada tatlo ka adulto ang indi makabasa ukon makasulat, kag isa sa kada apat ang gutom.
◆ Sa pagpaandar sing aircraft carrier, $590,000 ang ginagasto kada adlaw, apang sa Aprika lamang, 14,000 ka kabataan ang nagakapatay kada adlaw bangod sa gutom ukon iban pa nga kabangdanan nga may kaangtanan sa sini.
◆ Ang indi gid makatarunganon amo ang 3 pa 4 ka trilyon dolyares (12 ka sero) nga gingasto sugod sang Inaway Kalibutanon II sa paghimo sing nuklear nga arsenal, nga, kon gamiton, magakahulugan sang paghikog sang tawo sa bug-os nga globo.