Mga Pamangkot Gikan sa mga Bumalasa
◼ Bangod sang pinamulong ni Jesus sa Juan 15:15, dapat bala tamdon sang mga Cristiano ang ila kaugalingon subong iya “mga ulipon,” ukon makabig bala naton ang aton kaugalingon nga iya “mga abyan”?
Sarang kita kag dapat mangin lunsay amo sina. Agod mahangpan kon ngaa, talupangdon naton kon ano ang ginsiling didto ni Jesus sa iya matutom nga mga apostoles sa iya katapusan nga gab-i upod sa ila:
“Walay tawo nga may gugma nga daku pa sini, nga ihatag sang isa ka tawo ang iya kabuhi tungod sa iya mga abyan. Kamo akon mga abyan kon nagahimo kamo sang ginsugo ko sa inyo. Indi na ako magtawag sa inyo nga mga ulipon, kay ang ulipon wala makahibalo sang ginahimo sang iya agalon. Apang ako nagtawag sa inyo nga mga abyan, kay ang tanan nga akon nabatian sa akon Amay napakilala ko sa inyo.”—Juan 15:13-15.
Una, ang buot silingon ni Jesus paagi sa pagsiling nga ang iya matutom nga mga disipulo mga ulipon? Indi niya buot silingon ang mga ulipon sa kahulugan nga ang tanan nga katawhan nga mga kaliwat ni Adan natawo nga dihimpit, busa ginbaligya ukon naulipon sa sala. (Juan 8:34; Roma 5:18, 19; 6:16; 7:14) Tuhoy sa mga Cristiano kutob sadto, ang mga apostoles naulipon anay sa sina nga paagi, apang ang halad ni Jesus naghatag sing mga paagi sa paglibre, ukon sa paghilway, sa ila. (1 Pedro 1:18, 19; Galacia 4:5) Apang, wala sila gilayon mangin bug-os nga hilway. Subong sang ginsulat sang ulihi ni apostol Pablo, sila “ginbakal nga may bayad,” sang dugo ni Jesus, agod mangin ulipon sila sang Dios kag ni Cristo.—1 Corinto 6:20; 7:22, 23.
Sa Juan 15:15 si Jesus wala nagapanugda nga ang matutom nga mga apostoles nga magabaton sa dili madugay sing balaan nga espiritu kag mangin hinaplas nga mga Cristiano indi na mga ulipon. (Ipaanggid ang Juan 15:20.) Sa pagkamatuod, ang pag-alagad sa Dios paagi kay Cristo indi mapiguson kag makamamatay. Mahigugmaon ini kag nagaamlig sa kabuhi. (2 Timoteo 4:8; Tito 1:1, 2) Ang Cristiano nga nagabaton sing malipayon sang balor sang dugo ni Cristo kag mangin ulipon sang Dios magaatubang sing permanente nga kamatayon lamang kon sikwayon niya sa ulihi ina nga halad kag magabalik sa pagpakasala, nga mangin ulipon sini sa liwat. (Galacia 1:10; 4:8, 9; Hebreo 6:4-6) Busa, ang mga disipulo ni Jesus magapadayon nga mangin mga ulipon sang Dios kag ni Cristo, apang mangin labi pa sila sa mga ulipon. Ngaa?
Nahangpan ni Jesus kag sang mga apostoles sadto pa, nga sa normal nga mabugnaw ukon pormal nga agalon-ulipon nga kaangtanan, ‘ang ulipon wala makahibalo sang ginahimo sang agalon.’ Sing kinaandan, ang agalon indi makigsugilanon sa iya ginbakal nga ulipon, ukon magasugid sa iya sang iya pribado nga mga panghunahuna kag mga balatyagon.
Apang, makita naton gikan sa pinamulong ni Jesus nga tuhay ini sa mga apostoles. Nagsiling sia: “Ako nagtawag sa inyo nga mga abyan, kay ang tanan nga akon nabatian sa akon Amay napakilala ko sa inyo.” (Juan 15:15) Huo, subong nga kinaandan sa ulot sang mag-abyan, ginsugid ni Jesus sa ila ang mga detalye kag mga paghangop nga sekreto anay. (Mateo 13:10-12; 1 Corinto 2:14-16) Bisan pa nga sila mga alagad, ukon mga ulipon, sang Dios paagi kay Jesus, ang mga apostoles nag-agom sing mainit nga kasuod nga nagtanda man sa ila subong ginasaligan nga mga abyan. (Ipaanggid ang Salmo 25:14.) Sarang ina kag dapat mangin matuod man sa aton. Daw ano ka daku nga pribilehiyo ang may mga Agalon sa langit nga magakabig sa aton subong ginasaligan kag ginatahod nga mga kompidante, subong mga abyan!