Ano ang Dapat Naton Himuon Agod Maluwas?

ISA ka lalaki ang namangkot anay kay Jesus: “Ginuo, diutay lamang bala ang maluwas?” Ano ang ginsabat ni Jesus? Nagsiling bala sia: ‘Batuna lamang ako subong ang imo Ginuo kag Manluluwas, kag maluwas ka’? Wala! Si Jesus nagsiling: “Panikasog kamo sing lakas agod makasulod sa ganhaan nga makitid, kay nagasiling ako sa inyo, madamo ang magapaninguha sa pagsulod apang indi makasarang.”​—⁠Lucas 13:​23, 24.

Wala bala masabat ni Jesus ang pamangkot sang lalaki? Ang lalaki wala namangkot kon daw ano kabudlay ang maluwas; namangkot sia kon bala diutay lamang ang kadamuon. Gani ginpakita ni Jesus nga diutay lamang sangsa ginapaabot sang isa ang mahimo nga magapanikasog sing lakas sa pagbaton sining makatilingala nga pagpakamaayo.

‘Indi amo sina ang ginsiling sa akon,’ mahimo nga ipamatok sang pila ka bumalasa. Mahimo ginakutlo sini ang Juan 3:​16, nga nagasiling: “Kay ginhigugma gid sang Dios ang kalibutan, sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala, kundi may kabuhi nga walay katapusan.” (King James Version) Apang, kami nagasabat: ‘Ano, nian ang dapat naton tuuhan? Nga si Jesus nagkabuhi gid? Huo. Nga sia ang Anak sang Dios? Siempre! Kag sanglit ginatawag sang Biblia si Jesus nga “Manunudlo” kag “Ginuo,” indi bala nga dapat man naton tuuhan ang iya gintudlo, tumanon sia, kag sundon sia?’​—⁠Juan 13:13; Mateo 16:⁠16.

Pagsunod kay Jesus

A, diri nagautwas ang problema! Madamo sang mga ginsilingan nga sila “naluwas” ang daw wala gid sing tuyo nga sundon ukon tumanon si Jesus. Sa katunayan, ang isa ka Protestante nga klerigo nagsulat: “Sa pagkamatuod, ang aton pagtuo kay Cristo dapat magpadayon. Apang ang ginasiling nga ini dapat, ukon kinahanglan nga magpadayon, wala gid ginasakdag sa Biblia.”

Sa kabaliskaran, ginalista sang Biblia ang mahigko nga mga buhat nga kinaandan sa tunga sang pila ka tawo nga nagahunahuna nga sila “naluwas.” Nahanungod sa isa nga nagpadayon sa sinang mga pagginawi, nagsugo ini sa mga Cristiano: “Isikway ninyo ang tawo nga malaut sa tunga ninyo.” Sing pat-od indi luyag sang Dios ang mga malauton nga nagahigko sang iya Cristianong kongregasyon!​—⁠1 Corinto 5:​11-13.

Ano, nian, ang kahulugan sang pagsunod kay Jesus, kag paano naton ina mahimo? Ti, ano ang ginhimo ni Jesus? Sia bala imoral? makihilawason? palahubog? butigon? Dibunayag bala sia sa negosyo? Aba indi! ‘Apang,’ mahimo mamangkot ka, ‘dapat ko bala sikwayon inang tanan nga butang sa akon kabuhi?’ Para sa sabat, binagbinaga ang Efeso 4:17 tubtob 5:⁠5. Wala ini nagasiling nga pagabatunon kita sang Dios bisan ano man ang ginahimo naton. Sa baylo, nagasugo ini sa aton nga mangin tuhay gikan sa kalibutanon nga mga tawo nga “nadulaan sing tanan nga igbalatyag sa maayong pamatasan, . . . apang wala ninyo matun-an ang Cristo nga amo sina . . . Ubaha ninyo ang daan nga personalidad nga nahisuno sa inyo anay nga pagginawi . . . Ang makawat dili na magpangawat . . . Ang pagkamakihilawason kag ang tanan nga sahi sang kahigkuan ukon paghamkon dili gid paghingadlan sa tunga ninyo, subong nga nagakaigo sa mga tawo nga balaan . . . Bangod nahibaluan ninyo ini, nagakilala sini sa inyo kaugalingon, nga walay makihilawason ukon mahigko nga tawo ukon mahamkunon nga tawo​—⁠nga nagakahulugan sang sumilimba sa idolo​—⁠nga may panublion sa ginharian ni Cristo kag sang Dios.”

Ginasunod bala naton si Jesus kon sa dimagkubos wala kita nagatinguha sa pagkabuhi nahisuno sa iya halimbawa? Indi bala kita dapat mangabudlay nga himuon ang aton pagkabuhi nga labi nga kaangay kay Cristo? Inang importante nga pamangkot talagsa lamang ginabinagbinag, kon ginabinagbinag gid man, sang mga tawo nga nagasiling, subong sang isa ka relihiosong tract: “Magkari karon kay Cristo​—⁠kon ano ikaw.”

Ang isa sang mga disipulo ni Jesus nagpaandam nga ang didiosnon nga mga tawo “nagahimo nga balibad sang dibagay nga kaluoy sang Dios para sa lugak nga pagginawi kag nagpanghiwala sa aton lamang nga Tag-iya kag Ginuo, si Jesucristo.” (Judas 4) Paano naton, sa katunayan, ‘ginahimo nga balibad ang kaluoy sang Dios para sa lugak nga pagginawi’? Ginahimo naton ini paagi sa paghangop nga ang halad ni Cristo nagatabon sang hungod nga mga sala nga ginatuyo naton nga himuon sing padayon sa baylo sang mga sala sang tawhanon nga pagkadihimpit nga ginatinguhaan naton nga talikdan. Pat-od gid nga indi naton luyag ugyunan ang isa sang labing kilala nga ebanghelisador sa Amerika, nga nagsiling nga indi mo kinahanglan nga “maninlo, magbiya, ukon magliso.”​—⁠Ipaanggid ang Binuhatan 17:30; Roma 3:25; Santiago 5:​19, 20.

Ang Pagtuo Nagapahulag sang Buhat

Madamong tawo ang ginsilingan nga ang “pagtuo kay Jesus” isa lamang ka buhat kag nga ang aton pagtuo indi kinahanglan nga mangin mabakod katama agod magpahulag sing pagkamatinumanon. Apang ang Biblia wala nagaugyon. Wala magsiling si Jesus nga ang mga tawo nga nagasugod sang Cristianong dalanon naluwas. Sa baylo, sia nagsiling: “Sia nga nakabatas tubtob sa katapusan amo ang isa nga maluwas.” (Mateo 10:22) Ginapaanggid sang Biblia ang aton Cristianong dalanon sa isa ka palumba, nga ang padya sa katapusan sini amo ang kaluwasan. Kag ini nagalaygay: “Magdalagan sa paagi nga maagom ninyo ini.”​—⁠1 Corinto 9:⁠24.

Busa, ang “pagbaton kay Cristo” nagalakip sing kapin pa sa pagbaton lamang sang mga pagpakamaayo nga ginahatag sang superlatibo nga halad ni Jesus. Kinahanglan ang pagkamatinumanon. Si apostol Pedro nagasiling nga ang paghukom nagasugod sa “balay sang Dios,” kag nagadugang: “Karon kon nagasugod ini anay sa aton, ano bala ang mangin katapusan sadtong mga indi matinumanon sa maayong balita sang Dios?” (1 Pedro 4:17) Gani indi lamang pagpamati kag pagtuo ang himuon naton. Ang Biblia nagasiling nga dapat kita “mangin manugtuman sang pulong, kag indi mga tagpalamati lamang, nga nagadaya [sang aton kaugalingon] paagi sa sayop nga pangatarungan.”​—⁠Santiago 1:⁠22.

Ang Kaugalingon nga mga Mensahe ni Jesus

Ang tulun-an sang Bugna sa Biblia nagaunod sang mga mensahe tuhoy kay Jesus, nga ginpaalinton sa pito anay ka Cristianong mga kongregasyon paagi kay Juan. (Bugna 1:​1, 4) Nagsiling bala si Jesus nga sanglit “ginbaton” na sia sang mga tawo sa sining kongregasyon, bastante na yadto? Wala. Gindayaw niya ang ila mga binuhatan, ang ila pinangabudlayan kag ang ila pagbatas kag nagpamulong tuhoy sa ila gugma, pagtuo, kag ministeryo. Apang nagsiling sia nga pagatilawan sila sang Yawa kag nga pagapadyaan sila “sing indibiduwal suno sa [ila] mga binuhatan.”​—⁠Bugna 2:​2, 10, 19, 23.

Busa ginlaragway ni Jesus ang mas daku pa nga obligasyon sangsa nahangpan sang kalabanan nga mga tawo sang ginsilingan sila nga ang ila kaluwasan isa ka “natapos na nga hilikuton” sang “ginbaton” nila sia sa isa ka relihiosong pagtilipon. Si Jesus nagsiling: “Kon ang bisan sin-o buot magsunod sa akon, sikwayon niya ang iya kaugalingon kag pas-anon ang iya usok sang pag-antos kag padayon nga sundon ako. Kay ang bisan sin-o nga buot magluwas sang iya kalag madulaan sini; apang ang bisan sin-o nga magdula sang iya kalag bangod sa akon makakita sini.”​—⁠Mateo 16:​24, 25.

Sikwayon ang aton kaugalingon? Sundon si Jesus sing padayon? Magakinahanglan ina sing panikasog. Mahimo sini bag-uhon ang aton kabuhi. Apang, nagsiling gid bala si Jesus nga ang pila sa aton mahimo pa gani nga ‘madula ang aton mga kalag’​—⁠nga mapatay para sa iya? Huo, ina nga sahi sang pagtuo maagom lamang paagi sa ihibalo tuhoy sa makahalawhaw nga mga butang nga mahibaluan mo gikan sa pagtuon sa Pulong sang Dios. Napamatud-an ini sang adlaw nga si Esteban ginbato sang relihiosong mga panatiko nga “wala makasarang sa pagsumpong sang ila kaugalingon batok sa kaalam kag espiritu nga paagi sa sini sia nagpamulong.” (Binuhatan 6:​8-12; 7:​57-60) Kag ang subong sina nga pagtuo ginpakita sa aton tion sang ginatos ka Saksi ni Jehova nga napatay sa mga kampo konsentrasyon sa baylo nga lapason ang ila nahanas-sa-Biblia nga mga konsiensia.a

Cristianong Kakugi

Dapat kita manguyapot sing malig-on sa aton Cristianong pagtuo bangod, indi kaangay sang mahimo ninyo mabatian sa pila ka iglesia ukon relihiosong mga programa sa telebisyon, ang Biblia nagasiling nga mahimo kita magtalikod. Nagasugid ini tuhoy sa mga Cristiano nga nagbiya sang “matarong nga dalanon.” (2 Pedro 2:​1, 15) Busa dapat naton ‘padayon nga himuon ang aton kaluwasan nga may kahadlok kag pagkurog.’​—⁠Filipos 2:12; 2 Pedro 2:⁠20.

Amo bala sini ang paghangop sang nahaunang-siglo nga mga Cristiano, ang mga tawo nga nakabati sing aktuwal kay Jesus kag sa iya mga apostoles nga nagapanudlo? Huo. Nahibaluan nila nga dapat sila maghimo sing pila ka butang. Si Jesus nagsiling: “Busa lakat kamo kag maghimo sing disipulo sa tanan nga kapungsuran, . . . nagatudlo sa ila nga tumanon ang tanan nga butang nga ginsugo ko sa inyo.”​—⁠Mateo 28:​19, 20.

Pagkatapos sang duha ka bulan nga ginsiling yadto ni Jesus, 3,000 ang ginbawtismuhan sa isa lamang ka adlaw. Ang mga tumuluo madasig nga nagdamo tubtob sa 5,000. Gintudluan sang mga nagtuo ang iban. Sang nag-alaplaag sila bangod sang paghingabot, labi pa gid nga naglapnag ang ila mensahe. Ang Biblia nagasiling nga indi lamang pila ka mga lider kundi “ang mga nag-aplaag nagpanglakatan nga nagawali sang maayong balita sang pulong.” Busa, mga 30 ka tuig sang ulihi, si apostol Pablo nakasulat nga ang maayong balita “ginbantala sa bug-os nga tinuga sa idalom sang langit.”​—⁠Binuhatan 2:41; 4:4; 8:4; Colosas 1:⁠23.

Apang si Pablo wala nagpangumbertir, subong sang ginahimo sang mga ebanghelisador, paagi sa pagsiling: ‘Batuna ninyo si Jesus karon gid, kag kamo maluwas sing dayon.’ Ukon may pagsalig sia kaangay sang Amerikanong klerigo nga nagsulat: “Sang tin-edyer pa ako, . . . naluwas na ako.” Kapin sa 20 ka tuig pagkatapos ginpili sing personal ni Jesus si Pablo sa pagdala sang Cristianong mensahe sa katawhan sang mga pungsod, ining mapisan nga apostol nagsulat: “Ginasakit ko ang akon lawas kag ginahimo ini nga ulipon, agod, sa tapos nga nakawali ako sa iban, ako mismo indi mangin dikalahamut-an sa bisan paano.”​—⁠1 Corinto 9:27; Binuhatan 9:​5, 6, 15.

Ang kaluwasan isa ka libre nga dulot halin sa Dios. Indi ini mahimo maagom. Apang nagakinahanglan ini sang aton panikasog. Kon may nagtanyag sa imo sing isa ka malahalon gid nga regalo kag wala ka man lang magpakita sing pasalamat paagi sa pagpudyot kag pagbitbit sini, ang imo pagkadimapinasalamaton mahimo magapahulag sa naghatag nga ihatag na lang ini sa iban. Ti, daw ano ka malahalon ang dugo ni Jesucristo? Libre ini nga dulot, apang dapat naton ipakita ang tudok nga pagpasalamat para sa sini.

Ang matuod nga mga Cristiano yara sa naluwas nga kahimtangan sa bagay nga may kalahamut-an sila nga kahimtangan sa atubangan sang Dios. Subong isa ka grupo, ang ila kaluwasan sigurado. Sing indibiduwal, dapat nila tumanon ang mga sugo sang Dios. Walay sapayan, mahimo kita mapaslawan, kay si Jesus nagsiling: “Kon ang bisan sin-o wala nagapabilin nga nahiusa sa akon, ginapilak sia subong sang sanga kag nagakalaya.”​—⁠Juan 15:⁠6.

‘Ang Pulong sang Dios Buhi’

Ang sugilanon nga ginsambit sa pamuno sang ginsundan nga artikulo natabo sang halos 60 ka tuig nga nakaligad. Nagapati gihapon si Johnny nga ang kaluwasan maagom lamang paagi kay Jesucristo, apang narealisar niya nga dapat naton ini panikasugan. Kumbinsido gihapon sia nga ginatudlo sang Biblia ang lamang matuod nga ginhalinan sang paglaum para sa katawhan kag nga dapat naton tun-an inang dalayawon nga libro, matandog sini, kag tugutan ini nga magapahulag sa aton sa mga buhat sang gugma, pagtuo, kalulo, pagkamatinumanon, kag pagbatas. Ginpadaku niya ang iya mga kabataan sa pagpati sini man nga mga butang, kag karon nalipay sia nga makita sila nga nagapadaku sang ila kabataan sa amo man nga paagi. Ginahandum niya nga ang tanan may amo sina nga sahi sang pagtuo, kag ginahimo niya ang bisan ano nga masarangan niya agod mapatudok ini sa tagipusuon kag hunahuna sang iban.

Si apostol Pablo ginbugna sa pagsulat nga “ang pulong sang Dios buhi kag gamhanan.” (Hebreo 4:12) Makapabag-o ini sang kabuhi. Makapahulag ini sa imo sa tinagipusuon nga mga buhat sang gugma, pagtuo, kag pagkamatinumanon. Apang dapat mo himuon ang kapin pa sangsa “pagbaton” lamang sa hunahuna sa kon ano ang ginasiling sang Biblia. Tun-i ini kag tuguti ang imo tagipusuon nga mapahulag sini. Mag­patuytoy ka sa kaalam sini. Mga 5,000,000 ka mapinasakupon nga mga Saksi ni Jehova sa ­kapin sa 230 ka kadutaan ang nagatanyag sing libre nga pagtuon sa Biblia sa puluy-an. Agod mahibal-an kon ano ang imo matun-an gikan sa subong sina nga pagtuon, sulati ang mga manugbalhag sining magasin. Ang pagtuo kag espirituwal nga kusog nga matigayon mo magapahalipay sa imo!

[Footnote]

[Kahon sa pahina 7]

Ngaa “Magpangabudlay sing Lakas Para sa Pagtuo”?

Ang tulun-an sang Judas sa Biblia ginsulat “sa mga tinawag . . . , nga tinipigan tungod kay Jesucristo.” Nagasiling bala ini nga bangod ‘ginbaton [nila] si Jesus,’ ang ila kaluwasan sigurado? Wala, ginsilingan ni Judas yadtong mga Cristiano nga “magpangabudlay sing lakas para sa pagtuo.” Ginhatagan niya sila sing tatlo ka rason para himuon ina. Una, ‘ginluwas sang Dios ang isa ka katawhan paguwa sa duta sang Egipto,’ apang madamo sa ila ang nagtalikod sang ulihi. Ikaduha, bisan ang mga anghel nagrebelde kag nangin mga demonyo. Ikatlo, ginlaglag sang Dios ang Sodoma kag Gomorra bangod sang daku nga kahigkuan sa sekso nga ginhimo sa sadtong mga siudad. Ginhatag ni Judas ining mga rekord sa Biblia “subong isa ka nagapaandam nga halimbawa.” Huo, bisan ang mga tumuluo nga “tinipigan tungod kay Jesucristo” dapat maghalong nga indi magtalikod sa matuod nga pagtuo.​—⁠Judas 1-7.

[Kahon sa pahina 8]

Diin ang Husto?

Ang Biblia nagasiling: “Ang isa ka tawo ginapakamatarong paagi sa pagtuo luwas sa mga buhat sang kasuguan.” Ini man nagasiling: “Ang tawo ginapakamatarong bangod sang mga binuhatan, kag indi lamang bangod sang pagtuo.” Diin ang husto? Ginapakamatarong bala kita paagi sa pagtuo ukon paagi sa mga binuhatan?​—⁠Roma 3:28; Santiago 2:⁠24.

Ang nagahilisantuanay nga sabat gikan sa Biblia amo nga ini lunsay husto.

Sa mga siglo ang Sugo nga ginhatag sang Dios paagi kay Moises nagpatuman sa Judiyong mga sumilimba sa paghimo sing espesipikong mga halad kag mga dulot, sa pagsaulog sang mga adlaw sang kapiestahan, kag sa pagtuman sang mga sugo sa pagkaon kag iban pa. Inang “mga binuhatan sang kasuguan,” ukon “mga binuhatan” lamang, wala na ginakinahanglan sang gin-aman ni Jesus ang himpit nga halad.​—⁠Roma 10:⁠4.

Apang ang katunayan nga ining mga binuhatan nga ginhimo sa idalom sang Mosaikong Kasuguan ginbuslan sang superlatibo nga halad ni Jesus wala nagakahulugan nga mahimo naton pasapayanan ang mga instruksion sang Biblia. Ini nagasiling: “Daw ano pa gid ang dugo ni Cristo . . . nga makatinlo sang aton mga konsiensia gikan sa [daan] patay nga mga buhat agod makahimo kita sing balaan nga pag-alagad sa Dios nga buhi?”​—⁠Hebreo 9:⁠14.

Paano kita ‘makahimo sing balaan nga pag-alagad sa Dios nga buhi’? Upod sa iban pa nga butang, ang Biblia nagasugo sa aton nga sumpungon ang mga buhat sang unod, pamatukan ang imoralidad sang kalibutan, kag likawan ang mga siod sini. Ini nagasiling: “Pakig-away sang maayong pag-away sang pagtuo,” sikwaya “ang sala nga madali magsalawid sa aton,” kag “magdalagan nga may pagbatas sang dalaganon nga ginabutang sa aton atubang, samtang nagatulok kita sing maayo sa Pangulo nga Ahente kag Manughimpit sang aton pagtuo, si Jesus.” Kag ang Biblia nagalaygay sa aton nga indi ‘paglapyuon ukon pagpunawon ang aton mga kalag.’​—⁠1 Timoteo 6:12; Hebreo 12:​1-3; Galacia 5:​19-21.

Indi naton maagom ang kaluwasan paagi sa paghimo sining mga butang, kay wala gid sing tawo ang makahimo sing bastante nga takus sa sinang makatilingala nga pagpakamaayo. Walay sapayan, indi kita takus sa sining dalayawon nga dulot kon wala naton ginapakita ang aton gugma kag pagkamatinumanon paagi sa paghimo sang mga butang nga ginasiling sang Biblia nga luyag ipahimo sang Dios kag ni Cristo sa aton. Kon wala sing mga binuhatan nga nagapakita sang aton pagtuo, ang aton pangangkon nga nagasunod kay Jesus indi gid nagakabagay, kay ang Biblia maathag nga nagasiling: “Ang pagtuo, kon walay binuhatan, patay sa iya kaugalingon.”​—⁠Santiago 2:⁠17.

[Retrato sa pahina 7]

Tun-i ang Biblia kag tuguti ini nga magpahulag sa imo