Madaug Gid Bala sang Maayo ang Malain?

HALOS duha ka libo ka tuig na ang nakaligad, si Jesucristo, ang walay sala nga tawo, ginkasaba tungod sa iya kabuhi. Ang malain nga mga tawo nagbuko sa pagpatay sa iya bangod nagpamulong sia sing kamatuoran. Ginbutangbutangan sia sing sedisyon, kag ang kadam-an nag-ayo nga patyon sia. Ang Romanong gobernador, nga nagpakamahal sang iya politikanhon nga kabantugan labaw sa kabuhi sang isa ka kubos nga panday, nagtagudili kay Jesus sa mapintas nga kamatayon. Sa tanan nga naguwa nga dagway, daw nagmadinalag-on ang malain.

Apang, sang gab-i antes sia patyon, nagsiling si Jesus sa iya mga disipulo: “Nadaug ko ang kalibutan.” (Juan 16:33) Ano ang buot niya silingon? Sa bahin, nga ang kalainan sa kalibutan wala nagpaakig sa iya ukon nagpabalos sa iya sa kaanggid nga paagi. Wala sia madasok sa malain nga dihunan sang kalibutan. (Ipaanggid ang Roma 12:​2, Phillips.) Bisan sang nagatagumatayon, ginpangamuyo niya ang mga nagpatay sa iya: “Amay, patawara sila, kay wala sila makahibalo sang ila ginahimo.”​—⁠Lucas 23:⁠34.

Ginpakita ni Jesus​—⁠tubtob sang mapatay sia⁠—​nga ang malain sarang madaug. Ginlaygayan niya ang iya mga sumulunod nga makig-away batok sa malain. Paano nila ina mahimo? Paagi sa pagpamati sa Makasulatanhon nga laygay nga “dili magbayad sa bisan kay sin-o sing malaut sang malaut” kag “dag-a ang malaut paagi sa maayo,” subong sang ginhimo ni Jesus. (Roma 12:​17, 21) Apang madinalag-on gid bala ina nga dalanon?

Pagpakig-away Batok sa Kalainan sa Dachau

Si Else isa ka Aleman nga babayi nga nabilanggo sa Dachau kag naghatag sing hamili nga regalo sa 14-anyos nga Ruso nga bata nga babayi, ang regalo sang pagtuo kag paglaum.

Ang Dachau isa ka kilala nga kampo konsentrasyon diin linibo ang ginpatay paagi sa gas nga hilo kag ginatos, lakip ining lamharon nga Ruso nga bata nga babayi, ang makangilidlis nga gin-eksperimentuhan sa medisina. Ang Dachau daw larawan sang kalainan. Walay sapayan, bisan sa sinang kigang nga duta, nagtubo ang maayo kag nagmuad pa gani.

Naluoy gid si Else sa sining lamharon nga tin-edyer nga babayi nga napilitan man sa pagtan-aw sa mapintas nga paglugos sang SS nga mga guwardiya sa iya iloy. Si Else, nga nagbutang sa katalagman sang iya kaugalingon nga kabuhi, nangita sing mga kahigayunan nga masugilanon ang bata nga babayi nahanungod sa maayo kag malain kag nahanungod sa Makasulatanhon nga paglaum sang pagkabanhaw. Gintudluan niya ang iya lamharon nga abyan nga maghigugma sa baylo nga magdumot. Kag ang Ruso nga bata nga babayi nakalampuwas sa kangidlis sang Dachau, bangod kay Else.

Ginhimo lamang ini ni Else bangod luyag niya sundon ang dimaiyaiyahon nga halimbawa ni Cristo. Subong isa sang mga Saksi ni Jehova, natun-an niya ang indi pagbalos sing malain sa malain, kag ang iya pagtuo nagpahulag sa iya nga buligan ang iban nga himuon man ini. Bisan pa nga nag-antos sia sa Dachau, naagom niya ang moral nga kadalag-an batok sa malain nga rehimen. Kag indi lamang sia isahanon.

Si Paul Johnson, sa iya libro nga A History of Christianity, nagsiling nga “ang [mga Saksi ni Jehova] wala makigkooperar sa estado sang Nazi nga gintagudilian nila subong bug-os nga malaut. . . . Nubentay-siete porsiento ang nag-antos sing lainlain.” Walay paglaum bala ini nga pagpakigsumpong? Sa libro nga Values and Violence in Auschwitz, ang Polakong sosyologo nga si Anna Pawel­czynska nagsiling nahanungod sa mga Saksi: “Ining diutay nga grupo sang mga bilanggo isa ka malig-on nga puwersa sa ideolohiya kag nagdaug sila sa ila pagpakig-away batok sa Nazismo.”

Apang, para sa kalabanan sa aton, ang pangunang inaway ginaaway batok sa kalainan sa sulod sa baylo nga sa kalainan sa guwa. Isa ini ka pagsumpunganay sa sulod sang aton kaugalingon.

Pagdaug sa Malain sa Sulod Naton

Ginlaragway ni apostol Pablo ining pagpakig-away sa masunod nga paagi: “Indi ang maayo nga luyag ko himuon ang ginahimo ko; ang malain nga indi ko luyag himuon ang padayon ko nga ginahimo.” (Roma 7:​19, The New Testament, ni Wil­liam Bar­clay) Subong sang nahibaluan gid ni Pablo, ang paghimo sing maayo wala pirme nagaabot sing kinaugali.

Si Eugenio⁠a isa ka lamharon nga Katsila nga, sa duha ka malawig nga tinuig, nakig-away batok sa iya malain nga mga huyog. “Dapat ko estriktuhan ang akon kaugalingon,” siling niya. “Kutob sa pagkabata, may huyog ako nga mag-imoral. Subong isa ka tin-edyer, hungod ako nga nakigbahin sa magansal nga kinalipay sang mga homoseksuwal, kag sing prangka, nanamian ako sa sinang estilo sang pangabuhi.” Ano ang nagpabag-o sa iya sang ulihi?

“Luyag ko pahamut-an ang Dios, kag natun-an ko gikan sa Biblia nga wala sia mahamuot sa akon pagkabuhi,” siling ni Eugenio. “Gani namat-od ako nga magliwat, nga nagasunod sa mga pagsulundan sang Dios. Kada adlaw, dapat ko sa gihapon awayon ang negatibo kag mahigko nga panghunahuna. Determinado ako nga magdaug sa sining inaway, kag dalayon ako nga nangamuyo sing bulig sang Dios. Pagligad sang duha ka tuig natapos na ang pinakamalain, bisan pa estrikto gihapon ako sa akon kaugalingon. Apang takus ang pagpakig-away. May pagtahod na ako karon sa akon kaugalingon, maayo nga pag-asawahay, kag, labaw sa tanan, maayo nga kaangtanan sa Dios. Natun-an ko gikan sa personal nga eksperiensia nga ang malain nga panghunahuna sarang masikway antes ini mamunga​—⁠kon panikasugan mo gid.”

Ginadaug sang maayo ang malain sa kada tion nga ang malain nga panghunahuna ginasikway, sa kada tion nga wala kita nagabalos sing malain sa malain. Apang, inang mga kadalag-an, bisan importante man ina, wala nagadula sang duha ka pangunang ginahalinan sang kalainan. Bisan ano man ka daku ang aton panikasog, indi gid naton madaug sing bug-os ang aton napanubli nga mga kaluyahon, kag si Satanas may malain gihapon nga impluwensia sa katawhan. Gani magabag-o pa bala ini nga kahimtangan?

Paglaglag sa Yawa

Ang katutom ni Jesus tubtob sa kamatayon isa ka daku nga kapierdihan kay Satanas. Napaslawan ang Yawa sa iya panikasog nga gub-on ang integridad ni Jesus, kag ina nga kapaslawan amo ang ginsuguran sang katapusan para kay Satanas. Subong sang ginapaathag sang Biblia, si Jesus nakatilaw sing kamatayon agod nga “paagi sa iya kamatayon malaglag niya . . . ang Yawa.” (Hebreo 2:14) Pagkatapos sia mabanhaw nagsiling si Jesus sa iya mga disipulo: “Ang bug-os nga gahom sa langit kag sa duta ginhatag sa akon.” (Mateo 28:18) Kag ini nga gahom pagagamiton sa pagdula sang mga buhat ni Satanas.

Ang tulun-an sang Bugna nagalaragway sang adlaw nga gintabog ni Jesus si Satanas gikan sa mga langit. Ining Puno nga Malauton, kaupod sang iya mga demonyo, ginlatiran sa palibot sang duta. Subong resulta, paandam sang Biblia, ang malain magabugana: “Kailo sa duta kag sa dagat, kay ang Yawa nagpanaug sa inyo, nga may dakung kasingkal, nakahibalo nga may malip-ot lamang sia nga tion.”​—⁠Bugna 12:​7-9, 12.

Ginapakita sang tagna sang Biblia nga ining maragtason nga hitabo natabo na​—⁠sadtong mga Nahaunang Inaway Kalibutanon.⁠b Amo ina ang rason kon ngaa aton nasaksihan sa tion naton ang pagdamo sang kalainan. Apang indi na lang madugay kag si Satanas pagadumilian sing bug-os agod indi na niya maimpluwensiahan ang bisan sin-o.​—⁠Tan-awa ang Bugna 20:​1-3.

Ano ang buot silingon sini tanan para sa katawhan?

“Indi Sila Maghimo sing Malain”

Subong Hari sang Ginharian sang Dios, gamiton ni Jesus sa dili madugay ang iya ‘gahom sa duta’ sa paghimo sing isa ka programa sang espirituwal nga pagtudlo liwat. “Ang mga pumuluyo sang mapatubason nga duta magatuon sing pagkamatarong.” (Isaias 26:⁠9) Ang mga benepisyo makita gid sang tanan. Ang Biblia nagapasalig sa aton: “Indi sila maghalit [“indi sila maghimo sing malain,” Interlinear Hebrew/Greek English Bible ni Green] ukon maglaglag . . . kay ang duta matugob sang ihibalo kay Jehova subong nga ang mga tubig nagatabon sang dagat.”​—⁠Isaias 11:⁠9.

Bisan karon, madamo sang aton malain nga mga huyog ang sarang madaug. Kon wala na ang impluwensia sang demonyo, mas mahapos pa gid ‘likawan ang kalautan kag himuon ang matarong.’​—⁠1 Pedro 3:⁠11.

May rason gid kita sa pagsalig nga daugon sang maayo ang malain bangod ang Dios maayo, kag paagi sa bulig niya sarang madaug sadtong maluyag sa paghimo sing maayo ang malain, subong sang ginpamatud-an ni Jesus paagi sa iya kaugalingon nga halimbawa. (Salmo 119:68) Yadtong handa sa karon nga awayon ang malain makapaabot sang pagkabuhi sa isa ka natinluan nga duta nga ginagamhan sang Ginharian sang Dios, isa ka gobierno nga magadula sang kalainan sa tanan nga tion. Ginalaragway sang salmista ang resulta: “Tuhoy sa mahigugmaon nga kalulo kag kamatuoran, nagkitaay sila; ang pagkamatarong kag ang paghidait​—⁠naghalukay sila. Ang kamatuoran nagaulhot sa duta, kag ang pagkamatarong nagtamod kutob sa langit.”​—⁠Salmo 85:​10, 11.

[Mga footnote]