Ang Manuggahom nga Makakontrol sang Tiempo

May daku nga epekto sa katawhan ang milagruso nga pagpakaon ni Jesus sa linibo ka tawo. Nagsiling sila nga “amo gid ini ang Manalagna nga magakari sa kalibutan,” ang Mesias, kag mangin maayo gid sia nga manuggahom. (Juan 6:14; Deuteronomio 18:18) Gani nagplano ang mga tawo nga piliton si Jesus nga mangin hari.

Pero nabal-an ni Jesus ang ila ginaplano. Ginpapauli niya ang mga tawo kag ginpabalik sa sakayan ang iya mga disipulo. Diin sila makadto? Makadto sila sa Betsaida kag dayon sa Capernaum. Pero nagkadto si Jesus nga nagaisahanon sa bukid kag nagpangamuyo sa sina nga gab-i.

Antes magkaagahon samtang masanag ang bulan, nakita ni Jesus ang sakayan sa malayo. Mabalod katama bangod sang mabaskog nga hangin, kag “nabudlayan [ang mga apostoles] sa pagbugsay, kay sugata sila sa hangin.” (Marcos 6:48) Nagdulhog si Jesus sa bukid kag naglakat sa mga balod pakadto sa ila. “Nakapalayo na sila sing mga tatlo ukon apat ka milya.” (Juan 6:19) Nakita sang mga disipulo nga daw labayan lang sila ni Jesus, kag nagsinggit sila sa kahadlok: “Ginamatamata kita!”—Marcos 6:49.

Ginpabakod sila ni Jesus: “Magpakaisog kamo! Ako ini; indi kamo magkahadlok.” Pero nagsiling si Pedro: “Ginuo, kon ikaw ina, sugua ako sa pagpalapit sa imo sa ibabaw sang tubig.” Nagsiling si Jesus: “Kari ka!” Gani nagpanaug si Pedro sa sakayan, kag naglakat sa ibabaw sang tubig kag nagpalapit kay Jesus. Pero bangod sa unos, hinadlukan si Pedro kag amat-amat nga naglugdang. Nagsinggit sia: “Ginuo, luwasa ako!” Gin-uyatan ni Jesus ang kamot ni Pedro kag nagsiling: “Ikaw nga diutay sing pagtuo, ngaa nagduhaduha ka?”—Mateo 14:27-31.

Nagsakay si Pedro kag si Jesus sa sakayan, kag nag-untat ang mabaskog nga hangin. Natingala gid ang mga disipulo, pero dapat bala sila matingala? Kon nahangpan nila “ang kahulugan sang iya milagro tuhoy sa tinapay” pila ka oras antes sini sang ginpakaon niya ang linibo, indi tuman ka makatilingala nga makalakat sia sa tubig kag mapatinong ang hangin. Nagyaub sila sa iya nga nagasiling: “Matuod gid nga ikaw ang Anak sang Dios.”—Marcos 6:52; Mateo 14:33.

Sang ulihi, nakalab-ot sila sa matahom kag madamo sing tanom nga kapatagan sang Genesaret, sa bagatnan sang Capernaum. Ginhulog nila ang angkla kag nagdungka sa baybayon. Nakilala sang mga tawo si Jesus kag gindala nila sa iya, kag sang iban pa halin sa mga lugar sa palibot, ang mga may balatian. Kon matandog nila ang sidsid sang bayo ni Jesus, nagaayo sila.

Sa amo man nga tion, nabal-an sang kadam-an nga nakakita sang milagruso nga pagpakaon ni Jesus sa linibo ka tawo nga naglakat na sia. Gani sang nag-abot ang gamay nga mga sakayan halin sa Tiberias, nagsakay sila sa sini kag nagkadto sa Capernaum para pangitaon si Jesus. Sang nakita nila sia, namangkot sila: “Rabbi, san-o ka nag-abot diri?” (Juan 6:25) Gani ginsaway sila ni Jesus, kag mabal-an naton ini sa ulihi.