Ang Pagtamod sang Biblia
Sin-o ang mga ‘Natawo Liwat’?
SI Nicodemo isa ka katapo anay sang mataas nga korte sang mga Judiyo, isa ka eskolar sa relihioso nga kasuguan, kag nakakita sia sing tuman nga pamatuod sang mga milagro ni Jesus sa pagkombinse sa iya nga si Jesus amo ang Mesias. Apang, indi niya mahangpan ang ginsiling ni Jesus: “Kon ang isa indi matawo liwat, indi sia makakita sang ginharian sang Dios.”—Juan 3:1-3, 10.
“Paano ang pagkatawo sang tawo kon sia tigulang na?” pamangkot ni Nicodemo. “Makasulod bala sia sa makaduha sa tiyan sang iya iloy kag matawo?”—Juan 3:4.
Minilyon ka tawo karon ang nagapangangkon nga “natawo liwat” sila kag nagasiling sila nga nahangpan nila sing maathag kon ano ang buot silingon sini. Ang iban, kaangay ni Nicodemo, nagapalibog sa bug-os nga kahulugan sang matawo liwat. Sanglit ginhambal ni Jesucristo nga isa ini ka una nga kinahanglanon sa pagsulod sa Ginharian sang Dios, importante nga mahangpan naton kon ano ang buot niya silingon sang “matawo liwat.”
Bilang sabat sa pamangkot ni Nicodemo, si Jesus nagsiling sing dugang pa: “Sa pagkamatuod nagasiling ako sa imo, Kon ang isa indi matawo sa tubig kag sa espiritu, indi sia makasulod sa ginharian sang Dios. Ang natawo sa unod unod kag ang natawo sa espiritu espiritu. Indi ka matingala nga nagsiling ako sa imo, Kinahanglan kamo matawo liwat.”—Juan 3:5-7.
Mabudlay bala hangpon? Nahibaluan ni Jesus nga indi mahapos hangpon ang espirituwal nga mga kamatuoran. Gani agod mangin maathag ini, gingamit niya ang ilustrasyon nahanungod sa hangin. “Ang hangin nagahuyop sa diin ang buot niya, kag mabatian mo ang iya tingog, apang indi mo mahibaluan kon sa diin sia nagahalin ukon sa diin nagapakadto. Subong man ang tagsatagsa nga natawo sa espiritu.” (Juan 3:8) Mabatian ni Nicodemo, mabatyagan, kag makita ang mga epekto sang hangin, apang indi niya mahangpan kon sa diin ini nagahalin ukon nagakadto sa ulihi. Apang, indi maduhaduhaan nga may yara hangin. Sing kaanggid, ang mga kulang sing espirituwal nga paghangop mabudlayan sa paghangop kon paano si Jehova, paagi sa iya espiritu, makapahanabo sa isa ka tawo nga matawo liwat kag kon ano ang mangin destinasyon sa ulihi sina nga tawo. Apang, paagi sa bulig sang inspirado nga mga manunulat sang Biblia, mahangpan naton ina nga mga butang.—Juan 16:13.
Pagpaathag sa Makalilibog
Ano ang ginahunahuna ni Jesus sang nagpamulong sia nahanungod sa ‘pagkatawo sa tubig kag sa espiritu’? Ang pagkatawo nagakahulugan sing umpisa. Ang bag-o nga pagkatawo nagakahulugan sing bag-o nga umpisa. Sa bahin sang mga disipulo ni Jesus, ang nahauna nga tikang agod matawo liwat nagsugod sa tapos sila maghinulsol sa ila mga sala, nagtalikod sa sayop nga dalanon, kag ginbawtismuhan sa tubig. Sugod sang Pentecostes sang 33 C.E., bilang sabat sa sina nga aksion, ginhatagan sila ni Jehova sang ginpatuhuyan ni Pedro nga “natawo liwat sa paglaum nga buhi . . . natigana sa langit.” (1 Pedro 1:3, 4; 3:21) Gintanom sang balaan nga espiritu ni Jehova sa ila ang pagtuo nga sila sa ulihi magapuyo kaupod ni Jesucristo sa langit. Naghatag ini sa ila sing bug-os nga bag-ong pagtamod sa kabuhi—isa ka bag-ong umpisa.
Isa bala ini ka relihiosong eksperiensia sa emosyon lamang? Indi. Ginhimo sila sang balaan nga espiritu nga isa ka bag-o gid, “bag-o nga tinuga.” (2 Corinto 5:17) Sang sila una nga matawo subong mga tawo, makasasala sila nga mga anak ni Adan, nga nakapanubli sang tanan nga dikahimpitan nga ginpaliton niya sa iya mga kaliwat. Karon, sa tapos “matawo liwat,” ining mga disipulo nakatigayon sing matinlo nga tindog sa atubangan sang Dios. Paano? Ang bili sang halad ni Jesus gin-aplikar sa ila. Paagi sa sini, gintamod sila sang Dios subong matarong bisan dihimpit pa sila nga mga tawo. (Roma 3:25, 26; 5:12-21; 1 Corinto 6:11) Kapin pa sa sina, ginakilala na sila karon ni Jehova subong mga anak niya. Ginapakita ni apostol Pablo kon paano: “Kay ang tanan nga ginatuytuyan sang espiritu sang Dios mga anak sang Dios . . . mga anak kita sang Dios.” (Roma 8:14, 16) Ginbaton na sila karon subong bahin sang langitnon nga pamilya sang Dios.
Kag may kapin pa sa sini. Si Pablo nagapaathag liwat: “Kon mga anak, nian mga manunubli, mga manunubli sang Dios, apang mga masigkamanunubli ni Cristo.” (Roma 8:17) May paglaum ining espirituwal nga mga anak sang Dios sa pagpanubli sang ginpanubli ni Cristo Jesus—ang harianon nga gahom sa langit. Ginpahayag ni Jesus kay apostol Juan ang kadamuon sang mga tawo nga magagahom upod sa iya sa ibabaw sang duta—144,000. (Bugna 7:4; 14:1-3) Nian ginpakita pa niya kay Juan nga ining mga nahamut-an nga mga disipulo “mangin mga saserdote sang Dios kag ni Cristo, kag magahari sila kaupod niya sing isa ka libo ka tuig.”—Bugna 20:6.
Mga Benepisyo sa Iban
Nagakahulugan bala ini nga agod mahamut-an sang Dios, ang tanan dapat “matawo liwat”? Indi gid. Ang halad ni Jesus nagatabon sa kapin sa 144,000 ka tawo nga pinasahi nga napilian nga makaupod niya sa langit. Sang magsulat si apostol Juan sa “natawo liwat” nga mga Cristiano sa talipuspusan nayon sang nahaunang siglo, nagsiling sia nahanungod sa halad ni Jesus: “Sia ang katumbas nga halad para sa aton mga sala, apang indi lamang para sa aton kundi para man sa sala sang bug-os nga kalibutan.” (1 Juan 2:2) Paano ini?
Sa sining paagi. Ang mga ‘natawo liwat’ magahari upod kay Jesucristo sa langitnon nga Ginharian ni Jehova agod magdala sing mga kaayuhan sa iban pa nga katapo sang katawhan nga magakabuhi sa duta. Gintagna ini sa isa ka talalupangdon nga saad nga ginhatag sa katigulangan ni Jesus nga si Abraham halos 4,000 ka tuig na ang nagligad. “Paagi sa imo binhi pakamaayuhon sang tanan nga pungsod sang duta ang ila kaugalingon,” siling ni Jehova kay Abraham. (Genesis 22:18) Huo, daku nga mga pagpakamaayo ang ihatag sa tanan nga pungsod paagi sa “binhi” ni Abraham!
Sin-o inang “binhi”? Amo si Jesucristo, nga ginbuylugan sang iya matuod nga ‘natawo liwat’ nga mga sumulunod. Si apostol Pablo nagapaathag: “Dugang pa, kon kamo iya ni Cristo, mga binhi gid kamo ni Abraham.” (Galacia 3:16, 29) Kag ano ang mga pagpakamaayo nga magaabot sa katawhan sang tanan nga pungsod paagi kay Jesucristo kag sa sining ‘natawo liwat’ nga mga disipulo? Amo ang pribilehiyo nga mapasag-uli sa kahamuot sang Dios kag maagom ang tanan niya nga aman para sa paraiso nga duta.—Genesis 1:27, 28; Salmo 37:29; Hulubaton 2:21, 22; Isaias 45:18.
Gani ang 144,000 ka ‘natawo liwat’ nga mga disipulo “magasulod sa [langitnon] nga ginharian sang Dios” agod maghatag sing dalayawon nga mga pagpakamaayo nga dalhon sang Ginharian sang Dios sa dimaisip nga minilyon diri gid sa duta. (Mateo 6:10; Roma 8:19-21; Bugna 21:1-5) Kon bala nahangpan ni Nicodemo ang mga pulong ni Jesus kag ‘natawo liwat’ agod mangin bahin sining nagagahom nga hubon, indi naton mahibaluan. Ang aton nahibaluan amo nga ang kahigayunan agod mabaton ang mga kaayuhan sang ila langitnon nga paggahom bukas para kay bisan sin-o nga nagahandum sa paghimulos sini. Himuslan mo bala?
[Kapsion sa pahina 27]
Dapat bala “matawo liwat” ang tanan agod kahamut-an sang Dios?