Nagdaku sa Nazaret

Nagdaku si Jesus sa Nazaret nga isa ka gamay kag indi salapakon nga siudad. Nahamtang ini sa aminhan sang Judea, sa medyo nabukid nga bahin sang Galilea, sa katundan sang daku nga linaw nga ginatawag Dagat sang Galilea.

Mahimo duha ka tuig si Jesus sang gindala sia diri nanday Jose kag Maria halin sa Egipto. Daw ginapakita nga sia pa lang ang ila bata. Pero sang ulihi, natawo ang iya mga utod sa iloy, nga sanday Santiago, Jose, Simon, kag Judas. May bata man sila nga mga babayi. Gani mahimo nga indi magkubos sa anom ang manghod ni Jesus.

May mga paryente man si Jesus. Nakilala na naton si Elisabet kag ang iya bata nga si Juan nga nagaistar mga pila ka kilometro sa bagatnan sa Judea. Ang malapit kanday Jesus sa Galilea amo si Salome, nga mahimo utod ni Maria, gani tiya ni Jesus. Ang iya bana amo si Zebedeo. Ang ila duha ka bata, nga sanday Santiago kag Juan, mahimo mga pakaisa ni Jesus. Wala kita makahibalo kon nag-inupdanay sila samtang nagadaku, pero nangin suod sila sang ulihi kay nangin apostoles sila ni Jesus.

Dapat magbakabaka si Jose agod masagod ang iya nagadaku nga pamilya. Isa sia ka panday. Ginpadaku ni Jose si Jesus subong kaugalingon niya nga bata, gani gintawag si Jesus nga “anak sang panday.” (Mateo 13:55) Gintudluan man ni Jose si Jesus mamanday kag nangin eksperto gid sia. Gani nagsiling ang mga tawo parte kay Jesus: “Sia ang panday.”—Marcos 6:3.

Ang kabuhi sang pamilya ni Jose nasentro sa pagsimba kay Jehova. Bilang pagsunod sa Kasuguan sang Dios, ginatudluan nanday Jose kag Maria ang ila kabataan sa espirituwal ‘kon nagapungko sila sa ila balay kag kon nagalakat sila sa dalan kag kon nagahigda sila kag kon nagabangon.’ (Deuteronomio 6:6-9) May sinagoga sa Nazaret. Mapat-od naton nga regular nga ginadala ni Jose ang iya pamilya didto para magsimba. Sang ulihi, ginsiling nga “suno sa iya kinabatasan sa Adlaw nga Inugpahuway,” nagsulod si Jesus sa sinagoga. (Lucas 4:16) Nalipay man ang ila pamilya kon magkadto sila sa templo ni Jehova sa Jerusalem.