Ang Pagtamod sang Biblia

Kon Ngaa ang mga Tagna sa Biblia Importante sa Imo

“KON may positibo kuntani kita nga pamatuod nga ang Biblia amo ang Pulong sang Dios,” siling sang madamo nga tawo, “magapati kami sa sini.” Apang, sing masami, ina nga mga tawo indi makasugid kon anong “positibo nga pamatuod” ang kinahanglan agod makombinse sila. Isa bala ini ka milagro?

Si Jesus naghimo sing madamo nga milagro sang yari sia sa duta, apang ang mga maduhaduhaon wala magbaton sini subong pamatuod nga isa sia ka Humalambal sang Dios. Ti, ang iban nangaturungan nga “paagi kay Beelzebub nga prinsipe sang mga yawa” nga si Jesus naghimo sing mga milagro! Ginbaton ni Jesus nga ang iban nga “mga milagro” nga ginhimo sang iban mga buhat gid ni Satanas. (Lucas 11:14-19; Mateo 7:22, 23) Busa, may iban pa nga kinahanglan subong positibo nga pamatuod nga ang Biblia amo ang Pulong sang Dios—nga magapakita nga ang pinamulong gid sang Biblia, ang mga mensahe nga ginaunod sini, naghalin sa Dios mismo.

Sa mga pahina sang Biblia mismo, makita naton ina nga pamatuod—tagna. Sa pagkamatuod, si Jehova subong Dios sang kamatuoran kag Tuburan sang tanan nga kaalam, ang Isa nga nakahibalo kutob sa ginsuguran sang katapusan, makasarang sa pagtagna kon ano ang mahanabo sa ulihi nga mga tion, lakip na ang aton. (Salmo 31:5; Hulubaton 2:6; Isaias 46:9, 10) Ginhimo niya ini sa iya nasulat nga Pulong, kag sa masami sing detalyado katama. Binagbinagon naton ang isa lamang ka hubon sang mga tagna nga nagasentro kay Jesucristo.

Mga Tagna nga Nagapamatuod kay Jesus nga Mesias

Linibolibo ka tagna sang Biblia ang natuman kay Jesucristo.a Ayhan mangatarungan ang iban nga ginmaniobra ni Jesus kag sang iya mga disipulo ang mga bagay sa sini nga katuyuan. Apang mahimo bala ina? Binagbinagon naton ang pila ka katunayan.

Indi mahimo nga diktahan ni Jesus ukon sang iya mga ginikanan ang isa ka Romano nga Cesar nga magpapanaug sing dekrito nga nagkinahanglan kay Jose kag kay Maria nga magkadto sa ila tumandok nga banwa sang Betlehem agod magpasensus kag magparehistro sa buhis sa tion nga inugbata kay Jesus. Gani ang mga Romano, nga indi gid interesado sa katumanan sang tagna sa Biblia, may importante nga papel sa pagkabun-ag ni Jesus sa Betlehem bilang katumanan sang tagna sa Miqueas 5:2.

Sa labi nga pagbuyagyag ni Jesus sa pagkasalimpapaw sang Judiyong relihiosong mga lider, labi pa gid nga luyag nila nga patyon sia. Apang ang iya kamatayon indi magaabot sing direkta gikan sa kamot sang iya mga kasimanwa. Kon mga Judiyo kuntani ang nagpatay kay Jesus, mahimo nga ginbato nila sia tubtob sa kamatayon nga ginbalay sa Mosaikong Kasuguan. (Juan 8:59; 10:31) Apang, suno sa mga tagna, ang Mesias dapat bitayon sa usok agod kuhaon ang sumpa sang Kasuguan.” (Ipaanggid ang Deuteronomio 21:22, 23 sa Galacia 3:13.) Dapat sia “pagbayawon” agod ‘mabuyok [niya] ang tanan nga tawo.’ (Ipaanggid ang Numeros 21:4, 9 sa Juan 3:14 kag 12:32, 33). Paagi sa paglansang, subong sang gingamit sang mga Romano, indi mapangduhaduhaan ang nahanungod sa katumanan sining mga tagna. Gani ang mga Romano, nga indi interesado sa pagbulig nga matuman ang mga tagna sa Biblia, sa liwat may importante nga papel sa pagpamatuod sa Pulong sang tagna ni Jehova nga matuod.

Dugang pa, samtang nagakabit sa usok, wala sing mahimo si Jesus sa pagpamat-od kon ano ang ginahimo sa iya panapton. Indi niya mamaniobra ang mga Romanong soldado nga papalaran ini. Apang ginpapalaran nila ini, suno gid sa gintagna sang Biblia nga himuon nila! (Salmo 22:18; Juan 19:24) Sa liwat, mga Romano, indi si Jesus ukon mga disipulo niya, ang nadalahig sa pagtuman sa maragtas.

Si Jesus nagtagna nga mahanabo ang mga hitabo sa Jerusalem sa kaliwat niya nga magakahulugan sang hinali nga katapusan sang siudad. (Lucas 21:5-24) Kapin sa 500 ka tuig antes sang panahon ni Jesus, gintagna ini ni Daniel. (Daniel 9:26, 27) Sang tuig 70 C.E., ang Jerusalem ginlaglag. Ang mga pulong ni Jesus kag ni Daniel natuman. Sa liwat, ang tagna sang Biblia ginapakita nga masaligan.

Makabenepisyo Ka Bala Gikan sa Tagna?

Madamong tagna sa Biblia ang matuman pa. Halimbaw, ginpatagna ni Jehova sa iya Anak, si Jesucristo, nga ining karon nga malaut nga sistema sang mga butang matapos, sundan sang bag-ong kalibutan sang pagkamatarong sa idalom sang iya langitnon nga Ginharian. (Mateo 24:3-14; Bugna 21:1-5; tan-awa man ang 2 Pedro 3:7-13.) Ini tanan nasulat sa Biblia, sa Pulong sang tagna ni Jehova nga pirme napamatud-an nga matuod. Nian, indi bala nga dapat naton ini hatagan sing hanuot nga pagbinagbinag?

Ano ang rason sang kabataan nga indi magsalig sa mga saad sang mga ginikanan nga sang nagligad maayong mga butang lamang ang ginhimo tungod sa ila kag pirme nagtuman sang ila pulong? Sing kaanggid, ano ang rason naton nga indi magsalig sa mga saad ni Jehova nga paluntaron ang Ginharian sang iya Anak? Ano ang rason naton nga magpati nga si Jehova, nga naghimo sing tuman kadamo nga kaayo sa iya mga tinuga sang nagligad, sa gilayon madulaan sing interes sa ila kaayuhan?

Wala sing makahalaylo nga argumento sa sina nga pangatarungan. Busa, may rason gid kita sa pagsalig kay Jehova kag sa iya Pulong kag sa paglaum sa iya. Ang iya masaligan nga pulong sang tagna nagahatag sa aton sing katuyuan nga magkabuhi. Ginatuytuyan sini ang aton hilikuton padulong sa isa ka maayo nga tulumuron. Amo gid ini ang pinakadaku sing kabilihanan sa aton karon.

[Footnotes]

[Kahon sa pahina 26]

Ang mga tagna sang Biblia nga nagatagna sang kalaglagan sang mga siudad, subong sang Sodoma kag Gomora (Genesis 18:20, 21; 19:12, 13), Ninive (Sofonias 2:13), Babilonia (Jeremias 51:1, 2), kag Petra sa Edom (Jeremias 49:7-22), nagailustrar nga ang Pulong sang tagna napamatud-an nga sibu.

[Kahon sa pahina 27]

LUYAG MO BALA MAKITA ANG PALAABUTON NGA KATUMANAN SINING TAGNA?

“Sia nagapatunong sang mga inaway.”​—Salmo 46:9.

“Ang pumuluyo indi magsiling: ‘Nagamasakit ako.’”​—Isaias 33:24.

“Wala na sing kamatayon ukon kalisud ukon paghibi ukon kasakit pa.”​—Bugna 21:4.

“Ang takna magaabot nga ang tanan nga yara sa mga lulubngan magapamati sang iya tingog kag magaguwa.”—Juan 5:28, 29.

“Ang mga matarong magapanubli san duta, kag magapuyo sa sini.”—Salmo 37:29.