Ang Relihion Bala Makahatag sang Aton mga Kinahanglanon?

ANO ang aton kaunon? Ano ang aton imnon? Ano ang aton ipanapot? May pagkadagmit ini nga mga pamangkot, labi na kon mabudlay ang pagtigayon sing panguna nga mga kinahanglanon sa kabuhi. Apang, talupangda kon ano ang ginsiling ni Jesucristo: “Dili kamo maghimud-os nahanungod sang inyo kalag kon ano ang inyo kaunon ukon ano ang inyo imnon, bisan pa nahanungod sang inyo lawas, kon ano ang inyo ipanapot.” (Mateo 6:25) Makatilingala bala ina? Ti, kon ang isa kulang sing pagkaon, panapton, kag pasilungan, ginakinahanglan niya ang praktikal nga bulig, indi ang ginatamod sang iban subong kinaandan na nga ginahambal sa relihion.

Si Jesus indi dimahinuklugon, ni ginatinguhaan niya nga likawan ang isyu. Nahibaluan niya sing maayo ang mga kinahanglanon sang katawhan. Apang, nahibaluan man niya ang matuod gid nga katalagman. Kon nahanungod sa pagpaayaw sa aton mga kinahanglanon, mahapos katama ihugod ang aton kabuhi sa palibot sang materyal nga mga butang kag magbatyag nga ang Dios indi importante. Busa, dapat naton tadlungon ang aton ginauna nga butang.

Ginatadlong naton ang aton ginauna nga butang kon ginasunod naton ang laygay ni Jesus: “Padayon nga pangitaa anay ang ginharian kag ang pagkamatarong [sang Dios], kag tanan ini nga butang idugang sa inyo.” (Mateo 6:33) Kon ginasunod naton ini nga laygay, sarang mahatag sang relihion—sang matuod nga relihion pasad sa mga kamatuoran sang Biblia—ang aton mga kinahanglanon.

Walay sapayan, si Jesus indi tuman ka direalistiko sa pagsiling nga ang mangin isa ka disipulo niya kag pagsunod sa iya relihioso nga mga panudlo magalubad dayon sang tanan naton nga mga problema; indi niya buot silingon nga ang iya mga disipulo dapat lamang magpungko kag maghulat nga ihatag ini para sa ila sang Dios sing milagruso. Ti, mahimo nga ang tagsatagsa mangin Cristiano kon nagakahulugan ina sing gilayon nga kahilwayan gikan sa tanan nga mga palaligban sa kabuhi! Ang buot silingon ni Jesus amo nga ang iya Amay, nga si Jehova nga Dios, magaaman sang tanan nga butang nga kinahanglanon agod ihatag ang tanan naton nga mga kinahanglanon. Amo sina kon ngaa si Jesus nagsiling man: “Nahibaluan sang inyo langitnon nga Amay nga ginakinahanglan ninyo ining tanan nga butang.”—Mateo 6:32.

Ginahatag man ni Jehova ang importante gid naton nga mga kinahanglanon sa espirituwal. Paagi sa iya Balaan nga Kasulatan, ginhatagan niya kita sing inspirado nga panuytoy nga magagiya sang aton kabuhi sa pinakamaayo nga paagi. (Isaias 48:17) Ginpatok sang Dios ang isa ka paghiliupod sang mga sumilimba nga nagahatag sing suporta kon kinahanglanon. (Binuhatan 4:34) Ginabuligan man niya ang iya mga alagad paagi sa iya balaan nga espiritu, ukon aktibo nga puersa. (Lucas 11:13; Galacia 5:22-25) Dugang pa, ginaaman sang Dios nga ipasag-uli ang Paraiso sa duta.—Lucas 23:43; Bugna 21:1-4.

Pagpaayaw sang Aton Materyal nga mga Kinahanglanon

Binagbinaga karon ang pila sa mga prinsipio sang Biblia nga nagbulig sa katawhan nga mapaayawan ang ila materyal nga kinahanglanon. Ang Cristianong si apostol Pablo nagsulat:

“Tinluan ta ang aton kaugalingon sang tanan nga kadagtaan sang lawas kag espiritu.” (2 Corinto 7:1)

Hunahunaa ang tanan nga mga problema nga mapalagyuhan naton kon ginalikawan naton ang kadagtaan sang tabako, indi legal nga mga druga, kag iban pa nga butang nga nagadagta sang lawas. Kag mas maayo pa gid kon wala naton ginausikan ang kuarta, tion, kag hunahuna sa imoral nga literatura kag kalingawan nga nagadagta sang aton espiritu!

Ang Kasulatan nagasiling man:

“Dili ka magsimpon sa mga palainum sing alak, sa mga mahakug magkaon sing unod. Kay ang palahubog kag ang hakugan magaimol, kag ang katuyo magapapanaput sa tawo sing mga lapat.” (Hulubaton 23:20, 21)

Talupangda ang katapusan nga resulta sang pagpahubog kag pagkahakugan—kaimulon kag mga lapat. Madamo sa karon—bisan sa relihioso kaayo nga katawhan—ang nagapabilin nga imol bangod sang sobra nga pagpatuyang sa alkoholiko nga ilimnon ukon pagkayanggaw sa mga butang nga nagadagta sang lawas. Ang paglikaw sa sinang mga butang agod magpahisuno sa mga talaksan sang Biblia daku ang mahimo sa pagbulig sa aton nga mahatag ang aton mga kinahanglanon nga pagkaon, panapton, kag pasilungan.

Ang isa pa ka prinsipio nga nagabulig sa mga Cristiano nga mahatag ang ila mga kinahanglanon makita sa ginsiling ni apostol Pablo:

“Ginasaligan namon nga may matin-aw kami nga konsiensia, nga nagahandum sa pagginawi sing bunayag sa tanan nga butang.” (Hebreo 13:18)

Ang pagkabunayag sa tanan nila nga mga pagpakig-angot naghimo sa madamong Cristiano nga maamanan sing maayo ang ila kaugalingon kag ang ila mga pamilya. Naghatag ini sa ila sing maayo nga reputasyon, kag ang iban mahimo nga labi nga makig-angot sa ila. Ang bunayag nga tawo mahimo nga wala pirme sang pinakamadamo sa materyal nga paagi, apang masami nga may yara sia sang panguna nga mga kinahanglanon sa kabuhi kag nagatipig sang iya pagtahod sa kaugalingon.

May kahilabtanan sing suod sa sini amo ang laygay:

“Ang nagpangawat dili na magpangawat, kundi hinonoo magpangabudlay sia.” (Efeso 4:28)

Ang pag-aplikar sini nga prinsipio nagbulig sa madamo nga matigayon kag mahuptan ang palamugnan bangod masaligan sila. Busa, naamanan nila ang ila kaugalingon kag ang ila mga pamilya. Sa baylo nga malatnan sang espiritu sining kalibutan, nga nagbulag sa isa sa madamong dibunayag nga mga buhat, ang mga Cristiano bunayag, kag nagadala ini sing maayong mga resulta.

Sa pag-ilustrar: Luyag sang isa ka Saksi ni Jehova sa Japan nga magtrabaho sing pila lamang ka oras kada semana agod may dugang sia nga tion sa espirituwal nga mga butang. Apang, sang ginpangabay niya ini, ginpahalin sia sang iya amo sa iya obra. Bangod sina, ang iloy sang iya amo namangkot: “Ginpahalin mo bala ang labing masaligan nga tawo?” Malain ang natabo sa Saksi sang masamad niya ang iya likod sa paghimo sang iban nga obra. Wala magdugay pagkatapos sadto, nasugata niya ang iya anay amo, nga dimahim-os bangod bag-o lang niya mabalitaan nga isa sang iya mga empleyado ang nagapangawat sing bulawan, platinum, kag mga singsing gikan sa iya kompanya sang alahas. Gilayon nga ginpangabay sang amo ang Saksi nga magbalik sa obra, sini nga tion sa iya kaugalingon nga kondisyon. Luyag sang amo ang bunayag nga trabahador.

Suno kay apostol Pablo, ang Cristiano dapat “maghimo sing lakas nga trabaho” indi lamang sa pag-aman para sa iya kaugalingon kundi man “agod may ihatag sa mga nagakinahanglan.” (Efeso 4:28) Sa mga tion sang kaiwaton, ang matuod nga mga Cristiano handa pirme sa pagbulig sa iban. Naeksperiensiahan ini sang isa ka pamilya sa Fiji sang ang ila balay ginguba sang mabaskog nga bagyo samtang yadto sila sa isa ka Cristianong kombension. Pagpauli nila, nakita nila ang natabo. Apang nakita man nila ang kaupod nga mga tumuluo nga malipayon nga naggamit sang ila mga pagkabutang agod amanan ang pamilya sing pasilungan kag bulig agod matukod liwat ang ila puluy-an. “Makalilipay,” siling sang amay, “kon mahibaluan mo nga may mga Cristiano nga nagakabalaka gid sing tunay sa imo.”

Si Jesucristo nagpakita sing daku nga kahanuklog sa mga imol. Madamong beses nga personal niya nga ginbuligan ang mga imol sa lainlain nga paagi. Sa pagkamatuod, nahibaluan ni Jesus nga tubtob ining malaut nga sistema sang mga butang ginapahanugutan sa pagluntad, ang kaimulon kag iban pa nga problema sa katilingban magapabilin. (Juan 12:8) Busa, bisan pa nga daku ang ginhimo niya agod buligan ang katawhan sa materyal, ang matuod nga ideya sang iya ministeryo amo ang paghatag sang ila espirituwal nga mga kinahanglanon.

Sang ginsundan si Jesus sa Capernaum sang gutom nga kadam-an nga ginbusog niya, nagkomento sia sini: “Nagapangita kamo sa akon, indi bangod nga nakakita kamo sing mga tanda, kundi nga nakakaon kamo sang mga tinapay kag nabusog. Pangabudlay kamo, indi tungod sang kalan-on nga nagakawala, kundi tungod sang kalan-on nga nagapadayon sa kabuhi nga walay katapusan, nga ihatag sa inyo sang Anak sang tawo.” (Juan 6:26, 27) Ano ang buot silingon ni Jesus?

Buot silingon ni Jesus nga makatalagam nga ibuylog sia kag ang iya mga disipulo sang katawhan sa materyal lamang nga kaayuhan. Apang nahibaluan niya nga indi ini magadala sing mapinadayunon nga mga kaayuhan. Gani nagsiling sia: “Malipayon ang nabalaka sa ila espirituwal nga kinahanglanon, bangod ila ang ginharian sang mga langit. Malipayon ang mga ginagutom kag ginauhaw sa pagkamatarong, bangod paayawan sila.”—Mateo 5:3, 6.

Luwas sa pagkagutom sa materyal nga pagkaon, may pagkagutom man sa kamatuoran kag espirituwal nga hinimuan. Ang matuod nga kalipay nagaresulta kon ining espirituwal nga gutom ginabusog. Ang Cristiandad nagpatubas sing mahunahunaon sa materyal nga katilingban. Ang Nasidlangan nga mga relihion nagbilin sa katawhan sa espirituwal nga kadudulman. Apang ang matuod nga pagsimba—ang relihion ni Jesucristo—naghatag sang espirituwal nga mga kinahanglanon sang katawhan. Amo man sina ang mahimo sa imo. Ini nga mga aman mangin imo kon tigayunon mo ini.

Halimbawa, gikan sa isa ka Cristiano nga nagapanaksi sa dalan, nabaton sang isa ka pamatan-on sa Mau­ritius ang mga kopya sang Ang Lalantawan kag ang kaupod sini nga balasahon nga Magmata! Pagkadason nga semana, nagbalik sia sa pagkuha sing dugang nga magasin. Ginpaathag niya nga magahikog sia kuntani bangod sang iya mga problema sa pangwarta, apang ginbuligan sia sang magasin nga marealisar nga may isa ka Dios nga nagaulikid sa aton. Ang espirituwal nga pagkagutom sang pamatan-on nasugdan nga mapaayawan.

Makita pa bala naton ang tion nga ang tanan naton nga mga kinahanglanon mapaayawan sing bug-os? Ginapanaad sang Biblia nga makita pa naton. Matuod, ang mga tawo nakapoy na sa pagpamati sa mga panaad tuhoy sa maayo pa nga butang nga magaabot. Masunson sila nga napaslawan. Apang masaligan naton ang mga saad sang Biblia. Ginatuman sang Awtor sini, nga si Jehova nga Dios, ang tagsa ka saad nga ginasaad niya. Amo sini ang ginpabutyag ni Josue sang ginpahanumdom niya ang iya mga masigka Israelinhon: “Nakahibalo kamo sa bug-os ninyo nga mga tagipusuon kag sa bug-os ninyo nga mga kalag nga wala sing isa ka butang nga nakulang sa tanan nga butang nga maayo nga ginpamulong nahanungod sa inyo ni Jehova nga inyo Dios. Ang tanan nahanabo sa inyo. Wala sing isa ka butang nga nakulang sa ila.”—Josue 23:14.

Ang matuod nga solusyon sa tanan naton nga mga problema nasandig sa katumanan sang matahom nga mga saad sang Dios nga tinluan ang bug-os nga duta. (Bugna 11:18) Ang tanan naton nga mga kinahanglanon pagaihatag kon ipasag-uli sang iya Ginharian ang Paraiso sa duta, nagatuman sang iya orihinal nga katuyuan para sa katawhan. (Mateo 6:9, 10) Nian indi na naton mabatian ang ‘tingog sang paghibi ukon ang tingog sang pagtangis’ gikan sa mga tawo nga ang mga kinahanglanon indi gid mahatag. Paagi sa bunayag nga buhat kag paagi sa pag-aplikar sang diosnon nga mga prinsipio, matigayon nila ang bug-os kag makalilipay nga kabuhi.—Isaias 65:17-25.

Si Maria, ang Katolikong madre nga ginsambit kaina sa umpisa, nakatigayon sini nga pagsalig. Narealisar niya nga nagkabuhi gali sia sa espirituwal nga kadudulman sa sulod sang mga tinuig, nga ginasit-an sing mga kahadlok nahanungod sa palaabuton kag indi makakita sang matuod nga kahulugan sang kabuhi. Apang ginbag-o ina tanan sang pagkahibalo sang kamatuoran sang Biblia. “Naghalin ako sa kadudulman pakadto sa nagasilak sing labi kag labi nga kapawa,” siling niya. (Salmo 43:3; Hulubaton 4:18) Wala lamang ini magbulig sa iya nga matigayon ang iya gilayon nga materyal nga mga kinahanglanon kundi napaumpawan man ang iya espirituwal nga pagkagutom kag pagkauhaw. Huo, mahatag sang relihion—sang matuod nga relihion—ang aton mga kinahanglanon.

[Laragway sa pahina 7]

Mahatag sang matuod nga relihion ang tanan naton nga kinahanglanon