Ang Kabuhi kag Ministeryo ni Jesus

Ang Dalan Padulong sa Kabuhi

ANG dalan padulong sa kabuhi amo ang pagsunod sa mga panudlo ni Jesus. Apang indi ini mahapos himuon. Ang mga Fariseo, halimbawa, nahuyog sa paghukom sa iban sing padasudaso, kag mahimo nga madamo ang nagailog sa ila. Gani sang ginapadayon ni Jesus ang iya Wali sa Bukid, ginhatag niya ini nga laygay: “Dili kamo maghukom agod indi kamo paghukman; kay sa paghukom nga inyo ginahukom, hukman kamo.”

Makatalagam ilugon ang pagpanguna sang mamulayon kaayo nga mga Fariseo. Suno sa kasaysayan ni Lucas, ginailustrar ni Jesus ini nga katalagman paagi sa pagsiling: “Makatuytuy bala ang bulag sa bulag? Indi bala mahulog sila nga duha sa buho?”

Ang sobra nga pagkamamulayon sa iban, nga nagapadaku sa sayop nila, isa ka mabug-at nga sala. Gani namangkot si Jesus: “Paano bala ang pagsiling mo sa imo utod, ‘Ipakuha sa akon ang puling sa imo mata’; nga, toloka! may balayanon sa imo kaugalingon nga mata? Salimpapaw! Kuhaa anay ang balayanon sa imo kaugalingon nga mata, kag ugaling makakita ka sing maayo sa pagkuha sang puling sa mata sang imo utod.”

Wala ini nagakahulugan nga ang mga disipulo ni Jesus indi magagamit sing paghangop sa iban nga tawo, kay nagsiling sia: “Dili ninyo pag-ihatag sa mga ido ang mga butang nga balaan, ukon pag-ipilak ang inyo mga mutya sa atubangan sang mga baboy.” Ang mga kamatuoran gikan sa Pulong sang Dios balaan. Kaangay sila sa malaragwayon nga mutya. Apang kon ang iban nga mga indibiduwal, nga kaangay sang mga ido ukon mga baboy, wala nagapakita sing apresasyon sa sining hamili nga mga kamatuoran, bayaan sang mga disipulo ni Jesus ina nga mga tawo kag magapangita sing mga dulunggan nga labi ka mabinatunon.

Bisan pa ginhambalan ni Jesus ang pangamuyo sing una sa iya wali, ginapadaku niya karon ang kinahanglanon nga padayunon ini. “Padayon sa pagpangayo,” laygay niya, “kag kamo hatagan.” Agod iilustrar ang kahanda sang Dios sa pagsabat sa mga pangamuyo, si Jesus namangkot: “Sin-o bala ang tawo sa inyo nga kon ang iya anak magpangayo sing tinapay—magahatag sa iya sing bato? . . . Nian, kon kamo, nga malaut, makahibalo maghatag sing maayo nga mga dulot sa inyo mga anak, daw ano pa gid nga maayo nga mga butang ang ihatag sang inyo Amay nga yara sa langit sa mga nagapangayo sa iya?”

Sing masunod, si Jesus nagahatag sang kon ano ang nangin bantog nga pagsulondan sang pagginawi, nga ginatawag sing kinaandan nga Bulawanon nga Pagsulondan. Nagsiling sia: “Busa, ang tanan nga butang nga buot ninyo nga himuon sang mga tawo sa inyo, himoa man ninyo sa ila.” Ang pagsunod sa sining pagsulondan nagadalahig sang positibo nga aksion sa paghimo sing maayo sa iban, nagatratar sa ila sa luyag mo nga itratar sa imo.

Nga ang dalan padulong sa kabuhi indi mahapos ginpakita sa instruksion ni Jesus: “Sulod kamo sa gawang nga makitid; kay masangkad nga gawang kag malapad ang dalan nga nagapadulong sa kalaglagan, kag madamo ang mga nagasulod sa sini; kay makitid ang gawang kag masiput ang dalan nga nagapadulong sa kabuhi, kag pila lamang ang nakatultul sa sini.”

Ang katalagman nga patalangon daku, gani si Jesus nagapaandam: “Andam kamo sa dimatuod nga mga manalagna nga nagaabot sa inyo nga nagapanapot sang panapton sang karnero, apang sa sulod manunukub nga mga lobo.” Subong nga ang maayo nga kahoy kag malain nga kahoy makilala paagi sa ila mga bunga, siling ni Jesus, ang dimatuod nga mga manalagna makilala man paagi sa ila pagginawi kag mga panudlo.

Nagapadayon, si Jesus nagapaathag nga indi lamang kon ano ang ginasiling sang isa ang nagahimo sa iya nga disipulo Niya kundi kon ano ang ginahimo niya. Ang iban nga mga tawo magaangkon nga si Jesus amo ang ila Ginuo, apang kon wala nila ginahimo ang kabubut-on sang iya Amay, sia magasiling: “Pahayagan ko sila: Wala gid ako makakilala sa inyo! Palayo sa akon, kamo nga mga manugbuhat sang kalautan.”

Sa katapusan, ginahatag ni Jesus ang halandumon nga konklusion sang iya wali. Sia nagasiling: “Ang tagsatagsa nga nagapamati sining mga pulong ko kag nagatuman sa ila ipaangay sa tawong mainandamon nga nagtukud sang iya balay sa ibabaw sang igang. Kag nag-ulan kag nagbaha kag naghuyup ang kahanginan kag nagsampi sadtong balay kag wala ini mapukan, kay natukud ini sa ibabaw sang igang.”

Sa pihak nga bahin, si Jesus nagasiling: “Ang tagsatagsa nga nagapamati sining mga pulong ko kag wala nagatuman sa ila ipaanggid sa tawong buangbuang nga nagtukud sang iya balay sa ibabaw sang balas. Kag nag-ulan kag nagbaha kag naghuyup ang kahanginan kag nagsampi sadtong balay kag napukan ini, kag daku ang iya pagkapukan.”

Sang gintapos ni Jesus ang iya wali, ang kadam-an natingala sang iya panudlo, kay nagpanudlo sia sa ila subong sang isa nga may pagbulut-an kag indi subong sang ila relihioso nga mga lider. Mateo 7:1-29; Lucas 6:27-49.

◆ Ano ang ginsiling ni Jesus nahanungod sa paghukom sa iban; apang paano niya ginpakita nga ang iya mga disipulo nagakinahanglan sa paggamit sing paghangop nahanungod sa mga tawo?

◆ Ano ang dugang nga ginsiling ni Jesus nahanungod sa pangamuyo, kag ano nga pagsulondan sang pagginawi ang ginhatag niya?

◆ Paano ginpakita ni Jesus nga ang dalan padulong sa kabuhi indi mahapos kag may katalagman nga patalangon?

◆ Paano gintapos ni Jesus ang iya wali, kag ano ang epekto sini?