LEKSION 17

Ano ang mga Kinaiya ni Jesus?

Naimprinta nga Edisyon

Samtang ginatun-an naton ang mga ginhambal kag ginhimo ni Jesus diri sa duta, makita naton ang iya mga kinaiya nga makabulig sa aton nga mangin mas malapit sa iya kag sa iya Amay nga si Jehova. Ano ang pila sa manami nga mga kinaiya ni Jesus? Kag paano naton sia mailog?

1. Ano ang mga kinaiya ni Jesus nga pareho sa iya Amay?

Binilyon ka tuig nga nakaupod ni Jesus ang iya Amay sa langit, kag nakatuon gid sia sa iya. Gani ang ginahunahuna, ginabatyag, kag ginahimo ni Jesus daw pareho gid sa iya Amay. (Basaha ang Juan 5:19.) Ang matuod, nailog gid ni Jesus ang personalidad sang iya Amay amo nga nakasiling sia: “Ang bisan sin-o nga nakakita sa akon nakakita man sa Amay.” (Juan 14:9) Kon mas makilala mo si Jesus, mas makilala mo man si Jehova. Halimbawa, ang pagpalangga ni Jesus sa mga tawo nagapakita nga palangga ka man ni Jehova.

2. Paano ginpakita ni Jesus nga palangga niya si Jehova?

Si Jesus nagsiling: “Agod mahibaluan sang kalibutan nga ginahigugma ko ang Amay, ginahimo ko ang suno sa sugo nga ginhatag sang Amay sa akon.” (Juan 14:31) Sang ari si Jesus sa duta, ginpakita niya nga palangga gid niya ang iya Amay kay gintuman niya sia bisan pa may mga kabudlayan. Pirme gid ginaistorya ni Jesus sa iban ang parte sa iya Amay, kag ginabuligan sila nga mangin malapit sa Iya.—Juan 14:23.

3. Paano ginpakita ni Jesus nga palangga niya ang mga tawo?

Ang Biblia nagsiling nga ‘nalipay gid si Jesus sa katawhan.’ (Hulubaton 8:31, footnote) Ginpakita niya ini paagi sa pagpaumpaw kag pagbulig sa mga tawo. Paagi sa iya mga milagro ginpakita niya indi lang ang iya gahom kundi ang iya man kaluoy sa ila. (Marcos 1:40-42) Maayo ang pagpakig-angot niya sa tanan kag wala sia sing ginapasulabi. Ang iya ginhambal nakapaumpaw kag nakahatag sing paglaum sa tanan nga handa gid mamati sa iya. Handa pa gani sia nga mag-antos kag mapatay kay palangga niya ang tanan nga tawo. Pero mas palangga ni Jesus ang mga nagatuman sa iya mga ginatudlo.—Basaha ang Juan 15:13, 14.

USISAA PA GID

Hibaluon pa gid naton ang parte sa mga kinaiya ni Jesus kag kon paano naton mailog ang iya gugma kag kaalwan.

4. Palangga ni Jesus ang iya Amay

Ginatudluan kita sang halimbawa ni Jesus kon paano ipakita ang aton pagpalangga sa Dios. Basaha ang Lucas 6:12 kag Juan 15:10; 17:26. Sa tapos mabasa ang kada bersikulo, binagbinaga ini nga pamangkot:

Pareho kay Jesus, paano naton mapakita nga palangga naton si Jehova?

Si Jesus nga nagapangamuyo. — Palangga ni Jesus ang iya Amay sa langit kag pirme sia nagapakig-istorya sa iya paagi sa pagpangamuyo

5. Nagaulikid gid si Jesus sa mga tawo

Pirme gid ginauna ni Jesus ang iban sangsa iya kaugalingon. Bisan pa kapoy sia, ginbuligan niya ang mga tawo. Basaha ang Marcos 6:30-44, dayon binagbinaga ini nga mga pamangkot:

Sa sini nga mga bersikulo, paano ginpakita ni Jesus nga nagaulikid sia sa iban?—Tan-awa ang bersikulo 31, 34, 41, kag 42.
Ngaa ginbuligan ni Jesus ang mga tawo?—Tan-awa ang bersikulo 34.
Bangod nasunod ni Jesus ang mga kinaiya ni Jehova, ano ang ginatudlo sini sa imo parte kay Jehova?
Paano naton mailog ang pag-ulikid ni Jesus sa iban?

Paagi sa milagro, si Jesus nagpakaon sa linibo paagi sa pagpadamo sang lima ka tinapay kag duha ka gamay nga isda. Ginpanagtag ini sang iya mga disipulo sa mga lalaki, babayi, kag kabataan.

6. Maalwan si Jesus

Maalwan si Jesus bisan pa indi sia manggaranon, kag gusto niya nga mangin maalwan man kita. Basaha ang Binuhatan 20:35, dayon binagbinaga ini nga pamangkot:

Suno kay Jesus, paano kita mangin malipayon?

Tan-awa ang VIDEO, dayon binagbinaga ang masunod nga pamangkot.

VIDEO: “Mas Malipayon ang Nagahatag”—Porsyon lang sang video (4:00)

Paano kita makahatag sa iban bisan pa indi kita manggaranon?

Kabalo ka bala?

Ang Biblia nagatudlo sa aton nga mangamuyo kay Jehova sa ngalan ni Jesus. (Basaha ang Juan 16:23, 24.) Kon mangamuyo kita sa ngalan ni Jesus, ginapakita naton nga ginaapresyar naton ang iya ginhimo para mangin abyan kita ni Jehova.

KON MAGSILING ANG IBAN: “Daw wala man labot ang Dios kon nagaantos kita.”