Ang Kabuhi kag Ministeryo ni Jesus

Paghimo sing Maayong mga Buhat sa Adlaw nga Inugpahuway

TIGPAMULAK ini sang 31 C.E. Mga pila na ka bulan ang nagligad kutob sang makighambal si Jesus sa isa ka babayi sa bubon sang Samaria samtang manugkadto sa Galilea halin sa Judea.

Sa karon, sa tapos makapanudlo sing masangkad sa bug-os nga Galilea, si Jesus naglakat liwat pakadto sa Judea, diin magabantala sia sa mga sinagoga. Ipaanggid sa igtalupangod nga ginhatag sa iya ministeryo sa Galilea, diutay lamang ang ginasugid sang Biblia nahanungod sa hilikuton ni Jesus sa Judea sa sini nga pagduaw niya kag sa mga binulan nga ginhinguyang niya didto pagkatapos sang nagligad nga Paskwa. Sing maathag ang iya ministeryo wala makabaton sing maayo nga sabat sa Judea kaangay sa Galilea.

Sang ulihi si Jesus nagkadto sa Jerusalem, ang prinsipal nga siudad sang Judea, para sa Paskwa sang 31 C.E. Diri, sa tupad sang gawang sang mga karnero, may ponong nga ginatawag Betesda, diin madamong balatianon, bulag, kag piang ang nagakadto. Nagapati sila nga ang tawo sarang maayo paagi sa paglusong sa tubig sang ponong kon ini ginatublag.

Adlaw ini nga Inugpahuway, kag nakita ni Jesus ang tawo sa ponong nga nagmasakit sing 38 na ka tuig. Bangod nahibaloan niya ang madugay na nga pagbalatian sang tawo, si Jesus namangkot: “Buot ka bala mag-ayo?”

“Ginuo ko, wala ako sing tawo nga magabutang sa akon sa ponong kon matublag ang tubig,” sabat niya, “kag sang nagapakadto ako ang isa nagalusong sing una sa akon.”

Si Jesus nagsiling sa iya: “Tindog ka, dalha ang imo higdaan kag maglakat.” Kag sa gilayon nag-ayo ang tawo, kag nagdala sang iya higdaan kag naglakat!

Apang sang makita sang mga Judiyo ang tawo, nagsiling sila: “Adlaw karon nga Inugpahuway, kag indi tugot sa imo ang pagdala sang imo higdaan.”

Apang nagsabat sia sa ila: “Ang nag-ayo sa akon nagsiling sa akon, ‘Dalha ang imo higdaan kag maglakat.’”

“Sin-o bala ang tawo nga nagsiling sa imo, ‘Dalha ang imo higdaan kag maglakat’?” pamangkot nila. Si Jesus naghalin bangod sang kadam-an sa duog, kag wala makilala sang tawo nga gin-ayo ang ngalan ni Jesus. Apang sang ulihi, si Jesus kag ang tawo nagkitaay sa templo, kag nahibaloan sang tawo nga amo sia ang nag-ayo sa iya.

Gani ang gin-ayo nga tawo naglakat kag nagsugid sa mga Judiyo nga si Jesus amo ang nag-ayo sa iya. Kag sa sining kabangdanan, ang mga Judiyo naghingabot kay Jesus. Bangod sang anong rason? Agod bala hibaluon kon paagi sa ano nga nahimo niya ining makatilingala nga mga butang? Indi. Kundi agod makapangita sing inugsumbong sa iya bangod naghimo sia sining maayong butang sa adlaw nga Inugpahuway. Kag nagsugod sila sa paghingabot sa iya! Lucas 4:44; Juan 5:1-16.

◆ Daw ano na kalawig kutob sang katapusan nga ginduaw ni Jesus ang Judea?

◆ Ngaa tuman kabantog ang ponong nga ginatawag Betesda?

◆ Ano nga milagro ang ginhimo ni Jesus sa ponong, kag ano ang reaksion sang mga Judiyo?