Madamo ang Nakakita sa Iya Antes sang Pentecostes

Pagkatapos mabanhaw si Jesus, ginsugo niya ang iya 11 ka apostoles nga makigkita sa iya sa bukid sa Galilea. Didto man ang iban nga disipulo, mga 500 sila, nga ang pila sa ila nagapangduhaduha. (Mateo 28:17; 1 Corinto 15:6) Pero ang isiling subong ni Jesus magakumbinsi sa ila tanan nga buhi gid sia.

Ginpaathag niya nga ginhatag sa iya sang Dios ang bug-os nga awtoridad sa langit kag sa duta. “Gani,” siling ni Jesus sa ila, “kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo.” (Mateo 28:18-20) Huo, indi lamang buhi sia kundi interesado gihapon sia nga ibantala ang maayong balita.

Ang tanan nga sumulunod ni Jesus—lalaki, babayi, kag kabataan—nakabaton sing pareho nga sugo nga tudluan ang iban agod mangin disipulo niya. Mahimo punggan sang mga nagapamatok ang ila pagbantala kag pagpanudlo, pero ginpasalig niya sila: “Ginhatag sa akon ang bug-os nga awtoridad sa langit kag sa duta.” Ano ang buot silingon sini para sa iya mga sumulunod? Ginsilingan niya sila: “Dumduma ninyo nga kaupod ninyo ako sa tanan nga tion tubtob sa hingapusan sang sistema sang mga butang.” Wala magsiling si Jesus nga ang tanan nga nagabantala sang maayong balita makahimo sing mga milagro. Pero buligan sila sang balaan nga espiritu.

Sa kabilugan, nagpakita si Jesus sa iya mga disipulo “sa sulod sang 40 ka adlaw” pagkatapos nga mabanhaw sia. Nagpakita sia nga may lainlain nga tawhanon nga lawas kag “madamo nga beses nga nagpakita sia sa ila paagi sa indi mapanghiwala nga mga pamatuod nga buhi sia,” nga nagatudlo sa ila “tuhoy sa Ginharian sang Dios.”—Binuhatan 1:3; 1 Corinto 15:7.

Mahimo nga sang ara pa sa Galilea ang mga apostoles, ginsugo sila ni Jesus nga magbalik sa Jerusalem. Samtang nagatipon sila sa siudad, nagsiling sia: “Indi kamo anay maghalin sa Jerusalem, kundi hulata ninyo ang ginsaad sang Amay, nga nabatian ninyo sa akon; kay si Juan nagbawtismo sa tubig, apang bawtismuhan kamo sa balaan nga espiritu sa indi madugay.”—Binuhatan 1:4, 5.

Sang ulihi, nakigkita liwat si Jesus sa iya mga apostoles. “Gindala sila ni Jesus sa Betania,” nga yara sa nasidlangan nga bahin sang Bukid sang mga Olibo. (Lucas 24:50) Bisan pa nga ginsilingan niya sila nga mabiya sia, nagapati gihapon sila nga diri sa duta ang iya Ginharian.—Lucas 22:16, 18, 30; Juan 14:2, 3.

Ginpamangkot sang mga apostoles si Jesus: “Ginuo, ipasag-uli mo bala ang ginharian sa Israel sa sini nga tion?” Nagsabat sia: “Ang Amay lamang sa langit ang may awtoridad sa pagtalana sang tion kon san-o mahanabo ang mga butang, kag indi kinahanglan nga mahibaluan ninyo ina nga mga tion.” Dayon, ginpadaku niya liwat ang ila hilikuton, nga nagasiling: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.”—Binuhatan 1:6-8.

Yara sa Bukid sang mga Olibo ang mga apostoles upod sa ginbanhaw nga si Jesus sang nagpaibabaw sia padulong sa langit. Wala magdugay natabunan na sia sang panganod kag indi na nila sia makita. Pagkatapos mabanhaw, nagpakita si Jesus nga may tawhanon nga lawas. Pero nagkayab sia sa langit subong espiritu nga tinuga. (1 Corinto 15:44, 50; 1 Pedro 3:18) Samtang ginatan-aw sia sang matutom nga mga apostoles, “duha ka lalaki nga napanaptan sing puti” ang nagtindog sa ila tupad. Mga anghel sila nga nagpakita nga may tawhanon nga lawas, kag namangkot sila: “Mga tawo sang Galilea, ngaa nagatindog kamo kag nagatangla sa langit? Ining Jesus nga nakita ninyo nga ginbaton sa langit magaabot sa inyo sa amo man sini nga paagi.”—Binuhatan 1:10, 11.

Naghalin si Jesus sa duta nga indi bal-anon, nga ang nakakita lamang amo ang iya matutom nga mga sumulunod. Magabalik sia “sa amo man sini nga paagi”—nga indi bal-anon, nga ang makahibalo lamang sang iya presensia sa iya paggahom sa Ginharian amo ang iya matutom nga mga sumulunod.

Nagbalik sa Jerusalem ang mga apostoles. Pagkasunod nga mga inadlaw, nagtipon sila upod sa iban nga disipulo, lakip “sa mga utod nga lalaki ni Jesus kag kay Maria nga iya iloy.” (Binuhatan 1:14) Ini nga grupo nagpadayon sa pagpangamuyo. Ang isa sa ila ginapangamuyo amo ang pagpili sang disipulo nga magabulos kay Judas Iscariote para mangin 12 liwat ang mga apostoles. (Mateo 19:28) Luyag nila ang isa ka disipulo nga nakasaksi sang hilikuton ni Jesus kag sang iya pagkabanhaw. Sa katapusan nga tion nga ginsambit sa Biblia, nagpagabutgabot para mahibaluan ang kabubut-on sang Dios. (Salmo 109:8; Hulubaton 16:33) Si Matias, nga mahimo isa sa 70 nga ginpadala ni Jesus, amo ang napili kag “gin-isip sia upod sa 11 ka apostoles.”—Binuhatan 1:26.

Napulo ka adlaw pagkatapos magkayab si Jesus sa langit, ginsaulog ang Judiyo nga Kapiestahan sang Pentecostes 33 C.E. Mga 120 ka disipulo ang nagtipon sa Jerusalem sa kuarto sa ibabaw. Sa hinali lang, may gahod nga daw nagahagunos nga huyop sang hangin nga nabatian sa bug-os nga balay. Nakita ang mga dila nga daw kalayo, kag may isa nga nagtungtong sa kada isa didto. Naghambal dayon ang tanan nga disipulo sing lainlain nga lenguahe. Amo ini ang pagbubo sang balaan nga espiritu nga ginpromisa ni Jesus!—Juan 14:26.