“Ang mga Lirio sa Latagon”

WALAY palamugnan. Mataas nga balaklon. Kaimulon. Kapurauton. Ining mga tinaga masunson mabasa sa mga balita. Kag ginapakita sini ang mga kabudlayan nga ginaatubang sang minilyon samtang ginapanikasugan nila nga pakan-on kag papanaptan ang ila mga pamilya kag huptan ang isa ka puluy-an.

Palareho nga apektado ang mga tumuluo kag mga ditumuluo. Apang ang mga tumuluo wala nagaisahanon sa pag-atubang sina nga mga problema. Si Jesus, nga nagapamulong sa kubos nga katawhan sang unang siglo, nagsiling: “Tan-awa ang mga pispis sa langit, bangod wala sila nagasab-ug ukon nagaani ukon nagatipon sa mga tambubo; apang ginapakaon sila sang inyo langitnon nga Amay. Indi bala kamo mahal pa sa ila?”​—⁠Mateo 6:⁠26.

Nagsiling man si Jesus: “Magtuon gikan sa mga lirio sa latagon, kon paano sila nagatubo; wala sila nagapangabudlay, ukon nagapamurong; apang nagasiling ako sa inyo nga bisan pa si Solomon sa bug-os niyang himaya wala mapanapti subong sang isa sini sa ila. Apang, kon ang hilamon sa latagon ginapapanaptan sang Dios, . . . indi bala magpapanapot sia sing labi pa sa inyo?”​—⁠Mateo 6:​28-30.

Nagakahulugan bala ini nga ang isa ka Cristiano indi na kinahanglan mangabudlay agod mabuhi? Aba indi! Ang isa ka Cristiano nagapangabudlay sing lakas kon kinahanglanon agod makabayad sang iya mga balayran. Si apostol Pablo nagsiling: “Kon sin-o ang indi luyag magpangabudlay, indi sia magkaon.” (2 Tesalonica 3:10) Walay sapayan, nakahibalo ang Cristiano sang mahigugmaon nga pag-ulikid sang Dios kag nagatuo nga ang iya langitnon nga Amay nagabantay sa iya. Busa, wala sia nagakatumba sa mga paghimud-os sang kabuhi. Bisan sa mabudlay nga mga tion, ginauna niya ang dapat unahon​—⁠ang espirituwal nga mga butang. Nagatuo sia sa pinamulong ni Jesus: “Padayon nga pangitaa anay ninyo ang ginharian kag ang iya pagkamatarong, kag tanan ini nga butang idugang sa inyo.”​—⁠Mateo 6:⁠33.