Mga Pamangkot Gikan sa mga Bumalasa

◼ Ngaa nagsaad si Jesus nga yadtong nagatuo sa iya ‘indi na gid mapatay,’ nga sa katunayan ang tanan niya nga tagpalamati napatay?​—⁠Juan 11:​25, 26.

Sang nagpamulong si Jesus nahanungod sa indi mapatay, ukon tuhoy sa magkabuhi sing dayon, maathag nga indi niya buot silingon nga ang iya mga tagpalamati sadto anay indi na makaeksperiensia sing tawhanon nga kamatayon. Ang sadsaran nga punto ni Jesus amo nga ang pagtuo sa iya nagadul-ong sa kabuhi nga walay katapusan.

Sa isa ka halimbawa, si Jesus nagtawag sang iya kaugalingon nga “ang tinapay sang kabuhi.” Nian nagdugang sia: “Ini amo ang tinapay nga nagagikan sa langit, agod nga ang tawo makakaon sini kag indi mapatay. Ako ang buhi nga tinapay nga nagkari gikan sa langit; kon bisan sin-o ang magkaon sining tinapay magakabuhi sia sing dayon.”​—⁠Juan 6:​48-51.

Nagatan-aw sina lamang nga mga pulong, ang isa mahimo maghinakop nga ginsingganan ni Jesus ang iya tumalambong nga indi na gid sila makaeksperiensia sing kamatayon. Apang, wala ginasakdag sang konteksto ina nga konklusion. Si Jesus bag-o lang magsiling: “Ini amo ang kabubut-on sang nagpadala sa akon, nga wala ako sing madula sang tanan nga ginhatag niya sa akon kundi nga banhawon ini sa katapusan nga adlaw. . . . Ang tagsatagsa nga nakakita sa Anak kag nagatuo sa iya may kabuhi nga walay katapusan, kag banhawon ko sia sa katapusan nga adlaw. . . . Walay tawo nga makakari sa akon kon indi sia pagbuyukon sang Amay nga nagpadala sa akon; kag banhawon ko sia sa katapusan nga adlaw.” (Juan 6:​39-44) Kag sang ulihi nagdugang sia: “Ang nagakaon sang akon unod kag nagainum sang akon dugo may kabuhi nga walay katapusan, kag banhawon ko sia sa katapusan nga adlaw.” (Juan 6:54) Busa, ang saad ni Jesus nga ‘magkabuhi sing dayon’ indi makatarunganon nga hangpon nga nagakahulugan nga ang iya mga tagpalamati indi na gid makaeksperiensia sing kamatayon.

Kaanggid ini sa bantog nga saad ni Jesus kay Marta: “Ako ang pagkabanhaw kag ang kabuhi. Ang nagatuo sa akon, bisan mapatay sia, magakabuhi; kag ang bisan sin-o nga nagakabuhi kag nagatuo sa akon indi na gid mapatay.” (Juan 11:​25, 26) Maathag nga indi buot silingon ni Jesus nga ang matutom nga mga apostoles, halimbawa, indi na gid mapatay subong nga ang iban nga mga tawo napatay man. Sa sulod sang isa ka tuig, haplasan sila sang balaan nga espiritu kag hatagan sing paglaum nga maggahom subong mga hari sa langit. Agod mabaton ina nga padya, dapat sila mapatay subong mga tawo. (Roma 8:​14-23; 1 Corinto 15:​36-50) Kag talupangda nga si Jesus nagsiling: “Ang nagatuo sa akon, bisan mapatay sia, magakabuhi.”

Ang saad ni Jesus tumanon sa debotado nga mga alagad sang Dios nga nabuhi kag napatay sa wala pa magsugod ang paghatag sang kabuhi nga walay katapusan. Ang mga matutom yara sa linya para sa palaabuton nga pagkabanhaw. Paagi sa pagpabilin nga matutom pagkatapos sila ginbanhaw, indi na sila makaeksperiensia sing “ikaduha nga kamatayon,” dayon nga kamatayon.​—⁠Bugna 20:​15; 21:​8; Juan 8:⁠51.

Apang ginapakita sang tagna sang Biblia nga kita karon may pinasahi nga kahigayunan. Subong nga nagakabuhi kita sa konklusion sang sistema sang mga butang, mahimo kita makalampuwas sa nagapakari nga “dakung kapipit-an” kag makapasar pasulod sa bag-ong kalibutan. Sila nga may paglaum sang kabuhi nga walay katapusan sa paraiso nga duta kag nagahupot sang ila katutom sa Dios indi na makaeksperiensia sing tawhanon nga kamatayon. Nakalampuwas sa “dakung kapipit-an,” tuytuyan sila sa “tuburan sang tubig sang kabuhi.”​—⁠Bugna 7:​9-17.

[Piktyur sa pahina 31]

Ang pinamulong ni Jesus sa nagapangasubo nga si Marta nagahatag sa aton sing paglaum nga kabuhi nga dayon