“Tudlui Kami kon Paano Mangamuyo”
“Ang isa sang iya mga disipulo nagsiling sa iya: ‘Ginuo, tudlui kami kon paano mangamuyo.’ ”—LUCAS 11:1.
1-3. (a) Ngaa ang mga disipulo ni Jesus nagakinahanglan sing instruksion sa pangamuyo? (b) Ano nga mga pamangkot nahanungod sa pangamuyo ang nagautwas?
ANG iban nga tawo may dulot nga maayong tingog sa pag-amba. Ang iban may kinaugali nga talento subong mga musikero. Apang agod malab-ot ang ila pinakamataas nga mahimo, bisan ining mga manug-amba kag mga instrumentalista nagakinahanglan sing instruksion. Kaanggid ini sa pangamuyo. Narealisar sang mga disipulo ni Jesucristo nga kinahanglan nila ang instruksion agod pamatian sang Dios ang ila mga pangamuyo.
2 Si Jesus masunson nga nagapangamuyo sa iya Amay sing pribado, subong sang ginhimo niya sa bilog nga gab-i antes ginpili ang 12 ka apostoles. (Lucas 6:12-16) Bisan pa ginlaygayan niya ang mga disipulo nga magpangamuyo sing pribado, nabatian nila sia nga nagapangamuyo sa publiko kag nakita nila sia nga indi kaangay sang relihioso nga mga salimpapaw nga nagapangamuyo agod makita sang tawo. (Mateo 6:5, 6) Sing lohiko, nian, luyag sang mga sumulunod ni Jesus ang iya abanse nga instruksion sa pangamuyo. Busa, aton mabasa: “Nagapangamuyo sia sa isa ka duog, kag sang nag-untat sia, ang isa sang iya mga disipulo nagsiling sa iya: ‘Ginuo, tudlui kami kon paano mangamuyo, subong nga si Juan [Bautista] nagtudlo sang iya mga disipulo.’ ”—Lucas 11:1.
3 Paano nagsabat si Jesus? Ano ang maton-an naton gikan sa iya halimbawa? Kag paano kita makabenepisyo gikan sa iya instruksion sa pangamuyo?
Mga Leksion Para sa Aton
4. Ngaa dapat kita “magpangamuyo sa walay langan,” kag ano ang buot silingon sang paghimo sini?
4 Madamo kita sing maton-an gikan sa pinamulong kag halimbawa ni Jesus subong isa ka tawo sang pangamuyo. Ang isa ka leksion amo nga kon ang himpit nga Anak sang Dios kinahanglan nga mangamuyo sing tayuyon, ang iya dihimpit nga mga disipulo may mas daku nga kinahanglan nga mangayo pirme sa Dios sing panuytoy, paumpaw, kag espirituwal nga pagkaon. Busa, dapat kita “magpangamuyo sa walay langan.” (1 Tesalonica 5:17) Sa pagkamatuod, wala ini nagakahulugan nga dapat kita pirme mangin literal nga nagaluhod. Sa baylo, dapat kita pirme nga may mapangamuyuon nga panimuot. Dapat kita mangayo sa Dios sing panuytoy sa tanan nga bahin sang kabuhi agod makapanghikot kita nga may paghangop kag pirme nga may kahamuot niya.—Hulubaton 15:24.
5. Ano ang mahimo nga makakuha sang tion nga dapat ginahinguyang naton sa pangamuyo, kag ano ang dapat naton himuon nahanungod sini?
5 Sa sining “katapusan nga mga adlaw,” madamong butang ang magakuha sang tion nga dapat naton ihinguyang sa pangamuyo. (2 Timoteo 3:1) Apang kon ang mga problema sa balay, mga alatipanon sa negosyo, kag iban pa nagatublag sa regular nga pangamuyo sa aton langitnon nga Amay, nabug-atan kita sing sobra sa mga kabalaka sa sining kabuhi. Ina nga kahimtangan dapat dayon tadlungon, kay ang kapaslawan sa pagpangamuyo nagadul-ong sa pagkawasi sing pagtuo. Mahimo nga buhinan naton ang aton sekular nga mga obligasyon ukon timbangan ang mga kabalaka sa kabuhi sing mas hanuot kag sulitsulit nga pagliso sang aton tagipusuon sa Dios para sa panuytoy. Dapat kita “magbut-anan sa mga pangamuyo.”—1 Pedro 4:7.
6. Ano nga pangamuyo ang ton-an naton karon, kag upod ang anong tulumuron?
6 Sa ginatawag nga modelo nga pangamuyo, gintudluan ni Jesus ang iya mga disipulo sa pagpangamuyo, indi sing kon ano ang isiling sing eksakto. Ang kasaysayan ni Lucas tuhay sa iya ni Mateo bangod lainlain nga okasyon ang nadalahig. Ton-an naton ini nga pangamuyo subong halimbawa sang kinaugali sang aton mga pangamuyo subong mga sumulunod ni Jesus kag mga Saksi ni Jehova.
Amay Namon kag ang Iya Ngalan
7. Sin-o ang may pribilehiyo sa pagtawag kay Jehova nga “Amay namon”?
7 “Amay namon nga yara sa langit.” (Mateo 6:9; Lucas 11:2) Bangod kay si Jehova amo ang Manunuga sang katawhan kag nagapuyo sa langitnon nga duog, nagakaigo nga patuhuyan sia subong “Amay namon nga yara sa langit.” (1 Hari 8:49; Binuhatan 17:24, 28) Ang paggamit sa termino nga “namon” nagakilala nga ang iban man may suod nga kaangtanan sa Dios. Apang sin-o ang may walay latid nga pribilehiyo sa pagtawag sa iya subong Amay nila? Ang dedikado kag bawtismado lamang nga mga indibiduwal sang iya panimalay sang mga sumilimba. Ang pagtawag kay Jehova nga “Amay namon” nagapakita nga kita nagatuo sa Dios kag nakahibalo nga ang lamang nga sadsaran para sa pagpasag-uli sa iya amo ang bug-os nga pagbaton sa halad gawad ni Jesus.—Hebreo 4:14-16; 11:6.
8. Ngaa dapat kita malangkag sa paghinguyang sing tion sa pagpangamuyo kay Jehova?
8 Suod gid dapat ang aton balatyagon sa aton langitnon nga Amay! Subong mga kabataan nga wala gid ginakapoy sa pagpalapit sa ila amay, dapat kita mahidlaw sa paghinguyang sing tion sa pagpangamuyo sa Dios. Ang tudok nga pagpasalamat sa iya espirituwal kag materyal nga mga pagpakamaayo dapat magpahulag sa aton nga pasalamatan sia tungod sa iya kaayo. Dapat kita magbatyag nga nahuyog sa pagtugyan sa iya sang mga lulan nga nagapabug-at sa aton, nagasalig nga sakdagon niya kita. (Salmo 55:22) Makapat-od kita nga kon kita magmatutom, ang tanan magamadinalag-on sa ulihi bangod nagaulikid sia sa aton.—1 Pedro 5:6, 7.
9. Ang pangamuyo para sa pagpakabalaan sa ngalan sang Dios isa ka pangabay para sa ano?
9 “Pakabalaanon ang imo ngalan.” (Mateo 6:9; Lucas 11:2) Ang tinaga nga “ngalan” kon kaisa nagapatuhoy sa tawo mismo, kag ang “pagpakabalaan” nagakahulugan sang “paghimo nga balaan, pagpain ukon pagkabig nga sagrado.” (Ipaanggid ang Bugna 3:4.) Sa katunayan, nian, ang pangamuyo para sa pagpakabalaan sa ngalan sang Dios isa ka pangabay nga si Jehova magapanghikot sa pagpakabalaan sang iya kaugalingon. Paano? Paagi sa pagdula sang tanan nga pasipala nga gintumpok sa iya ngalan. (Salmo 135:13) Bangod sina, dulaon sang Dios ang kalautan, padakuon ang iya kaugalingon, kag pahibaluon ang mga pungsod nga sia amo si Jehova. (Ezequiel 36:23; 38:23) Kon nalangkag kita nga makita ina nga adlaw kag ginaapresyar gid ang pagkahalangdon ni Jehova, pirme kita magapalapit sa iya sa masimbahon nga espiritu nga ginapakita sang mga tinaga nga “pakabalaanon ang imo ngalan.”
Ang Ginharian sang Dios kag ang Iya Kabubut-on
10. Ano ang kahulugan kon magpangamuyo kita nga magkari ang Ginharian sang Dios?
10 “Magkari ang imo ginharian.” (Mateo 6:10; Lucas 11:2) Ang Ginharian nga ginapatuhuyan diri amo ang soberano nga paggahom ni Jehova, subong nga ginapabutyag paagi sa langitnon nga Mesianikong pangulohan sa kamot ni Jesucristo kag sang iya kaupod nga “mga balaan.” (Daniel 7:13, 14, 18, 27; Isaias 9:6, 7; 11:1-5) Ano ang kahulugan sang pangamuyo nga ini “magkari”? Nagakahulugan ini nga ginapangabay naton nga ang Ginharian sang Dios magakari batok sa tanan nga mga nagapamatok sa balaan nga pagginahom sa duta. Sa tapos ‘madugmok [sang Ginharian] kag madula ang tanan nga mga ginharian sa duta,’ magahimo ini sa duta nga isa ka tugob-globo nga paraiso.—Daniel 2:44; Lucas 23:43.
11. Kon luyag naton makita nga ang kabubut-on ni Jehova pagahimuon sa bug-os nga uniberso, ano ang himuon naton?
11 “Paghimuon ang imo kabubut-on, sa duta, subong sang sa langit.” (Mateo 6:10) Isa ini ka pangabay nga tumanon sang Dios ang iya katuyuan sa duta, nga nagalakip sang pagdula sa iya mga kaaway. (Salmo 83:9-18; 135:6-10) Sa katunayan, nagakahulugan ini nga nahidlaw kita nga makita ang balaan nga kabubut-on nga pagahimuon sa bug-os nga uniberso. Kon yara ini sa aton tagipusuon, pirme naton himuon ang kabubut-on ni Jehova sa bug-os naton nga masarangan. Indi kita makahimo sina nga pangabay sing bunayag kon indi kita manikasog sing hanuot nga himuon ang kabubut-on sang Dios sa aton bahin. Nian, kon nagapangamuyo kita sa sining paagi, siguruhon naton nga wala kita nagahimo sing mga butang nga supak sa sina nga kabubut-on, subong sang pagpangaluyag sa isa nga ditumuluo ukon pag-adoptar sa kalibutanon nga mga paagi. (1 Corinto 7:39; 1 Juan 2:15-17) Sa baylo, dapat naton pirme dumdumon ang panghunahuna, ‘Ano bala ang kabubut-on ni Jehova sa sining bagay?’ Huo, kon ginahigugma naton ang Dios upod sa aton bug-os nga tagipusuon, pangitaon naton ang iya panuytoy sa tanan nga hilikuton sa kabuhi.—Mateo 22:37.
Aton Adlaw-adlaw nga Kalan-on
12. Ano ang epekto sa aton sang pagpangabay lamang sang ‘matag-adlaw nga kalan-on’?
12 “Hatagi kami karon nga adlaw sang amon kalan-on para sini nga adlaw.” (Mateo 6:11) Ang kasaysayan ni Lucas mabasa: “Hatagi kami sa adlaw-adlaw sang amon kalan-on sa inadlaw.” (Lucas 11:3) Ang pagpangabay sa Dios nga hatagan sing kinahanglanon nga kalan-on “para sa sini nga adlaw” nagapadaku sang pagtuo sa iya ikasarang sa pag-atipan para sa aton mga kinahanglan sa adlaw-adlaw. Ang mga Israelinhon kinahanglan nga magtipon sing mana “sa adlaw-adlaw sang bahin sa tagsa ka adlaw,” indi para sa isa ka semana ukon labi pa. (Exodo 16:4) Indi ini isa ka pangamuyo para sa manamit nga mga pagkaon kag sa sobra katama nga mga aman kundi para sa aton matag-adlaw nga mga kinahanglanon kon ini magautwas. Ang pagpangabay sa adlaw-adlaw nga kalan-on lamang nagabulig man sa aton nga indi mangin makagod.—1 Corinto 6:9, 10.
13. (a) Sa masangkad nga kahulugan, ano ang kahulugan sang pagpangabay para sa matag-adlaw nga kalan-on? (b) Ano dapat ang mangin panimuot naton, bisan pa nga kita nagapangabudlay sing lakas kag haluson nga may yara lamang?
13 Sa masangkad nga kahulugan, ang pagpangabay para sa adlaw-adlaw nga kalan-on nagakahulugan nga indi kita magbatyag nga hilway kundi padayon nga nagapangabay sa Dios sing kalan-on, ilimnon, panapton, kag iban pa nga mga kinahanglanon. Subong dedikado nga mga katapo sang iya panimalay sang mga sumilimba, kita nagasalig sa aton Amay apang wala nagapungko sing tinamad paagi sa paghulat nga sia magaaman para sa aton sing milagruso. Kita nagapangabudlay kag nagagamit sang bisan ano nga paagi nga magamit naton agod makatigayon sing kalan-on kag iban pa nga mga kinahanglanon. Apang, makatarunganon kita nga makapasalamat sa Dios sa pangamuyo bangod nakita naton sa likod sining mga aman ang gugma, kaalam kag gahom sang aton langitnon nga Amay. (Binuhatan 14:15-17; ipaanggid ang Lucas 22:19.) Ang aton kapisan mahimo nga magadul-ong sa kabuganaan. Apang bisan pa kon kita nagapangabudlay sing lakas kag haluson lang nga may yara, mangin mapasalamaton kag kontento kita. (Filipos 4:12; 1 Timoteo 6:6-8) Sa katunayan, ang diosnon nga tawo nga may kinaandan nga pagkaon kag panapton mahimo nga mas malipayon sang sa iban nga bugana sa materyal. Gani bisan pa diutay lamang ang aton bangod sang mga sirkunstansia nga indi naton kontrolado, indi kita magkasubo. Mangin manggaranon gihapon kita sa espirituwal. Sa pagkamatuod, indi kinahanglan nga mangin imol kita sa pagtuo, paglaum, kag gugma kay Jehova, nga sa iya ang aton pagdayaw kag pasalamat nagadangat sa tinagipusuon nga pangamuyo.
Pagpatawad sang mga Utang Namon
14. Tungod sa anong mga utang kita nagapangabay sing kapatawaran, kag ano ang ginaaplikar sang Dios sa sini?
14 “Kag patawara kami sang mga utang namon, subong nga ginpatawad man namon ang mga nakautang sa amon.” (Mateo 6:12) Ginapakita sang kasaysayan ni Lucas nga ina nga mga utang amo ang mga sala. (Lucas 11:4) Ang napanubli nga pagkamakasasala nagapugong sa aton gikan sa paghimo sang tanan nga butang suno sa himpit nga kabubut-on sang aton Amay. Busa, sa kahulugan, ining mga kakulangan amo ang aton mga utang, ukon mga obligasyon sa Dios, bangod nagsugod kita nga ‘nagakabuhi kag nagalakat sa espiritu.’ (Galacia 5:16-25; ipaanggid ang Roma 7:21-25.) Mga utang naton ini bangod kita dihimpit kag indi na karon bug-os nga makatuman sa talaksan sang Dios. Para sa kapatawaran sini nga mga sala nga kita may pribilehiyo sa pagpangamuyo. Sing makalilipay, ginaaplikar sang Dios ang merito sang halad gawad ni Jesus sa sining mga utang, ukon mga sala.—Roma 5:8; 6:23.
15. Ano dapat ang aton panimuot sa kinahanglanon nga disiplina?
15 Kon ginapaabot naton nga patawaron sang Dios ang aton mga utang, ukon mga sala, dapat kita mangin mahinulsulon kag handa sa pagbaton sing disiplina. (Hulubaton 28:13; Binuhatan 3:19) Bangod ginahigugma kita ni Jehova, ginahatagan niya kita sing disiplina nga kinahanglan naton sing personal agod matadlong naton ang aton mga kaluyahon. (Hulubaton 6:23; Hebreo 12:4-6) Sa pagkamatuod, mangin malipayon kita kon ang pagtubo sa pagtuo kag ihibalo nagapahisuno sing bug-os sang aton tagipusuon sa mga kasuguan kag mga prinsipio sang Dios agod indi gid kita makalapas sing hungod. Apang kamusta kon nahantop naton ang pagkahungod sa aton sala? Nian dapat gid kita magkasubo sing daku kag dapat mangamuyo sing hanuot para sa kapatawaran. (Hebreo 10:26-31) Nagaaplikar sang laygay nga aton nabaton, dapat naton gilayon tadlungon ang aton dalanon.
16. Ngaa mapuslanon nga pirme pangabayon sa Dios nga patawaron ang aton mga sala?
16 Ang tayuyon nga pagpangabay sa Dios nga patawaron ang aton mga sala mapuslanon. Ang paghimu sini nagapahanumdom pirme sa aton sang aton pagkamakasasala kag dapat nga may nagapaubos nga epekto. (Salmo 51:3, 4, 7) Aton ginakinahanglan nga ang aton langitnon nga Amay “magapatawad sang aton mga sala kag . . . magatinlo sa aton sa tanan nga pagkadimatarong.” (Juan 1:8, 9) Dugang pa, ang pagsambit sang aton mga sala sa pangamuyo nagabulig sa aton nga padayon nga awayon ini sing lakas. Busa padayon man kita nga ginapahanumdom sang pagkinahanglan naton sing gawad kag sang merito sang ginpatulo nga dugo ni Jesus.—1 Juan 2:1, 2; Bugna 7:9, 14.
17. Paano ang pagpangamuyo para sa kapatawaran nagabulig sa aton sa aton kaangtanan sa iban?
17 Ang pagpangamuyo para sa kapatawaran nagabulig man sa aton nga mangin maluluy-on, maawaon, kag maalwan sa mga nakautang sa aton, daku man ukon diutay. Ang kasaysayan ni Lucas nagasiling: “Patawara kami sa mga sala namon, kay nagapatawad man kami sa tagsatagsa nga nakautang sa amon.” (Lucas 11:4) Sa katunayan, mahimo naton matigayon ang kapatawaran gikan sa Dios lamang kon aton na ‘ginpatawad ang mga nakautang sa aton,’ mga tawo nga nakasala sa aton. (Mateo 6:12; Marcos 11:25) Si Jesus nagdugang: “Kon patawaron ninyo ang mga tawo sang ila paglapas, ang inyo langitnon nga Amay magapatawad man sa inyo; apang kon indi ninyo pagpatawaron ang mga tawo sang ila mga paglapas, indi man ang inyo Amay magpatawad sang inyo mga paglapas.” (Mateo 6:14, 15) Ang pagpangamuyo para sa kapatawaran sang aton mga sala dapat magpahulag sa aton nga batason ang iban kag patawaron sila. Si apostol Pablo nagsulat: “Subong nga si Jehova nagpatawad sa inyo, amo man ang himuon ninyo.”—Colosas 3:13; Efeso 4:32.
Sa Panulay kag sa Malaut
18. Ngaa indi gid naton pagbasulon ang Dios tungod sa mga pagsulay kag mga pagtilaw sa aton?
18 “Kag dili kami pagdalha sa panulay.” (Mateo 6:13; Lucas 11:4) Ining mga pulong wala nagapakita nga si Jehova nagasulay sa aton sa paghimo sing sala. Kon kaisa ang Kasulatan nagapamulong nahanungod sa paghimo ukon pagpahanabo sang Dios sang mga butang nga ginatugot lamang niya. (Rut 1:20, 21; ipaanggid ang Manugwali 11:5.) Apang “ang Dios indi masulay sang malaut kag sia gid wala nagasulay sa bisan kay sin-o nga tawo,” sulat ni disipulo Santiago. (Santiago 1:13) Busa, indi gid naton pagbasulon ang aton langitnon nga Amay bangod sang mga pagsulay kag mga pagtilaw nga malaut, kay si Satanas amo ang Manunulay nga nagatinguha sa pagmaniobra sa aton nga magpakasala batok sa Dios.—Mateo 4:3; 1 Tesalonica 3:5.
19. Paano kita mahimo nga magapangamuyo nahanungod sa pagsulay?
19 Paagi sa pangabay, “Dili kami pagdalha sa panulay,” sa katunayan aton ginapangabay kay Jehova nga indi kita pagtugutan nga madala kon ginsulay ukon gin-ipit sa paglapas sa iya. Sarang kita makapakiluoy sa aton Amay nga tuytuyan ang aton mga tikang agod wala sing pagsulay nga magalutaw sa aton banas nga grabe gid para sa aton. Nahanungod sini, si Pablo nagsulat: “Walay pagsulay nga nakaabot sa inyo nga indi masarangan sang tawo. Ang Dios matutom, kag indi magtugot nga sulayon kamo labaw sa inyo masarangan, kundi kaupod sang pagsulay magahatag man sing lulutsan agod nga makasarang kamo sa pagbatas.” (1 Corinto 10:13) Makapangamuyo kita nga tuytuyan kita ni Jehova agod indi masulay labaw sa aton masarangan kag nga sia magaaman sing paagi nga makalikaw kon ginasubuan katama. Ang mga pagsulay nagahalin sa Yawa, sa aton makasasala nga unod, kag sa mga kaluyahon sang iban, apang ang aton mahigugmaon nga Amay magatuytoy sa aton agod indi kita masulay.
20. Ngaa mangamuyo sing kaluwasan gikan sa “malaut”?
20 “Kundi luwasa kami sa malaut.” (Mateo 6:13) Pat-od gid nga sarang mapunggan sang Dios si Satanas, ang “malaut,” gikan sa pagdaug sa aton. (2 Pedro 2:9) Kag karon mismo nga kinahanglan naton sing labi ang kahilwayan gikan sa Yawa, kay ‘sia may dakung kasingkal, nakahibalo nga sia may malip-ot nga tion.’ (Bugna 12:12) Indi kita ignorante sa mga padugi ni Satanas, apang nahibaluan niya ang aton mga kaluyahon. Gani, kinahanglan kita mangamuyo kay Jehova nga ipahilayo kita sa kamot sang kaangay sang leon nga Kaaway. (2 Corinto 2:11; 1 Pedro 5:8, 9; ipaanggid ang Salmo 141:8, 9.) Halimbawa, kon interesado kita magminyo, mahimo nga kinahanglan nga kita mangabay kay Jehova nga luwason kita gikan sa mga padugi ni Satanas kag gikan sa pagsulay nga mapalambo ang kalibutanon nga mga kaangtanan nga magadul-ong sa imoralidad ukon sa paglapas sa Dios paagi sa pagminyo sa ditumuluo. (Deuteronomio 7:3, 4; 1 Corinto 7:39) Luyag bala naton ang manggad? Nian mahimo nga kinahanglan ang pangamuyo agod buligan kita nga mabatuan ang pagsulay nga magsugal ukon magdaya. Nalangkag sa pagguba sang aton kaangtanan kay Jehova, si Satanas magagamit sing bisan ano nga hinganiban sa iya talagoan sang mga pagsulay. Gani kabay nga kita padayon nga magapangamuyo sa aton langitnon nga Amay, nga wala gid nagabiya sa matarong sa pagsulay kag nga nagaaman sing kaluwasan gikan sa malaut.
Ang Pangamuyo Nagapalig-on sang Pagtuo kag Paglaum
21. Paano kita makabenepisyo gikan sa pagpangamuyo para sa Ginharian?
21 Ang aton langitnon nga Amay, nga nagaluwas sa aton gikan sa malaut, nagakalipay sa pagpakamaayo sa aton sing bugana. Apang, ngaa gintugutan niya sa malawig nga tion nga ang iya palangga nga katawhan mangamuyo, “Pakaria ang imo ginharian”? Ti, sa sulod sang mga tinuig, ang pagpangamuyo sa sining paagi nagpauswag sang aton handum kag apresasyon para sa Ginharian. Ina nga pangamuyo nagapahanumdom sa aton sang daku nga pagkinahanglan para sa sining maluluy-on nga pangulohan sa langit. Ginabutang man sini sa atubangan naton ang paglaum nga kabuhi sa idalom sang paggahom sang Ginharian.—Bugna 21:1-5.
22. Ano dapat ang aton padayon nga panimuot nahanungod sa pagpangamuyo sa aton langitnon nga Amay, nga si Jehova?
22 Sa walay duhaduha ang pangamuyo nagapalig-on sing pagtuo kay Jehova. Ang aton pagkasuod sa iya ginapabakud kon ginasabat niya ang aton mga pangamuyo. Busa, indi gid kita maglapyo sa pagkadto sa iya sa adlaw-adlaw upod ang pagdayaw, pasalamat, kag pakiluoy. Kag kabay nga mangin mapasalamaton kita sa mabuligon nga sabat ni Jesus sa pangabay sang iya mga sumulunod: “Ginuo, tudlui kami kon paano mangamuyo.”
Nadumduman Mo Bala?
◻ Anong mga leksion ang maton-an naton gikan sa pinamulong kag halimbawa ni Jesus subong isa ka tawo sang pangamuyo?
◻ Tungod sa ano kita dapat mangamuyo nahanungod sa aton langitnon nga Amay kag sa iya ngalan?
◻ Ano ang aton ginapangabay kon ginapangamuyo naton nga magkari ang Ginharian sang Dios kag pagahimuon ang iya kabubut-on sa duta?
◻ Ano ang aton ginapangayo kon nagapangamuyo para sa aton adlaw-adlaw nga kalan-on?
◻ Ano ang kahulugan sang aton pagpangamuyo para sa kapatawaran sang aton mga utang?
◻ Ngaa importante ang mangamuyo nahanungod sa pagsulay kag kaluwasan gikan kay Satanas, nga malaut?
[Piktyur sa pahina 16]
Ang mga sumulunod ni Jesus nangabay sa iya nga tudluan sila sa pagpangamuyo. Nakahibalo ka bala kon paano kita makabenepisyo gikan sa iya mga instruksion sa pangamuyo?