Ginhimo Nila ang Kabubut-on ni Jehova

Si Jesus Naghinguyang sing Tion Upod sa Kabataan

NAGAHINGAPOS na sadto ang tatlo-kag-tunga-ka-tuig nga ministeryo ni Jesus. Sa indi madugay magasulod sia sa Jerusalem kag atubangon ang masakit nga kamatayon. Nakahibalo gid sia sang matabo, kay ginsilingan niya ang iya mga disipulo: “Ang Anak sang tawo itugyan sa mga kamot sang mga tawo, kag patyon nila sia.”​—⁠Marcos 9:⁠31.

Pat-od gid nga luyag ni Jesus himuslan ang kada adlaw, kada oras, ang kada tion nga nabilin. Ang iya mga disipulo alatipanon pa gihapon. Nakita ni Jesus nga kinahanglan pa nila ang mabaskog nga laygay tuhoy sa kinahanglan nga magpaubos kag ang pirme nga katalagman nga masandad. (Marcos 9:​35-​37, 42-​48) Kinahanglan man sila paathagan tuhoy sa pag-asawahay, diborsio, kag pagkadiminyo. (Mateo 19:​3-12) Bangod nahibal-an niya nga malapit na lang sia mapatay, walay duhaduha nga nakighambal si Jesus sa iya mga disipulo sing maathag kag may pagkahilingagawon. Importante gid sadto ang tion​—⁠ang katunayan nga naghimo nga labi pa ka talalupangdon ang masunod nga ginhimo ni Jesus.

Gin-abiabi ni Jesus ang Kabataan

Ang rekord sang Biblia nagasiling: “Ang mga tawo nagdala sa iya sing kabataan nga magamay agod nga tandugon niya sila.” Sang makita ini sang mga disipulo, namatok sila gilayon. Ayhan nangatarungan sila nga tuman ka importante ukon kasako si Jesus agod kabalak-an pa ang kabataan. Nian, handurawa lamang ang kakibot sang mga disipulo sang naakig si Jesus sa ila! “Tuguti ninyo ang kabataan sa pagkari sa akon,” siling niya sa ila. “Indi ninyo sila pagpunggi, kay ang ginharian sang Dios ila sang mga kasubong nila.” Nian si Jesus nagdugang: “Sa pagkamatuod nagasiling ako sa inyo, Ang bisan sin-o nga indi magbaton sang ginharian sang Dios kaangay sang bata nga magamay indi sia makasulod sa sini.”​—⁠Marcos 10:​13-​15.

Nakita ni Jesus ang dalayawon nga mga kinaiya sa kabataan. Masami sila nga mausisaon kag masinaligon. Ginapamatian nila ang ginasiling sang ila mga ginikanan kag ginapangapinan pa gani sila sa iban nga kabataan. Ang ila pagkamabinatunon kag pagkamatudluan takus gid ilugon sang tanan nga luyag makasulod sa Ginharian sang Dios. Subong sang ginsiling ni Jesus, “ang ginharian sang Dios iya sang mga kasubong nila.”​—⁠Ipaanggid ang Mateo 18:​1-5.

Apang wala lamang gingamit ni Jesus ining kabataan tungod lang sa isa ka ilustrasyon. Ginapaathag sang rekord nga luyag gid ni Jesus makig-upod sa ila. Si Marcos nagsiling nga “ginkugos [ni Jesus] ang kabataan kag ginpakamaayo sila, nga nagapandong sang iya mga kamot sa ila.” (Marcos 10:16) Ang rekord lamang ni Marcos ang nagalakip sing mahigugmaon nga detalye nga “ginkugos [ni Jesus] ang kabataan.”a Sa amo, sobra pa ang ginhimo ni Jesus sa ginapaabot sang mga hamtong, nga nagdala sining kabataan kay Jesus agod nga “tandugon” lamang niya sila.

Ano ang kahulugan sang ‘pagpandong [ni Jesus] sang iya mga kamot’ sa kabataan? Wala diri ginapahangop ang isa ka relihioso nga seremonya, subong sang pagbawtismo. Bisan pa sa pila ka okasyon, ang pagpandong sang mga kamot nagakahulugan sing pagtangdo, sa iban nagakahulugan lamang ini sing paghatag sing pagpakamaayo. (Genesis 48:14; Binuhatan 6:⁠6) Gani mahimo gid nga ginpakamaayo lamang ni Jesus ang kabataan.

Ano man ang kahulugan sini, nagagamit si Marcos sing mabaskog nga tinaga para sa “pagpakamaayo” (ka·teu·lo·geʹo), nga nagapakita sing daku nga puwersa. Nagapahangop ini nga ginpakamaayo ni Jesus ang kabataan sing hanuot, mapinalanggaon, kag mahigugmaon. Maathag nga wala niya gintamod ang kabataan subong nagauyang sing tion nga kabug-atan.

Leksion Para sa Aton

Ang paagi sang pagpakig-angot ni Jesus sa kabataan kag sa mga hamtong indi makakululba ukon makapanubo. “Mahimo nga nagayuhum sia gilayon ukon nagakadlaw sing masinadyahon,” siling sang isa ka reperensia. Indi katingalahan nga ang mga tawo sa tanan nga pangidaron napahamtang ang buot kon kaupod niya. Ginahunahuna ang huwaran ni Jesus, mahimo naton pamangkuton ang aton kaugalingon, ‘Madali bala ako mapalapitan sang iban?’ ‘Daw tuman bala kasako sa akon nga indi na matublag sang mga hilikuton kag mga problema sang iban?’ Ang pagpalambo sing sinsero nga interes sa mga tawo magapahulag sa aton nga ihatag ang aton kaugalingon, subong sang ginhimo ni Jesus. Mabatyagan sang iban ang aton matuod nga interes kag mapahilapit sila sa aton.​—⁠Hulubaton 11:⁠25.

Subong sang ginapakita sang rekord ni Marcos, nalipay si Jesus upod sa kabataan. Mahimo gid nga naghinguyang sia sing tion agod tan-awon sila samtang nagahampang, kay ginpatuhuyan niya ang ila mga hampang sa isa sang iya mga ilustrasyon. (Mateo 11:⁠16-​19) Ayhan ang pila sang mga kabataan nga ginpakamaayo ni Jesus bata pa kaayo agod makilala sia kag mahangpan ang iya ginatudlo. Apang wala niya ginbatyag nga ginauyangan niya ang iya tion. Naghinguyang sia sing tion sa kabataan bangod ginahigugma niya sila. Mahimo nga madamo sang kabataan nga nasumalang ni Jesus sa tion sang iya ministeryo ang napahulag sang ulihi nga mangin iya mga disipulo bangod sang iya gugma.

Kon nakahinguyang sing tion si Jesus upod sa kabataan sa tion sang ital-ital, katapusan nga senemana sang iya kabuhi, pat-od gid nga makahatag kita sing tion sa ila sa aton masako nga iskedyul. Ilabi na nga mangin mahunahunaon kita sa mga may pinasahi nga pagkinahanglan, subong sang ilo nga kabataan. Sa pagkamatuod, ang tanan nga kabataan nagakalipay kon ginahatagan sila sing atension, kag luyag ni Jehova nga hatagan naton sila sing tanan nga gugma kag bulig tubtob masarangan naton.​—⁠Salmo 10:⁠14.

[Footnote]