Kon Ngaa ang Pagtuo Indi Mapabakod sang Milagro Lamang
MAPATI lang ako kon makita ko. Amo sina ang panimuot sang madamo. Ang iban nagasiling nga mapati lang sila sa Dios kon magpakita sia sa milagruso nga paagi. Ayhan matabo ina, apang ina bala nga pagpati nagadul-ong sa matuod nga pagtuo?
Binagbinaga ang mga Israelinhon nga sanday Core, Datan, kag Abiram. Ginapakita sang Biblia nga nasaksihan nila ining makahalawhaw nga mga milagro gikan sa Dios: ang napulo ka kalalat-an sa Egipto, ang pagpalagyo sang pungsod sang Israel paagi sa Dagat nga Mapula, kag ang paglaglag sa Egiptohanon nga Faraon kag sa iya kusog militar. (Exodo 7:19–11:10; 12:29-32; Salmo 136:15) Nabatian man nanday Core, Datan, kag Abiram si Jehova nga nagpamulong gikan sa langit sa Bukid Sinai. (Deuteronomio 4:11, 12) Apang, wala lang gani madugay nga natabo ining mga milagro, ginpangunahan sining tatlo ka lalaki ang pagribok batok kay Jehova kag sa iya gintangdo nga mga alagad.—Numeros 16:1-35; Salmo 106:16-18.
Mga 40 ka tuig sang ulihi, si manalagna Balaam nakasaksi man sing isa ka milagro. Bisan ang pagpasilabot sang anghel wala makapugong sa iya sa pagdampig sa mga kaaway sang Dios, ang mga Moabinhon. Walay sapayan sadto nga milagro, si Balaam nagpadayon sa pagpamatok kay Jehova nga Dios kag sa Iya katawhan. (Numeros 22:1-35; 2 Pedro 2:15, 16) Apang, ang kakulang sing pagtuo ni Balaam diutay gid lamang kon ipaanggid sa iya ni Judas Iscariote. Walay sapayan nga nakig-upod sing suod kay Jesus kag nakasaksi sa dikinaandan nga mga milagro, ginluiban ni Judas si Jesus tungod sa katluan ka pilak.—Mateo 26:14-16, 47-50; 27:3-5.
Ang Judiyong relihiosong mga lider nakahibalo man sang madamong milagro ni Jesus. Pagkatapos niya mabanhaw si Lazaro, nagsiling pa gani sila: “Ining tawo nagahimo sing madamong tanda.” Apang naghumok bala ang ila tagipusuon kag nagtuo sang nakita nila ang buhi na karon nga si Lazaro? Wala, sa pagkamatuod. Sa baylo, nagbuko sila nga patyon sanday Jesus kag Lazaro!—Juan 11:47-53; 12:10.
Bisan ang direkta nga pagpasilabot sang Dios wala magpahulag sa mga malauton nga magtuo. Samtang didto si Jesus sa presinto sang templo sang isa ka okasyon, nangamuyo sia sing mabaskog: “Amay, himayaa ang imo ngalan.” Si Jehova nagsabat sa isa ka tingog gikan sa langit: “Ginhimaya ko na kag himayaon ko pa ini.” Apang, ining milagro wala magpahulag sa mga yadto didto nga magtuo. Ang Biblia nagasiling: “Bisan nakahimo sia sing tama kadamo nga tanda sa atubangan nila, wala gid sila magtuo sa iya.”—Juan 12:28-30, 37; ipaanggid ang Efeso 3:17.
Kon Ngaa ang mga Milagro Wala Makapabakod sing Pagtuo
Paano nagaluntad ang amo nga kakulang sing pagtuo walay sapayan sang tama kadamo nga milagro? Ang pagsikway sang Judiyong relihiosong mga lider kay Jesus daw makalilibog gid kon binagbinagon mo nga sadto mismo nga ginsugdan niya ang iya ministeryo, ang mga Judiyo sa kabilugan ‘nagapaabot sa Cristo,’ ukon sa Mesias. (Lucas 3:15) Apang, ang problema amo ang kon ano ang mga ginapaabot sadto. Ginbalikwat sang leksikograpo nga si W. E. Vine ang isa ka bantog nga iskolar sang Biblia nga nagsiling nga madugay na nga ginahunahuna sang mga Judiyo ang tuhoy sa isa ka Mesias nga magahatag sa ila sing “dutan-on nga kadalag-an” kag “materyal nga kabuganaan.” Gani, wala sila makahanda para sa kubos, indi politiko nga si Jesus sang Nasaret, nga didto sa tunga nila subong ang matuod nga Mesias sang 29 C.E. Ang relihiosong mga lider nahangawa man nga ang mga panudlo ni Jesus basi makatublag sa nagaluntad na nga kahimtangan kag makaapektar sa ila prominente nga mga posisyon. (Juan 11:48) Bangod sa nauna na nila nga mga ideya kag kakagod, wala nila mahangpan ang mga milagro ni Jesus.
Sang ulihi ginsikway sang Judiyong relihiosong mga lider kag sang iban pa ang milagruso nga pamatuod nga ang mga sumulunod ni Jesus ginakahamut-an sang Dios. Halimbawa, sang gin-ayo sang iya mga apostoles ang isa ka tawo nga piang kutob sa pagkabun-ag, ang akig nga mga katapo sang mataas nga hukmanan sang mga Judiyo namangkot: “Ano bala ang himuon ta sa sining mga tawo? Bangod, sa katunayan, hayag sa tanan nga nagapuyo sa Jerusalem nga ang isa ka tanda nga bantog nahimo paagi sa ila; kag indi naton mapanghiwala ini. Apang, agod nga indi na ini maglapnag sa katawhan, pahugon ta sila nga indi na magpamulong sa bisan kay sin-o sa sining ngalan.” (Binuhatan 3:1-8; 4:13-17) Sing maathag, ining makatilingala nga milagro wala magpabakod ukon magpahulag sa sadtong mga tawo nga magtuo.
Ang ambisyon, bugal, kag kakagod amo ang mga butang nga nagpahulag sa madamo nga patig-ahon ang ila tagipusuon. Amo sini ang natabo kanday Core, Datan, kag Abiram, nga ginhinambitan sa pamuno. Ang kahisa, kahadlok, kag iban pa makahalalit nga mga panimuot nag-upang sa iban. Ginpahanumdom man sa aton ang tuhoy sa dimatinumanon nga mga anghel, mga demonyo, nga may pribilehiyo anay nga makita ang nawong mismo sang Dios. (Mateo 18:10) Wala sila magduhaduha sa pagluntad sang Dios. Sa pagkamatuod, “ang mga demonyo nagatuo kag nagakurog.” (Santiago 2:19) Apang, wala sila sing pagtuo sa Dios.
Ang Kahulugan sang Matuod nga Pagtuo
Ang pagtuo indi lamang pagpati. Indi lamang ini umalagi nga emosyonal nga reaksion sa pila ka milagro. Ang Hebreo 11:1 nagasiling: “Ang pagtuo amo ang masaligan nga pagpaabot sa mga butang nga ginalauman, ang maathag nga pagpasundayag sa mga katunayan bisan nga dimakita.” Ang indibiduwal nga may pagtuo kumbinsido sa iya tagipusuon nga ang tanan nga butang nga ginasaad ni Jehova nga Dios daw subong nga natuman na. Dugang pa, ang dimapanghiwala nga pamatuod tuhoy sa dimakita nga mga katunayan makusog gid katama sa bagay nga ang pagtuo mismo ginasiling nga katumbas sa sina nga ebidensia. Huo, ang pagtuo ginapasad sa ebidensia. Kag sadto anay, ang mga milagro nakabulig sa pagtubo sang pagtuo ukon sa pagpabakod sini. Ang mga tanda nga ginhimo ni Jesus nagkumbinsi sa iban nga sia amo ang ginsaad nga Mesias. (Mateo 8:16, 17; Hebreo 2:2-4) Sa kaanggid, ang dulot sang balaan nga espiritu, ukon aktibo nga kusog, sang Dios, subong sang milagruso nga pagpang-ayo kag paghambal sa mga dila nagpamatuod nga wala na ginakahamut-an ni Jehova ang mga Judiyo kundi ang iya kahamuot yara na karon sa Cristianong kongregasyon, nga gintukod sang iya Anak, nga si Jesucristo.—1 Corinto 12:7-11.
Lakip sa milagruso nga mga dulot sang espiritu amo ang ikasarang sa pagpanagna. Sang nakita sang mga ditumuluo ining milagro, ang iban napahulag sa pagsimba kay Jehova, nga nagasiling: “Ang Dios yara gid sa tunga ninyo.” (1 Corinto 14:22-25) Apang, indi tuyo ni Jehova nga Dios nga ang mga milagro mangin isa ka permanente nga bahin sang Cristianong pagsimba. Sing nahisuno, si apostol Pablo nagsulat: “Bisan man may mga dulot sang pagpanagna, ini magataliwan; bisan man may mga hambal, ini magauntat.” (1 Corinto 13:8) Ining mga dulot nag-untat sang napatay ang mga apostoles kag ang mga nakabaton sini nga mga dulot paagi sa ila.
Nabilin bala ang mga tawo nga wala sing sadsaran para sa pagtuo? Wala, kay si Pablo nagsiling: “Walay sapayan, sa pagkamatuod, wala niya ginbilin ang iya kaugalingon nga wala saksi sa bagay nga naghimo sia sing maayo, naghatag sa inyo sing ulan gikan sa langit kag sing mga panag-on nga mabungahon, nga nagapuno sang inyo tagipusuon sing pagkaon kag kasadya.” (Binuhatan 14:17) Sa pagkamatuod, para sa mga bunayag sing tagipusuon nga handa magbukas sang ila hunahuna kag tagipusuon sa ebidensia nga nagalibot sa aton, ang “kitaon nga mga kinaiya [ni Jehova nga Dios] makita sing maathag kutob sa pagtuga sa kalibutan, kay nahantop sila paagi sa mga butang nga nahimo, bisan ang iya dayon nga gahom kag pagka-Dios, gani [ang mga nagapanghiwala sa Dios] wala sing balibad.”—Roma 1:20.
Indi lamang ang pagpati sa pagluntad sa Dios ang kinahanglan. Si Pablo naglaygay: “Mag-untat kamo sa pagpauyon sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) Sarang ini mahimo paagi sa makugi nga pagtuon sa Kasulatan sa bulig sang Cristianong mga publikasyon, kaangay sini nga magasin. Ang pagtuo pasad sa sibu nga ihibalo sang Dios, ang Biblia, indi maluya ukon manabaw. Ang mga nakahantop sang kabubut-on sang Dios kag nagahimo sini nga may pagtuo nagabuhat sing balaan nga pag-alagad sa Dios.—Roma 12:1.
Nagatuo Bisan Wala Makakita
Nabudlayan si apostol Tomas nga magtuo sa pagkabanhaw ni Jesus gikan sa minatay. “Kon indi ko makita sa iya mga kamot ang agi sang mga lansang, kag mabutang ang akon tudlo sa agi sang mga lansang kag mabutang ang akon kamot sa iya kilid, indi gid ako magpati,” siling ni Tomas. Sang nagmateryalisar sang ulihi si Jesus sa lawas nga may mga pilas bangod sang paglansang sa iya, si Tomas nagtuo sa sining milagro. Apang, si Jesus nagsiling: “Malipayon ang mga wala makakita apang nagatuo.”—Juan 20:25-29.
Karon, minilyon ka Saksi ni Jehova ang “nagalakat paagi sa pagtuo, indi paagi sa itululok.” (2 Corinto 5:7) Bisan pa nga wala nila makita ang mga milagro nga ginrekord sa Biblia, malig-on sila nga nagpati nga nahanabo ini. Ang mga Saksi nagatuo sa Dios kag sa iya Pulong. Paagi sa bulig sang iya espiritu, nahangpan nila ang mga panudlo sang Biblia kag ang nagapangibabaw nga tema sini—ang pagbindikar sa pagkasoberano ni Jehova nga Dios paagi sa iya langitnon nga Ginharian. (Mateo 6:9, 10; 2 Timoteo 3:16, 17) May daku nga kapuslanan sa ila kaugalingon, ginaaplikar sining matuod nga mga Cristiano ang maalamon nga laygay sang Biblia sa kabuhi. (Salmo 119:105; Isaias 48:17, 18) Ginabaton nila ang dimasuay nga pamatuod nga ginapakilala sang mga tagna sang Biblia ang aton tion subong ang “katapusan nga mga adlaw,” kag nagatuo sila nga ang ginsaad nga bag-ong kalibutan sang Dios malapit na. (2 Timoteo 3:1-5; Mateo 24:3-14; 2 Pedro 3:13) Para sa ila isa ka kalipay ang ipaambit sa iban ang ihibalo tuhoy sa Dios. (Hulubaton 2:1-5) Nakahibalo sila nga paagi lamang sa pagtuon sa Kasulatan nga ang mga nagapangita sa Dios makakita gid sa iya.—Binuhatan 17:26, 27.
Nadumduman mo bala si Albert, nga ginhinambitan sa nauna nga artikulo? Pila ka adlaw pagkatapos nga wala ginsabat ang iya pangamuyo para sa isa ka milagro, ginduaw sia sang isa sa mga Saksi ni Jehova, sang isa ka tigulang nga babayi nga nagbilin sa iya sing pila ka literatura nga napasad sa Biblia. Pagkatapos sadto ginbaton ni Albert ang isa ka wala bayad nga pagtuon sa Biblia sa puluy-an. Sang nahangpan niya sing labi ang mensahe sang Biblia, ang iya kabang-awan nangin kakunyag. Narealisar niya nga nakita gid man niya ang Dios bisan pa nga tuhay sangsa ginpaabot niya.
Ang Kasulatan nagalaygay: “Pangitaa ninyo si Jehova samtang nga makita pa sia. Tawga ninyo sia samtang nga malapit pa sia.” (Isaias 55:6) Sarang mo ini mahimo, indi paagi sa paghulat sa modernong-adlaw nga milagro gikan sa Dios, kundi paagi sa pagkuha sing sibu nga ihibalo tuhoy sa iya Pulong. Kinahanglanon ini, kay ang pagtuo indi mapabakod sang mga milagro lamang.
[Kapsion sa pahina 5]
Bisan ang milagruso nga pagbanhaw kay Lazaro wala magpahulag sa mga kaaway ni Jesus nga magtuo sa iya
[Kapsion sa pahina 7]
Ang pagtuo ginapasad sa sibu nga ihibalo sa Biblia