Ang Kabuhi kag Ministeryo ni Jesus

Ang Ikaduha nga Milagro sa Cana

SANG magpauli si Jesus sa iya teritoryo sa tapos sang masangkad nga pagbantala sa Judea, wala sia sing tuyo nga magpahuway. Sa baylo, ginsugdan niya ang isa ka daku pa nga ministeryo sa Galilea, ang duta nga iya gindak-an. Apang ang iya mga disipulo, sa baylo nga mag-upod sa iya, nagpauli sa ila mga pamilya kag sa ila anay mga trabaho.

Anong mensahe ang ginbantala ni Jesus? Amo ini: “Ang ginharian sang Dios malapit na. Maghinulsol kamo, kag magtuo sa maayong balita.” Kag ang sabat? Ginbaton sang mga taga-Galilea si Jesus. Ginpadunggan sia sang tanan. Apang, indi ini bangod sang iya mensahe kundi, sa baylo, bangod madamo sa ila ang didto sa Paskua sa Jerusalem sang binulan nga nagligad kag nakita nila ang talalupangdon nga mga tanda nga ginhimo niya.

Mahimo nga ginsugdan ni Jesus ang iya pagministeryo sa Galilea didto sa Cana. Madumduman ninyo nga antes sini, sang magbalik sia gikan sa Judea ginhimo niya nga alak ang tubig sa isa ka sinalusalo sang kasal didto. Sa sining ikaduha nga okasyon ang anak sang isa ka opisyal sang pangulohan ni Hari Herodes Antipas nagmasakit. Sang mabatian nga si Jesus nag-abot sa Cana gikan sa Judea, naglakbay ang opisyal gikan pa sa iya balay sa Capernaum agod pangitaon sia. Sing masubo, nagpakiluoy sia: ‘Dulhog palihug sa wala pa mapatay ang akon bata.’

Si Jesus nagsabat: ‘Pauli ka. Ang imo anak nag-ayo na!’ Nagpati ang opisyal ni Herodes kag nagsugod sang malawig nga paglakbay pauli. Sa dalanon ginsugata sia sang iya mga alagad, nga nagdalidali sa pagsugid sa iya nga wala na sing problema—ang iya anak nag-ayo na! ‘San-o sia nag-ayo?’ pamangkot niya.

‘Kahapon sang ala 1:00 s.h.,’ sabat nila.

Narealisar sang opisyal nga amo gid ini ang oras sang si Jesus nagsiling, ‘Ang imo anak nag-ayo na!’ Sa tapos sadto, ang tawo kag ang iya bug-os nga panimalay nangin mga disipulo ni Cristo.

Sa amo ang Cana ginpaboran subong amo ang duog nga diin, sa iya pagpauli halin sa Judea, si Jesus makaduha nga naghimo sing mga milagro. Ang mga ini, sa pagkamatuod, indi lamang ang mga milagro nga iya ginhimo tubtob sining tinion, apang importante ini sila bangod gintandaan sini ang iya pagbalik sa Galilea.

Nagpauli karon si Jesus sa Nasaret. Ano ang nagahulat sa iya didto? Juan 4:43-54; Marcos 1:14, 15; Lucas 4:14, 15.

◆ Sang magbalik si Jesus sa Galilea, ano ang natabo sa iya mga disipulo, kag paano sia ginbaton sang mga tawo?

◆ Anong milagro ang ginhimo ni Jesus, kag paano ini nag-apektar sa mga nadalahig sa sini?

◆ Paano sa amo ginpaboran ni Jesus ang Cana?

[Bug-os pahina nga retrato pahina 8]