Kon Ngaa ang Iban Natawo Liwat
“KON ang isa indi matawo liwat, indi sia makasulod sa ginharian sang Dios.” (Juan 3:3) Ina nga mga pulong nagpakunyag kag nagpalibog sa madamo nga mga tawo kutob sang ginpamulong ini ni Jesucristo sang nagligad nga kapin sa 1,900 ka tuig.
Para sa nagakaigo nga paghangop sa mga pinamulong ni Jesus nahanungod sa liwat nga pagkatawo, sabton anay naton ining mga pamangkot: Ano ang katuyuan sang Dios para sa katawhan? Ano ang nagakatabo sa kalag sa kamatayon? Ano ang tuyo nga himuon sang Ginharian sang Dios?
Ang Katuyuan sang Dios Para sa Katawhan
Ang nahaunang tawo, si Adan, gintuga nga isa ka himpit tawhanon nga anak nga lalaki sang Dios. (Lucas 3:38) Wala gid gintuyo ni Jehova nga Dios nga si Adan mapatay. Si Adan kag ang iya asawa, si Eva, may paglaum nga manganak sing walay sala nga tawhanon nga panimalay nga magakabuhi sing dayon kag magatugob sang paraiso nga duta. (Genesis 1:28) Ang kamatayon indi anay bahin sang orihinal nga katuyuan sang Dios para sa lalaki kag sa babayi. Nagsalakay lamang ini sa tawhanon nga danyag subong resulta sang pagrebelde batok sa balaan nga kasuguan.—Genesis 2:15-17; 3:17-19.
Ining pagrebelde nagpautwas sing daku nga mga hulusayon sa moral, subong sang pagkamatarong sang pagkasoberano sang Dios kag sang ikasarang sang mga tawo sa pagpabilin nga matutom sa iya mga kasuguan. Kinahanglan ang tion agod malubad ini nga mga hulusayon. Apang ang katuyuan ni Jehova nga Dios para sa katawhan wala magbalhin, kag indi sia mapaslawan sa kon ano ang ginatuyo niya nga himuon. Tuyo gid niya nga tugbon ang duta sang isa ka himpit nga tawhanon nga panimalay nga magaagom sang kabuhi nga walay katapusan sa Paraiso. (Salmo 37:29; 104:5; Isaias 45:18; Lucas 23:43) Dapat naton huptan sa hunahuna ining sadsaran nga kamatuoran kon ginabinagbinag naton ang mga pinamulong ni Jesus nahanungod sa liwat nga pagkatawo.
Ano ang Nagakatabo sa Kalag sa Kamatayon?
Wala makahibalo sang ginpahayag sang balaan nga espiritu sang Dios sa mga manunulat sang Biblia, ang mga pilosopo sang Gresya nagpanikasog nga makakita sing kahulugan sa kabuhi. Indi sila makapati nga ang tawo gintuyo lamang nga magkabuhi sa pila ka tuig, sa masami sa makaluluoy nga mga kahimtangan, kag nian magauntat na lamang sa pagluntad. Husto sila sa sini. Apang sa ila mga konklusion nahanungod sa mga paglaum sang tawo pagkapatay, nagsala sila. Naghinakop sila nga ang tawo padayon nga nagaluntad sa iban nga dagway pagkapatay, nga sa sulod sang tagsatagsa may isa ka dimamalatyon nga kalag.
Ang mga Judiyo kag ang nagapangangkon nga mga Cristiano naimpluwensiahan sinang mga pagtamod. Siling sang libro nga Heaven—A History: “Diin man makita sang nag-alaplaag nga mga Judiyo ang mga Griegong maalamon, ang ideya tuhoy sa dimamalatyon nga kalag nagapangibabaw.” Ang libro nagadugang: “Ang Griegong mga doktrina nahanungod sa kalag may madalom nga impresyon sa Judiyo kag sang ulihi sa Cristianong mga pagtuluuhan. . . . Paagi sa paghimo sing pinasahi nga pagsamo sang pilosopiya ni Plato kag sang biblikanhon nga tradisyon, si Philo [ang unang-siglo nga Judiyong pilosopo sang Alexandria] naghanda sang dalan para sa ulihi nga Cristianong mga mahunahunaon.”
Ano ang ginpatihan ni Philo? Ini man nga libro nagapadayon: “Para sa iya, ang kamatayon nagapasag-uli sang kalag sa iya orihinal, wala pa matawo nga kahimtangan. Sanglit ang kalag iya sang espirituwal nga kalibutan, ang kabuhi sa lawas malip-ot lamang, sa masami makaluluoy, nga hugna.” Apang, ang “wala pa matawo nga kahimtangan” ni Adan wala nagaluntad. Suno sa kasaysayan sang Biblia, wala gid gintuyo sang Dios ang isa ka awtomatiko nga pagliton sa iban pa nga duog sa kamatayon, subong nga ang duta daw isa lamang ka duog tilipunan para sa mas mataas ukon mas manubo nga pagluntad.
Ang pagpati nga ang tawhanon nga kalag dimamalatyon wala ginatudlo sang inspirado sang espiritu nga Pulong sang Dios, ang Biblia. Bisan kis-a wala sini gingamit ang tinaga nga “dimamalatyon nga kalag.” Nagasiling ini nga si Adan gintuga subong kalag, indi nga may kalag. Ang Genesis 2:7 nagasiling: “Si Jehova nga Dios naghimo sang tawo gikan sa yab-ok sang duta kag naghuyup sa iya ilong sang ginhawa sang kabuhi, kag ang tawo nangin buhi nga kalag.” Ang katawhan wala gid magpaabot sang kabuhi nga walay katapusan sa langit ukon sang dayon nga pag-antos sa kalayuhon nga impierno. Ginapakita sang Biblia nga ang kalag, ukon ang tawo, nga nagakapatay wala nagaluntad nga may hinalung-ong. (Salmo 146:3, 4; Manugwali 9:5, 10; Ezequiel 18:4) Busa, ang mga pilosopo may dimakasulatanhon nga mga pagtamod nahanungod sa kalag. Dapat kita mag-andam batok sa nagapatalang nga mga ideya nga mahimo magpatiko sang aton paghangop sa mga pinamulong ni Jesus nahanungod sa liwat nga pagkatawo.
Natawo Liwat sa Paggahom Subong mga Hari
Ginsilingan ni Jesus si Nicodemo nga yadtong “matawo liwat . . . makasulod sa ginharian sang Dios.” (Juan 3:3-5) Ano ina nga Ginharian? Sa malaragwayon nga hambal, sa maaga nga bahin sang tawhanon nga maragtas, ginpahibalo ni Jehova nga Dios ang iya katuyuan sa paggamit sang isa ka pinasahi nga “binhi”—isa ka nagapakari nga gumalahom—sa pagdugmok sa ulo sang orihinal nga Man-ug, si Satanas nga Yawa. (Genesis 3:15; Bugna 12:9) Subong sang ginbuyagyag sing amat-amat sa Kasulatan, ining “binhi” ginpakilala subong nga si Jesucristo, nga nagagahom kaupod sang iya kaupdanan nga mga gumalahom sa isa ka pinasahi nga pagpakita sang pagkasoberano sang Dios, ang Mesianikong Ginharian. (Salmo 2:8, 9; Isaias 9:6, 7; Daniel 2:44; 7:13, 14) Amo ini ang Ginharian sang langit, ang panguluhan sa mga langit nga magabindikar sa pagkasoberano ni Jehova kag magaluwas sa katawhan gikan sa kahiulipnan sa sala kag kamatayon.—Mateo 6:9, 10.
Subong kaupod nga mga gumalahom ni Jesus amo ang 144,000 nga ginbakal gikan sa katawhan. (Bugna 5:9, 10; 14:1-4) Ginpili sang Dios ang pila gikan sa dihimpit nga tawhanon nga panimalay ni Adan nga mangin ang “mga balaan sang Labing Mataas,” nga magagahom kaupod ni Cristo sa Mesianikong Ginharian. (Daniel 7:27; 1 Corinto 6:2; Bugna 3:21; 20:6) Ining mga lalaki kag babayi nagtuo kay Jesucristo, nga nagsiling nga sila ‘natawo liwat.’ (Juan 3:5-7) Paano kag ngaa natabo ini nga pagkatawo?
Ining mga indibiduwal ginbawtismuhan sa tubig subong mga sumulunod ni Cristo. Ginpatawad sang Dios ang ila mga kasal-anan sa sadsaran sang halad gawad ni Jesus, ginpakamatarong sila, kag gin-adoptar sila subong espirituwal nga mga anak. (Roma 3:23-26; 5:12-21; Colosas 1:13, 14) Si apostol Pablo nagasiling sa ila: “Nakabaton kamo sang espiritu sang pagkaanak, nga sa sini nga espiritu kita nagatuaw: ‘Abba, Amay!’ Ang espiritu mismo nagasaksi upod sa aton espiritu nga mga anak kita sang Dios. Nian, kon kita mga anak, mga manunubli man kita: mga manunubli gid sang Dios, kag mga masigkamanunubli ni Cristo, kon matuod nga nagaantos kita kaupod niya agod nga paghimayaon man kita kaupod niya.”—Roma 8:15-17.
Subong mga sumulunod ni Cristo, sila may bag-ong pagkatawo, ukon bag-ong panugod, sa kabuhi. Nagresulta ini sa kombiksion nga magapakigbahin sila sa langitnon nga panublion ni Jesus. (Lucas 12:32; 22:28-30; 1 Pedro 1:23) Si apostol Pedro naglaragway sang liwat nga pagkatawo sa sining paagi: “Bangod sang dakung kaluoy [sang Dios] natawo kita liwat sa paglaum nga buhi paagi sa pagkabanhaw ni Jesucristo, kag sa panublion nga dimadinulunton, walay dagta, kag nagapadayon, natigana sa langit tungod sa inyo.” (1 Pedro 1:3, 4) Ining bag-o nga kabuhi sa langit mangin posible para sa sinang mga indibiduwal bangod banhawon sila sang Dios subong sang pagbanhaw niya kay Jesus.—1 Corinto 15:42-49.
Kumusta ang Duta?
Wala ini nagakahulugan nga ang tanan nga matinumanon nga katawhan matawo liwat sa ulihi agod magkadto sa langit halin sa duta. Inang sayop nga ideya kaanggid anay sa ginpatihan sang mga pilosopo kaangay ni Philo, nga naghunahuna nga “ang kabuhi sa lawas malip-ot lamang, sa masami makaluluoy, nga hugna.” Apang wala sing malain sa orihinal nga dutan-on nga tinuga ni Jehova nga Dios.—Genesis 1:31; Deuteronomio 32:4.
Ang tawhanon nga kabuhi wala gid gintuyo nga mangin malip-ot kag masakit. Si Jesucristo kag yadtong natawo liwat sa pag-alagad subong mga hari kag mga saserdote kaupod niya sa langit magadula sang tanan nga makahalalit nga mga resulta sang pagrebelde ni Satanas. (Efeso 1:8-10) Paagi sa ila subong ginsaad nga ‘binhi ni Abraham,’ “pakamaayuhon ang tanan nga pungsod sang duta.” (Galacia 3:29; Genesis 22:18) Para sa matinumanon nga katawhan magakahulugan ini sing kabuhi sa paraiso nga duta, tuhay katama gikan sa malip-ot, puno sang kasakit nga pagkabuhi karon.—Salmo 37:11, 29; Bugna 21:1-4.
Sin-o ang Magabenepisyo?
Lakip sa magabenepisyo gikan sa aman sang Dios sa pagpakamaayo sa katawhan amo ang pagabanhawon nga nagtuo sa halad gawad ni Jesus. (Juan 5:28, 29; Binuhatan 24:15) Ang kalabanan sa ila wala pa gid makatuon nahanungod sa Dios kag kay Cristo kag busa indi makapakita sing pagtuo kay Jesus. Yadtong pagabanhawon magalakip man sa matutom nga mga tawo kaangay ni Juan Bautista, nga napatay antes ginbuksan ni Jesus ang dalan padulong sa langitnon nga kabuhi. (Mateo 11:11) Luwas sa ila, ‘ang dakung kadam-an gikan sa tanan nga pungsod naglaba sang ila mga panapton nga malaba kag nagpaputi sini sa dugo sang Kordero,’ si Jesucristo. Nagsabat sila sing kalahamut-an sa pagbantala sang Ginharian nga hilikuton nga ginapangunahan karon sang natawo liwat nga mga “kauturan” ni Jesus kag makalampuwas sa inaway sang Dios sa Armagedon agod magapuyo sa isa ka natinluan nga duta. (Bugna 7:9-14; 16:14-16; Mateo 24:14; 25:31-46) Busa, sa kahimusan sang Dios, minilyon ang maluwas, bisan nga wala sila matawo liwat agod maggahom kaupod ni Cristo sa mga langit.—1 Juan 2:1, 2.
Malakip ka bala sa sadtong magapanubli sing kabuhi sa paraiso nga duta? Huo kon magtuo ka sa halad ni Jesucristo kag makig-upod sing aktibo sa matuod nga Cristianong kongregasyon. Wala ini madagtai sang mga pilosopiya kundi nagpabilin nga “haligi kag pamakod sang kamatuoran.” (1 Timoteo 3:15; ipaanggid ang Juan 4:24; 8:31, 32.) Nian mapaabot mo ang isa ka makatilingala nga palaabuton nga ang natawo liwat nga mga anak sang Dios nagagahom sa langit kag ang tanan nga dutan-on nga mga anak sang Dios napasag-uli sa kahimpitan sa isa ka matahom nga paraiso nga duta. Gani himusli ang imo kahigayunan para sa kabuhi sa sinang bag-ong kalibutan sang dayon nga mga pagpakamaayo.—Roma 8:19-21; 2 Pedro 3:13.
[Laragway sa pahina 6]
Si Adan wala gid ginpapili nga magkabuhi sa langit ukon mag-antos sing dayon sa kalayuhon nga impierno