“Karon ang iya mga ginikanan nagkadto tuigtuig sa Jerusalem sa piesta sang paskua.” (Lucas 2:41) Suno sa Kasugoan sang Dios, ang tagsa ka lalaki dapat nga magkadto sa Jerusalem para sa mga piesta. (Deuteronomio 16:16) Apang ang rekord nagasiling nga “ang iya mga ginikanan nagkadto tuigtuig.” Gindala ni Jose si Maria, kag ang bug-os nga pamilya, sa sinang paglakbay nga kapin sa 60 ka milya (100 km) pakadto sa Jerusalem para sa malipayon nga okasyon. (Deuteronomio 16:6, 11) Amo sina ang ila batasan—isa ka tayuyon nga bahin sang ila kabuhi. Subong man, wala sila magkadto sing pakunokuno lamang; nagpabilin sila sa tanan nga adlaw sang piesta.—Lucas 2:42, 43.

Pagkalipat

Sang batabata pa si Jesus, walay duhaduha nga nagpabilin sia nga suod sa iya mga ginikanan sa sining tuigan nga mga paglakbay pakadto sa daku nga siudad sang Jerusalem. Apang, sang magdakudaku na sia ayhan ginhatagan sia sing dugang nga kahilwayan. Sang 12 anyos sia, yara sia sa edad nga gintamod sang mga Judiyo subong ang importante nga tion sa banas padulong sa pagkahamtong. Ayhan bangod sining normal kag kinaugali nga pagbalhin, natabo ang pagkalipat sang mag-abot na ang tion agod ang pamilya ni Jose magbiya sa Jerusalem kag magpauli. Ang kasaysayan mabasa: “Sang nagabalik sila, ang bata nga si Jesus nagpabilin sa Jerusalem, kag ang iya ginikanan wala makahibalo sini. Apang sang nagahunahuna nga yara sia sa kaupdanan naglakat sila sing isa ka adlaw nga lalakton, kag ginpangita nila sia sa ila kahimataan kag kilala.”—Lucas 2:43, 44.

May mga bahin sining hitabo nga nahibaloan sang mga ginikanan kag mga kabataan. Apang, may isa ka tuhay: si Jesus himpit. Sanglit matinumanon sia nga nagpasakop kay Jose kag kay Maria, indi naton mahanduraw nga wala niya matuman ang pila ka kahimusan nga ginhimo nila upod sa iya. (Lucas 2:52) Mahimo nga may yara ukon wala sing komunikasyon. Ang mga ginikanan naghunahuna nga si Jesus yara sa kaupdanan sang mga himata kag mga kilala. (Lucas 2:44) Mahapos mahanduraw nga, sa kasaku sa pagbiya sa Jerusalem, hatagan nila sing una nga igtalupangod ang ila mas magagmay nga kabataan kag hunahunaon nga ang ila panganay nga anak, si Jesus, kaupod man.

Apang, maathag nga naghunahuna si Jesus nga nahibaloan sang iya mga ginikanan kon diin sia. Amo sini ang ginapanugda sang magsabat sia: “Ngaa bala nga nagpangita kamo sa akon? Wala bala kamo makahibalo nga kinahanglan nga yara ako sa balay sang akon Amay?” Indi nga dimatinahuron sia. Ang iya pinamulong nagapakita lamang sang iya kakibot sa kamatuoran nga wala makahibalo ang iya mga ginikanan kon diin sia makita. Tipiko ini nga halimbawa sang dipaghangpanay nga maapresyar sang madamong ginikanan sang nagadalagku nga kabataan.—Lucas 2:49.

Hunahunaa ang kabalaka ni Jose kag ni Maria pagligad sadtong nahaunang adlaw, sang matukiban nila nga wala si Jesus. Kag handurawa ang ila dugang nga kabalaka sa sulod sang duha ka adlaw nga ginpangita nila sia sa Jerusalem. Apang, natabo nga madinalag-on ang ila paghanas kay Jesus sa sini nga krisis. Si Jesus wala makig-impon sa malain nga kaupdanan. Wala sia naghatag sing kahuluy-an sa iya mga ginikanan. Sang makita nila si Jesus, yara sia “sa templo, nga nagalingkod sa tunga sang mga manunudlo, nga nagapamati sa ila kag nagapamangkot sa ila. Kag ang tanan nga nakabati sa iya naorongan sa iya paghangop kag sa iya mga sabat.”—Lucas 2:46, 47.