Sin-o ang Natawo Liwat?

ANG tanan bala nga maayo nga mga tawo nagakadto sa langit? Amo sina ang ginahunahuna sang madamo, apang si Jesucristo wala nagaugyon. Nagapakighambal sa Judiyong gumalahom nga si Nicodemo, nga nagkadto sa iya sing tago sa kagab-ihon, si Jesus nagsiling: “Walay nakasaka sa langit.”—Juan 3:13.

Apang, ginpakita ni Jesus kay Nicodemo nga magaabot ang tion nga ang pila ka tawo may kahigayunan nga makasulod sa Ginharian sang langit. Tuhoy sini si Jesus nagsiling: “Kon ang isa indi matawo sa tubig kag sa espiritu, indi sia makasulod sa ginharian sang Dios. Ang natawo sa unod unod kag ang natawo sa espiritu espiritu. Indi ka matingala nga nagsiling ako sa imo, Kinahanglan kamo matawo liwat (born again, sa Ingles).” Apang natingala si Nicodemo kon paano ang isa mahimo matawo liwat.—Juan 3:1-9.

Ayhan natingala ka man kon ano ang buot silingon ni Jesus. Ang iya mga pinamulong maaplikar bala sa eksperiensia sang hinali nga pagkakombertir nga ginapangangkon sang madamo nga nagabatyag nga napuno sila sang balaan nga espiritu sang Dios?

Ang mga Emosyon kag ang Hunahuna

Ang pila nagasiling nga sa pagpat-od kon bala ang isa natawo liwat, ang importante amo ang pagbatyag sang gahom sang espiritu. Apang, ang aton tagipusuon kag hunahuna mahimo makadaya sa aton, labi na kon impluwensiado sang makusog nga emosyon.—Jeremias 17:9.

Si William Sargant, isa ka mananalawsaw sa mga epekto sang emosyon sa hunahuna, nagapatalupangod sang kinahanglanon nga “mag-andam kita batok sa mga pagtuluuhan nga natigayon sa idalom sang kahimtangan nga ang emosyon napukaw kag sa amo nga ang aton utok mahimo nga nagaluib sa aton.” Suno kay Sargant, ang isa ka halimbawa amo ang epekto sang revivalist nga pagbantala kag sang pamahog sang silot sa kalayuhon nga impierno. Sin-o ang indi maluyag nga matawo liwat agod makakadto sa langit kon ang lamang nga mapilian amo ang walay katapusan nga pag-antos? Si Sargant nagasiling nga sa idalom sinang emosyonal nga kahuol, “ang pangatarungan ginapahigad, ang kompyuter sang normal nga utok umalagi nga wala nagaandar, kag ang bag-ong mga ideya kag mga opinyon ginabaton nga walay pang-alag-ag.”—The Mind Possessed.

Gani, nian, paano mahibaluan sang isa kon ang isa ka pagtuo nahanungod sa liwat nga pagkatawo “ginabaton nga walay pang-alag-ag”? Ang dalanon sang matuod nga kaalam amo ang magpatuytoy sa tanan nga butang nga ginpasulat sang balaan nga espiritu sang Dios sa mga manunulat sang Biblia. Ang mga Cristiano ginapalig-on sa pagsimba sa Dios ‘upod ang ila ikasarang sa pagpangatarungan’ kag dapat makapat-od nga ang ila ginapatihan matuod.—Roma 12:1, 2; 1 Tesalonica 5:21.

Ang liwat nga pagkatawo nagabukas sang isa sang labing importante nga mga pribilehiyo nga nahatag na sa mga tawo. May kaangtanan ini sa talalupangdon gid nga hitabo sa katumanan sang katuyuan sang Dios. Bisan pa matuod ini tanan, ang mga pamangkot subong sini nagautwas: Sin-o ang natawo liwat? Paano ini nagakatabo? Anong mga paglaum ang ginahatag sa sinang mga indibiduwal? Kag sila lamang bala ang makalampuwas?

[Laragway sa pahina 3]

Natingala si Nicodemo kon paano ang isa mahimo matawo liwat