Gin-atipan Ako sing Maayo ni Jehova

NAGSUGOD ako sa pag-alagad kay Jehova sa dikinaandan nga paagi, sa pagsiling sing kubos. Nagdaku ako sa isa ka matahom nga uma sa malayo nga aminhan sang New Zealand, nga ginaistaran labi na sang Maori nga katawhan kaangay ko. Samtang nagalakbay sakay sang kabayo sang isa ka adlaw, ginpalapitan ako sa dalan sang akon pakaisa nga si Ben. Sadtong 1942 ini, sang tigragas (Nabagatnan nga Hemisperyo, tigpamulak sa Naaminhan nga Hemisperyo). Beinte-siete ako sadto kag isa ka aktibo nga katapo sang Simbahan sang Inglaterra.

Madamong tinuig na nga ginabasa ni Ben ang mga libro ni Huwes Rutherford, presidente anay sang Watch Tower Bible and Tract Society, kag karon may ginauyatan sia nga isa ka sulat halin sa pangunang talatapan sang Watch Tower Society sa New Zealand nga nagapangabay sa iya nga agdahon ang lokal nga mga tawo sa isa ka lugar diin magasaulog sila sing tingob sang Panihapon sang Ginuo. Dugang pa, si Ben amo ang magapangita sang isa nga magadumala sa serbisyo. Nagatangla sa akon, si Ben nagsiling: “Ikaw ina sia.” Nalipay tamdon nga sangkol—kag isa nga nagapakigbahin sa komunyon sa simbahan—nagpasugot ako.

Sadtong gab-i sang Panihapon sang Ginuo, mga 40 ka tawo ang nagtipon sa puluy-an ni Ben para sa pagsaulog sang kamatayon sang aton Ginuo, kag wala sing isa sa ila ang Saksi ni Jehova. Pag-abot ko gindaho sa akon sang akon pakaisa ang balayan sang pamulongpulong. Ginlaktawan ko ang ginpanugda nga ambahanon kag gintawag ang bayaw ni Ben sa pagbukas paagi sa pangamuyo. Nian ginpamulongpulong ko ang ginbalay nga materyal, nga nagalakip sang serye sang mga pamangkot upod ang mga sabat pasad sa Kasulatan. Ang isa ka lokal nga klerigo nga nagtambong nagsaligbat paagi sa mga pamatok, apang ginsabat ini paagi sa pagbasa sa mga reperensya sang Kasulatan sa balayan.

Madumduman ko nga ang isa sang mga pamangkot sa balayan amo ang may kaangtanan sa tion sang tuig nga ang okasyon ginasaulog. Makalilipay gid sang ang tanan nga nagtambong naggawa sa bintana kag nakita ang bulan nga ugsad. Sing maathag, ang petsa amo ang Nisan 14.

Daw ano gid ka importante yadto nga gab-i! Ang amon selebrasyon naglawig sing apat ka oras! Madamong pamangkot ang ginpautwas kag ginsabat gikan sa mga Kasulatan sa balayan sang Sosiedad. Nagadumdom sang nagligad, nakahibalo ako nga indi ko malampuwasan ang eksperiensia kon wala ang mahigugmaon nga pag-atipan ni Jehova—bisan pa nga sadto nga tion indi ako isa sang iya dedikado nga mga Saksi. Walay sapayan, sadto nga gab-i sang Memoryal sang 1942, natukiban ko ang akon katuyuan sa kabuhi.

Maaga nga Kabuhi

Natawo ako sang 1914. Ang akon amay napatay apat ka bulan antes ako natawo, kag madumduman ko nga sang bata pa ako nahisa ako sa iban nga mga kabataan nga may mga amay nga nagahigugma sa ila. Nahidlaw gid ako sina. Para sa akon iloy ang pangabuhi nga wala sing bana isa ka mabudlay nga paghimakas, nga ginpabudlay pa gid sang malawig nga mga epekto sang Inaway Kalibutanon I.

Subong isa ka pamatan-on, ginpangasawa ko si Agnes Cope, kag sia ang akon kaupod sa kabuhi sa sobra sa 58 ka tuig. Sang primero naghimakas kami agod magmadinalag-on sa kabuhi. Napaslawan ako subong isa ka mangunguma bangod sang grabe nga tigpalamangag. Nakakita ako sing paumpaw sa mga hampang, apang tubtob sadtong 1942 nga Memoryal nga eksperiensia, wala ako sing tunay nga katuyuan sa kabuhi.

Pagpanaksi sa mga Paryente

Pagkatapos sadto nga Memoryal, gintun-an ko ang Biblia sing hanuot, nagasugilanon sa akon iban nga mga pakaisa sang literatura sa Biblia nga ginbalhag sang Watch Tow­er So­cie­ty. Sang Septiembre 1943 ang iban nga mga Saksi ni Jehova gikan sa iban nga lugar nagkari sa pagduaw sang amon nabaw-ing nga komunidad. May yara kami isa ka serioso, apat-ka-oras nga paghambalanay. Nian, sang mahibaluan nga magalakat sila pagkaaga, namangkot ako: “Ano ang nagapugong sa akon nga magpabawtismo karon?” Kami nga tatlo sang akon mga pakaisa nagpatugmaw sa tubig ala una y medya sang kaagahon.

Pagkatapos sadto, madamo ako sing ginlakbay agod panaksihan ang akon mga paryente. Ang iban nagbaton, kag para sa ila ginpasad ko ang akon mga diskusyon sa Mateo kapitulo 24. Ang iban naman wala magbaton, kag sa sina nga mga okasyon gingamit ko ang mga pinamulong ni Jesus sa mga Fariseo nga narekord sa Mateo kapitulo 23. Apang, sang ulihi, natun-an ko nga mangin labi ka mataktikanhon, bilang pag-ilog sa aton malulo kag mahigugmaon nga langitnon nga Amay.—Mateo 5:43-45.

Sang primero ang akon asawa namatok sa akon handum nga alagaron si Jehova. Apang, sang ulihi nagbuylog sia sa akon, kag sang Disiembre 1943 sia nangin isa ka dedikado kag bawtismado nga timbang. Kaupod niya nga nabawtismuhan sadtong halandumon nga adlaw amo ang lima pa gikan sa amon minuro sang Waima, nagahimo sang kabilugan nga manugbantala sang Ginharian sa sinang lugar sa siam.

Mga Pagpakamaayo Walay Sapayan sang Pagpamatok

Sang 1944 ginduaw kami liwat sang mga kauturan halin sa iban nga lugar, kag sini nga tion naghatag sila sing kinahanglanon nga paghanas sa pormal nga pamalaybalay nga ministeryo. Sang ang amon presensia sa komunidad nangin labi kaathag, ang pamatok gikan sa mga tiglawas sang Cristiandad nagdugang. (Juan 15:20) May yara liwat-liwat nga komprontasyon upod sa lokal nga mga klerigo, nagaresulta sa malawig nga diskusyon sa doktrina. Apang si Jehova naghatag sing kadalag-an, kag ang iban nga mga katapo sang komunidad, lakip ang akon utod nga babayi, nagpaidalom sa mahigugmaon nga pag-atipan ni Jehova.

Isa ka kongregasyon ang gintukod sa Waima sang Hunyo 1944. Ang relihioso nga paghingabot kag pagdumot nagdugang. Ang mga Saksi ni Jehova wala gintugutan nga maglubong sa lokal nga patyo. Kon kaisa ang pagpamatok nangin masingki. May pisikal nga pagsakit. Ang akon salakyan kag ang garahe sini ginsunog. Apang, paagi sa pagpakamaayo ni Jehova, wala pa tatlo ka bulan, nakabakal kami sing isa ka trak. Kag gingamit ko ang ginaguyod sang kabayo nga karo sa pagdala sang akon nagadaku nga pamilya sa mga miting.

Ang nagadugang nga kadamuon sang mga kaupdanan nagkahulugan nga may madagmit kami nga pagkinahanglan sing mas daku nga duog tilipunan, gani namat-od kami sa pagpatindog sing isa ka Kingdom Hall sa Waima. Amo ini ang nahaunang Kingdom Hall nga ginpatindog sa New Zealand. Apat ka bulan pagkatapos nga ang nahaunang mga kahoy ginpulod sang Disiembre 1, 1949, ang dungan nga asambleya kag dedikasyon ginhiwat sa bag-ong 260-sing-pulungkuan nga tilipunan. Sadto anay isa ina ka daku nga hinimuan, nga nahimo paagi sa bulig ni Jehova.

Dugang Pa nga mga Pamatuod sang Pag-atipan ni Jehova

Sanglit ang kadamuon sang mga manugbantala sang Ginharian sa malayo nga aminhan sang New Zealand padayon nga nagadamo, ang nagalakbay nga mga manugtatap naghatag sing pagpalig-on nga mag-alagad kon diin mas daku ang kinahanglanon. Bilang sabat, sang 1956, ginsaylo ko ang akon pamilya sa Pukekohe, bagatnan lamang sang Auckland. Nag-alagad kami didto sa 13 ka tuig.—Ipaanggid ang Binuhatan 16:9.

Ang duha ka halimbawa sang pag-atipan ni Jehova sini nga tion nagapangibabaw sa akon memorya. Samtang gin-empleo sang konsilyo sang banwa subong tsuper sang trak kag manugpadalagan sang makina, gin-agda ako sa apat-ka-semana nga kurso sang Kingdom Ministry School sa sanga talatapan sang Watch Tower Society sa Auckland. Nangayo ako sing apat ka semana nga bakasyon para sa sining katuyuan, kag ang hepe nga enhinyero nagsiling: “Sige. Kuntani madamo pa nga tawo ang kaangay mo. Pagbalik mo, makigkita ka sa akon sa akon opisina.” Sang nagkadto ako sang ulihi sa iya opisina, ginswelduhan ako para sa apat ka semana nga wala ako. Busa, ang materyal nga mga kinahanglanon sang akon pamilya gin-atipan.—Mateo 6:33.

Amo yadto ang una nga halimbawa. Ang ikaduha natabo sang kami nga mag-asawa nagsulod sa payunir nga pag-alagad sang 1968. Sa liwat, nagsalig kami sa supurta ni Jehova, kag ginpadyaan niya kami. Isa ka aga pagkatapos nakapamahaw, ginbuksan sang akon asawa ang repridyereytor kag tunga sa libra nga mantikilya lamang ang nakita niya. “Sarn,” siling niya, “wala na kita sing makaon. Magaguwa pa bala kita sa latagon karon nga adlaw?” Ang akon sabat? “Huo!”

Sa amon una nga ginkadtuan, ang tagbalay nagkuha sang literatura nga gintanyag namon kag malulo nga naghatag sa amon sing pila ka dosena nga itlog subong donasyon. Ang ikaduha nga tawo nga ginduaw namon nagregalo sing mga utan—kumaras (kamote), cauliflower, kag mga carrot. Ang iban pa nga kalan-on nga ginpauli namon sadto nga adlaw amo ang karne kag mantikilya. Daw ano ka matuod sa amon bahin ang mga pinamulong ni Jesus: “Tan-awa ang mga pispis sa langit, wala sila nagasab-ug ukon nagaani ukon nagatipon sa mga tambobo; kag ginapakaon sila sang inyo Amay nga langitnon. Indi bala kamo mahal pa sa ila?”—Mateo 6:26.

Asaynment sa Luwas

Rarotonga sa Cook Islands! Amo ini ang amon espesyal payunir nga asaynment sang 1970. Amo ini ang nangin puluy-an namon sa masunod nga apat ka tuig. Ang una nga hangkat diri amo ang pagtuon sang bag-ong pamulong. Apang, bangod magkaanggid ang New Zealand Maori kag Cook Island Maori, nakahatag ako sang akon nahaunang pamulongpulong publiko pagligad sang lima ka semana nga pag-abot namon.

Sa Cook Islands, pila lamang ang mga manugbantala sang Ginharian, kag wala kami sing duog nga ginatipunan. Sa liwat, bilang sabat sa pangamuyo, si Jehova nag-aman sang amon mga kinahanglanon. Ang wala ginapaabot nga pagsugilanon sa tag-iya sang isa ka tiangge nagresulta sa pag-arkila namon sa isa ka nagakaigo nga lote, kag sa sulod sang isa ka tuig may isa kami ka diutay nga balay kag isa ka Kingdom Hall nga makapalingkod sing 140. Kutob sadto nakabaton kami sing madamo nga pagpakamaayo, sa kadayawan ni Jehova.

Ginaapresyar labi na amo ang pagkamaabiabihon nga ginpakita sa amon sa pulo. Sa masami, samtang nagaministeryo, ginatanyagan kami sing makapabugnaw nga ilimnon—ginabaton sing hanuot sa mainit kag magin-ot nga klima. Masami kami nagapauli nga may saging, papaws, paho, kag kahil nga ginbilin sa amon puwertahan sang mga tawo nga wala namon nakilala.

Sang 1971 kami sang akon asawa, kaupod sang tatlo pa ka manugbantala halin sa Rarotonga, naglakbay pakadto sa pulo sang Aitutaki, nga kilala tungod sang iya matahom nga linaw. Nakita namon ang mga nagahigugma sang Pulong sang Dios sa tunga sang maabiabihon nga mga pumuluyo kag nakasugod sing apat ka pagtuon sa Biblia, nga ginpadayon namon paagi sa sulat pagbalik namon sa Rarotonga. Sang ulihi yadtong mga estudyante sa Aitutaki ginbawtismuhan, kag isa ka kongregasyon ang gintukod. Sang 1978 ang ikaduhang Kingdom Hall sa Cook Islands ginpatindog didto. Padayon nga ginapatubo ni Jehova ang mga butang bilang sabat sa amon pagtanom kag pagbunyag.—1 Corinto 3:6, 7.

Pribilehiyo ko nga maduaw ang napulo ka pulo sa grupo sang Cook Island, sing masami sa idalom sang mabudlay nga mga sirkunstansia. Ang isa ka pagbiyahe sa sakayan pakadto sa Atiu, 180 kilometros kalayo, nagkinahanglan sing kapin sa anom ka adlaw bangod sang mamadlus nga hangin kag mabalud nga dagat. (Ipaanggid ang 2 Corinto 11:26.) Bisan pa limitado ang suplay nga kalan-on kag ang madamo sa akon palibot ginadagat, nagpasalamat ako sa pag-atipan ni Jehova, nga nagresulta sa maayo nga pag-abot sa akon kaladtuan.

Sang 1974 wala kami gintugutan nga mag-istar sa Cook Islands kag gani nagbalik kami sa New Zealand. Sadto nga tion may tatlo ka kongregasyon sa mga pulo.

Dugang nga mga Pribilehiyo sa Pag-alagad—Kag Isa ka Pagtilaw

Didto sa New Zealand, ang bag-ong mga ganhaan sang kahigayunan ginbuksan. (1 Corinto 16:9) Ang Sosiedad nagkinahanglan sang isa nga makabadbad sang Ang Lalantawan kag iban pa nga literatura sa Biblia sa Cook Island Maori. Ako ang ginhatagan sing pribilehiyo, kag nagpabilin ini nga akon pribilehiyo tubtob karon. Nian may pribilehiyo ako nga maduaw liwat sing tayuyon ang akon mga kauturan sa Cook Islands, sang primero subong isa ka manugtatap sa sirkito, nian subong isa ka tal-us nga manugtatap sa distrito.

Sa isa sina nga mga pagduaw, si Brother Alex Napa, isa ka espesyal payunir sa Rarotonga, nag-upod sa akon sa 23-ka-adlaw nga pagbiyahe sa dagat nga nagdala sa amon sa Manahiki, Rakahanga, kag Penrhyn—mga pulo sa aminhan nga Cooks. Sa tagsa ka pulo, ginpahulag ni Jehova ang mga tagipusuon sang maabiabihon nga lokal nga katawhan sa pag-aman sa amon sing mga dalayunan kag sa pagkuha sing madamong literatura sa Biblia. (Ipaanggid ang Binuhatan 16:15.) Sa sining mga pulo, madamo ang perlas gikan sa talaba, kag sa madamong okasyon ang mga tawo nagtanyag sing mga perlas subong amot sa bili sang bug-os kalibutan nga pagbantala nga hilikuton. Gani, sa paghatag namon sing espirituwal nga mga perlas, nakabaton kami sing literal.—Ipaanggid ang Mateo 13:45, 46.

Daw ano gid katahom inang naligwin nga bahin sang kalibutan! Handurawa ang dalagku nga bagis nga nagalangoy sing mahidaiton kaupod sang mga bata sa isa ka linaw! Daw ano katahom nga talan-awon ang ginahatag sang mga kalangitan kon gab-i! Matuod gid ang pinamulong sang salmista: “Sa adlaw-adlaw nagahambal, kag sa gab-i-gab-i nagapakita sing ihibalo.”—Salmo 19:2.

Nian, sang nagligad nga siam ka tuig, nag-abot ang isa ka matuod nga pagtilaw sa integridad. Ang akon asawa naospital bangod sang dalayon nga pagdugo sa utok. Kinahanglan ang operasyon, apang indi magpasugot ang doktor nga mag-opera nga wala sing dugo. Ang amon konsiensia sang akon asawa indi magpasugot sa isa ka paagi nga nagalapas sang kasuguan sang Dios. Apang ang konsiensia sang manugbusbos nagadikta nga gamiton ang tanan nga sarang magamit, lakip ang dugo, sa pagluwas sang ka­buhi.

Nanghina ang panglawas sang akon asawa, kag ginbutang sia sa intensive care ward, nga limitado nga pagduaw lamang ang ginatugot. Naagihan niya ang magpalamungol bangod sang presyon sa espeho sang dulunggan. Nangin mabudlay ini nga sitwasyon. Pagkatapos sang isa ka pagduaw ginsundan ako sang doktor sa akon salakyan, nag-insister nga ang tsansa lamang sang akon asawa amo ang pag-opera nga may dugo kag nagpakiluoy sa akon nga magpasugot sa sini. Walay sapayan, nagsalig kami nga mag-asawa kay Jehova—bisan pa nga ang pagtuman sa iya kasuguan magaresulta sa pagkawasi sang pila ka tuig sa sining karon nga kabuhi.

Sa hinali, nag-uswag sing tumalagsahon ang kahimtangan sang akon asawa. Pag-abot ko isa ka adlaw naabtan ko sia nga nagalingkod sa katre nga nagabasa. Sang masunod nga mga adlaw nagsugod sia sa pagpanaksi sa mga pasyente kag sa mga nars. Nian ginpatawag ako sa opisina sang manugbusbos. “Mr. Wharerau,” siling niya, “mapalad ka gid nga tawo! Nagapati kami nga ang balatian sang imo asawa naayo.” Sa wala ginapaabot, ang presyon sang iya dugo nangin normal. Magkaupod namon nga mag-asawa nga ginpasalamatan si Jehova kag ginbag-o ang amon determinasyon nga himuon ang amon bug-os nga masarangan sa pag-alagad sa iya.

Karon gintangdo kami liwat sa Cook Islands kag sa liwat nagaalagad sa Rarotonga. Isa gid ka ginpakamaayo nga pribilehiyo! Sa pagdumdom sang nagligad ginapasalamatan namon sang akon asawa ang pag-atipan ni Jehova sa halos lima ka dekada nga pag-alagad sa iya. Sa materyal, wala gid kami makulangi sang mga kinahanglanon sa kabuhi. Sa espirituwal, ang mga pagkamaayo tuman kadamo agod isaysay. Ang isa nga talalupangdon amo ang kadamuon sang akon undanon nga mga paryente nga nagbaton sang kamatuoran. Maisip ko ang kapin sa 200 nga mga bawtismado na karon nga mga Saksi ni Jehova, lakip ang 65 ka direkta nga mga kaliwat. Ang amon isa ka apo nga lalaki katapo sang panimalay Bethel sang New Zealand, samtang ang smon isa ka anak nga babayi kaupod sang iya bana kag duha ka anak nga lalaki nagatrabaho sa hilikuton nga pagpatindog sa mga sanga.—3 Juan 4.

Sa pagtan-aw sa unahan, ginahamili ko ang palaabuton nga magkabuhi sa paraiso diin, sa bug-os nga duta, ang katahom magalabaw pa sa matahom nga berde nga nalupyakan nga natawhan ko. Daw ano nga pribilehiyo nga abiabihon liwat ang akon iloy kag amay sa pagkabanhaw kag sugiran sila sang nahanungod sa gawad, sa Ginharian, kag sa tanan iban pa nga mga pamatuod sang pag-atipan ni Jehova.

Ang akon determinasyon, nga ginasakdag sang ihibalo nga ang Dios nagaatipan sa akon, amo ang ginsiling sang salmista sa Salmo 104:​33: “Magaamba ako kay Jehova tubtob nga nagakabuhi ako; magaamba ako sing pagdayaw sa akon Dios samtang may kabuhi ako.”—Panugiron ni Sarn Wharerau.

[Retrato ni Sarn Wharerau sa pahina 26]

[Laragway sa pahina 28]

Ang nahaunang Kingdom Hall nga ginpatindog sa New Zealand, 1950