Ang Cristianong Pagtamod sa Awtoridad

“Wala sing awtoridad luwas paagi sa Dios.”​—⁠ROMA 13:⁠1.

1. Ngaa masiling nga si Jehova amo ang Supremo nga Awtoridad?

ANG awtoridad naangot sa pagkamanunuga. Ang Supremo nga Isa nga nagpaluntad sa tanan nga tinuga, may kabuhi man ukon wala, amo si Jehova nga Dios. Indi mapanghiwala nga sia ang Supremo nga Awtoridad. Nagaugyon ang matuod nga mga Cristiano sa mga balatyagon sang langitnon nga mga tinuga nga nagsiling: “Takus ikaw, Jehova, nga amon Dios, sa pagbaton sing himaya kag sing kadungganan kag sing gahom, bangod gintuga mo ang tanan nga butang, kag bangod sang imo kabubut-on nagluntad sila kag gintuga.”​—⁠Bugna 4:⁠11.

2. Paano ginbaton sang unang tawhanon nga mga manuggahom nga wala sila matuod sing kinaugali nga kinamatarong sa paggahom sa ila mga isigkatawo, kag ano ang ginsiling ni Jesus kay Poncio Pilato?

² Ang katunayan gid nga madamo sang una nga tawhanon nga mga manuggahom ang nagtinguha sa pagpakamatarong sang ila awtoridad paagi sa pagpangangkon nga isa ka dios ukon tiglawas sang isa ka dios isa ka hipos nga pagkilala nga wala sing tawo ang may duna nga kinamatarong sa paggahom sa ibabaw sang iban nga mga tawo.⁠a (Jeremias 10:23) Ang lamang nga lehitimo nga tuburan sang awtoridad amo si Jehova nga Dios. Ginsilingan ni Cristo si Poncio Pilato, ang Romanong gobernador sang Judea: “Wala kuntani ikaw sing awtoridad sa akon kon wala mahatag ini sa imo gikan sa ibabaw.”​—⁠Juan 19:⁠11.

“Wala sing Awtoridad Luwas Paagi sa Dios”

3. Ano ang ginsiling ni apostol Pablo tuhoy sa “superyor nga mga awtoridad,” kag anong mga pamangkot ang ginapautwas sang ginsiling ni Jesus kag ni Pablo?

³ Nagsulat si apostol Pablo sa mga Cristiano nga nagakabuhi anay sa idalom sang paggahom sang Romanong Emperyo: “Ang tagsa ka tawo magpasakop sa superyor nga mga awtoridad, kay wala sing awtoridad luwas paagi sa Dios; ang nagaluntad nga mga awtoridad ginbutang sang Dios sa ila relatibo nga mga posisyon.” (Roma 13:⁠1) Ano ang buot silingon ni Jesus sang magsiling sia nga ang awtoridad ni Pilato ginhatag sa iya “gikan sa ibabaw”? Kag sa anong paagi ginhunahuna ni Pablo nga ang politikanhon nga mga awtoridad sang iya adlaw ginbutang sang Dios sa ila mga posisyon? Buot bala nila silingon nga si Jehova personal nga may kahilabtanan sa pagtangdo sa tagsa ka indibiduwal nga politikanhon nga manuggahom sining kalibutan?

4. Ano ang gintawag ni Jesus kag ni Pablo kay Satanas, kag ano nga pangangkon ni Satanas ang wala ginpanghiwala ni Jesus?

⁴ Paano ini matabo, samtang gintawag ni Jesus si Satanas nga “manuggahom sining kalibutan,” kag gintawag man sia ni apostol Pablo nga “dios sining sistema sang mga butang”? (Juan 12:31; 16:11; 2 Corinto 4:⁠4) Dugang pa, sang ginasulay si Jesus, gintanyagan sia ni Satanas sing “awtoridad” sa “ibabaw sang tanan nga ginharian sang napuy-an nga duta,” nagapangangkon nga ining awtoridad ginhatag sa iya. Ginsikway ni Jesus ang iya tanyag, apang wala niya ginpanghiwala nga yadto nga awtoridad iya ni Satanas nga sarang niya mahatag.​—⁠Lucas 4:​5-8.

5. (a) Paano naton hangpon ang ginsiling ni Jesus kag ni Pablo nahanungod sa tawhanon nga awtoridad? (b) Sa anong kahulugan ang superyor nga mga awtoridad “ginbutang sang Dios sa ila relatibo nga mga posisyon”?

⁵ Ginhatag ni Jehova ang paggahom sa ibabaw sining kalibutan kay Satanas paagi sa pagtugot sa iya nga magkabuhi pa sa tapos sang iya pagrebelde kag sa tapos niya masulay si Adan kag si Eva kag mabuyok sila nga magrebelde batok sa Iya soberanya. (Genesis 3:​1-6; ipaanggid ang Exodo 9:​15, 16.) Busa, ang mga pulong ni Jesus kag ni Pablo, nagakahulugan nga sa tapos ginsikway sang unang tawhanon nga mag-asawa sa Eden ang teokrasya, ukon paggahom sang Dios, gintugutan ni Jehova ang nagbulag nga mga tawo nga maghimo sing mga balayan sang awtoridad nga magatugot sa ila sa pagkabuhi sa isa ka mahim-ong nga katilingban. Kon kaisa, agod matuman ang iya katuyuan, ginpahanabo ni Jehova nga mapukan ang pila ka manuggahom ukon panguluhan. (Daniel 2:​19-21) Ang iban gintugutan niya nga magpabilin sa gahom. Tuhoy sa mga manuggahom nga gintugutan ni Jehova sa pagluntad, sarang masiling nga sila “ginbutang sang Dios sa ila relatibo nga mga posisyon.”

Ang Unang mga Cristiano kag ang Romanong Awtoridad

6. Paano gintamod sang unang mga Cristiano ang Romanong awtoridad, kag ngaa?

⁶ Ang unang mga Cristiano wala magbuylog sa Judiyong mga sekta nga naghimbon kag nakig-away batok sa mga Romano nga nagakontrol sa Israel. Bangod ang Romanong awtoridad, paagi sa ila legal nga sistema, naghupot sing kahim-ong sa duta kag sa dagat; nagtukod sing madamong mapuslanon nga mga palatayunan (aque­duct), mga dalan, kag mga taytay; kag sa kabilugan nag-alagad para sa kaayuhan sang tanan, ginkabig sila sang mga Cristiano subong ‘ministro sang Dios [ukon, “alagad,” foot­note] sa ila para sa ila kaayuhan.’ (Roma 13:​3, 4) Ang kasuguan kag kahim-ong nagpatubas sing isa ka kahimtangan nga nagtugot sa mga Cristiano sa pagbantala sing maayong balita sing lapnag, subong ginsugo ni Jesus. (Mateo 28:​19, 20) Upod ang maayong konsiensia, nagbayad sila sing mga buhis nga ginapangayo sang mga Romano, bisan pa kon ang iban sang kuwarta gingamit para sa mga katuyuan nga wala nahamut-an sang Dios.​—⁠Roma 13:​5-7.

7, 8. (a) Ano ang ginapahayag sang mahalungon nga pagbasa sa Roma 13:​1-7, kag ano ang ginapakita sang konteksto? (b) Sa idalom sang anong mga kahimtangan ang Romanong awtoridad wala mag-alagad subong “ministro sang Dios,” kag sa sining bahin anong panimuot ang ginhuptan sang unang mga Cristiano?

⁷ Ang isa ka mahalungon nga pagbasa sang una nga pito ka bersikulo sang Roma kapitulo 13 nagapahayag nga ang politikanhon nga “superyor nga mga awtoridad” “ministro sang Dios” sa pagdayaw sa mga nagahimo sing maayo kag sa pagsilot sa mga nagabuhat sing malain. Ginapakita sang konteksto nga ang Dios, indi ang superyor nga mga awtoridad, ang nagadesisyon kon ano ang maayo kag kon ano ang malain. Kon, busa, ang Romanong emperador ukon ang bisan anong iban pa nga politikanhon nga awtoridad nagpatuman sing mga butang nga gindumilian sang Dios ukon, sa kabaliskaran, nagdumili sing mga butang nga ginpatuman sang Dios, wala na sia nag-alagad subong ministro sang Dios. Si Jesus nagsiling: “Ihatag kay Cesar ang mga butang nga iya ni Cesar, apang sa Dios ang mga butang nga iya sang Dios.” (Mateo 22:21) Kon ang Romanong Estado nagpangayo sing mga butang nga iya sang Dios, subong sang pagsimba ukon sang kabuhi sang isa ka tawo, ginsunod sang matuod nga mga Cristiano ang laygay sang apostol: “Dapat namon tumanon ang Dios subong manuggahom sa baylo sang mga tawo.”​—⁠Binuhatan 5:⁠29.

⁸ Ang pagpangindi sang unang mga Cristiano sa pagbuhat sing pagsimba sa emperador kag idolatriya, pag-untat sang ila Cristianong mga pagtinipon kag pagbantala sing maayong balita nagdala sing paghingabot. Ginapatihan nga si apostol Pablo ginpatay sa mando ni Emperador Nero. Ang iban nga mga emperador, labi na sanday Domitian, Marcus Aurelius, Septimius Severus, Decius, kag Diocletian, naghingabot man sa unang mga Cristiano. Sang ginhingabot sining mga emperador kag sang ila sakop nga mga awtoridad ang mga Cristiano, sa pagkamatuod wala sila nag-alagad subong “ministro sang Dios.”

9. (a) Ano ang nagapabilin nga matuod tuhoy sa politikanhon nga superyor nga mga awtoridad, kag gikan kay sin-o ang politikanhon nga sapat nakabaton sing gahom kag awtoridad? (b) Ano ang makatarunganon nga masiling tuhoy sa pagpasakop sang mga Cristiano sa superyor nga mga awtoridad?

⁹ Ini tanan nagailustrar nga samtang ang politikanhon nga superyor nga mga awtoridad nagaalagad sa pila ka bahin subong “kahimusan sang Dios” sa paghupot sing isa ka mahim-ong nga katilingban sang tawo, bahin sila gihapon sang kalibutanon nga sistema sang mga butang nga sa diin ang dios amo si Satanas. (1 Juan 5:19) Katapo sila sang bug-os kalibutan nga politikanhon nga organisasyon nga ginsimbulo sang “sapat nga mapintas” sa Bugna 13:​1, 2. Ina nga sapat nakabaton sing gahom kag awtoridad gikan sa “dakung dragon,” si Satanas nga Yawa. (Bugna 12:⁠9) Busa, sing makatarunganon, ang pagpasakop sang mga Cristiano sa sina nga mga awtoridad relatibo, indi bug-os.​—⁠Ipaanggid ang Daniel 3:​16-18.

Nagakaigo nga Pagtahod sa Awtoridad

10, 11. (a) Paano ginpakita ni Pablo nga dapat kita mangin matinahuron sa mga tawo sa awtoridad? (b) Paano kag ngaa sarang mahimo ang mga pangamuyo “tuhoy sa mga hari kag sa tanan nga yara sa mataas nga kahimtangan”?

¹⁰ Apang, wala ini nagakahulugan nga ang mga Cristiano dapat maghupot sing isa ka walay huya, rebelyuso nga panimuot batok sa politikanhon nga superyor nga mga awtoridad. Matuod, madamo sining mga tawo ang indi gid takus tahuron sa ila pribado ukon bisan sa ila publiko nga kabuhi. Apang, ginpakita sang mga apostoles, paagi sa ila huwaran kag paagi sa ila laygay, nga ang mga tawo sa awtoridad dapat tahuron. Sang nag-atubang si Pablo sa incestuso nga si Hari Herodes Agrippa II, nagpamulong sia sa iya upod ang nagakaigo nga pagtahod.​—⁠Binuhatan 26:​2, 3, 25.

¹¹ Nagsiling pa gani si Pablo nga nagakaigo sambiton ang kalibutanon nga mga awtoridad sa aton mga pangamuyo, ilabi na kon sila ginapangabay sa paghimo sing mga desisyon nga nagaapektar sang aton kabuhi kag Cristianong mga hilikuton. Sia nagsulat: “Nian, nahauna sa tanan, nagapangabay ako nga ang mga pag-ampo, mga pangamuyo, mga pagpakiluoy, mga pagpasalamat, himuon tuhoy sa tanan nga sahi sang mga tawo, tuhoy sa mga hari kag sa tanan nga yara sa mataas nga kahimtangan; agod nga magkabuhi kita sing malinong kag mahidaiton nga may bug-os nga debosyon kag pagkaserioso. Maayo ini kag kalahamut-an sa panulok sang aton Manluluwas, ang Dios, nga ang iya kabubut-on amo nga ang tanan nga sahi sang mga tawo maluwas kag makadangat sa sibu nga ihibalo sa kamatuoran.” (1 Timoteo 2:​1-4) Ang aton matinahuron nga panimuot sa sina nga mga awtoridad mahimo nga magadul-ong sa ila pagtugot sa aton nga padayunon nga may kahilwayan ang aton hilikuton sa pagtinguha nga luwason ang “tanan nga sahi sang mga tawo.”

12, 13. (a) Anong timbang nga laygay tuhoy sa awtoridad ang ginhatag ni Pedro? (b) Paano naton balusan “ang walay ihibalo nga ginapanghambal sang dimakatarunganon nga mga tawo” nga nagatuga sing dimakatarunganon nga kaugot batok sa mga Saksi ni Jehova?

¹² Si apostol Pedro nagsulat: “Tungod sa Ginuo magpasakop kamo sa tagsa ka tawo nga tinuga: kon bala sa isa ka hari subong superyor ukon sa mga gobernador subong pinadala niya sa paghatag sing silot sa mga nagahimo sing malaut apang sa pagdayaw sa mga nagahimo sing maayo. Kay amo gid sina ang kabubut-on sang Dios, nga paagi sa paghimo sing maayo mabusalan ninyo ang walay ihibalo nga ginapanghambal sang dimakatarunganon nga mga tawo. Mangin subong sang hilway nga mga tawo, apang nagagamit sang inyo kahilwayan, indi subong kunop sa kalautan, kundi subong mga ulipon sang Dios. Padunggi ang tanan nga sahi sang mga tawo, higugmaa ang bug-os nga katilingban sang kauturan, magkahadlok sa Dios, padunggi ang hari.” (1 Pedro 2:​13-17) Daw ano ka timbang nga laygay! Dapat kita magpasakop sing bug-os sa Dios subong mga ulipon niya, kag nagahatag kita sing relatibo kag matinahuron nga pagpasakop sa politikanhon nga mga awtoridad nga ginpadala sa pagsilot sa mga nagahimo sing malaut.

¹³ Nasapwan nga madamo nga sekular nga mga awtoridad ang may makatilingala gid nga sayop nga panghunahuna nahanungod sa mga Saksi ni Jehova. Masami nga ang kabangdanan sini amo nga ginsugiran sila sing sayop sang mahaliton nga mga kaaway sang katawhan sang Dios. Ukon mahimo nga ang tanan nga nahibaluan nila tuhoy sa aton nakuha lamang nila gikan sa media, nga kon kaisa indi makatarunganon sa ila ginasiling. Kon kaisa sarang naton madula ining dimakatarunganon nga kaugot paagi sa aton matinahuron nga panimuot kag, kon posible, paagi sa paghatag sa mga awtoridad sing sibu nga laragway sang hilikuton kag mga pagtuluuhan sang mga Saksi ni Jehova. Para sa masako nga mga opisyal, ang brosyur nga Jehovah’s Witnesses in the Twentieth Century nagaaman sing malip-ot kag maathag nga paathag. Para sa bug-os pa nga impormasyon, sarang sila mahatagan sing libro nga Jehovah’s Witnesses​—⁠Proclaimers of God’s Kingdom, isa ka maayong instrumento nga takus ilakip sa mga bulutangan sing libro sang lokal kag pungsudnon nga publiko nga mga librarya.

Awtoridad sa Sulod sang Cristianong mga Puluy-an

14, 15. (a) Ano ang sadsaran sang awtoridad sa sulod sang Cristianong panimalay? (b) Ano dapat ang mangin panimuot sang Cristianong mga asawa sa ila mga bana, kag ngaa?

¹⁴ Maathag nga kon ang mga Cristiano ginaobligar sang Dios sa pagpakita sing nagakaigo nga pagtahod sa kalibutanon nga mga awtoridad, dapat man nila tahuron ang kahimusan sang awtoridad nga gintukod sang Dios sa sulod sang Cristianong mga panimalay. Maathag nga ginbalay ni apostol Pablo ang prinsipio sang pagkaulo nga nagaluntad sa tunga sang katawhan ni Jehova. Sia nagsulat: “Luyag ko mahibaluan ninyo nga ang ulo sang tagsa ka lalaki amo si Cristo; nian ang ulo sang babayi amo ang lalaki; nian ang ulo ni Cristo amo ang Dios.” (1 Corinto 11:⁠3) Amo ini ang prinsipio sang teokrasya, ukon paggahom sang Dios. Ano ang ginadalahig sini?

¹⁵ Ang pagtahod sa teokrasya nagasugod sa puluy-an. Ang isa ka Cristianong asawa nga wala nagapakita sing nagakaigo nga pagtahod sa awtoridad sang iya bana​—⁠masigkatumuluo man sia ukon indi​—⁠indi teokratiko. Naglaygay si Pablo sa mga Cristiano: “Magpasakop kamo sa isa kag isa sa pagkahadlok kay Cristo. Magpasakop ang mga asawa sa ila bana subong nga sa Ginuo, kay ang bana amo ang ulo sang asawa subong nga si Cristo man amo ang ulo sang kongregasyon, kay sia gid ang manluluwas sini nga lawas. Sa kamatuoran, subong nga ang kongregasyon nagapasakop kay Cristo, subong man ang mga asawa sa ila bana sa tagsa ka butang.” (Efeso 5:​21-24) Subong nga ang Cristianong mga lalaki dapat magpasakop sa pagkaulo ni Cristo, ang Cristianong mga babayi dapat magkilala sa pagkamaalamon sang pagpasakop sa hinatag-sang-Dios nga awtoridad sang ila bana. Magahatag ini sa ila sing tudok nga kaayawan kag, importante pa, sing pagpakamaayo ni Jehova.

16, 17. (a) Paano ang mga anak nga ginpadaku sa Cristianong mga puluy-an makapatuhay sang ila kaugalingon gikan sa madamo nga pamatan-on karon, kag ano ang pangpalig-on sa ila? (b) Paano si Jesus isa ka maayong huwaran para sa mga pamatan-on karon, kag ano ang ginapalig-on sa ila nga himuon?

¹⁶ Ang teokratiko nga mga anak malipayon sa pagpakita sing nagakaigo nga pagtahod sa ila mga ginikanan. Tuhoy sa kaliwatan sang mga pamatan-on sa katapusan nga mga adlaw, gintagna nga sila mangin “malalison sa mga ginikanan.” (2 Timoteo 3:1, 2) Apang ang inspirado nga Pulong sang Dios nagasiling sa Cristianong mga anak: “Kamo nga mga anak, magmatinumanon sa inyo mga ginikanan sa tanan nga butang, kay kalahamut-an ini sa Ginuo.” (Colosas 3:20) Ang pagtahod sa awtoridad sang mga ginikanan nagapahamuot kay Jehova kag nagadala sang iya pagpakamaayo.

¹⁷ Ginailustrar ini sa bahin ni Jesus. Ang pag-asoy ni Lucas nagasiling: “Nagdulhog sia upod sa ila [iya mga ginikanan] kag nag-abot sa Nazaret, kag padayon nga nagpasakop sa ila. . . . Kag si Jesus padayon nga nag-uswag sa kaalam kag pisikal nga pagdaku kag sa kahamuot sang Dios kag sang mga tawo.” (Lucas 2:​51, 52) Si Jesus 12 anyos sadto, kag ang porma sang Griegong berbo nga gingamit diri nagapadaku nga sia “padayon nga nagpasakop” sa iya mga ginikanan. Gani wala sia mag-untat sa pagpasakop sang mangin tin-edyer na sia. Kon kamo nga mga pamatan-on luyag mag-uswag sa espirituwalidad kag sa kahamuot ni Jehova kag sang diosnon nga mga tawo, magapakita kamo sing pagtahod sa sulod kag sa guwa sang inyo puluy-⁠an.

Awtoridad sa Sulod sang Kongregasyon

18. Sin-o ang Ulo sang Cristianong kongregasyon, kag kay sin-o niya gintugyan ang awtoridad?

¹⁸ Nagahambal tuhoy sa ginakinahanglan nga kahim-ong sa sulod sang Cristianong kongregasyon, si Pablo nagsulat: “Ang Dios isa ka Dios, indi sang kagamo, kundi sang paghidait. . . . Ang tanan nga butang kabay nga mahanabo sing disente kag suno sa kahimusan [ukon, “suno sa kahim-ong,” foot­note].” (1 Corinto 14:​33, 40) Agod ang tanan nga butang mahanabo sing mahim-ong, gintugyan ni Cristo, nga Ulo sang Cristianong kongregasyon, ang awtoridad sa matutom nga mga lalaki. Aton mabasa: “Ginhatag niya ang iban subong mga apostol, ang iban subong mga manalagna, ang iban subong mga ebanghelisador, ang iban subong mga manugbantay kag mga manunudlo, agod pasibuon ang mga balaan, para sa ministeryal nga hilikuton . . . Apang sa paghambal sing kamatuoran, paagi sa gugma magtubo kita sa tanan nga butang padulong sa iya nga amo ang ulo, si Cristo.”​—⁠Efeso 4:​11, 12, 15.

19. (a) Sin-o ang gintangdo ni Cristo sa ibabaw sang tanan niya nga dutan-on nga mga pagkabutang, kag sin-o ang ginhatagan niya sing pinasahi nga awtoridad? (b) Ano nga pagtugyan sing awtoridad ang nagakatabo sa sulod sang Cristianong kongregasyon, kag ano ang ginakinahanglan sini sa aton bahin?

¹⁹ Sa sining tion sang katapusan, gintangdo ni Cristo ang kolektibo nga “matutom kag mainandamon nga ulipon” sa ibabaw sang “tanan niya nga mga pagkabutang,” ang mga interes sang Ginharian sa duta. (Mateo 24:​45-47) Subong sang sa unang siglo, ining ulipon ginatiglawas sang isa ka nagadumala nga hubon sang hinaplas nga Cristianong mga lalaki nga ginhatagan ni Cristo sing awtoridad sa paghimo sing mga desisyon kag sa pagtangdo sing iban pa nga mga manugtatap. (Binuhatan 6:​2, 3; 15:⁠2) Nian, ang Nagagahom nga Hubon nagatugyan sing awtoridad sa mga Komite sang Sanga, sa mga manugtatap sang distrito kag sirkito, kag sa mga gulang sa tagsa sang kapin sa 73,000 ka kongregasyon sang mga Saksi ni Jehova sa bug-os nga duta. Ini tanan nga debotado nga Cristianong mga lalaki takus sang aton pagsakdag kag pagtahod.​—⁠1 Timoteo 5:⁠17.

20. Ano nga mga halimbawa ang nagapakita nga si Jehova wala mahamuot sa mga wala nagatahod sa mga masigka-Cristiano nga may awtoridad?

²⁰ Tuhoy sa pagtahod nga utang naton sa mga yara sa awtoridad sa sulod sang Cristianong kongregasyon, isa ka makawiwili nga pagpaanggid ang sarang mahimo sa pagpasakop nga utang naton sa sekular nga mga awtoridad. Kon ang isa ka tawo makalapas sing isa ka tawhanon nga kasuguan nga ginaaprobahan sang Dios, ang silot nga ginapatuman sang “mga nagagahom,” isa gid ka indi talangkod nga ekspresyon sang kasingkal sang Dios “sa nagabuhat sing malaut.” (Roma 13:​3, 4) Kon si Jehova nagakaakig kon ginalapas sang isa ka tawo ang tawhanon nga mga kasuguan kag wala sing nagakaigo nga pagtahod sa kalibutanon nga mga awtoridad, daw ano pa gid nga maakig sia sing kapin kon ginasikway sang isa ka dedikado nga Cristiano ang mga prinsipio sang Biblia kag nagapakita sing pagtamay sa mga masigka-Cristiano nga may awtoridad!

21. Anong Makasulatanhon nga laygay ang mangin malipayon kita nga sundon, kag ano ang pagabinagbinagon sa masunod nga artikulo?

²¹ Sa baylo nga mabaton ang kaakig sang Dios paagi sa isa ka rebelyuso ukon independiente nga panimuot, sundon naton ang laygay ni Pablo sa mga Cristiano sa Filipos: “Busa, mga hinigugma ko, sa paagi nga kamo pirme nagatuman, indi lamang sang tion nga yara ako, kundi labi na karon nga wala ako, padayon nga panikasugi ang inyo kaluwasan nga may kahadlok kag pagkurog; kay ang Dios isa nga, para sa iya maayong kahamuot, nagapanghikot sa sulod ninyo agod nga kamo magbuot kag maghikot. Padayon nga himua ninyo ang tanan nga butang nga walay pagkumod ukon mga argumento, agod nga kamo mangin walay kasawayan kag inosente, mga anak sang Dios nga walay dagta sa tunga sang isa ka tiko kag balingag nga kaliwatan, nga sa tunga nila nagasiga kamo subong nga mga sulu sa kalibutan.” (Filipos 2:​12-15) Indi kaangay sang tiko kag balingag nga kaliwatan karon nga nagdala sa iya kaugalingon sing krisis sa awtoridad, ang katawhan ni Jehova nagapasakop sa awtoridad. Sa amo, nagaani sila sing daku nga mga benepisyo, subong makita naton sa masunod nga artikulo.

[Footnote]

Subong Repaso

◻ Sin-o ang Supremo nga Awtoridad, kag ngaa makatarunganon ang iya awtoridad?

◻ Sa anong kahulugan ang superyor nga mga awtoridad “ginbutang sang Dios sa ila relatibo nga mga posisyon”?

◻ San-o ang superyor nga mga awtoridad indi na “ministro sang Dios,”?

◻ Ano nga kahimusan sang awtoridad ang nagaluntad sa sulod sang Cristianong mga pamilya?

◻ Ano nga pagtugyan sing awtoridad ang nagaluntad sa sulod sang Cristianong kongregasyon?

[Mga piktyur sa pahina 18]

Si Jesus nagsiling: “Ihatag kay Cesar ang mga butang nga iya ni Cesar”