Ang Kabuhi kag Ministeryo ni Jesus

Ang Mataas nga Talaksan Para sa Iya mga Sumulunod

GINAKABIG sang relihioso nga mga lider si Jesus nga manuglapas sang Kasugoan sang Dios kag nagbuko pa gani sa pagpatay sa iya. Gani samtang ginapadayon ni Jesus ang iya Wali sa Bukid, nagsiling sia: “Dili kamo maghunahuna nga ako nagkari sa pagbungkag sang Kasugoan ukon sang mga Manalagna. Wala ako magkari sa pagbungkag, kundi sa pagtuman.”

Daku ang pagtahod ni Jesus sa Kasugoan sang Dios kag ginapalig-on niya ang iban nga tahuron man ini. Sa katunayan, nagsiling sia: “Busa, ang bisan sin-o nga maglalis sang isa sining mga sugo nga labing kubos kag magpanudlo sing subong sa mga tawo, tawgon sia nga ‘labing kubos’ sa ginharian sang langit,” buot silingon nga ina nga tawo indi gid makasulod sa Ginharian.

Nagatahod gid sa Kasugoan sang Dios, ginapakamalaut ni Jesus bisan ang panimuot nga nagadul-ong sa paglalis sa sini. Sa tapos masambit nga ang Kasugoan nagasiling, “Dili ka magpatay,” si Jesus nagdugang: “Apang, ako nagasiling sa inyo nga ang tagsatagsa nga padayon nga nagapangakig sa iya utod nga wala sing kabangdanan, may katalagman sa paghukom.”

Sanglit ang padayon nga pagpangakig sa kaupod mabug-at katama, ayhan nagadul-ong pa sa pagpatay, ginailustrar ni Jesus kon tubtob diin ang isa makighidait. Nagsiling sia: “Kon nagadala ka sang imo [mahalaron nga] dulot sa halaran kag dira makadumdum ka nga ang imo utod may aligutgut sa imo, bayai dira ang imo dulot sa atubangan sang halaran, kag lakat ka; pasag-uli anay sa imo utod, kag ugaling, kari ka kag maghalad sang imo dulot.”

Nagaliso sang igtalupangod sa ikapito sang Napulo ka Sugo, si Jesus nagpadayon: “Nabatian ninyo nga ginsiling, ‘Dili ka magpanglahi.’” Apang, ginapakamalaut ni Jesus bisan ang dalayon nga panimuot padulong sa panglahi. “Ako nagasiling sa inyo nga ang tagsatagsa nga padayon nga nagatulok sa babayi sa pagkaibog sa iya nakapanglahi na sa iya sa tagipusuon niya.”

Wala diri ginahambalan ni Jesus ang ­nahanungod sa umalagi nga imoral nga panghunahuna kundi ang nahanungod sa ‘padayon nga pagtulok.’ Inang dalayon nga pagtulok nagapukaw sang maibog nga handum, nga, kon may kahigayunan, magadangat sa panglahi. Paano ini malikawan sang isa nga matabo? Ginailustrar ni Jesus kon daw ano ka daku nga tikang ang nagakaigo, nga nagasiling: “Kon ang imo mata nga tuo nagapasandad sa imo, lukata ini kag ihaboy. . . . Kag, kon ang imo kamut nga tuo nagapasandad sa imo, utda ini kag ihaboy.”

Ang mga tawo masunson nga handa sa pagsakripisyo sa literal nga batiis nga may masakit agod maluwas ang ila kabuhi. Apang suno kay Jesus, importante pa gani nga ‘ihaboy’ ang bisan ano, nga ayhan subong ka hamili sa mata ukon kamut, agod likawan ang imoral nga panghunahuna kag buhat. Kay kon indi, paathag ni Jesus, ina nga mga tawo itagbong sa Gehenna (ang nagadabdab nga basurahan malapit sa Jerusalem), nga nagasimbulo sa dayon nga kalaglagan.

Ginahambalan man ni Jesus kon paano makig-angot sa mga tawo nga nagatuga sing halit kag kaakig. “Dili kamo magbatok sa malauton,” amo ang laygay niya. “Kundi ang bisan sin-o magtampa sa imo pisngi nga tuo, itaya man ang isa sa iya.” Indi buot silingon ni Jesus nga dapat pangapinan sang isa ang iya kaugalingon ukon ang iya pamilya kon ginasalakay. Ang tampa wala ginahimo sa pagsakit sa pisikal kundi, sa baylo, sa pag-insulto. Gani, ang buot silingon ni Jesus amo nga kon ang bisan sin-o nagatinguha sa pagpukaw sing inaway ukon baisay, ayhan paagi sa literal nga pagtampa ukon paghambal sing masakit, sayop ang magbalus.

Sa tapos mapatalupangod ang kasugoan sang Dios nga higugmaon ang isigkatawo, si Jesus nagsiling: “Apang, ako nagasiling sa inyo: Padayon nga higugmaa ang inyo mga kaaway kag pangamuyo kamo tungod sa mga nagahingabot sa inyo.” Nagahatag sing makusog nga rason sa paghimo sina, nagdugang sia: “[Agod] nga mangin anak kamo sang inyo Amay nga yara sa langit, kay nagapasubang sia sang iya adlaw sa mga malauton kag sa mga maayo.”

Si Jesus nagahinakop sini nga bahin sang iya wali paagi sa paglaygay: “Magpakahimpit kamo, subong nga himpit ang inyo langitnon nga Amay.” Indi buot silingon ni Jesus nga ang mga tawo mangin himpit sa bug-os nga kahulugan. Sa baylo, sarang sila, paagi sa pag-ilog sa Dios, makapasangkad sang ila gugma sa paglakip bisan sa ila mga kaaway. Ang kaanggid nga kasaysayan ni Lucas nagarekord sang ginsiling ni Jesus: “Padayon kamo nga magmaluluy-on, subong nga ang inyo Amay maluluy-on.” Mateo 5:17-48; Lucas 6:36.

◆ Paano ginpakita ni Jesus ang daku nga pagtahod sa Kasugoan sang Dios?

◆ Ano nga instruksion ang ginhatag ni Jesus sa paggabut sa kabangdanan sang pagpatay kag panglahi?

◆ Ano ang buot silingon ni Jesus sang magsiling sia nga iliso ang pihak nga pisngi?

◆ Paano kita mangin himpit subong nga ang Dios himpit?