Mga Pamangkot Gikan Sa Mga Bumalasa

Ngaa indi pareho ang rekord ni Mateo sa rekord ni Lucas parte sa kabuhi ni Jesus sang bata pa sia?

Indi pareho ang rekord ni Mateo sa rekord ni Lucas parte sa pagkatawo ni Jesus kag sa iya kabuhi sang bata pa sia bangod nagpokus ang kada isa ka manunulat sang Ebanghelyo sa indi pareho nga mga karakter.

Nagpokus ang rekord ni Mateo sa mga hitabo nga may labot kay Jose. Ginsugid sini ang reaksion ni Jose sang mabal-an niya nga nagabusong si Maria, ang iya damgo nga ginpaathag sa iya sang anghel ang sitwasyon, kag ang pagbaton niya sini nga paathag. (Mat. 1:19-25) Ginsugid man ni Mateo ang damgo ni Jose nga ginsugo sia sang anghel nga magpalagyo sa Egipto, ang iya pagpalagyo upod sa iya pamilya, ang iya damgo nga ginsugo sia sang anghel nga magbalik sa Israel, ang iya pagbalik, kag ang iya desisyon nga mag-istar ang iya pamilya sa Nazaret. (Mat. 2:13, 14, 19-23) Sa una nga duha ka kapitulo sang Ebanghelyo ni Mateo, walo ka beses nga ginsambit si Jose, pero apat lang ka beses si Maria.

Pero nagpokus kay Maria ang rekord ni Lucas. Ginsaysay sini ang pagbisita ni anghel Gabriel kay Maria, ang pagbisita ni Maria sa iya paryente nga si Elisabet, kag ang pagdayaw ni Maria kay Jehova. (Luc. 1:26-56) Ginsugid man ni Lucas ang ginsiling ni Simeon kay Maria nga magaantos sa ulihi si Jesus. Sang ginsaysay ni Lucas ang pagkadto sang pamilya ni Maria sa templo sang 12 anyos si Jesus, ginkutlo niya ang ginsiling ni Maria, indi ang ginsiling ni Jose. Nagsiling man si Lucas nga may epekto gid ini nga mga hitabo kay Maria. (Luc. 2:19, 34, 35, 48, 51) Sa una nga duha ka kapitulo sang Ebanghelyo ni Lucas, 12 ka beses nga ginsambit si Maria, pero 3 lang ka beses si Jose. Gani mas madamo ang ginasugid ni Mateo parte sa ginkabalak-an kag ginhimo ni Jose, pero mas madamo nga detalye ang ginasaysay ni Lucas parte sa ginhimo kag naeksperiensiahan ni Maria.

Indi man pareho ang ginrekord sang duha ka manunulat sang Ebanghelyo parte sa mga katigulangan ni Jesus. Ginlista ni Mateo ang mga katigulangan ni Jose nga nagapakita nga si Jesus, bilang gin-adoptar nga anak ni Jose, amo ang legal nga manunubli sang pagkahari ni David. Ngaa? Bangod kaliwat si Jose ni Hari David sa pamilya ni Solomon nga anak ni David. (Mat. 1:6, 16) Pero ginlista ni Lucas ang mga katigulangan ni Maria nga nagapakita nga si Jesus amo ang kinaugali nga manunubli. ‘Natawo sia subong kaliwat ni David’ sa literal nga kahulugan. (Roma 1:3) Ngaa? Bangod kaliwat si Maria ni Hari David sa pamilya ni Natan nga anak ni David. (Luc. 3:31) Pero ngaa si Jose, indi si Maria, ang ginlista ni Lucas nga anak ni Heli, kay amay ni Maria si Heli? Bangod mga lalaki lang ang kinaandan nga ginalakip sa opisyal nga listahan sang mga katigulangan. Gani sang ginlista ni Lucas si Jose bilang anak ni Heli, nahangpan sang mga tawo sadto nga umagad ni Heli si Jose.—Luc. 3:23.

Ang mga listahan sang mga katigulangan ni Jesus nga ginrekord ni Mateo kag ni Lucas nagapamatuod nga si Jesus ang ginsaad nga Mesias. Bangod kilala gid si Jesus nga kaliwat ni Hari David, indi ini mapanghiwala bisan sang mga Fariseo kag mga Saduceo. Subong, ini nga mga rekord ni Mateo kag ni Lucas nangin basihan sang aton pagtuo kag pamatuod nga masaligan gid ang mga promisa sang Dios.