Ang Kabuhi kag Ministeryo ni Jesus

Pagtigayon sing Suod nga Kaangtanan

PAGKATAPOS sang panihapon sa memoryal, ginpalig-on ni Jesus ang iya mga apostoles paagi sa dipormal nga pagpakigsugilanon sing suod. Lampas na sa tungang-gab-i. Gani si Jesus naglaygay: “Tindog kamo, mahalin kita diri.” Apang, antes sila maghalin, si Jesus, nga napahulag sang iya gugma tungod sa ila, nagpadayon sa pagpamulong, nagahatag sing makapahulag nga ilustrasyon.

“Ako ang matuod nga puno sang ubas, kag ang akon Amay amo ang mangunguma,” umpisa niya. Gintanum sang Daku nga Mangunguma, si Jehova nga Dios, ining malaragwayon nga puno sang ubas sang ginhaplasan niya sing balaan nga espiritu si Jesus sang ginbawtismuhan sia sang tigragas sang 29 C.E. Apang padayon nga ginpakita ni Jesus nga ang puno sang ubas nagakahulugan sing labi pa sa iya, nga nagasiling:

“Ang tagsa ka sanga sa akon nga wala nagapamunga ginakuha niya, kag ang tagsa nga nagapamunga ginatinloan niya, agod nga magpamunga sing madamo pa. . . . Subong nga ang sanga indi makapamunga sa iya kaugalingon kon wala nagaangot sa puno, amo man kamo, kon indi kamo magpabilin sa akon. Ako amo ang puno sang ubas, kamo ang mga sanga.”

Sang Pentecostes, pagligad sang 51 ka adlaw, ang mga apostoles kag ang iban nangin mga sanga sang puno sang ubas sang ang balaan nga espiritu ginpasagahay sa ila. Sang ulihi, 144,000 ka tawo ang nangin sanga sang malaragway nga puno sang ubas. Upod sa sanga sang puno sang ubas, si Jesucristo, sila ang nagahuman sa malaragwayon nga puno sang ubas nga nagapamunga sang mga bunga sang Ginharian sang Dios.

Ginpaathag ni Jesus ang yabi sang pagpamunga: “Ang nagapabilin sa akon, kag ako sa iya, sia amo ang nagapamunga sing madamo; kay luwas sa akon wala kamo sing mahimo.” Apang, kon ang isa indi magapamunga, siling ni Jesus, “ginapilak sia subong sang sanga kag nagakalaya; kag ang mga sanga ginatipon, ginadap-ong sa kalayo kag nagakasunog.” Sa pihak nga bahin, si Jesus nagasaad: “Kon magpabilin kamo sa akon kag ang akon mga pulong magpabilin sa inyo, pangayo kamo sing bisan anong buot ninyo kag himuon ini sa inyo.”

Padayon nga ginpakita ni Jesus sa iya mga apostoles kon ano ang nagahimaya sa Amay, nga amo, “nga magpamunga kamo sing madamo kag sa amo magpamatuod nga kamo mga disipulo niya.” Ang bunga nga luyag sang Dios gikan sa mga sanga amo ang ila pagpadayag sang katulad-Cristo nga mga kinaiya, labi na ang gugma. Dugang pa, bangod kay si Cristo amo ang manugwali sang Ginharian sang Dios, ang maayo nga bunga nagalakip man sang ila hilikuton sa paghimo sing disipulo kasubong sang ginhimo niya.

“Pabilin kamo sa akon gugma,” laygay ni Jesus. Apang, paano ini himuon sang iya mga apostoles? “Kon magbantay kamo sang akon mga sugo,” siling niya, “magapabilin kamo sa akon gugma.” Nagapadayon, si Jesus nagapaathag: “Ini amo ang akon sugo, nga maghigugmaanay kamo subong nga ako naghigugma sa inyo. Walay tawo nga may gugma nga daku pa sini, nga ihatag sang isa ka tawo ang iya kabuhi tungod sa iya mga abyan.”

Sa sulod sang pila ka oras, ipakita ni Jesus ining labaw nga gugma paagi sa paghatag sang iya kabuhi tungod sang iya mga apostoles, subong man sang tanan pa nga iban nga nagatuo sa iya. Ang iya halimbawa dapat magpahulag sa iya mga sumulunod nga ipakita ina man nga nagasakripisyo sa kaugalingon nga gugma para sa isa kag isa. Ini nga gugma magapakilala sa ila, kay subong sang ginsiling sang nagligad ni Jesus: “Sa sini ang tanan nga mga tawo makahibalo nga kamo mga disipulo ko, kon magahigugmaanay kamo.”

Nagapakilala sang iya abyan, si Jesus nagasiling: “Kamo akon mga abyan kon nagahimo kamo sang ginsugo ko sa inyo. Indi na ako magtawag sa inyo nga mga ulipon, kay ang ulipon wala makahibalo sang ginahimo sang iya agalon. Apang ako nagtawag sa inyo nga mga abyan, kay ang tanan nga akon nabatian sa akon Amay napakilala ko sa inyo.”

Daw ano ka hamili nga kaangtanan nga tigayunon​—⁠ang mangin suod nga mga abyan ni Jesus! Apang agod padayon nga matigayon ini nga kaangtanan, ang iya mga sumulunod dapat “magpamunga.” Sa amo, si Jesus nagsiling, “bisan ano ang inyo pangayuon sa Amay sa akon ngalan, ihatag ini sa inyo.” Sa pagkamatuod, isa ina ka daku nga padya bangod sang pagpatubas sing bunga sang Ginharian!

Sa tapos malaygayan ang mga apostoles nga “maghigugmaanay,” ginpaathag ni Jesus nga ang kalibutan magadumot sa ila. Apang, sia nagalaygay sa ila: “Kon ang kalibutan nagadumot sa inyo, kilalaha ninyo nga ini nagdumot sa akon sing una sa inyo.” Masunod nga ginpakita ni Jesus kon ngaa ginadumtan sang kalibutan ang iya mga sumulunod, nga nagasiling: “Bangod nga kamo indi iya sang kalibutan, kundi ginpili ko kamo gikan sa kalibutan, busa ang kalibutan nagadumot sa inyo.”

Nagapaathag sing dugang sang rason bangod sang pagdumot sang kalibutan, si Jesus nagapadayon: “Tanan ini himuon nila sa inyo bangod sa akon, kay wala sila makakilala sa nagpadala [si Jehova nga Dios] sa akon.” Sa katunayan ang milagruso nga mga buhat ni Jesus, nagpakamalaut sa mga nagdumot sa iya, kay sia nagsiling: “Kon wala ako makahimo sa tunga nila sang mga buhat nga walay iban nga makahimo, wala sila kuntani sing sala; apang karon nakakita sila kag nagdumot sa akon kag sa akon Amay.” Busa, subong sang ginasiling ni Jesus, ang kasulatan natuman: “Gindumtan nila ako sa walay kabangdanan.”

Subong sang ginhimo niya sang nagligad, ginpaumpawan sila liwat ni Jesus paagi sa pagsaad nga magpadala sing timbang, ang balaan nga espiritu, nga amo ang gamhanan nga aktibo nga kusog sang Dios. “Sia magasaksi sa akon; kag kamo man magasaksi.” Juan 14:31–15:27; 13:​3, 35; Galacia 6:16; Salmo 35:19; 69:⁠4.

▪ San-o gintanum ni Jehova ang malaragwayon nga puno sang ubas, kag san-o kag paano ang iban nangin bahin sang puno sang ubas?

▪ Sa ulihi, pila ang nangin sanga sang malaragwayon nga puno sang ubas?

▪ Ano nga bunga ang luyag sang Dios gikan sa mga sanga?

▪ Paano kita mangin mga abyan ni Jesus?

▪ Ngaa ginadumtan sang kalibutan ang mga sumulunod ni Jesus?