“Magmapinasalamaton Kamo”

“Pagahuma ang paghidait ni Cristo sa inyo tagipusuon . . . Kag magmapinasalamaton kamo.”​—⁠COLOSAS 3:⁠15.

1. Batok sa ano dapat magbantay ang mga Cristiano sa sining dimapinasalamaton nga kalibutan?

INING magamo nga ika-20 nga siglo nakalab-ot sa panahon nga sa diin madamo nga tawo ang nalipat na kon paano mangin mapinasalamaton. Ang mainapresyahon nga mga pulong nga “palihog” kag “salamat” nagalaka kag nagalaka nga mabatian sa pagligad sang tagsa ka tuig. Ang pagkadimapinasalamaton nangin bahin sang “hangin,” ang makagud nga espiritu nga nagapangibabaw sa katawhan sining kalibutan. (Efeso 2:​1, 2) Bisan pa ang mga Cristiano “indi bahin sang kalibutan,” dapat sila magpuyo sa sini tubtob nagapadayon ang sistema sang mga butang karon. (Juan 17:​11, 16) Busa, dapat sila maghalong nga ining dimapinasalamaton nga espiritu indi maglaton sa ila, nga mahimo magbuhin sang ila pagkamapinasalamaton.

2. (a) Ano ang pila ka paagi nga sa diin ang mga alagad ni Jehova mahimo magpabutyag sing pagkamapinasalamaton sa iya? (b) Ano ang kinahanglanon labaw sa pagpabutyag sing pasalamat sa pulong lamang?

² Ang apresasyon sa pagkaayo sang Dios mahimo mapabutyag sing masunson sa pagpakighambal sa mga masigkatumuluo. Ang kalabanan sang dedikado nga mga Cristiano mahimo nga nagapasalamat sa ila langitnon nga Amay, si Jehova, bangod sang iya pagkaayo sing pila ka beses sa isa ka adlaw, nga ginahimo ini sa personal nga pangamuyo. Ang pagkamapinasalamaton ginapabutyag man sa mga pangamuyo sang kongregasyon kag samtang nagaamba sing mga ambahanon sang Ginharian sa Cristianong mga miting. Sa pagkamatuod, mahapos magpabutyag sing pasalamat sa mga pulong. Apang, ginpalig-on ni apostol Pablo ang iya kauturan sa Colosas nga indi lamang magsiling nga mapinasalamaton sila kundi ipakita man ukon ipasundayag ang pagkamapinasalamaton sa ila adlaw-adlaw nga pagkabuhi. Sia nagsulat: “Pagahuma ang paghidait ni Cristo sa inyo tagipusuon, kay sa kamatuoran, gintawag kamo sa sini sa isa ka lawas. Kag magmapinasalamaton kamo.”​—⁠Colosas 3:⁠15.

Bugana nga Kabangdanan sang Pagkamapinasalamaton

3. Ngaa dapat kita tanan mangin mapinasalamaton sa Dios?

³ Ang tanan nga nagakabuhi may bugana nga rason sa pagkamapinasalamaton. Ang labing daku nga rason amo ang kabuhi gid, kay ang tanan nga ginapanag-iyahan naton ukon ginaplano hinali nga mangin wala sing pulos kon madula naton ang aton kabuhi. Ginlaygayan ni salmista David ang tanan nga tawo nga dumdumon nga “sa imo [Jehova nga Dios] yara ang tuburan sang kabuhi.” (Salmo 36:⁠9) Kag ginpahanumdom ni apostol Pablo ang mga taga-Atenas sang amo gihapon nga dayon nga kamatuoran sang nagapamulong sia sa Areopago. (Binuhatan 17:28) Huo, ang mangin buhi lamang isa ka bugana nga kabangdanan sa pagkamapinasalamaton. Kag ang aton apresasyon nagadaku pa kon dumdumon naton ang mga kinaiya nga ginhatag sa aton sang Dios​—⁠ang sentido sa pagsabor, sa pagtandog, sa pagpanimaho, sa pagtan-aw kag sa pagpamati​—⁠agod nga malipay kita sa kabuhi kag sa mga katahom sang tinuga sa palibot naton.

4. Ano ang magaamlig sa aton gikan sa pagpasapayan sa mga pagpakamaayo sang kabuhi?

⁴ Apang, madamo ang nagapasapayan sining maayong mga butang. Marealisar lamang sang madamo nga tawo ang mga pagpakamaayo nga wala nila maapresyar sang maayo pa ang ila panglawas kon ang isa ka ikasarang, subong sang panan-aw ukon palamatin-an madula sa ila. Ang dedikado nga mga Cristiano dapat pirme maghalong nga indi maanod sa pareho nga kakulang sing apresasyon. Dapat sila magpangabudlay sing lakas nga matipigan ang mapinasalamaton nga panimuot subong sang ginpakita sang salmista nga nagsiling: “O Jehova, nga akon Dios, madamo ang makatilingala nga buhat nga imo nahimo, kag ang imo mga hunahuna ayon sa amon; dili sila mapaanggid sa imo. Kon ako magpahayag kag magpamulong nahanungod sa ila, labi pa sila kadamo sa maisipan ko.”​—⁠Salmo 40:⁠5.

5. Walay sapayan sang dugang pa nga mga pagpakamaayo sa Israel gikan kay Jehova, anong makahuluya nga dalanon ang ginsunod nila?

⁵ Ang ika-106 sang Salmo nagahatag sing mabinalaybayon nga sumaryo sang gamhanan nga mga buhat nga ginhimo ni Jehova para sa iya katawhan, ang Israel. Ang mga pagpakig-angot sang Dios sa ila dugang pa sa pagkamaayo kag normal nga mga pagpakamaayo sang kabuhi nga iya ginahatag sa katawhan sa kabilugan. Apang, walay sapayan sining mga bentaha, ginapakita sang salmista nga ang mga Israelinhon wala magpadayon sa pagpakita sing apresasyon sa tumalagsahon nga mga pagpakamaayo sa ila. Ang bersikulo 13 nagasiling: “Sa madali nalipat sila sang iya mga binuhatan; wala sila maghulat sang iya laygay.” Indi, indi ang pagligad sang tion ang amat-amat nga nagbuhin sang ila pagkamapinasalamaton, amo kon ngaa mga dekada sang ulihi wala na nila madumduman ang ginhimo sang Dios para sa ila. Sa baylo, nalipat sila sa madali​—⁠sa sulod sang mga semana sang talalupangdon nga mga milagro ni Jehova para sa ila sa Dagat nga Mapula. (Exodo 16:​1-3) Sing makapasubo, ang mga hitabo sang ulihi nagpakita nga ang pagkadimapinasalamaton nangin regular nga sulundan sang ila kabuhi.

Kon Paano Magpakita sing Pagkamapinasalamaton

6. Ngaa indi mabudlay ang ginapatuman nga ikapulo?

⁶ Sing detalyado, ginhambal ni Jehova ang tatlo ka espisipiko nga paagi nga ang mga Israelinhon makapakita sing matuod nga apresasyon sa iya pagkamaayo. Ang isa amo ang pagtuman sa ginapatuman nga ikapulo paagi sa paghatag kay Jehova sang ikapulo sang tanan nga patubas kag panong. (Levitico 27:​30-32) Indi ini mabudlay, kay ang Dios ang may salabton sa adlaw, sa matambok nga duta, sa ulan, kag sa milagro sang pagtubo. Gani, ang paghatag sing ikapulo sa mga saserdote sa santuaryo ni Jehova isa ka praktikal nga pagpabutyag sang pagkamapinasalamaton kay Jehova.

7. (a) Ano ang daku nga kinatuhayan sang paghatag sing ikapulo kag sang paghatag sing mga amot kay Jehova? (b) Ano ang gintugutan sini nga ipahayag sang mga Israelinhon nahanungod sa ila kaugalingon?

⁷ Ang isa pa ka kinahanglanon amo ang paghatag sing mga amot sa Dios nga ang kadamuon sini ginapamat-uran sang panimuot sang tagipusuon sang indibiduwal nga Israelinhon. Samtang wala sing kadamuon nga ginpat-od, ang mga amot dapat nga gikan sa nahauna nga mga bunga​—⁠sa nahauna sang uyas, sang alak, kag sang bulbol sang karnero. (Numeros 15:​17-21; Deuteronomio 18:⁠4) Dugang pa, nagsugo si Jehova nga ang iya katawhan ‘dili magpangalag-ag sa paghatag’ kag magahatag sang ‘pinakaali sa nahauna nga mga bunga.’ (Exodo 22:29; 23:19) Naghatag ini sa mga Israelinhon sing mga kahigayunan sa pagpakita sang ila pagkamapinasalamaton kay Jehova sa kitaon nga paagi. Mapakita nila ang kadalumon sang ila pagkamapinasalamaton paagi sa kadamuon sang ila mga amot. Magaamot bala sila sing isa lamang ka pongpong sang ubas? Ukon ang isa ka maalwan nga tagipusuon magapahulag bala sa ila sa paghatag sing isa ka alat sang ubas? Sa amo, ang tagsa ka tawo ukon pamilya makapasundayag sing pagkamapinasalamaton nga wala ginapilit.

8. (a) Ano ang duha ka benepisyo nga gin-aman sang kahimusan sa pagpanaghaw? (b) Paano ang pagkaalwan kag pagkamapinasalamaton mapasundayag sang tanan nga nadalahig sa kahimusan sa pagpanaghaw?

⁸ Ang ikatlo nga paagi sa pagpakita sing pagkamapinasalamaton amo ang may kaangtanan sa aman sang Dios para sa pagpanaghaw. Sa tig-alani, may mga bahin nga wala maani nga ginabilin para sa mga imol. Indi lamang nga nagtudlo ini sing kaluoy kag pagpatugsiling sa mga imol kundi nagpasalig ini nga sila indi magkabuhi sa mga limos, nga wala sing pagpanikasog sa ila bahin. (Levitico 19:​9, 10) Wala ginpat-od kon daw ano nga kadamuon ang ibilin para sa mga imol. Apang kon ang Israelinhon nga mga mangunguma nagpakita sing maalwan nga espiritu paagi sa pagbilin sing madamo sa higad sang ila mga uma kag sa amo nagapakita sing pabor sa mga imol, ginahimaya nila ang Dios. (Hulubaton 14:31) Yara sa ila ang pagdesisyon kon bala makitid ukon malapad nga bahin sang wala maani ang ila ibilin. Apang ang Dios nagasugo gid sing pagkaalwan paagi sa pagtudlo nga ang bisan anong linaylay nga nalipatan sa uma kag ang bisan anong bunga nga nabilin sa kahoy ukon puno sang ubas dapat ihatag sa mga manugsaghaw. (Deuteronomio 24:​19-22) Nian, ang mga manugsaghaw makapakita sang ila pagkamapinasalamaton kay Jehova sa sining aman paagi sa paghatag sang ikapulo sang ila mga sinaghaw sa iya duog sang pagsimba.

Pagkaalwan sang Tagipusuon?

9. Ngaa ang mga nagapakita sing makagod nga panimuot aktuwal nga nagahalit sa ila kaugalingon?

⁹ Kon ang mga Israelinhon maalwan sa pag-amot, pakamaayuhon ni Jehova ina nga panimalay. (Ipaanggid ang Ezequiel 44:30; Malaquias 3:10.) Apang, walay sapayan sang bugana nga mga ani, masunson sila napaslawan sa paghatag sang ila mga amot. Nian gingamit sang Dios ang mga pahanumdom paagi sa mga hari ukon mga manalagna agod pukawon liwat ang ila pagkamapinasalamaton. Ang matuod, may nawasi ang makagod nga mga Israelinhon, kay wala ginapakamaayo ni Jehova ang mga wala nagahatag sing mga amot para sa iya pagsimba ukon para sa mga imol.

10. (a) Ano ang makalilipay nga mga resulta sang mga pahanumdom ni Hari Ezequias nahanungod sa pagkamapinasalamaton? (b) Nagdugay bala ining mga kahimtangan?

¹⁰ Sang isa ka bes, ang mga pahanumdom ni Hari Ezequias nagresulta sa makalilipay nga 14 ka adlaw nga selebrasyon sa Jerusalem. Napasag-uli sa espirituwal ang katawhan. Nahauna, ginlaglag nila ang tanan nga butang sang pagsimba sa idolo kag dayon ‘naghatag sing tinumpok sa tinumpok. . . . Sang nag-abot kag nakita ni Ezequias kag sang mga prinsipe ang mga tinumpok, ginpakamaayo nila si Jehova kag ang iya katawhan nga Israel.’ (2 Cronica 30:​1, 21-23; 31:​1, 6-8) Apang, sing makapasubo, sa tapos sadtong mga panahon sang pagpasag-uli, nangin dimapinasalamaton liwat ang katawhan. Sa katapusan, ang pagpailob sang Dios naubos, kag gintugutan niya ang iya katawhan nga mabihag sang Babilonia. Ang ila siudad kag matahom nga templo ginlaglag. (2 Cronica 36:​17-21) Sang ulihi, sa tapos sang pagpasag-uli, ang mga kahimtangan nangin serioso liwat nga ginpaangay ni Jehova ang pagkakuom sang mga Judiyo sa pagpangawat sa iya.​—⁠Malaquias 3:⁠8.

11. Anong prinsipio nga naton-an gikan sa maragtas sang Israel ang makahatag sing benepisyo sa mga Cristiano nga nagakabuhi sa sining tion?

¹¹ Ano ang maton-an naton gikan sa nagabag-obag-o nga maragtas sang mga Israelinhon? Amo ini: Samtang ang pagkamapinasalamaton nagpabilin nga mabaskog sa ila tagipusuon, malipayon nga ginpakita nila ini paagi sa paghatag sing ‘mga tinumpok sa tinumpok’ kay Jehova. Apang sang malipatan ang pagkamapinasalamaton ukon nagbuhin ini, ang malipayon nga paghatag sing materyal halos nag-untat. Mahimo bala mapakita sang dedikado nga mga Cristiano karon inang malain nga panimuot? Huo, bangod dihimpit gihapon kita. Nalipay gid kita nga ginparekord sang Dios ang iya mga pagpakig-angot sa Israel agod nga kita, nga nagakabuhi sa katapusan sining sistema sang mga butang, makatuon kag makabenepisyo gikan sa ila!​—⁠Roma 15:4; 1 Corinto 10:⁠11.

12. (a) Paano ang katawhan ni Jehova karon yara sa kahimtangan nga kaanggid sa kahimtangan sang mga Israelinhon anay? (b) Anong mga pamangkot ang dapat naton ipamangkot?

¹² Kaangay sang mga Israelinhon, ang katawhan ni Jehova karon may madamo nga rason sa pagpasalamat. Nagabaton man kita sing kapin nga mga pagpakamaayo sang sa ginaagom sang aton mga isigkatawo. Sa kamatuoran, mas madamo ang nahibaluan naton nahanungod sa mga katuyuan ni Jehova sang sa katawhan anay sang Israel. Naton-an naton kon paano kinabubut-on nga ginhalad sang Dios ang iya Anak, kag nahibaluan naton ang mga pagpakamaayo nga dalhon sini sa mga nahamut-an sang Dios. Kag karon may pribilehiyo kita nga mangin sa espirituwal nga paraiso, kay kutob sang 1919, nagtuga si Jehova sing isa ka dakung espirituwal nga kahimtangan para sa iya katawhan. Huo, madamo sing dugang pa nga mga rason ang mga Saksi ni Jehova sa pagpasalamat. Gani dapat kita mamangkot: Daw ano kadalom ang aton pagkamapinasalamaton sa Dios? Kag paano naton mapakita ang aton kaugalingon nga mapinasalamaton sa sining ika-20 nga siglo?

Modernong-Adlaw nga mga Kaanggid

13, 14. Bisan pa ang mga Cristiano wala sa idalom sang Mosaikong Kasuguan, may pagkaanggid bala nga masambit para sa ila gikan sa sugo sang paghatag sing ikapulo?

¹³ Ang mga Cristiano wala sa idalom sang Mosaikong Kasuguan nga nagbalay kon paano ipasundayag ang pagkamapinasalamaton sa Dios. (Galacia 3:​24, 25) Ang aton “halad” sang pagdayaw kay Jehova amo “ang bunga sang mga bibig nga nagatu-ad sang iya ngalan.” (Hebreo 13:15) Amo ini, nian, ang nahauna nga paagi nga ang dedikado nga mga Cristiano makapakita sing pagkamapinasalamaton sa Dios. Apang may yara makawiwili nga mga pagkaanggid gikan sa kasuguan nahanungod sa ikapulo, paghatag sing mga amot, kag pagpanaghaw.

¹⁴ Ang tithing ukon ikapulo nagakahulugan sing paghatag sing espisipiko nga ikapulo​—⁠kag wala ini sing tal-us. Sing kaanggid, sa karon may yara espisipiko nga mga sugo sa tanan nga alagad ni Jehova, nga wala man sing mga tal-us. Dapat kita magtipon sing regular, kag dapat naton ibantala sa publiko ang maayong balita sang Ginharian ni Jehova kag buligan ang iban nga mangin mga disipulo ni Cristo.​—⁠Hebreo 10:​24, 25; Mateo 24:14; 28:​19, 20.

15. Anong mga tanda sang maalwan nga tagipusuon sa modernong mga tion ang nagaanggid sa mga ginpahayag sang mga amot kag mga kahimusan sa pagpanaghaw sa dumaan nga Israel?

¹⁵ Dumduma, man, ang mga kahimusan tuhoy sa paghatag sing mga amot kag sa pagpanaghaw. Wala sing espisipiko nga kadamuon nga ginsugo. Subong man, ang Kasulatan wala nagapahamtang sing espisipiko nga kadamuon sang tion para sa tagsa sang mga Saksi ni Jehova agod ihinguyang sa balaan nga pag-alagad. Ang kadamuon sang tion nga ginahugod sa pagtuon sang Pulong sang Dios kag sa pagbantala sa iban ginabilin sa pagpahulag sang maalwan kag dimakagud nga mga tagipusuon. Sing kaanggid, ang kasangkaron sang materyal nga mga amot para sa pagpauswag sa mga interes sang Ginharian ginabilin sa kon ano ang idikta sang tagipusuon sang tagsa ka indibiduwal. Ang kadalumon sang pagkamapinasalamaton amo ang magapat-od kon bala ang isa sang mga alagad sang Dios karon magadala sing “mga tinumpok sa mga tinumpok” ukon sing bastante lamang. (2 Cronica 31:⁠6) Apang, subong sang natabo sa Israel, sa daku pa nga pagpakita sang isa sing pagkamapinasalamaton, daku man nga mga pagpakamaayo ang mabaton niya gikan sa Dios.

Mga Paagi sa Pagpakita sing Pagkamapinasalamaton

16-18. Sa anong espisipiko nga mga paagi ang dedikado nga mga Cristiano makapakita sang ila kaugalingon nga mapinasalamaton?

¹⁶ Ang isa sang labing direkta nga mga paagi sa pagpasundayag sing pagkamapinasalamaton kay Jehova amo ang pagpakigbahin sa bug-os tion nga ministeryo. Nagakaigo bala ang kadakuon sang imo pagkamapinasalamaton nga mapahulag ang imo tagipusuon sa paghandum sina? Napanilagan nga ang madinalag-on nga payunir nagakinahanglan anay sing handum sa pag-alagad kag dayon sing husto nga mga kahimtangan. Kon mabaskog ang pagkamapinasalamaton, ang nagatiklod nga handum sa pag-alagad sa Dios sing dugang pa nagaawas sa isa ka mainapresyahon nga tagipusuon. Amo bala sina ang ginabatyag mo? Bisan pa kon ang imo mga kahimtangan karon wala nagatugot sa imo nga makaambit sa bug-os tion nga ministeryo, indi ini dapat magpugong sa imo espiritu sa pagpayunir. Sarang ka makahatag sing bug-os tagipusuon nga pagsakdag kag pagpalig-on sa mga payunir.

¹⁷ Kon indi ka makapayunir karon, mahimo ka bala makaauxiliary payunir sa tion kag tion? May yara pinasahi nga mga tion sa tagsa ka tuig nga ang Cristianong kongregasyon nagapalig-on sang kapin sa kinaandan nga panikasog sa pagbantala nga hilikuton. Ang mga binulan sang tig-ilinit, halimbawa, maayo gid para sa madamo, kag sa Oktubre may yara dugang pa nga hilikuton may kaangtanan sa kampanya sa suskripsion sa magasin. Tuhoy sa dugang pa nga tion para sa balaan nga pag-alagad, ang prinsipio matuod nga ang pagkamapinasalamaton nagapatubas sing maalwan nga paghatag.

¹⁸ Ang isa pa ka espisipiko nga paagi sa pagpakita sing pagkamapinasalamaton amo ang pagsakdag sa teokratikong programa sa pagtukod nga nagakatabo sa bilog nga duta. Sa madamo nga kadutaan, may bag-o nga mga Kingdom Hall nga ginatukod, kag ang nagaluntad nga mga hall ginapasangkad bangod sang pagginutok. Ginatukod ang bag-ong mga Assembly Hall, kag ginadugang ang mga ekstension sa mga Puluy-an Bethel kag mga pabrika. Daw ano ka praktikal nga paagi sa pagpasundayag sing pagkamapinasalamaton kay Jehova​—⁠sa pag-amot naton sing kusog ukon pinansial nga bulig sa pag-atipan sining mga proyekto sa pagtukod!

Maayong Halimbawa sang Imol nga Balo nga Babayi

19. Ano ang nagapadayaw gid sa imo nahanungod sa imol nga balo nga babayi sa templo?

¹⁹ Ang isa ka kilala nga halimbawa sa Biblia sa pagpakita sing pagkamapinasalamaton paagi sa maalwan nga paghatag sing materyal amo ang balo nga babayi nga ginlaragway ni Jesus. (Lucas 21:​1-4) Pat-od nga nahibaluan niya nga ang iya duha ka sensilyo nga manubo sing bili may diutay lamang nga mabulig sa templo kag sa mga alagad didto. Apang wala niya gintan-aw ang templo kag ang mga saserdote nga nagaalagad didto kag magsiling sa iya kaugalingon: ‘Mas maayo ang ila pagkabuhi sang sa akon kag mas matahom ang ila tinukod sang sa akon diutay nga balay.’ Matuod, ang templo kapin ka luhuso kag matahom. “Napunihan ini sing matahom nga mga bato kag nadedikar nga mga butang.” (Lucas 21:⁠5) Apang wala ina magpugong sa balo nga babayi sa paghatag sang iya amot. Luyag niya ipakita ang iya kaugalingon nga mapinasalamaton kay Jehova, indi sa mga tawo nga nagaalagad sa templo.

20. Paano kita makapakita sing pareho nga dalayawon nga panimuot nga ginpakita sang imol nga balo nga babayi?

²⁰ Ang katawhan ni Jehova karon nagatuon gikan sa sining halimbawa. Kaangay sang imol nga balo nga babayi, nahibaluan nila nga ang ila mga amot, daku ukon diutay, ginahatag sa Dios. Kag may pagsalig sila sa paghibalo nga ang dutan-on nga organisasyon ni Jehova natukod sa isa ka paagi nga wala sing indibiduwal ang makaganansia sa pinansial. Ang mga pasilidad sang Sosiedad gintukod kag ginapalakat agod sangkapan ang lakas nga mga manugpangabudlay sa pagtigayon sing pinakadaku nga resulta sa de-kalidad nga pagbalhag sing mga Biblia kag mga bulig sa Biblia kag sa pag-alagad sa mga interes sang Ginharian. Tuhay gid ini sa naburuka nga pag-abuso sa gindonar nga kuwarta nga ginreport sining karon lang tuhoy sa pila ka ebanghelisador sa telebisyon.

Mapuslanon ang mga Pahanumdom sa Pagkamapinasalamaton

21, 22. Anong epekto ang dapat pukawon sang maluluy-on nga mga pahanumdom sa pagpakita sang aton kaugalingon nga mapinasalamaton sa mainapresyahon nga mga tagipusuon?

²¹ Kinahanglan nga pahanumdumon pirme ang mga Israelinhon sang ila katungdanan kay Jehova, labi na ang kinahanglanon nga magpasundayag sing mapinasalamaton nga espiritu. Sa kabilugan, kon ining mga butang ginapatalupangod sa ila, ang pagkamapinasalamaton ginapapagsik liwat sa ila tagipusuon, kag nagresulta ini sa kapin pa sa mga pulong sa pagpabutyag sang ila mapinasalamaton nga apresasyon. Handa sila sa paghatag sing “mga tinumpok sa mga tinumpok” sang patubas kay Jehova agod gamiton sa iya balay sang pagsimba.

²² Gani kabay nga amo man sini ang ginabatyag sang “Israel sang Dios” karon kag sang “dakung kadam-an” nga ila kaupod. (Galacia 6:16; Bugna 7:⁠9) Kabay nga ang ila mapinasalamaton nga tagipusuon magpahulag sa ila sa paghatag sing “mga tinumpok sa mga tinumpok” sang pagdayaw kay Jehova. Nian makasiling gid sila: “Mapinasalamaton kami sa amon maalwan kag mahigugmaon nga Dios, si Jehova.”

Nadumduman Mo Bala?

◻ Ngaa dapat pirme usisaon sang mga Cristiano ang kasangkaron sang ila pagkamapinasalamaton?

◻ Ngaa ang katawhan ni Jehova pirme nga may ekstra nga kabangdanan sa pagpasalamat?

◻ Sa anong espisipiko nga mga paagi ang mga Israelinhon makapakita sing pagkamapinasalamaton kay Jehova?

◻ Kaangay sang mga Israelinhon, anong espisipiko nga mga butang ang mahimo naton sa pagpabutyag sing pagkamapinasalamaton?

◻ Ano ang maton-an naton gikan sa imol nga balo nga babayi sa templo?

[Laragway sa pahina 7]

Ang mga Israelinhon nagpakita sing pagkamapinasalamaton paagi sa paghalad sing ikapulo kag sing nahauna nga mga bunga kag paagi sa pagtugot sa mga imol sa pagpanaghaw sa mga uma

[Laragway sa pahina 8]

Ginpasalamatan sang salmista si Jehova bangod sang Iya makatilingala nga mga binuhatan kag panghunahuna para sa Iya katawhan

[Laragway sa pahina 10]

Ang mga Saksi ni Jehova karon nagapakita sing pagkamapinasalamaton paagi sa pagpakigbahin sa pag-alagad sa latagon kag sa teokratikong mga proyekto sa pagtukod, subong man paghatag sing materyal nga mga regalo