Paano Mangamuyo? Ang Amay Namon Bala Amo ang Pinakamaayo nga Pangamuyo?
Ang sabat sang Biblia
Ang Pangamuyo sang Ginuo nagahatag sa aton sang giya kon paano kita mangamuyo kag kon ano ang aton ipangamuyo. Gintudlo ini ni Jesus sang nangabay ang iya mga disipulo: “Ginuo, tudlui kami magpangamuyo.” (Lucas 11:1) Pero indi lang ang Pangamuyo sang Ginuo, ukon ang pangamuyo nga Amay Namon ang ginabaton sang Dios.a Sa baylo, gintudlo ini ni Jesus bilang halimbawa kon ano nga pangamuyo ang ginapamatian sang Dios.
Sa sini nga artikulo
Ano ang ginasiling sang pangamuyo nga Amay Namon?
Ang pangamuyo nga Amay Namon, mabasa sa Mateo 6:9-13. Pero indi pareho ang ginasiling sini sa sarisari nga mga translation sang Biblia. Ari ang duha ka halimbawa.
Bag-ong Kalibutan nga Badbad: “Amay namon nga yara sa langit, pakabalaanon ang imo ngalan. Magkari ang imo Ginharian. Matuman ang imo kabubut-on sa duta subong sang sa langit. Hatagi kami sang amon pagkaon para sa sini nga adlaw; kag patawara kami sang amon mga sala, subong nga ginapatawad man namon ang mga nakasala sa amon. Buligi kami agod indi kami madaug sang pagsulay, kag luwasa kami sa isa nga malauton.”
Ang Biblia sang Philippine Bible Society: “Amay namon nga yara sa langit, pakabalaanon ang imo ngalan. Magkari ang imo ginharian, paghimoon ang imo kabubut-on, sa duta subong sang sa langit. Hatagi kami karon nga adlaw sang amon kalan-on sa adlaw-adlaw; kag patawara kami sang mga utang namon, subong nga ginpatawad man namon ang mga nakautang sa amon; kag dili kami pagdalha sa panulay, kundi luwasa kami sa malaut.”b
Ano ang buot silingon sang pangamuyo nga Amay Namon?
Ang mga gintudlo ni Jesus nagaugyon sa iban pa nga mga bahin sang Biblia. Gani, sigurado kita nga mapaathag sang iban nga mga teksto ang buot silingon sang Amay Namon.
“Amay namon nga yara sa langit”
Bagay gid nga tawgon ang Dios nga “Amay namon” kay sia ang nagtuga kag naghatag sang kabuhi sa aton.—Isaias 64:8.
“Pakabalaanon ang imo ngalan”
Ang ngalan sang Dios nga si Jehova, dapat padunggan kag kabigon nga balaan, ukon sagrado. Makabulig ang mga tawo sa pagpakabalaan sang ngalan sang Dios kon ginasugid nila sa iban ang parte sa iya kinaiya kag mga katuyuan.—Salmo 83:18; Isaias 6:3.
“Magkari ang imo Ginharian”
Ang Ginharian sang Dios isa ka gobierno sa langit kag si Jesus ang Hari sini. Gintudluan kita ni Jesus nga ipangamuyo nga ini nga gobierno magagahom sa bilog nga duta.—Daniel 2:44; Bugna 11:15.
“Matuman ang imo kabubut-on sa duta subong sang sa langit”
Wala sing malain ukon kamatayon sa langit. Gani kabubut-on man sang Dios nga ang mga tawo mabuhi sing wala katapusan sa duta nga may paghidait kag seguridad.—Salmo 37:11, 29.
“Hatagi kami sang amon pagkaon para sa sini nga adlaw”
Dapat naton dumdumon nga ang aton Manunuga ang nagahatag sang aton pagkaon kag sang iban pa naton nga kinahanglanon para mabuhi kita.—Binuhatan 17:24, 25.
“Patawara kami sang amon mga sala, subong nga ginapatawad man namon ang mga nakasala sa amon”
Ang tanan nga tawo may sala gani kinahanglan ang kapatawaran. Pero kon gusto naton nga patawaron kita sang Dios dapat patawaron man naton ang mga nakasala sa aton.—Mateo 6:14, 15.
“Buligi kami agod indi kami madaug sang pagsulay, kag luwasa kami sa isa nga malauton”
Si Jehova nga Dios wala nagasulay sa aton para maghimo sing malain. (Santiago 1:13) Pero ginasulay kita sang “isa nga malauton,” nga amo si Satanas nga Yawa kag ginatawag man nga “Panulay.” (1 Juan 5:19; Mateo 4:1-4) Ginapangabay naton si Jehova nga buligan kita nga magtuman pirme sa iya kag indi magpadaug kon ginasulay kita nga maghimo sing malain.
Ang pagsaulo bala sang pangamuyo nga Amay Namon amo lang ang paagi sa pagpangamuyo?
Gintudlo ni Jesus ang pangamuyo nga Amay Namon bilang halimbawa. Indi ini dapat pagsauluhon para sulitsuliton. Antes gintudlo ni Jesus ang pangamuyo nga Amay Namon nagpaandam sia: “Kon magpangamuyo kamo, indi ninyo pagsulitsulita ang inyo ginasiling.” (Mateo 6:7) Gani sang nagtudlo si Jesus kon paano mangamuyo sa iban nga okasyon, lain naman nga mga tinaga ang iya nga gingamit.—Lucas 11:2-4.
Ang pinakamanami nga paagi sa pagpangamuyo amo ang sinsero nga pangamuyo nga nagasugid sa Dios sang kon ano gid ang aton ginabatyag kag ginahunahuna.—Salmo 62:8.
Paano kita dapat mangamuyo?
Ang pangamuyo nga Amay Namon isa ka maayo nga halimbawa nga nagatudlo kon ano nga paagi sang pangamuyo ang ginapamatian sang Dios. Talupangda kon paano ini nagasanto sa iban pa nga mga teksto sa Biblia parte sa pangamuyo.
Sa Dios lang mangamuyo
Teksto: “Sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay.”—Filipos 4:6.
Buot silingon: Dapat kita mangamuyo sa Dios, indi kay Jesus, kay Maria, ukon sa mga santos. Ang mga tinaga nga “Amay namon,” sa umpisa sang pangamuyo nga Amay Namon nagatudlo sa aton nga dapat sa kay Jehova nga Dios lang kita mangamuyo.
Ipangamuyo ang mga butang nga suno sa kabubut-on sang Dios
Teksto: “Bisan ano ang ipangamuyo naton suno sa iya kabubut-on, magapamati sia sa aton.”—1 Juan 5:14.
Buot silingon: Makapangamuyo kita sang bisan ano basta suno ini sa kabubut-on sang Dios. Gintudluan kita ni Jesus nga importante gid ang kabubut-on sang Dios kay ginlakip gid niya sa pangamuyo nga Amay Namon ang mga tinaga nga “matuman ang imo kabubut-on.” Kon magtuon kita sang Biblia mabal-an naton ang kabubut-on sang Dios para sa duta kag para sa mga tawo.
Ipangamuyo ang personal nga mga kinahanglanon
Teksto: “Itugyan ang imo lulan kay Jehova, kag sia magaalay-ay sa imo.”—Salmo 55:22.
Buot silingon: Nabal-an gid sang Dios ang aton mga kinahanglanon. Ginpangabay ni Jesus ang pila ka personal nga mga kinahanglanon sa pangamuyo nga Amay Namon. Gani sa aton pangamuyo puede man kita makapangabay sang parte sa aton adlaw-adlaw nga mga kinahanglanon, sang giya kon nagahimo kita sang importante nga mga desisyon, sang bulig kon may mga problema kita, kag sang pagpatawad sa aton mga sala.c
a Halimbawa, sa pila ka pangamuyo ni Jesus kag sang iya mga disipulo wala nila gingamit ang mga tinaga halin sa pangamuyo nga Amay Namon.—Lucas 23:34; Filipos 1:9.
b Ang katapusan sang pangamuyo nga Amay Namon sa Ang Biblia sang Philippine Bible Society, nagasiling: “Kay imo ang ginharian kag ang kagamhan kag ang himaya, sa walay katubtuban. Kabay pa.” Ini nga mga tinaga nga nagadayaw sa Dios, nga mabasa man sa iban pa nga translation sang Biblia ginatawag nga doxology. Pero, ang The Jerome Biblical Commentary nagasiling: “Ang doxology . . . indi makita sa pinakamasaligan nga [mga manuskrito].”
c Ang iban nga nakahibalo nga kinahanglan nila ang pagpatawad sang Dios mahimo nagabatyag nga indi pagpamatian sang Dios ang ila nga pangamuyo kay may sala sila. Pero ginaagda sila ni Jehova: “Maghambalanay kita kag buligan ko kamo nga tadlungon ang inyo kaangtanan sa akon.” (Isaias 1:18) Batunon gid niya ang bisan sin-o nga sinsero nga nagapangayo sing kapatawaran sa iya.