Ang Pulong sang Dios Kamatuoran

“Pakabalaana sila paagi sa kamatuoran; ang imo pulong kamatuoran.”​—⁠JUAN 17:⁠17.

1. Paano gintamod sang Hebreo nga salmista ang Biblia, apang paano ini ginatamod sang madamo karon?

“ANG imo pulong suga sa akon mga tiil, kag kapawa sa akon banas.” (Salmo 119:​105) Amo ang ginsiling sang Hebreo nga salmista. Pila lamang karon ang may subong sina nga pagtahod sa Pulong sang Dios. Sa sining ika-20 nga siglo, ang Pulong sang Dios nagaluntad sa nasulat nga porma subong ang Balaan nga Biblia. Nabadbad na ini sa mas madamo nga hambal kag napanagtag sing kapin ka lapnag sa bisan ano nga libro sa maragtas. Apang, ang kalabanan nagadumili sa pagbaton sini subong suga sa ila mga tiil. Bisan gani ang nagapangangkon nga mga Cristiano masami nga nagapasulabi sang ila kaugalingon nga mga ideya sa baylo nga tugutan ang Biblia nga mangin kapawa sa ila banas.​—⁠2 Timoteo 3:⁠5.

2, 3. Paano ginatamod sang mga Saksi ni Jehova ang Biblia, kag ano ang ila nabenepisyo sa sini?

² Tuhay gid kita nga mga Saksi ni Jehova nga nagaugyon sa salmista. Para sa aton, ang Biblia isa ka tuytoy nga ginhatag sang Dios. Nahibaluan naton nga ang “bug-os nga Kasulatan gin-inspirar sang Dios kag mapuslanon sa pagpanudlo, sa pagsabdong, sa pagsaway, kag sa pagdisiplina sa pagkamatarong.” (2 Timoteo 3:16) Indi kaangay sang madamo karon, indi naton luyag mag-eksperimento sa mga butang tuhoy sa moralidad kag paggawi. Nahibaluan naton kon ano ang husto bangod ginasugid ini sa aton sang Biblia.

³ Naghatag ini sa aton sing daku nga mga kaayuhan. Nakilala naton si Jehova, kag natun-an naton ang iya dalayawon nga mga katuyuan para sa duta kag sa katawhan, gani nagasalig gid kita nga posible ang masanag nga palaabuton para sa aton kag sa aton pamilya. Nagaugyon kita sing bug-os tagipusuon sa salmista nga nagsiling: “Daw ano ang paghigugma ko sa imo kasuguan! Ginapamalandungan ko ini sa bug-os nga adlaw. Ang imo mga sugo nagahimo sa akon nga maalam pa sa akon mga kaaway, kay sila yari sa akon tubtob sa wala sing katubtuban.”​—⁠Salmo 119:​97, 98.

Pagpanaksi Paagi sa Paggawi

4. Ang pagkilala sa Biblia subong Pulong sang Dios nagahatag sa aton sing ano nga obligasyon?

⁴ Busa, may rason gid nga mag-ugyon sa ginsiling ni Jesus sa iya Amay: “Ang imo pulong kamatuoran.” (Juan 17:17) Apang ang pagkilala sa sini nga kamatuoran nagahatag sa aton sing obligasyon. Dapat naton buligan ang iban sa pagrealisar nga ang Pulong sang Dios amo ang kamatuoran. Sa sining paagi maagom man nila ang mga pagpakamaayo nga ginaagom naton. Paano naton sila mabuligan sa sinang paagi? Una, dapat naton panikasugan gid nga iaplikar ang mga prinsipio sang Biblia sa aton pagkabuhi sa adlaw-adlaw. Sa sinang paagi, makita sang mga matarong sing tagipusuon nga ang dalanon sang Biblia amo gid ang labing maayo.

5. Ano nga laygay ang ginhatag ni Pedro nahanungod sa pagpanaksi paagi sa aton paggawi?

⁵ Amo sini ang ideya sang laygay ni apostol Pedro sa Cristianong mga babayi nga may bana nga ditumuluo. Sia nagsiling sa ila: “Kamo nga mga asawa, magpasakop kamo sa inyo mga bana, agod nga, bisan ang wala nagatuman sang pulong, madaug sila sa wala sing pulong bangod sang paggawi sang ila mga asawa.” (1 Pedro 3:1) Amo man ini ang prinsipio sang iya laygay sa tanan nga Cristiano​—⁠mga lalaki, mga babayi, kag kabataan⁠—​sang magsiling sia: “Maggawi kamo sing nagakaigo sa tunga sang mga pungsod, agod nga kon ginapakamalaut kamo nila, sila bangod sang inyo maayong mga buhat nga ila nakita maghimaya sa Dios sa adlaw sang iya pagduaw.”​—⁠1 Pedro 2:​12; 3:⁠16.

Ang Superyor nga Kaalam sang Biblia

6. Paano kita ginabuligan ni Pedro sa paghangop nga dapat buligan ang iban sa pag-apresyar sa Biblia?

⁶ Dugang pa, mabuligan sang mga Cristiano ang iban nga apresyaron ang Biblia kon himuon nila ang ginalaygay man ni Pedro: “Pakabalaana sa inyo tagipusuon si Cristo subong nga Ginuo, nga handa pirme sa pag-apin sang paglaum nga yara sa inyo sa kay bisan sin-o nga magpamangkot sa inyo, apang himua ini nga may kalulo kag pagtahod.” (1 Pedro 3:15) Dapat sangkol ang Cristianong mga ministro sa pag-apin sa Biblia kag sa pagpaathag sa iban nga Pulong ini sang Dios. Paano nila mahimo ina?

7. Ano nga kamatuoran nahanungod sa Biblia ang nagapakita nga Pulong gid ini sang Dios?

⁷ Ang isa ka makahaylo nga pangatarungan masapwan sa tulun-an sang Hulubaton. Didto aton mabasa: “Anak ko, kon batunon mo ang akon mga pulong kag tipigan ang akon mga sugo sa imo, sa paglingig sang imo idulungog sa kaalam . . . , makita mo ang ihibalo sang Dios. Kay si Jehova gid nagahatag sing kaalam; gikan sa iya baba nagaguwa ang ihibalo kag paghantop.” (Hulubaton 2:​1-6) Ang kaalam sang Dios masapwan sa mga pahina sang Biblia. Kon makita sang sinsero nga tawo ina nga madalom nga kaalam, indi mahimo nga indi niya marealisar nga ang Biblia indi pulong sang tawo lamang.

8, 9. Paano napamatud-an nga husto ang laygay sang Biblia nahanungod sa paghupot sing balanse nga pagtamod sa pagtigayon sing manggad?

⁸ Binagbinaga ang pila ka halimbawa. Sa karon, ang kadalag-an sa kabuhi masami nga ginatakus paagi sa pinansial nga ikasarang. Kon daku ang suweldo sang isa ka tawo, ginakabig sia nga kapin ka madinalag-on. Apang, ang Biblia nagapaandam batok sa sobra nga pagpadaku sa materyal nga mga butang. Si apostol Pablo nagsulat: “Ang mga determinado magmanggaranon nagakahulog sa pagsulay kag sa siod kag sa madamo nga wala sing pulos kag mahaliton nga mga kailigbon, nga nagatugdang sang mga tawo sa kadulaan kag kalaglagan. Kay ang gugma sa kuwarta amo ang gamot sang tanan nga kalainan, kag paagi sa pagtinguha sa sini nga gugma ang iban nagtalang gikan sa pagtuo kag ginbuno ang ila kaugalingon sing madamo nga kasakitan.”​—⁠1 Timoteo 6:​9, 10; ipaanggid ang Mateo 6:⁠24.

⁹ Ginapakita sang eksperiensia kon daw ano ka nagakaigo ining paandam. Ang isa ka klinikal nga sikologo nagsulat: “Ang mangin Num. 1 kag manggaranon wala nagapabatyag sa imo nga madinalag-on, naayawan, ginatahod ukon ginhigugma.” Huo, ang mga nagahinguyang sang tanan nila nga kusog sa pagpangita sing manggad masami nga nagabatyag sing kaugot kag kapaslawan sa ulihi. Ang Kasulatan, bisan pa nagakilala sa kapuslanan sang kuwarta, nagatudlo sa butang nga kapin ka importante: “Ang kaalam pangapin subong nga ang kuwarta pangapin; apang ang pagkalabaw sang ihibalo amo nga ang kaalam nagatipig sang kabuhi sang may iya sini.”​—⁠Manugwali 7:⁠12.

10. Ngaa dapat naton pamatian ang laygay sang Biblia nga bantayan ang aton pagpakig-upod?

¹⁰ Madamo sing subong sina nga ideya sa Biblia. Ang isa pa amo: “Sia nga nagalakat upod sa maalam nga mga tawo magamaalam man, apang sia nga nagapakig-angot sa mga buangbuang magaantos.” (Hulubaton 13:20) Napamatud-an man ini sang eksperiensia. Ang pag-ipit sang mga katubotubo nagdul-ong sa mga pamatan-on sa pagpahubog, sa pag-abuso sa droga, kag sa imoralidad. Ang bisan sin-o nga nagapakig-upod sa mga tawo nga bastos maghambal makasapo sang ila kaugalingon sa ulihi nga nagabinastos man. Madamo ang nagapangawat sa ila mga amo bangod ‘ginahimo ini sang tanan.’ Sa pagkamatuod, subong ginasiling man sang Biblia: “Ang malain nga mga pagpakig-upod nagapierde sang maayo nga pamatasan.”​—⁠1 Corinto 15:⁠33.

11. Paano ginpakita sang isa ka sikolohiko nga pagtuon ang kaalam sang pagsunod sa Bulawanon nga Talaksan?

¹¹ Ang isa sang labing bantog nga laygay sa Biblia amo ang ginatawag nga Bulawanon nga Talaksan: “Busa, ang tanan nga butang nga luyag mo nga himuon sang mga tawo sa imo, dapat mo man himuon sa ila.” (Mateo 7:12) Kon ginsunod sang katawhan ining talaksan, maayo kuntani ang kahimtangan sa kalibutan. Apang, bisan pa wala ginasunod sang katawhan sa kabilugan ang talaksan, mas maayo himuon mo ini subong indibiduwal. Ngaa? Bangod gintuga kita agod magtatapay kag mag-ulikdanay. (Binuhatan 20:35) Ang isa ka sikolohiko nga pagtuon nga ginhimo sa Estados Unidos agod hibaluon kon ano ang reaksion sang mga tawo sang magbulig sila sa iban nakalab-ot sa sini nga konklusyon: “Daw subong bala nga ang pag-atipan sa iban isa gid ka bahin sang tawhanon nga kinaugali subong sang pag-atipan sa kaugalingon.”​—⁠Mateo 22:⁠39.

Ang Laygay sang Biblia​—⁠Tumalagsahon nga Maalamon

12. Ano ang isa ka butang nga nagahimo sa Biblia nga tumalagsahon?

¹² Sa karon, sa pagkamatuod, madamo sing ginahalinan sing laygay luwas sa Biblia. Ang mga pamantalaan nagaunod sing mga kolumna sang laygay, kag ang mga balaligyaan sing libro puno sing libro tuhoy sa pagbulig sa kaugalingon. Dugang pa, may yara mga sikologo, propesyonal nga mga manuglaygay, kag iban pa nga nagatanyag sing laygay sa nanuhaytuhay nga latagon. Apang tumalagsahon ang Biblia sa dimagkubos tatlo ka butang. Una, ang laygay sini pirme mapuslanon. Indi gid ini teoriya lamang, kag indi gid ini makahalit sa aton. Ang bisan sin-o nga nagasunod sa laygay sang Biblia magaugyon sa salmista sang magsiling sia sa Dios sa pangamuyo: “Ang imo mga pahanumdom masaligan gid.”​—⁠Salmo 93:⁠5.

13. Ano ang nagapakita nga ang Biblia superyor gid sa kaalam sang tawo?

¹³ Ikaduha, ang Biblia nakalampuwas sa pagtilaw sang tion. (1 Pedro 1:​25; Isaias 40:8) Ang laygay halin sa tawo kilala nga nagabag-obag-o, kag ang uso karon nga tuig masami nga ginamulay sa masunod nga tuig. Apang, bisan pa natapos ang Biblia sang halos 2,000 ka tuig nga nagligad, nagaunod ini gihapon sing labing maalamon nga laygay nga matigayon, kag ang mga laygay sini maaplikar sa bug-os nga uniberso. Maaplikar ini nga may pareho nga epekto nagapuyo ka man sa Aprika, sa Asia, sa Bagatnan ukon Aminhan nga Amerika, ukon sa Europa, ukon sa mga isla sang dagat.

14. Sa anong paagi labaw ang laygay sang Pulong sang Dios?

¹⁴ Bilang katapusan, ang masangkad nga laygay sang Biblia wala sing tupong. Ang isa ka hulubaton sa Biblia nagasiling: “Si Jehova nagahatag sing kaalam,” kag bisan ano man nga problema ukon desisyon ang ginaatubang naton, may yara kaalam sa Biblia nga makabulig sa aton sa paglubad sini. (Hulubaton 2:6) Nasapwan sang kabataan, mga tin-edyer, mga ginikanan, mga tigulang, mga amo, mga empleyado, mga tawo nga may awtoridad, nga ang kaalam sang Biblia naaplikar sa ila. (Hulubaton 4:11) Bisan pa kon nagaatubang kita sa mga kahimtangan nga wala matabo sang tion ni Jesus kag sang iya mga apostoles, ang Biblia nagahatag sa aton sing laygay nga epektibo gid. Halimbawa, sang nahaunang siglo, ang pagpanigarilyo indi kilala sa Natung-an nga Sidlangan. Sa karon, lapnag ini. Walay sapayan, ang bisan sin-o nga nagatalupangod sa laygay sang Biblia nga likawan nga “mangin sa idalom sang awtoridad [ukon pagkontrol] sang bisan ano” kag magpabilin nga matinlo gikan sa “tanan nga pagdagta sa unod kag espiritu” magalikaw sa sini nga bisyo, nga makapagiyan kag makahalalit sa lawas.​—⁠1 Corinto 6:​12; 2 Corinto 7:⁠1.

Para sa Aton Dayon nga Kaayuhan

15. Ngaa madamo ang nagasiling nga ang Biblia kina­raan?

¹⁵ Matuod, madamo ang nagasiling nga ang Biblia kinaraan na kag wala sing kaangtanan sa sining ika-20 nga siglo. Apang, mahimo gid nga ang rason amo nga ang Biblia wala nagasiling sang luyag nila pamatian. Ang pagsunod sa Makasulatanhon nga laygay magahatag sa aton sing dayon nga kaayuhan, apang nagakinahanglan ini sa masami sing pagpailob, disiplina, kag pagdingot sa kaugalingon​—⁠mga kinaiya nga indi popular sa kalibutan nga nagapalig-on sa aton nga pangitaon ang gilayon nga kaayawan.​—⁠Hulubaton 1:​1-3.

16, 17. Ano nga mataas nga mga talaksan sa seksuwal nga moralidad ang ginapahamtang sang Biblia, kag paano ini ginsikway sa modernong mga tion?

¹⁶ Binagbinaga ang seksuwal nga imoralidad. Ang Makasulatanhon nga mga talaksan tuman ka estrikto. Ang lamang nga duog para sa seksuwal nga pagkasuod amo ang sa sulod sang pag-asawahay, kag ina nga pagkasuod sa guwa sang pag-asawahay ginadumilian. Aton mabasa: “Bisan ang mga makihilawason, ukon mga diwatahan, ukon mga makihilahion, ukon babayinhon, ukon mga sodomanhon . . . indi makapanubli sang ginharian sang Dios.” (1 Corinto 6:​9, 10) Dugang pa, para sa mga Cristiano ginapatuman sang Biblia ang monogamya, isa ka bana para sa isa ka asawa. (1 Timoteo 3:2) Kag bisan pa may yara sobra nga mga kaso nga sa diin ang diborsio ukon pagbulagay mahimo nga tugutan, ang Biblia nagasiling nga sa kabilugan ang higot sang pag-asawahay magapadayon tubtob buhi. Si Jesus mismo nagsiling: “Sia nga nagbuhat sa ila sa ginsuguran nagbuhat sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag iloy kag maghiusa sa iya asawa, kag ang duha mangin isa ka unod’ . . . Sa bagay nga indi na sila duha, kundi isa ka unod. Busa, ang gintingob sang Dios, dili pagbu­lagon sang tawo.”​—⁠Mateo 19:​4-6, 9; 1 Corinto 7:​12-16.

¹⁷ Sa karon, ining mga talaksan ginasikway sing lapnag. Ginapabay-an ang malaw-ay nga mga buhat sa sekso. Ang seksuwal nga mga relasyon sa ulot sang naga-date nga mga tin-edyer ginatamod subong normal. Ang pagpuyuay nga indi kasal ginabaton na. Sa tunga sang mga mag-asawa, ang pagpangerido ukon pagpangerida kinaandan na. Kag ang diborsio isa ka epidemya sa sining moderno nga kalibutan. Apang, ining relaks nga mga talaksan wala makahatag sing kalipay. Ang malain nga mga resulta nagpamatuod nga ang Biblia husto gid gali sa pag-insister tuhoy sa estrikto nga mga talaksan sa moral.

18, 19. Ano ang nangin resulta sang lapnag nga indi pagsapak sa mga talaksan ni Jehova sa moralidad?

¹⁸ Ang Ladies’ Home Journal nagsiling: “Ang pagpadaku sa sekso nga nagpakilala sa katuigan sisenta kag sitenta wala magdala sing kalipay sa tawo kundi sing daku nga pag-antos.” Ang “daku nga pag-antos” nga ginapatuhuyan diri nagalakip sang kabataan nga nahalitan sa emosyon bangod sang pagdiborsio sang ila mga ginikanan kag sang mga adulto nga nagaantos sing daku nga kasakit sa emosyon. Nagalakip man ini sang pagdugang sang isa sing ginikanan nga mga pamilya kag sang epidemya sang hoben nga mga dalaga nga may mga bata na samtang sila gani daw mga bata pa. Dugang pa, nagalakip ini sang epidemya sang mga balatian nga ginapaliton paagi sa sekso, subong sang genital ­herpes, gonorrhea, syphilis, chlamydia, kag AIDS.

¹⁹ Bangod sini tanan, ang isa ka propesor sang sosyolohiya nagsiling: “Ayhan daku na kita tanan sa pagbinagbinag kon bala mangin para sa aton kaayuhan nga sakdagon ang pagkaputli sa wala pa ang kasal subong isa ka pagsulundan nga amo ang daku gid nga sabat sa mga kinahanglanon sang aton mga banwahanon kag sa ila kinamatarong sa kahilwayan: kahilwayan gikan sa balatian, kahilwayan gikan sa wala ginahandum nga pagmabdos.” Husto ang Biblia sa pagsiling: “Malipayon ang mapagros nga tawo nga ang iya pagsalig amo si Jehova kag wala nagasapak sa mga bugalon, sa mga nagaliso sa kabutigan.” (Salmo 40:4) Ang mga nagasalig sa kaalam sang Biblia wala ginalimbungan sang kabutigan sang mga nagapamatok sa Biblia kag nagasiling nga ang kaulag nagadala sing kalipay. Ang maalamon, bisan pa estrikto, nga mga talaksan sang Biblia amo ang para sa labi nga ikaayo.

Mabudlay nga mga Problema sa Kabuhi

20. Ano nga mga prinsipio sang Biblia ang napamatud-an nga nakabulig sa mga may daku nga kaimulon?

²⁰ Ang kaalam sang Biblia nagabulig man sa aton sa pag-atubang sa mabudlay nga mga problema nga ginaatubang naton sa kabuhi. Halimbawa, sa pila ka kadutaan, may mga Cristiano nga daku gid ang kaimulon. Apang naatubang nila ang ila kaimulon kag malipayon gihapon sila. Paano? Paagi sa pagsunod sa inspirado nga Pulong sang Dios. Ginapatihan gid nila ang makalilipay nga mga pulong sang Salmo 55:​22: “Itungtong kay Jehova ang imo lulan, kag sia magaalay-ay sa imo.” Nagasalig sila sa Dios nga hatagan sila sing kusog sa pagbatas. Dayon ginaaplikar nila ang mga prinsipio sang Biblia kag ginalikawan ang makahalalit kag mauyang nga mga bisyo, subong sang pagpanigarilyo kag pagpahubog. Mapisan sila, subong amo ang ginarekomendar sang Biblia, kag sa amo masami nga mapakaon nila ang ila pamilya samtang ang tamaran nga mga tawo ukon ang mga tawo nga nagapadaug sa pagkawala sing paglaum nagakapaslawan. (Hulubaton 6:​6-11; 10:26) Dugang pa, ginapamatian nila ang paandam sang Biblia: “Dili magkahisa sa mga nagahimo sing pagkadimatarong.” (Salmo 37:1) Wala sila nagasugal ukon nagahimo sing mga krimen, subong sang pagbaligya sing droga. Mahimo nga isa ini ka madali nga “solusyon” sa ila mga problema, apang ang malawig nga bunga sini masakit.

21, 22. (a) Paano ang isa ka Cristiano nga babayi nakakuha sing bulig kag paglipay gikan sa Biblia? (b) Ano pa nga kamatuoran nahanungod sa Biblia ang nagabulig sa aton sa pagrealisar nga ini Pulong sang Dios?

²¹ Nagabulig gid bala sa mga imol ang pagsunod sa Biblia? Huo, subong ginapamatud-an sang madamo gid nga mga eksperiensia. Ang isa ka Cristiano nga babayi nga balo sa Asia nagsulat: “Bisan pa pigado ako, indi malain ang buot ko ukon naugot ako. Ang kamatuoran sang Biblia nagapuno sa akon sing positibo nga pagtamod.” Nagsiling sia nga ang isa ka talalupangdon nga saad ni Jesus natuman sa iya bahin. Si Jesus nagsiling: “Padayon, nian, nga pangitaa anay ang ginharian kag ang iya pagkamatarong, kag tanan ini nga butang idugang sa inyo.” (Mateo 6:33) Nagapamatuod sia nga paagi sa pag-una sang iya pag-alagad sa Dios, pirme niya nabaton, sa lainlain nga paagi, ang materyal nga mga kinahanglanon sang kabuhi. Kag ang iya Cristiano nga pag-alagad nagahatag sa iya sing dungog kag tulumuron sa kabuhi nga nagahimo sang iya kaimulon nga mabatas niya.

²² Sa pagkamatuod, ginapakita sang kadalumon sang kaalam sang Biblia nga ini gid Pulong sang Dios. Wala sing libro nga ginhimo sang mga tawo lamang ang makakobre sa madamo gid kag nanunaytuhay nga bahin sang kabuhi kag tuman ka mahinantupon kag husto pirme. Apang may isa pa ka kamatuoran nahanungod sa Biblia nga nagapakita nga ini naghalin sa Dios. May gahom ini sa pagpabag-o sa katawhan para sa maayo pa. Ipaathag namon ini sa masunod nga artikulo.

Mapaathag Mo Bala?

◻ Sa anong paagi ang mga Saksi ni Jehova ginapakamaayo bangod sang ila pagbaton sa Biblia subong Pulong sang Dios?

◻ Subong mga tawo nga nagapati sa Pulong sang Dios, ano ang aton obligasyon, kag paano ang aton paggawi makabulig sa aton sa pagtuman sini nga obligasyon?

◻ Ano ang nagahimo sa maalamon nga laygay sang Biblia nga superyor sa laygay sang tawo lamang?

◻ Ano ang pila ka halimbawa nga nagapakita sang kadalumon sang kaalam sang Biblia?