Ginpasangkad Niya ang Iya Ministeryo sa Galilea

Masako gid si Jesus kag ang apat niya ka disipulo sa Capernaum. Sang gab-i, gindala sa iya sang mga taga-Capernaum ang mga masakiton para ayuhon. Wala na sia sing tion para mag-isahanon.

Pagkaaga samtang madulom pa, nagbangon si Jesus kag naggua. Nagkadto sia sa malinong nga lugar para mangamuyo sa iya Amay. Pero wala lang yadto magdugay. Sang natalupangdan nila nga wala sia, ginpangita sia ni “Simon kag sang iya mga kaupod.” Mahimo nga si Pedro ang nanguna kay sa iya balay si Jesus nagadayon.—Marcos 1:36; Lucas 4:38.

Sang nakita nila si Jesus, nagsiling si Pedro: “Ang tanan nagapangita sa imo.” (Marcos 1:37) Indi katingalahan nga gusto sang mga taga-Capernaum nga magtener pa didto si Jesus. Gin-apresyar gid nila ang ginhimo niya, gani “nagpakiluoy sila sa iya nga indi sia magbiya sa ila.” (Lucas 4:42) Pero, nagkadto bala si Jesus sa duta para lang magpang-ayo? Kag diri lang bala nga lugar sia magapanghikot? Ano ang iya ginsiling?

Ginsilingan ni Jesus ang iya mga disipulo: “Makadto kita sa iban nga lugar, sa malapit nga mga banwa, agod makabantala man ako didto, kay nagkari ako sa sini nga katuyuan.” Ginsilingan pa gani niya ang mga tawo nga gusto nga magpabilin sia: “Dapat ko man ibantala ang maayong balita sang Ginharian sang Dios sa iban nga mga siudad, kay tungod sini ginpadala ako.”—Marcos 1:38; Lucas 4:43.

Ang panguna nga rason kon ngaa nagkadto si Jesus sa duta amo nga ibantala ang Ginharian sang Dios. Pakabalaanon sini nga Ginharian ang ngalan sang iya Amay kag dulaon sing permanente ang tanan nga balatian. Ginpamatud-an niya nga sia ang ginpadala sang Dios paagi sa pagpang-ayo. Mga ginatos ka tuig antes sini, ginpamatud-an man ni Moises nga ginpadala sia sang Dios paagi sa tumalagsahon nga mga buhat.—Exodo 4:1-9, 30, 31.

Gani naghalin si Jesus sa Capernaum para magbantala sa iban nga siudad, kag nag-upod ang iya apat ka disipulo. Sila amo si Pedro kag ang iya utod nga si Andres kag si Juan kag ang iya utod nga si Santiago. Sang nagligad lang nga semana gin-agda sila ni Jesus nga mag-upod sa iya.

Nagmadinalag-on gid ang pagbantala ni Jesus sa bug-os nga Galilea upod sa apat ka disipulo! Nagbantog gid si Jesus. “Ang balita tuhoy sa iya naglapnag sa bug-os nga Siria,” sa rehiyon sang napulo ka siudad nga ginatawag nga Decapolis, kag sa tabok sang Suba Jordan. (Mateo 4:24, 25) Nagsunod kay Jesus kag sa iya mga disipulo ang daku nga kadam-an sa sini nga mga lugar, pati sa Judea. Madamo ang nagpabulong sa iya. Wala sila ginpabay-an ni Jesus kundi gin-ayo niya ang mga may balatian kag ginpagua ang malaut nga mga espiritu sa mga ginsudlan sang demonyo.