Watchtower ONLINE NGA LIBRARY
Watchtower
ONLINE NGA LIBRARY
Hiligaynon
  • BIBLIA
  • PUBLIKASYON
  • MITING
  • cf kap. 8 p. 77-86
  • “Tungod Sini nga Ginpadala Ako”

Wala ang video nga ginpili mo.

Sorry, may error sa pag-load sang video.

  • “Tungod Sini nga Ginpadala Ako”
  • “Kari Ka Mangin Sumulunod Ko”
  • Mga subtitulo
  • Pareho nga Materyal
  • Kon Ngaa Nagbantala si Jesus
  • Kon Ano ang Ginbantala ni Jesus
  • Ang Pagtamod ni Jesus sa Iya Ministeryo
  • “Kari Ka, Mangin Sumulunod Ko”
    Ang Lalantawan Nagabantala sang Ginharian ni Jehova—2009
  • “Nagahatag Ako sa Inyo sing Sulundan”
    Ang Lalantawan Nagabantala sang Ginharian ni Jehova—2002
  • Ginhanas sa Pagpanaksi sing Maid-id
    Ang Lalantawan Nagabantala sang Ginharian ni Jehova—2005
  • Magahulag Bala Ikaw sa Gugma ni Jesus?
    Ang Lalantawan Nagabantala sang Ginharian ni Jehova—1992
Mangita sing Iban Pa
“Kari Ka Mangin Sumulunod Ko”
cf kap. 8 p. 77-86

KAPITULO 8

“Tungod Sini nga Ginpadala Ako”

1-4. (a) Paano malantipon nga gintudluan ni Jesus ang isa ka Samaritana, kag ano ang resulta? (b) Ano ang reaksion sang iya mga apostoles?

INORAS na sila nga nagalakat. Nagpaaminhan si Jesus kag ang iya mga apostoles, halin sa Judea padulong sa Galilea. Nanglaktod sila​—nga nagkinahanglan sing mga tatlo ka adlaw nga paglakat—​sa Samaria. Mga udto-adlaw na sila nakalab-ot sa gamay nga siudad sang Sicar, diin nagdulog sila agod magkaon.

Retrato sa pahina 78

2 Sang naglakat ang iya mga apostoles sa pagbakal sing pagkaon, nagpahuway si Jesus sa isa ka bubon sa gua sang siudad. Isa ka babayi ang nagkari sa pagsag-ub sing tubig. Mahimo kuntani nga wala na lang sia ginsapak ni Jesus. “Nalapyo [sia] bangod sang pagpanglakaton.” (Juan 4:6) Mahangpan gid kon nagpiyong na lamang sia kag wala na nagkomento tuhoy sa ginahimo sini nga Samaritana. Subong sang nakita naton sa Kapitulo 4 sini nga libro, mahimo nga ginpaabot sang babayi nga tamayon sia sang bisan sin-o nga Judiyo. Apang, nakigsugilanon si Jesus sa iya.

3 Nag-umpisa sia paagi sa isa ka ilustrasyon, isa nga may kaangtanan sa adlaw-adlaw nga pagsinalayo sang babayi​—sa kon ano gid ang ginahimo niya sadto nga higayon. Nagkari sia sa pagsag-ub sing tubig; si Jesus naghambal tuhoy sa nagahatag-kabuhi nga tubig nga magabulong sang iya espirituwal nga kauhaw. Pila ka beses nga naghinambit ang Samaritana sang mga butang nga mahimo baisan.a Mataktikanhon nga ginlikawan ni Jesus ini nga mga butang kag nagpadayon sa luyag niya ihambal. Nagkonsentrar sia sa espirituwal nga mga butang​—ang putli nga pagsimba kag si Jehova nga Dios. Ang iya pinamulong may daku gid nga epekto, kay ginsugid ini sang babayi sa mga lalaki sa siudad, kag luyag man nila nga magpamati kay Jesus.​—Juan 4:3-42.

4 Sang nagbalik sila, ano ang reaksion sang mga apostoles sa di-kinaandan nga pagpanaksi diri ni Jesus? Wala sila nalangkag. Nakibot pa gani sila nga nakigsugilanon si Jesus sa sining babayi, kag mahimo nga wala nila ginsapak ang babayi. Sang makahalin na ang babayi, ginpilit nila si Jesus nga kaunon ang dala nila. Apang, nagsiling si Jesus sa ila: “May kalan-on ako nga wala ninyo mahibalui.” Bangod wala makahangop, naghunahuna sila sang primero nga ginapatuhuyan niya ang literal nga pagkaon. Nian nagpaathag sia: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:32, 34) Busa gintudluan sila ni Jesus nga mas importante para sa iya ang iya panguna nga hilikuton sa kabuhi sangsa pagkaon. Luyag niya nga tamdon nila ini sing amo man. Ano ini nga hilikuton?

5. Ano ang hilikuton ni Jesus sa kabuhi, kag ano ang binagbinagon naton sa sini nga kapitulo?

5 Si Jesus nagsiling anay: “Dapat ko ibantala ang maayong balita sang ginharian sang Dios, kay tungod sini ginpadala ako.” (Lucas 4:43) Huo, ginpadala si Jesus agod ibantala kag ipanudlo ang maayong balita sang Ginharian sang Dios.b Ang mga sumulunod ni Jesus karon may amo man nga hilikuton. Busa, importante nga binagbinagon naton kon ngaa nagbantala si Jesus, kon ano ang ginbantala niya, kag kon paano niya gintamod ang iya hilikuton.

Kon Ngaa Nagbantala si Jesus

6, 7. (a) Sa ano nga paagi luyag ni Jesus nga tamdon sang “tagsa ka manunudlo sang mga tawo” ang pagpaambit sing maayong balita sa iban? Iilustrar.

6 Binagbinagon naton kon paano gintamod ni Jesus ang mga kamatuoran nga gintudlo niya; pagkatapos sini, hambalan naton ang iya panimuot sa mga tawo nga gintudluan niya. Naggamit si Jesus sing maathag nga ilustrasyon agod ipakita kon paano niya gintamod ang pagpaambit sa iban sang mga kamatuoran nga gintudlo ni Jehova sa iya. Nagsiling sia: “Ang tagsa ka manunudlo sang mga tawo, nga natudluan tuhoy sa ginharian sang langit, kaangay sa isa ka tawo, isa ka agalon sang panimalay, nga nagapagua sing bag-o kag daan nga mga butang sa iya talaguan sing bahandi.” (Mateo 13:52) Ngaa ginpagua sang tagbalay sa sini nga ilustrasyon ang mga butang sa iya talaguan sing bahandi?

7 Wala ginapabugal sang tagbalay ang iya mga pagkabutang, kaangay sang ginhimo sang una ni Hari Ezequias​—nga may makahalalit nga mga resulta. (2 Hari 20:13-20) Ano ang motibo sang tagbalay? Binagbinaga ang isa ka ilustrasyon: Nagduaw ka sa balay sang imo paborito nga maestro. Ginbuksan niya ang hunoshunos sang lamesa kag ginkuha ang duha ka sulat​—ang isa duag-dalag na bangod sang kadugayon, ang isa naman bulubag-o pa. Mga sulat ini nga nabaton niya gikan sa iya amay​—ang isa nabaton niya sang bata pa lang sia, ang isa naman sining karon lang. Nagakilan ang iya mga mata sa kalipay samtang ginasugiran ka niya kon daw ano gid ka bilidhon ini nga mga sulat sa iya kag kon paano ginbag-o sang laygay sini ang iya kabuhi kag kon paano man ini makabulig sa imo. Maathag gid nga ginapakabahandi sang manunudlo ang mga sulat. (Lucas 6:45) Ginpaambit niya ini sa imo, indi agod magpabugal ukon magganar, kundi agod buligan ka kag agod ipaalinton sa imo ang kapuslanan sini.

8. Ngaa may rason gid kita nga tamdon subong mga bahandi ang mga kamatuoran nga natun-an naton gikan sa Pulong sang Dios?

8 Amo man sini ang motibo ni Jesus, ang Daku nga Manunudlo, sa pagpaambit sang mga kamatuoran sang Dios sa iban. Para sa iya, ini nga mga kamatuoran malahalon gid nga mga bahandi. Ginhigugma niya ini, kag nalangkag sia nga ipaambit ini. Luyag niya nga mangin amo man ang pagtamod sang iya tanan nga mga sumulunod, “ang tagsa ka manunudlo sang tawo.” Kita man bala? May rason kita nga higugmaon ang tanan nga kamatuoran nga natun-an naton gikan sa Pulong sang Dios. Ginapakabahandi naton ang mga hiyas sang kamatuoran, ini man madugay na nga mga pagtuluuhan ukon ulihi lang nga mga pagbag-o. Paagi sa paghambal upod ang tinagipusuon nga kapagsik kag sa padayon nga paghigugma sa gintudlo ni Jehova sa aton, ginapaalinton naton ina nga gugma, kaangay sang ginhimo ni Jesus.

9. (a) Paano gintamod ni Jesus ang mga tawo nga gintudluan niya? (b) Paano naton mailog ang panimuot ni Jesus sa mga tawo?

9 Ginhigugma man ni Jesus ang mga tawo nga gintudluan niya, subong sang binagbinagon naton sing mas maayo sa Seksion 3. Suno sa tagna, ang Mesias ‘magakaawa sa kubos kag sa imol.’ (Salmo 72:13) Interesado si Jesus sa mga tawo. Interesado sia sa mga panghunahuna kag mga panimuot nga nag-impluwensia sa ila; nabalaka sia sa mga butang nga nagpabug-at sa ila kag nag-upang sa ila nga mahangpan ang kamatuoran. (Mateo 11:28; 16:13; 23:13, 15) Halimbawa, dumduma ang Samaritana. Nalipay gid sia nga ginpakitaan sia sing interes ni Jesus. Ang paghantop ni Jesus sa iya kahimtangan nagpahulag sa iya nga batunon si Jesus subong manalagna kag sugiran ang iban tuhoy sa iya. (Juan 4:16-19, 39) Matuod, indi mabasa sang mga sumulunod karon ni Jesus ang tagipusuon sang mga tawo nga ginabantalaan nila. Apang, kaangay ni Jesus, mahimo naton mapakitaan sing interes ang mga tawo; mapakita naton ang aton pag-ulikid sa ila; kag mabagay naton ang aton ginahambal sa ila partikular nga mga interes, mga problema, kag mga kinahanglanon.

Kon Ano ang Ginbantala ni Jesus

10, 11. (a) Ano ang ginbantala ni Jesus? (b) Ngaa kinahanglan ang Ginharian sang Dios?

10 Ano ang ginbantala ni Jesus? Kon ikaw ang magpangita sing sabat paagi sa pag-usisa sa mga panudlo sang madamo nga relihion nga nagapangangkon nga nagatiglawas sa iya, ayhan magahinakop ka nga nagbantala sia sing isa ka sahi sang sosyal nga ebanghelyo. Ukon ayhan naghunahuna ka nga ginsakdag niya ang politikal nga reporma ukon ginpadaku niya nga ang iya kaugalingon nga kaluwasan amo ang pinakaimportante. Apang, subong sang ginpakita sang nagligad, si Jesus maathag nga nagsiling: “Dapat ko ibantala ang maayong balita sang ginharian sang Dios.” Ano gid ang nadalahig sa sini?

11 Dumduma nga si Jesus didto sa langit sang una nga ginhangkat ni Satanas ang kinamatarong sang pagkasoberano ni Jehova. Daw ano gid kasakit kay Jesus sang ginpasipalahan ang iya Amay kag ginsumbong subong isa ka di-makatarunganon nga Manuggahom nga nagadingot sa Iya mga tinuga sing maayo nga mga butang! Daw ano gid kasakit sa Anak sang Dios sang nagpati sanday Adan kag Eva, ang palaabuton nga mga ginikanan sang katawhan, sa pasipala ni Satanas! Nakita sang Anak kon paano naglapnag ang sala kag kamatayon sa tawhanon nga pamilya subong resulta sadto nga pagrebelde. (Roma 5:12) Apang, nalipay gid sia sang mahibaluan niya nga husayon ini sang iya Amay sa pila ka adlaw!

12, 13. Ano nga mga inhustisya ang husayon sang Ginharian sang Dios, kag paano ginhimo ni Jesus nga tema sang iya ministeryo ang Ginharian?

12 Labaw sa tanan, ano ang panguna nga hulusayon nga dapat husayon? Ang balaan nga ngalan ni Jehova kinahanglan nga pakabalaanon, kag tinluan sang tanan nga pasipala nga ginhimo sa sini ni Satanas kag sang tanan nga nagdampig sa iya. Ang kinamatarong sang pagkasoberano ni Jehova, ang iya paagi sang paggahom, dapat mabindikar. Mas nahangpan ni Jesus ining importante nga mga hulusayon sangsa kay bisan sin-o. Sa iya huwaran nga pangamuyo, gintudluan niya ang iya mga sumulunod nga pangabayon una nga ang ngalan sang iya Amay pakabalaanon, masunod nga ang Ginharian sang iya Amay magkari, kag nian nga ang kabubut-on sang Dios himuon sa duta. (Mateo 6:9, 10) Sa dili madugay, dulaon sa duta sang Ginharian sang Dios, nga ang Manuggahom sini amo si Cristo Jesus, ang malauton nga sistema ni Satanas kag tukuron ang matarong nga paggahom ni Jehova sa walay katubtuban.​—Daniel 2:44.

13 Ini nga Ginharian amo ang tema sang ministeryo ni Jesus. Ang tanan niya nga ginhambal kag ginhimo nagbulig agod mahangpan kon ano ini nga Ginharian kag paano sini himuon ang katuyuan ni Jehova. Wala magtugot si Jesus nga may mag-upang sa iya sa iya misyon nga ibantala ang maayong balita sang Ginharian sang Dios. Sang panahon niya, may yara mga problema kag di-maisip nga mga inhustisya nga dapat lubaron, apang gintuon niya ang iya igtalupangod sa iya mensahe kag sa iya hilikuton. Nagkahulugan bala ini nga si Jesus makitid sing panghunahuna, nga wala sia sing balatyagon kag ang iya pamaagi makatalaka? Indi gid!

14, 15. (a) Paano si Jesus “daku pa kay Solomon”? Paano naton mailog si Jesus sa kon ano ang aton ginabantala?

14 Subong sang makita naton sa sining bug-os nga seksion, ginhimo ni Jesus ang iya pagpanudlo nga makawiwili kag makagalanyat. Ginganyat niya ang tagipusuon sang mga tawo. Ayhan madumduman naton si Hari Solomon, nga nagpangita sing kalahamut-an nga mga tinaga, sing husto nga mga pulong sang kamatuoran, agod mapaalinton ang panghunahuna nga gin-inspirar ni Jehova nga isulat niya. (Manugwali 12:10) Ginhatagan ni Jehova yadtong di-himpit nga tawo sing “pagkadaku sing tagipusuon,” amo nga nakapamulong sia tuhoy sa madamo nga butang, lakip ang pispis, isda, kahoy, kag sapat. Nagkari ang mga tawo gikan sa malayo agod magpamati kay Solomon. (1 Hari 4:29-34) Apang, si Jesus “daku pa kay Solomon.” (Mateo 12:42) Mas maalam sia, kag mas ‘daku sing tagipusuon.’ Sang nagpanudlo sa mga tawo, gingamit ni Jesus ang iya di-matupungan nga ihibalo tuhoy sa Pulong sang Dios kag tuhoy man sa pispis, sapat, isda, agrikultura, paniempo, mga hitabo, maragtas, kag kahimtangan sa katilingban. Sa amo man nga tion, wala ginpabugal ni Jesus ang iya ihibalo agod dayawon sia sang iban. Ginhuptan niya ang iya mensahe nga simple kag maathag. Indi katingalahan nga nahamuot ang mga tawo sa pagpamati sa iya!​—Marcos 12:37; Lucas 19:48.

15 Ginatinguhaan sang mga Cristiano karon nga ilugon ang halimbawa ni Jesus. Wala kita sing daku nga kaalam kag ihibalo kaangay niya, apang kita tanan may ihibalo kag eksperiensia nga magamit naton kon nagapaambit sang mga kamatuoran sang Pulong sang Dios sa iban. Halimbawa, magamit sang mga ginikanan ang ila eksperiensia sa pagpadaku sa mga anak agod iilustrar ang gugma ni Jehova sa Iya mga anak. Magamit sang iban ang mga halimbawa ukon mga ilustrasyon gikan sa sekular nga trabaho, eskwelahan, ukon sa ila ihibalo tuhoy sa mga tawo kag sa mga hitabo. Sa amo man nga tion, nagahalong kita nga wala naton ginapahilayo ang igtalupangod sa aton mensahe​—ang maayong balita sang Ginharian sang Dios.​—1 Timoteo 4:16.

Ang Pagtamod ni Jesus sa Iya Ministeryo

16, 17. (a) Paano gintamod ni Jesus ang iya ministeryo? (b) Paano ginpakita ni Jesus nga ang iya ministeryo amo ang pinakaimportante sa iya kabuhi?

16 Gintamod ni Jesus ang iya ministeryo subong isa ka bilidhon nga bahandi. Nalipay sia sa pagbulig sa mga tawo nga makilala ang langitnon nga Amay kon sin-o gid Sia, nga wala ginapaburon sang makapagumon nga mga doktrina kag mga tradisyon sang mga tawo. Nalipay si Jesus sa pagbulig sa mga tawo nga matigayon ang kalahamut-an nga kaangtanan kay Jehova kag ang paglaum nga kabuhi nga walay katapusan. Nalipay sia sa paglugpay kag sa pagpahalipay sa mga tawo paagi sa maayong balita. Paano niya ginpakita nga may amo sia sini nga balatyagon? Binagbinaga ang tatlo ka paagi.

17 Una, gintamod ni Jesus ang ministeryo nga amo ang pinakaimportante sa iya kabuhi. Ang pagpamulong tuhoy sa Ginharian amo ang iya karera, ang iya hilikuton sa kabuhi, ang iya panguna nga interes. Amo kon ngaa, subong sang nakita naton sa Kapitulo 5, maalamon nga ginhuptan ni Jesus nga simple ang iya kabuhi. Subong sang ginlaygay niya sa iban, gintuon niya ang iya mata sa kon ano gid ang pinakaimportante. Wala sia matublag sang mga butang nga dapat niya kuntani atipanon, mentinahon, kag kay-uhon ukon islan samtang nagalipas ang tion. Nagkabuhi sia sing simple agod wala sing butang nga makaupang sa iya sa iya ministeryo.​—Mateo 6:22; 8:20.

18. Sa ano nga paagi nangin masako si Jesus sa iya ministeryo?

18 Ikaduha, nangin masako si Jesus sa iya ministeryo. Naghinguyang sia sing madamo nga kusog sa sini, literal nga naglakat sing ginatos ka kilometro sa bug-os nga Palestina, kag ginpangita ang mga tawo nga mapaambitan niya sing maayong balita. Nakighambal sia sa ila sa ila mga puluy-an, sa mga plasa, sa mga tiendahan, kag sa publiko nga mga lugar. Nakighambal sia sa ila bisan pa nga kinahanglan niya kuntani nga magpahuway, magkaon, mag-inom, ukon magpahunayhunay upod sa iya labing suod nga mga abyan. Bisan sang nagatagumatayon sia, padayon niya nga ginpaambit ang maayong balita sang Ginharian sang Dios sa iban!​—Lucas 23:39-43.

19, 20. Paano gin-ilustrar ni Jesus ang pagkahilingagawon sang pagbantala nga hilikuton?

19 Ikatlo, gintamod ni Jesus ang ministeryo subong isa ka butang nga hilingagawon. Madumduman naton nga nakighambal sia sa isa ka Samaritana sa bubon sa gua sang Sicar. Ayhan wala mahantop sang mga apostoles ni Jesus sadto nga tion nga hilingagawon gid nga ipaambit sa iban ang maayong balita. Nagsiling si Jesus sa ila: “Wala bala kamo nagasiling nga may apat pa ka bulan antes magaabot ang ani? Yari karon! Nagasiling ako sa inyo: Tuluka ninyo kag tan-awa ang kaumhan, nga maputi na ini agod anihon.”​—Juan 4:35.

20 Ginkuha ni Jesus yadto nga ilustrasyon sa kon ano ang panahon sadto nga tion. Bulan yadto sang Chislev (Nobiembre/​Disiembre). Ang tig-alani sang sebada apat pa ka bulan, sa mga panahon sang Paskua, sa Nisan 14. Gani wala pa sadto mabatyagan sang mga mangunguma ang pagkahilingagawon sang pag-ani. Madugaydugay pa ini. Apang kamusta naman ang pag-ani sa mga tawo? Ti, madamo ang handa nga magpamati, magtuon, mangin mga disipulo ni Cristo kag mag-agom sang makalilipay nga paglaum nga ginahatag ni Jehova sa ila. Daw subong nga natan-aw na ni Jesus yadtong malaragwayon nga mga uma kag nakita nga maputi na ini kag ang tanan nga uhay nagahapayhapay sa dupoydupoy sang hangin, palatandaan nga handa na ini nga anihon.c Karon na ang tion, kag ang hilikuton hilingagawon! Gani, sang si Jesus luyag hawiran sang mga tawo sa isa ka siudad, nagsabat sia: “Sa iban man nga mga siudad dapat ko ibantala ang maayong balita sang ginharian sang Dios, kay tungod sini ginpadala ako.”​—Lucas 4:43.

21. Paano naton mailog si Jesus?

21 Sa tatlo ka paagi nga ginbinagbinag bag-o lang, sarang naton mailog si Jesus. Matamod naton ang Cristianong ministeryo nga amo ang pinakaimportante sa aton kabuhi. Bisan pa may mga obligasyon kita sa pamilya kag sa trabaho, mapakita naton nga ginauna naton ang aton ministeryo paagi sa makugi kag regular nga pagpakigbahin sa sini, subong sang ginhimo ni Jesus. (Mateo 6:33; 1 Timoteo 5:8) Mangin masako kita sa ministeryo, ginagamit ang aton tion, kusog, kag materyal nga mga butang agod suportahan ini. (Lucas 13:24) Kag indi naton pagkalimtan nga ang aton hilikuton hilingagawon. (2 Timoteo 4:2) Dapat naton himuslan ang tanan nga kahigayunan sa pagbantala!

22. Ano ang binagbinagon sa masunod nga kapitulo?

22 Ginpakita man ni Jesus ang pagkaimportante gid sang hilikuton paagi sa pagpat-od nga magapadayon ini pagkatapos sang iya kamatayon. Ginsugo niya ang iya mga sumulunod nga padayunon ang hilikuton nga pagbantala kag pagpanudlo. Ini nga sugo amo ang topiko sang masunod nga kapitulo.

a Halimbawa, sang namangkot ang Samaritana kon ngaa nakighambal si Jesus sa iya, nga isa ka Judiyo, ginsambit sang Samaritana ang madugay na nga kaawayon sa ulot sang mga Samariahanon kag mga Judiyo. (Juan 4:9) Nagsiling man sia nga kaliwat sila ni Jacob, kag ini nga butang wala gid ginabaton sang mga Judiyo sadto. (Juan 4:12) Gintawag nila ang mga Samariahanon nga mga taga-Cuta agod ipatalupangod nga mga dumuluong sila.

b Ang pagbantala nagakahulugan sing pagpahibalo, ukon pagpahayag, sing isa ka mensahe. Ang pagpanudlo may kaanggid man nga kahulugan apang nagadalahig ini sang pagpaalinton sing isa ka mensahe nga may mas madalom nga kahulugan kag detalye. Ang maayo nga pagpanudlo nagalakip sang pagpangita sing mga paagi sa paglab-ot sa tagipusuon agod mapahulag ang mga estudyante nga iaplikar ang ila nabatian.

c Tuhoy sini nga bersikulo, ang isa ka reperensia nga sinulatan nagsiling: “Ang berde nga uyas, kon luntay na, nagadalag ukon nagalus-aw, nga nagapakita nga tion na ini nga anihon.”

Paano Mo Mailog si Jesus?

  • Paano mapakita sang aton pangamuyo kag sang aton mga buhat nga nahangpan naton ang pagkahilingagawon sang ministeryo?​—Mateo 9:35-38.

  • Kon makita naton nga ang aton kakugi sa ministeryo nagaugdaw, paano kita mapalig-on sang panimuot ni Jesus?​—Marcos 1:35-39.

  • Samtang nagabantala kita, paano naton dapat tamdon ang mga tawo nga kubos, ginpigos, ukon ginsikway sang iban?​—Lucas 18:35–19:10.

  • Ngaa indi naton dapat pagtugutan nga mag-ugdaw ang aton kakugi sa pagbantala bangod sang di-pagsapak ukon pagpamatok?​—Juan 7:32-52.

    Hiligaynon Publications (1980-2025)
    Mag-log Out
    Mag-log In
    • Hiligaynon
    • I-share
    • Mga preference
    • Copyright © 2025 Watch Tower Bible and Tract Society of Pennsylvania
    • Mga Kasugtanan sa Paggamit
    • Privacy Policy
    • Privacy Settings
    • JW.ORG
    • Mag-log In
    I-share