Pagbulig sa Bata nga Magtubo sa Diosnon nga Kaalam

ANG mahunahunaon nga mga tawo sa madamong pungsod kag ginhalinan nagakilala nga si Jesus isa ka makatilingala nga manunudlo kag moralist. Apang ang paghanas bala sa iya sang bata pa nag-amot sa sini? Ano nga mga leksion ang maton-an sang mga ginikanan karon gikan sa kabuhi kag pagpadaku sang pamilya sa iya?

Diutay lamang ang ginasugid sa aton sang Biblia nahanungod sa pagkabata ni Jesus. Sing sadsaran, ang iya nahaunang 12 ka tuig gintuptupan sa duha ka bersikulo: “Sang natuman nila [si Jose kag si Maria] ang tanan nga butang suno sa kasugoan ni Jehova, nagpauli sila sa Galilea sa ila kaugalingon nga banwa, nga Nasaret. Kag ang bata nagtubo kag nagbakud, nga napun-an sang kaalam, kag ang bugay sang Dios padayon nga yara sa iya.” (Lucas 2:39, 40) Apang may mga leksion diri nga maton-an ang mga ginikanan.

Ang bata “nagtubo kag nagbakud.” Busa, ang iya mga ginikanan nag-atipan sa iya sa pisikal. Subong man, padayon sia nga “napun-an sang kaalam.”a Kay sin-o salabton ang tudloan sia sang ihibalo kag paghangop nga mangin sadsaran sina nga kaalam?

Sa idalom sang Mosaikong Kasugoan, ang iya mga ginikanan may amo sina nga katungdanan. Ang Kasugoan nagsiling sa Israelinhon nga mga ginikanan: “Ining mga pulong nga ginasugo ko karon sa imo manginsa imo tagipusuon; kag itudlo mo sila sing makugihon sa imo mga anak, kag hambalon mo sila sa nagalingkod ka sa imo balay kag sa nagalakat ka sa dalanon kag sa nagahigda ka kag sa nagabangon ka.” (Deuteronomio 6:6, 7) Ang katunayan nga si Jesus padayon nga “napun-an sang kaalam,” kag subong man nga ang “bugay sang Dios padayon nga yara sa iya,” nagapakita nga si Jose kag si Maria nagtuman sini nga sugo.

Ayhan ang iban magabatyag nga sanglit si Jesus isa ka himpit nga bata, ang pagpadaku sa iya wala gid man nagahatag sing realistiko nga sadsaran sa pagsagud sa iban nga kabataan. Walay sapayan, si Jose kag si Maria indi himpit. Apang maathag nga padayon nila nga ginhatag ang iya pisikal kag espirituwal nga mga kinahanglanon, kag ginhimo nila ini walay sapayan sang mga pag-ipit sang nagadaku nga pamilya. (Mateo 13:55, 56) Subong man, si Jesus, walay sapayan himpit, kinahanglan pa nga magtubo gikan sa pagkalapsag tubtob sa pagkabata kag sa pagkatin-edyer tubtob sa pagkahamtong. Daku nga hilikuton sa pagdihon ang himuon sang iya mga ginikanan, kag maathag nga maayo ang nahimo nila.