PAGTUDLO AGOD MANGIN DISIPULO
LEKSION 10
Mangin Determinado
Prinsipio: “Bangod palangga namon kamo, determinado kami nga ipaambit sa inyo, indi lamang ang maayong balita sang Dios, kundi ang amon man kaugalingon.”—1 Tes. 2:8.
Ang Ginhimo ni Jesus
1. Tan-awa ang VIDEO, ukon basaha ang Juan 3:1, 2. Dayon binagbinaga ang masunod nga mga pamangkot:
Ngaa gusto ni Nicodemo nga sa gab-i sia maistorya kay Jesus?—Tan-awa ang Juan 12:42, 43.
Paano ginpakita ni Jesus nga determinado sia sa paghimo sang disipulo?
Ano ang Matun-an Naton kay Jesus?
2. Mapakita naton nga palangga naton ang mga tawo kon determinado kita nga buligan sila nga mangin disipulo.
Iluga si Jesus
3. Magtuon sa oras kag lugar nga gusto sang imo Bible study. Mahimo may gusto sia nga oras ukon adlaw sa inyo pagtuon. Mas gusto bala niya nga magtuon kamo sa iya ulubrahan, sa ila balay, ukon sa publiko nga lugar? Kon posible, i-adjust ang imo iskedyul para makatuon kamo sa oras kag lugar nga gusto niya.
4. Mangin regular sa inyo pagtuon. Kon may kadtuan ka, indi pag-i-cancel ang inyo pagtuon. Kundi, binagbinaga ini:
Puede bala kamo makatuon sa lain nga adlaw sina nga semana?
Puede bala kamo makatuon paagi sa pagtawag ukon videoconference?
Puede mo bala mapalihug ang isa ka utod nga magdumala sang pagtuon?
5. Ipangamuyo nga indi ka maluyahan. Mangayo sing bulig kay Jehova nga mapadayon mo ang pagtuon sa imo Bible study bisan pa nabudlayan sia nga mangin regular ang inyo pagtuon ukon mag-aplikar sang inyo natun-an. (Fil. 2:13) Mahimo madamo sing maayo nga kinaiya ang imo Bible study, gani ipangamuyo nga buligan ka nga magpokus sa sini.