Mga Pangamuyo nga Pat-od Gid nga Pagasabton
MAY mga pangamuyo nga pat-od gid nga pagasabton. Ang pangunang mga punto sini ginlakip sa modelo nga ginhatag ni Jesucristo sa iya mga disipulo sang nagsiling sia: “Busa, pangamuyo kamo sing subong sini: ‘Amay namon nga yara sa langit, pakabalaanon ang imo ngalan. Magkari ang imo ginharian. Paghimuon ang imo kabubut-on, sa duta, subong man sa langit.’ ”—Mateo 6:9-13.
Ang mga tinaga sa modelo nga pangamuyo ni Jesus ginsulit sing minilyon ka beses. Bisan nga wala ginpaabot ni Cristo nga sauluhon lamang sang iya matutom nga mga sumulunod ina nga pangamuyo, ang ila mga pakiluoy nga nagapabutyag sing kaanggid nga mga balatyagon pat-od gid nga pagasabton. (Mateo 6:7, 8) Gani, ano ang buot silingon sang pagbindikar sa ngalan sang Dios? Ngaa ipangamuyo nga magkari ang iya Ginharian? Kag ngaa pangabayon nga pagahimuon ang kabubut-on sang Dios?
“Pakabalaanon ang Imo Ngalan”
Si Jehova, “ang Labing Mataas sa bug-os nga duta,” amo ang Isa nga ginpatuhuyan ni Jesus nga “Amay namon nga yara sa langit.” (Salmo 83:18) Ang Dios nangin ‘amay’ sa mga Israelinhon paagi sa paghilway sa ila gikan sa pagkaulipon sa Egipto kag paagi sa pagsulod sa isa ka kaangtanan sa katipan kaupod nila. (Deuteronomio 32:6, 18; Exodo 4:22; Isaias 63:16) Karon, ang hinaplas nga mga Cristiano nagatahod sing mahigugmaon kay Jehova subong ila Amay. (Roma 8:15) Kag ang ila mga kaupdanan, nga may dutan-on nga paglaum, nagapangamuyo man kay Jehova nga Dios subong ila Amay.—Juan 10:16; Bugna 7:1-9.
Apang ngaa ipangamuyo nga pakabalaanon ang ngalan sang Dios? Ti, kutob sang pagrebelde sang nahaunang tawhanon nga mag-asawa sa katamnan sang Eden, ang balaan nga ngalan ginpasipalahan. Bilang sabat sa sina nga pangamuyo, si Jehova magadula sang tanan nga pasipala nga ginhatag sa iya ngalan. (Salmo 135:13) Himuon niya ini paagi sa pagdula sang kalautan sa duta. Nahanungod sina nga tion, ang Dios nagsiling paagi kay manalagna Ezequiel: “Pakadakuon ko kag pakabalaanon ko kag ipakilala ko ang akon kaugalingon sa mga mata sang madamo nga mga pungsod; nian makilala nila nga ako amo si Jehova.”—Ezequiel 38:23.
Si Jehova nga Dios balaan kag matinlo. Busa ang iya ngalan dapat nga pakabalaanon, ukon kabigon subong balaan. Ipakita niya ang iya pagkabalaan paagi sa paghulag nga pakabalaanon ang iya kaugalingon sa atubangan sang tanan nga tinuga. (Ezequiel 36:23) Yadtong maluyag sang iya kahamuot kag sang dayon nga kabuhi dapat magatahod kay Jehova nga may kahayanghag kag magapakabalaan sang iya ngalan paagi sa pagkabig sini nga tuhay kag mas mataas sa iban. (Levitico 22:32; Isaias 8:13; 29:23) Sing nahisuno, si Jesus nagsugo sa iya mga sumulunod sa pagpangamuyo: “Pakabalaanon ang imo ngalan” ukon “kabigon nga sagrado; tratuhon subong balaan.” Makapat-od kita nga pagasabton sang Dios ini nga bahin sang modelo nga pangamuyo ni Jesus.
“Magkari ang Imo Ginharian”
Si Jesus nagsugo man sa iya mga sumulunod sa pagpangamuyo: “Magkari ang imo ginharian.” Ang mga pangamuyo para sa pagkari sang Ginharian sang Dios pat-od gid nga pagasabton. Ang Ginharian amo ang soberano nga pagginahom ni Jehova nga ginpabutyag paagi sa langitnon nga Mesianikong gobierno sa mga kamot sang iya Anak, si Jesucristo, kag sang kaupod nga “mga balaan.” (Daniel 7:13, 14, 18, 22, 27; Isaias 9:6, 7) Madugay na ginpamatud-an sang mga Saksi ni Jehova gikan sa Kasulatan nga si Jesus nagalingkod na subong langitnon nga Hari sang tuig 1914. Ngaa, nian, ang isa dapat magpangamuyo nga “magkari” ang Ginharian?
Ang pagpangamuyo para sa pagkari sang Ginharian aktuwal nga nagakahulugan sang pagpangabay nga magakari ini batok sa tanan nga nagapamatok sa balaan nga pagginahom sa duta. Sa dili madugay sa karon ‘ang ginharian [sang Dios] . . . magadugmok kag magapapas sining tanan nga [dutan-on nga] mga ginharian, kag ini magapadayon tubtob sa tion nga dinapat-od.’ (Daniel 2:44) Ining hitabo magaamot sa pagpakabalaan sa balaan nga ngalan ni Jehova.
“Paghimuon ang Imo Kabubut-on”
Si Jesus dugang nga nagsugo sa iya mga disipulo sa pagpangamuyo: “Paghimuon ang imo kabubut-on, sa duta, subong sang sa langit.” Isa ini ka pangabay nga si Jehova magapanghikot nahisuno sa iya kabubut-on para sa duta. Kaanggid ini sa ginsiling sang salmista: “Ang bisan ano nga nahamut-an ni Jehova ina nahimo niya sa langit kag sa duta, kag sa kadagatan kag sa tanan nga kadadalman. Sia nagapatub-ok sang mga usbong gikan sa mga ukbong sang duta; nga nagahimo sang mga kilat nga sa ulan; kag nagapaguwa sang hangin gikan sa iya mga bahandian, sia nagpatay sang mga panganay sang Egipto, gikan sa tawo kag sa sapat. Nagpadala sia sing mga tanda kag mga kalatingalahan sa tunga mo, O Egipto, kay Faraon kag sa tanan niyang alagad; nga naglaglag sing madamong pungsod kag nagpatay sing mga hari nga gamhanan.”—Salmo 135:6-10.
Ang pagpangamuyo nga paghimuon ang kabubut-on ni Jehova sa duta isa ka pangabay nga pagahimuon niya ang iya mga katuyuan sa sining globo. Nagalakip ini sang permanente nga pagdula sa mga nagapamatok sa iya, subong sang pagdula niya anay sa ila sa diutay nga kasangkaron sang unang panahon. (Salmo 83:9-18; Bugna 19:19-21) Ang mga pangamuyo nga paghimuon ang kabubut-on ni Jehova sa bug-os nga duta kag uniberso pat-od gid nga pagasabton.
Kon Magagahom ang Ginharian
Sa baylo sang kalautan nga lapnag karon sa tawhanon nga katilingban, ano ang mapaabot kon ang Ginharian sang Dios magagahom kag ang balaan nga kabubut-on paghimuon sa duta subong sa langit? Suno kay apostol Pedro, “nagahulat kita sing bag-ong mga langit kag bag-ong duta suno sa saad [sang Dios], diin nagapuyo ang pagkamatarong.” (2 Pedro 3:13) Ang “bag-ong mga langit” amo ang matarong nga espirituwal nga mga kagamhanan—si Jesucristo kag ang 144,000 ka masigkamanunubli sa langitnon nga Ginharian. (Roma 8:16, 17; Bugna 14:1-5; 20:4-6) Ang “bag-ong duta” indi isa pa ka dutan-on nga globo. Sa baylo, isa ini ka matarong nga katilingban sang mga tawo nga nagapuyo sa duta.—Ipaanggid ang Salmo 96:1.
Sa idalom sang pagginahom sang Ginharian, ang duta pagahimuon nga isa ka bug-os globo nga paraiso. (Lucas 23:43) Nian ang matuod nga paghidait kag kabuganaan pagaagumon sang tanan nga matinumanon nga katawhan. (Salmo 72:1-15; Bugna 21:1-5) Mangin kaupod ka sang malipayon nga kadam-an kon ikaw matutom nga sumalakdag sang Mesianikong pagginahom sa ibabaw sang matinumanon nga mga sakop sa duta. Ang mga sumalakdag sinang pagginahom hanuot nga nagapangamuyo para pakabalaanon ang ngalan ni Jehova, para magkari ang iya Ginharian, kag para paghimuon ang iya kabubut-on. Ang ila tinagipusuon nga mga pangamuyo pat-od gid nga pagasabton.