Nagpabawtismo si Jesus

Mga anom ka bulan na nga nagsugod sa pagbantala si Juan nga Manugbawtismo sang nagkadto ang manug-30 anyos nga si Jesus sa iya sa Suba Jordan. Ngaa? Indi lamang ini pagpamasyar ukon gusto lang niya kamustahon ang pagbantala ni Juan. Kundi, ginpangabay ni Jesus si Juan nga bawtismuhan sia.

Siempre, nangindi si Juan: “Nagkadto ka bala sa akon agod magpabawtismo? Apang ako ang dapat magpabawtismo sa imo.” (Mateo 3:14) Nahibaluan ni Juan nga si Jesus pinasahi nga Anak sang Dios. Dumduma nga sang ginabusong pa lang si Juan, nagkibo sia sang nagbisita sa iya iloy nga si Elisabet si Maria, nga nagabusong kay Jesus. Mahimo gid nga ginsugiran sia sang iya iloy parte sini. Kag mahimo nahibaluan niya ang pagpahibalo sang anghel sa pagkabun-ag ni Jesus kag ang parte sa mga anghel nga nagpakita sa mga manugbantay sang karnero sa gab-i nga natawo si Jesus.

Nahibaluan ni Juan nga ang iya pagbawtismo para sa mga naghinulsol sang ila mga sala. Pero si Jesus wala sing sala. Bisan pa nga nangindi si Juan, namilit si Jesus: “Indi ako pagpunggi, kay sa sini nga paagi nagakaigo para sa aton nga himuon ang tanan nga matarong.”—Mateo 3:15.

Ngaa nagakaigo nga magpabawtismo si Jesus? Bawtismuhan sia indi bilang simbulo sang paghinulsol sang mga sala. Ang iya pagpabawtismo nagapakita nga ginapresentar niya ang iya kaugalingon sa paghimo sang kabubut-on sang iya Amay. (Hebreo 10:5-7) Isa ka panday si Jesus, pero tion na karon nga sugdan niya ang ministeryo nga ginsugo sang iya Amay sa langit nga himuon niya sa duta. Ginapaabot bala ni Juan nga may tumalagsahon nga matabo kon bawtismuhan niya si Jesus?

Sang ulihi, si Juan nagsiling: “Ang Dios nga nagpadala sa akon sa pagbawtismo paagi sa tubig nagsiling sa akon: ‘Kon kay sin-o mo makita nga nagkunsad kag nagpabilin ang akon balaan nga espiritu, sia amo ang magabawtismo paagi sa balaan nga espiritu.’” (Juan 1:33) Gani ginapaabot ni Juan nga magakunsad ang espiritu sang Dios sa isa nga iya bawtismuhan. Sang nagtakas si Jesus sa tubig, mahimo nga wala na nakibot si Juan sang nakita niya “ang espiritu sang Dios nga nagapanaug kaangay sang salampati kag nagkunsad [kay Jesus].”—Mateo 3:16.

Pero indi lang amo sina ang natabo sang ginbawtismuhan si Jesus. ‘Ginbuksan ang langit’ sa iya. Ano ang buot silingon sini? Mahimo nagakahulugan ini nga sang ginbawtismuhan si Jesus, nagbalik sa iya hunahuna ang kabuhi niya sa langit antes sia nangin tawo. Gani, nadumduman niya ang iya kabuhi subong espiritu nga anak ni Jehova, lakip na ang gintudlo sa iya sang Dios nga mga kamatuoran sa langit antes sia nagkadto sa duta.

Dugang pa, sang ginbawtismuhan si Jesus, may tingog nga naghalin sa langit: “Ini ang akon Anak, ang hinigugma, nga ginakahamut-an ko.” (Mateo 3:17) Kay sin-o ini tingog? Indi ini tingog ni Jesus kay kaupod sia ni Juan. Tingog ini sang Dios. Maathag nga si Jesus Anak sang Dios. Indi sia ang Dios.

Talalupangdon nga si Jesus isa ka tawo nga anak sang Dios, pareho sang una nga tawo nga si Adan. Pagkatapos malaragway ni disipulo Lucas ang bawtismo ni Jesus, nagsulat sia: “Mga 30 ka tuig ang edad ni Jesus sang ginsugdan niya ang iya hilikuton, kag suno sa ginahunahuna sang mga tawo, anak sia ni Jose, nga anak ni Heli, . . . nga anak ni David, . . . nga anak ni Abraham, . . . nga anak ni Noe, . . . nga anak ni Adan, nga anak sang Dios.”—Lucas 3:23-38.

Kaangay ni Adan, si Jesus tawo man nga “anak sang Dios.” Paagi sa iya pagpabawtismo, natigayon niya ang bag-o nga kaangtanan sa Dios, ang mangin espirituwal nga Anak sang Dios. Gani, may awtoridad si Jesus nga magtudlo sang kamatuoran halin sa Dios kag itudlo ang dalan padulong sa kabuhi. Ginsugdan ni Jesus ang pagkabuhi nga sa ulihi ihalad niya ang iya kabuhi bilang tawo para sa makasasala nga katawhan.