Ginadala ni Jehova ang Madamong Anak sa Himaya
“Nagakaigo para sa [Dios] . . . sa pagdala sang madamong anak sa himaya, nga magahimpit sa Pangulo nga Ahente sang ila kaluwasan paagi sa mga pag-antos.”—HEBREO 2:10.
1. Ngaa makapat-od kita nga ang katuyuan ni Jehova para sa katawhan matuman?
GINTUGA ni Jehova ang duta nga mangin ang dayon nga puluy-an sang himpit tawhanon nga pamilya nga magakabuhi sa walay katapusan. (Manugwali 1:4; Isaias 45:12, 18) Matuod, ang aton katigulangan nga si Adan nagpakasala kag bangod sini ginliton niya ang sala kag kamatayon sa iya kaanakan. Apang ang katuyuan sang Dios para sa katawhan matuman paagi sa iya Ginsaad nga Binhi, si Jesucristo. (Genesis 3:15; 22:18; Roma 5:12-21; Galacia 3:16) Bangod sang gugma sa katawhan, ginhatag ni Jehova ang “iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Kag bangod sang gugma, ‘ginhatag [ni Jesus] ang iya kalag nga gawad sang madamo.’ (Mateo 20:28) Ginagawad sining “katumbas nga gawad” ang mga kinamatarong kag mga paglaum nga gindula ni Adan kag ginahimo nga posible ang kabuhi nga walay katapusan.—1 Timoteo 2:5, 6; Juan 17:3.
2. Paano ginlarawan ang pagpadapat sa halad-gawad ni Jesus sa tuigan nga Adlaw sang Katumbasan sang Israel?
2 Ang pagpadapat sa halad-gawad ni Jesus ginlarawan sa tuigan nga Adlaw sang Katumbasan. Sadto nga adlaw, ang mataas nga saserdote sang Israel naghalad una sang baka nga lalaki subong halad-tungod-sa-sala kag ginpresentar ang dugo sini sa sagrado nga Kaban sa Labing Balaan sang tabernakulo, kag sang ulihi sa templo. Ginhimo ini tungod sa iya kaugalingon, sa iya panimalay, kag sa tribo ni Levi. Sing kaanggid, ginpresentar ni Jesucristo sa Dios ang balor sang iya dugo una sa pagtabon sa mga kasal-anan sang iya espirituwal nga “mga kauturan.” (Hebreo 2:12; 10:19-22; Levitico 16:6, 11-14) Sa Adlaw sang Katumbasan, ang mataas nga saserdote naghalad man sing kanding subong halad-tungod-sa-sala kag ginpresentar ang dugo sini sa Labing Balaan, busa nagahimo sing katumbasan para sa mga kasal-anan sang 12 ka indi saserdotenhon nga mga tribo sang Israel. Subong man, gamiton sang Mataas nga Saserdote nga si Jesucristo ang iya dugo tungod sa katawhan nga nagatuo, ginadula ang ila mga sala.—Levitico 16:15.
Gindala sa Himaya
3. Suno sa Hebreo 2:9, 10, ano ang ginahimo sang Dios sa sulod sang 1,900 ka tuig?
3 Sa sulod sang 1,900 ka tuig, naghimo ang Dios sing tumalagsahon nga butang may kaangtanan sa “mga kauturan” ni Jesus. Nahanungod sini, si apostol Pablo nagsulat: “Ginatan-aw naton si Jesus, nga ginhimo nga kubos sa mga anghel, nga ginpurungan sing himaya kag kadungganan bangod sang pag-antos sing kamatayon, agod nga paagi sa dibagay nga kaluoy sang Dios matilawan niya ang kamatayon para sa tagsa ka tawo. Kay nagakaigo para sa isa [si Jehova nga Dios] nga tungod sa tanan nga mga butang kag paagi sa iya ang tanan nga mga butang, sa pagdala sang madamong anak sa himaya, nga magahimpit sa Pangulo nga Ahente sang ila kaluwasan paagi sa mga pag-antos.” (Hebreo 2:9, 10) Ang Pangulo nga Ahente sang kaluwasan amo si Jesucristo, nga nakatuon sing himpit nga pagkamatinumanon paagi sa mga butang nga gin-antos niya sang nagkabuhi subong isa ka tawo sa duta. (Hebreo 5:7-10) Si Jesus amo ang nahauna nga ginpanganak subong espirituwal nga anak sang Dios.
4. San-o kag paano ginpanganak si Jesus subong espirituwal nga Anak sang Dios?
4 Gingamit ni Jehova ang iya balaan nga espiritu, ukon aktibo nga kusog, sa pagpanganak kay Jesus subong iya espirituwal nga Anak, agod dalhon sia sa langitnon nga himaya. Samtang kaupod ni Juan Bautista, si Jesus gintum-oy sing bug-os sa tubig sa pagsimbulo sang pagpresentar niya sang iya kaugalingon sa Dios. Ang Ebanghelyo ni Lucas nagasiling: “Sang nabawtismuhan ang tanan nga katawhan, si Jesus ginbawtismuhan man kag, samtang nagapangamuyo sia, ang langit nagbukas kag ang balaan nga espiritu nagkunsad sa lawasnon nga dagway kaangay sang isa ka salampati sa ibabaw niya, kag nagguwa ang tingog gikan sa langit: ‘Ikaw ang akon Anak, ang hinigugma; sa imo nahamuot ako.’ ” (Lucas 3:21, 22) Nakita ni Juan nga nagkunsad kay Jesus ang balaan nga espiritu kag nabatian si Jehova nga nagahambal nga may kahamuot sa iya subong Iya hinigugma nga Anak. Sadto nga tion kag paagi sa balaan nga espiritu, ginpanganak ni Jehova si Jesus subong ang nahauna sa ‘madamong anak nga dalhon sa himaya.’
5. Sin-o ang una nga nakabenepisyo sa halad ni Jesus, kag pila sila?
5 Ang “mga kauturan” ni Jesus amo ang nahauna nga nakabenepisyo gikan sa iya halad. (Hebreo 2:12-18) Sa palanan-awon, nakita na sila ni apostol Juan sa himaya sa langitnon nga Bukid nga Sion kaupod sang Kordero, ang ginbanhaw nga si Ginuong Jesucristo. Ginhatag man ni Juan ang ila kadamuon, nga nagasiling: “Nakita ko, kag, yari karon! ang Kordero nagatindog sa Bukid nga Sion, kag kaupod niya ang isa ka gatos kag kap-atan kag apat ka libo nga may ila sang iya ngalan kag sang ngalan sang iya Amay nga nasulat sa ila mga agtang. . . . Ginbakal sila gikan sa mga tawo subong nahaunang mga bunga nga sa Dios kag sa Kordero, kag wala sing butig nga nasapwan sa ila baba; wala sila sing dagta.” (Bugna 14:1-5) Gani ang ‘madamong anak nga gindala sa himaya’ sa langit may kabug-usan nga 144,001 lamang—si Jesus kag ang iya espirituwal nga mga kauturan.
“Natawo sa Dios”
6, 7. Sin-o ang “natawo sa Dios,” kag ano ang buot silingon sini para sa ila?
6 Yadtong ginpanganak ni Jehova “natawo sa Dios.” Nagapatuhoy sa ila, si apostol Juan nagsulat: “Ang tagsatagsa nga natawo sa Dios wala nagapakasala, bangod ang Iya [kay Jehova] binhi sa pagpanganak nagapabilin sa sinang isa, kag indi sia makasala, kay natawo sia sa Dios.” (1 Juan 3:9) Ining “binhi sa pagpanganak” amo ang balaan nga espiritu sang Dios. Nagapanghikot suno sa iya pulong, ginhatagan sini ang kada isa sang 144,000 sing “bag-ong pagkatawo” pakadto sa langitnon nga paglaum.—1 Pedro 1:3-5, 23.
7 Si Jesus Anak sang Dios kutob sa iya tawhanon nga pagkabun-ag, subong nga ang himpit nga si Adan “anak sang Dios.” (Lucas 1:35; 3:38) Apang, pagkatapos sang bawtismo ni Jesus, talalupangdon gid nga si Jehova nagsiling: “Ikaw ang akon Anak, ang hinigugma; sa imo nahamuot ako.” (Marcos 1:11) Paagi sa sining pinamulong nga kadungan sang pag-ilig sang balaan nga espiritu, maathag gid sadto nga tion nga ginpanganak sang Dios si Jesus subong Iya espirituwal nga Anak. Sing malaragwayon, si Jesus ginhatagan sadto sing “bag-ong pagkatawo” nga may kinamatarong nga magkabuhi liwat subong espirituhanon nga Anak sang Dios sa langit. Kaangay niya, ang iya 144,000 ka espirituwal nga mga kauturan “natawo liwat.” (Juan 3:1-8; tan-awa Ang Lalantawan, Nobiembre 15, 1992, pahina 3-6.) Kaangay man ni Jesus, ginhaplasan sila sang Dios kag ginsugo sa pagwali sing maayong balita.—Isaias 61:1, 2; Lucas 4:16-21; 1 Juan 2:20.
Pamatuod sang Pagpanganak
8. Ano ang pamatuod nga ginpanganak sang espiritu (a) si Jesus? (b) ang iya unang mga disipulo?
8 May pamatuod nga si Jesus ginpanganak sang espiritu. Nakita ni Juan Bautista ang pagkunsad sang espiritu kay Jesus kag nabatian ang deklarasyon sang Dios tuhoy sa espirituwal nga pagka-anak sang bag-ong hinaplas nga Mesias. Apang paano mahibaluan sang mga disipulo ni Jesus nga ginpanganak sila sang espiritu? Ti, sang adlaw nga nagkayab sia sa langit, si Jesus nagsiling: “Si Juan, sa pagkamatuod, nagbawtismo sa tubig, apang bawtismuhan kamo sa balaan nga espiritu indi madamong adlaw pagkatapos sini.” (Binuhatan 1:5) Ang mga disipulo ni Jesus ‘ginbawtismuhan sa balaan nga espiritu’ sadtong adlaw sang Pentecostes 33 C.E. Yadtong pagpasagahay sa espiritu gin-updan sing ‘hagunos gikan sa langit subong sang mamadlos nga hangin nga naghuyop’ kag sing “mga dila nga daw kalayo” sa tagsa ka disipulo. Ang labing talalupangdon amo ang ikasarang sang mga alagad sa “pagpamulong sing lainlain nga mga hambal, suno sa paghambal nga ginhatag sa ila sang espiritu.” Gani may nakita kag nabatian nga ebidensia nga ang dalan pasulod sa langitnon nga himaya subong mga anak sang Dios ginbuksan para sa mga sumulunod ni Cristo.—Binuhatan 2:1-4, 14-21; Joel 2:28, 29.
9. Ano ang pamatuod nga ang mga taga-Samaria, si Cornelio, kag ang iban pa sang nahaunang siglo ginpanganak sa espiritu?
9 Mga pila ka tion pagkatapos sadto, si Felipe nga ebanghelisador nagwali sa Samaria. Walay sapayan nga ginbaton sang mga taga-Samaria ang iya mensahe kag ginbawtismuhan, kulang sila sing ebidensia nga ginpanganak sila sang Dios subong mga anak niya. Sang nangamuyo sanday apostol Pedro kag Juan kag gintakdong ang ila kamot sa mga tumuluo, “nakabaton sila sing balaan nga espiritu” sa dimapat-od nga paagi nga nakita sang mga nagatan-aw. (Binuhatan 8:4-25) Pamatuod ini nga ang tumuluo nga mga taga-Samaria ginpanganak sang espiritu subong mga anak sang Dios. Sing kaanggid, sang 36 C.E., ginbaton ni Cornelio kag sang iban pa nga mga Gentil ang kamatuoran sang Dios. Si Pedro kag ang Judiyong mga tumuluo nga nag-upod sa iya “natingala, bangod ang wala bayad nga dulot sang balaan nga espiritu ginpasagahay man sa katawhan sang mga pungsod. Kay nabatian nila sila nga nagapamulong sing mga hambal kag nagapakadaku sa Dios.” (Binuhatan 10:44-48) Madamong nahaunang-siglo nga mga Cristiano ang nakabaton sing “mga dulot sang espiritu,” subong sang pagpamulong sa mga hambal. (1 Corinto 14:12, 32) Busa ining mga indibiduwal may maathag nga ebidensia nga ginpanganak sila sa espiritu. Apang paano mahibaluan sang ulihi nga mga Cristiano kon bala ginpanganak sila sang espiritu ukon wala?
Ang Saksi sang Espiritu
10, 11. Pasad sa Roma 8:15-17, paano mo ipaathag nga ang espiritu nagapanaksi sa mga masigkamanunubli ni Cristo?
10 Ang bug-os nga 144,000 ka hinaplas nga mga Cristiano may pat-od nga ebidensia nga may espiritu sila sang Dios. May kaangtanan sini, si Pablo nagsulat: “Nakabaton kamo sing espiritu sang pag-ayop subong mga anak, nga paagi sini nagasinggit kita: ‘Abba, Amay!’ Ang espiritu mismo ang nagasaksi upod sa aton espiritu nga mga anak kita sang Dios. Nian, kon kita mga anak, kita mga manunubli man: mga manunubli sa pagkamatuod sang Dios, apang mga masigkamanunubli ni Cristo, kon magaantos kita sing magkaupod agod mahimaya man kita sing magkaupod.” (Roma 8:15-17) Ang hinaplas nga mga Cristiano may balatyagon nga anak sila sang ila langitnon nga Amay, ang nagapangibabaw nga kahulugan sang pagkaanak. (Galacia 4:6, 7) Nakapat-od gid sila nga ginpanganak sila sang Dios sa espirituwal nga pagkaanak subong mga masigkamanunubli ni Cristo sa langitnon nga Ginharian. Sa sini, ang balaan nga espiritu ni Jehova may pat-od nga hilikuton.
11 Sa idalom sang impluwensia sang balaan nga espiritu sang Dios, ang espiritu, ukon ang nagapangibabaw nga panimuot, sang mga hinaplas nagapahulag sa ila nga sundon sa positibo nga paagi ang ginasiling sang Pulong sang Dios nahanungod sa langitnon nga paglaum. Halimbawa, kon mabasa nila ang ginasiling sang Kasulatan tuhoy sa espirituwal nga mga anak ni Jehova, ginabaton nila gilayon nga inang mga pinamulong nagapatuhoy sa ila. (1 Juan 3:2) Nahibaluan nila nga sila ‘ginbawtismuhan kay Cristo Jesus’ kag sa iya kamatayon. (Roma 6:3) Ang ila mabakod nga pagtuo amo nga espirituwal sila nga mga anak sang Dios, nga mapatay kag banhawon sa langitnon nga himaya, kaangay ni Jesus.
12. Ano ang ginpahulag sang espiritu sang Dios sa hinaplas nga mga Cristiano?
12 Ang mangin espirituwal nga anak indi isa ka napalambo nga handum. Ang mga ginpanganak sa espiritu indi luyag nga magkadto sa langit bangod sang kalisdanan sa karon nga mga kabudlayan sa duta. (Job 14:1) Sa baylo, ginpatubo sang espiritu ni Jehova sa tunay nga mga hinaplas ang paglaum kag handum nga indi kinaandan sa katawhan sa kabilugan. Ining mga ginpanganak sang espiritu nakahibalo nga ang kabuhi nga walay katapusan sa tawhanon nga pagkahimpit sa paraiso nga duta nga ginapalibutan sang isa ka malipayon nga pamilya kag mga abyan mangin makalilipay gid. Apang, ini nga kabuhi indi ang panguna nga handum sang ila tagipusuon. Ang mga hinaplas may tuman ka kusog nga langitnon nga paglaum nga handa nila nga isakripisyo ang tanan dutan-on nga mga palaabuton kag mga relasyon.—2 Pedro 1:13, 14.
13. Suno sa 2 Corinto 5:1-5, ano ang ‘hanuot nga handum’ ni Pablo, kag ano ang ginapakita sini nahanungod sa mga ginpanganak sang espiritu?
13 Ang ila hatag-Dios nga paglaum sang langitnon nga kabuhi tuman ka kusog sa bagay nga may balatyagon sila kaangay kay Pablo, nga nagsulat: “Nahibaluan namon nga kon ang amon dutan-on nga balay, ining tolda, maguba, makatigayon kami sing tinukod gikan sa Dios, isa ka balay nga wala ginhimo sang mga kamot, nga walay katapusan sa mga langit. Kay sa sining ginapuy-an nga balay nagaugayong kami sa pagkamatuod, nga nagahandum sing hanuot nga isuklob ang isa nga para sa amon gikan sa langit, agod nga, sa pagsuklob sini, indi kami masapwan nga hublas. Sa katunayan, kami nga yari sa sining tolda nagaugayong, nga nabug-atan; bangod luyag namon, nga indi ini pag-ubahon, kundi isuklob ang isa pa, agod nga ang mamalatyon malamon sang kabuhi. Karon sia nga naghimo sa amon para sa sini gid nga butang amo ang Dios, nga naghatag sa amon sing palatandaan sang kon ano ang magaabot, nga amo, ang espiritu.” (2 Corinto 5:1-5) Ang ‘hanuot nga handum’ ni Pablo amo nga banhawon sia pakadto sa langit subong dimamalatyon espirituhanon nga tinuga. Ginapatuhuyan ang tawhanon nga lawas, gingamit niya ang pagpaanggid sa isa ka mahimo maguba nga tolda, isa ka mahuyang kag umalagi nga puluy-an kon ipaanggid sa isa ka balay. Walay sapayan nga nagakabuhi sa duta sa mamalatyon, undanon nga lawas, ang mga Cristiano nga may espiritu subong palatandaan sang palaabuton nga kabuhi sa langit nagapaabot sing “tinukod gikan sa Dios,” isa ka dimamalatyon, dimadinulunton nga espirituhanon nga lawas. (1 Corinto 15:50-53) Kaangay ni Pablo, makasiling sila sing hanuot: “May kaisog kami kag nahamuot nga mahibaluan nga sa baylo nga mawala sa [tawhanon nga] lawas kag magpuyo [sa langit] upod sa Ginuo.”—2 Corinto 5:8.
Ginpasulod sa Pinasahi nga mga Katipan
14. Sang ginsugdan ang pagsaulog sang Memoryal, anong katipan ang una nga ginsambit ni Jesus, kag ano ang papel sini may kaangtanan sa espirituwal nga mga Israelinhon?
14 Ang ginpanganak sang espiritu nga mga Cristiano nakapat-od nga ginpasulod sila sa duha ka pinasahi nga mga katipan. Ginsambit ni Jesus ang isa sini sang gingamit niya ang tinapay nga walay lebadura kag ang alak agod sugdan ang Memoryal sang iya nagapakari nga kamatayon kag nagsiling tuhoy sa tagayan sang alak: “Ining tagayan nagakahulugan sang bag-ong katipan bangod sang akon dugo, nga iula tungod sa inyo.” (Lucas 22:20; 1 Corinto 11:25) Sin-o ang mga may bahin sa bag-ong katipan? Si Jehova nga Dios kag ang mga katapo sang espirituwal nga Israel—yadtong tuyo ni Jehova nga dalhon sa langitnon nga himaya. (Jeremias 31:31-34; Galacia 6:15, 16; Hebreo 12:22-24) Nagapanghikot paagi sa gin-ula nga dugo ni Jesus, ginakuha sang bag-ong katipan gikan sa mga pungsod ang katawhan para sa ngalan ni Jehova kag ginahimo ining ginpanganak sang espiritu nga mga Cristiano nga bahin sang “binhi” ni Abraham. (Galacia 3:26-29; Binuhatan 15:14) Ang bag-ong katipan nagahanda sa tanan nga espirituwal nga mga Israelinhon nga madala sa himaya paagi sa pagbanhaw sa ila padulong sa dimamalatyon nga kabuhi sa langit. Bangod “walay katapusan nga katipan,” ang mga benepisyo sini mangin dayon. Ipahayag sa ulihi kon bala ini nga katipan may bahin sa iban nga mga paagi sa tion sang Milenyo kag pagkatapos sini.—Hebreo 13:20.
15. Nahisuno sa Lucas 22:28-30, sa anong isa pa ka katipan ginsugdan nga dalhon ang hinaplas nga mga sumulunod ni Jesus, kag san-o?
15 Ang “madamong anak” nga gintuyo ni Jehova nga ‘dalhon sa himaya’ gindala man sing indibiduwal sa katipan para sa langitnon nga Ginharian. Nahanungod sining katipan sa ulot niya kag sang mga sumulunod sang iya tikang, si Jesus nagsiling: “Kamo ang nagpabilin nga kaupod ko sa mga pagtilaw sa akon; kag nakigkatipan ako sa inyo, subong sang pagpakigkatipan sang akon Amay sa akon, para sa isa ka ginharian, agod makakaon kag makainom kamo sa akon latok sa akon ginharian, kag makalingkod sa mga trono sa paghukom sa napulog-duha ka tribo sang Israel.” (Lucas 22:28-30) Ang katipan sang Ginharian ginsugdan sang ang mga disipulo ni Jesus ginhaplasan sing balaan nga espiritu sang Pentecostes 33 C.E. Yadto nga katipan nagapabilin nga nagapanghikot sa ulot ni Cristo kag sang iya kaupod nga mga hari sing dayon. (Bugna 22:5) Gani, nian, ang ginpanganak sang espiritu nga mga Cristiano positibo nga yara sila sa bag-ong katipan kag sa katipan para sa Ginharian. Busa, sa mga pagsaulog sang Panihapon sang Ginuo, ang pila lamang sang nabilin nga mga hinaplas nga yari pa sa duta ang nagapakigbahin sa tinapay, nga nagalarawan sa walay kasal-anan nga tawhanon nga lawas ni Jesus, kag sa alak, nga nagalarawan sa iya himpit nga dugo nga gin-ula sa kamatayon kag nagpalig-on sa bag-ong katipan.—1 Corinto 11:23-26; tan-awa Ang Lalantawan, Pebrero 1, 1989, pahina 17-20.
Gintawag, Ginpili, kag Matutom
16, 17. (a) Agod madala sa himaya, ano ang dapat nga pamatud-an sang tanan nga 144,000? (b) Sin-o ang “napulo ka hari,” kag paano nila ginatratar ang dutan-on nga nagkalabilin sang “mga kauturan” ni Cristo?
16 Ang una nga pagpadapat sa halad-gawad ni Jesus nagpaposible nga matawag ang 144,000 sa langitnon nga kabuhi kag mapilian nga mangin ginpanganak sang espiritu sang Dios. Agod madala sa himaya, siempre pa, dapat nila ‘himuon ang ila bug-os nga masarangan agod mapat-od ang pagtawag kag pagpili sa ila,’ kag dapat nila pamatud-an nga matutom sila tubtob sa kamatayon. (2 Pedro 1:10; Efeso 1:3-7; Bugna 2:10) Ang diutay nga nagkalabilin sang mga hinaplas nga yari pa sa duta nagahupot sang ila integridad walay sapayan nga ginapamatukan sang “napulo ka hari” nga nagalaragway sa tanan politikal nga mga kagamhanan. “Magapakig-away sila sa Kordero,” siling sang anghel, “apang, bangod sia amo ang Ginuo sang mga ginuo kag Hari sang mga hari, ang Kordero magadaug sa ila. Subong man, ang mga gintawag kag ginpili kag matutom sa iya magahimo sini.”—Bugna 17:12-14.
17 Ang tawhanon nga mga gumalahom wala sing padaug kay Jesus, ang “Hari sang mga hari,” kay yara sia sa langit. Apang mapakita nila ang kapintas sa nagkalabilin sang iya “mga kauturan” nga yari pa sa duta. (Bugna 12:17) Ina nga kapintas matapos sa inaway sang Dios sa Armagedon, kon ang kadalag-an igahatag sa “Hari sang mga hari” kag sa iya “mga kauturan”—“yadtong gintawag kag ginpili kag matutom.” (Bugna 16:14, 16) Samtang sini nga tion, ang ginpanganak sang espiritu nga mga Cristiano masako katama. Ano ang ginahimo nila karon, sa wala pa sila madala sa himaya ni Jehova?
Ano ang Inyo Sabat?
◻ Sin-o ang ‘dalhon [sang Dios] sa langitnon nga himaya’?
◻ Ano ang kahulugan sang ‘natawo sa Dios’?
◻ Paano ang ‘espiritu nagapanaksi’ sa pila ka Cristiano?
◻ Sa anong mga katipan gindala ang mga ginpanganak sang espiritu?
[Retrato sa pahina 15]
Sang Pentecostes 33 C.E., ginhatag ang pamatuod nga ang dalan padulong sa langitnon nga himaya ginbuksan