Ang “Tinapay sang Kabuhi” Matigayon sang Tanan

“Ako ang buhi nga tinapay nga nagkari gikan sa langit; kon bisan sin-o ang magkaon sining tinapay magakabuhi sia sing dayon; kag, ang tinapay nga akon ihatag tungod sa kabuhi sang kalibutan amo ang akon unod.”—JUAN 6:51.

1. Anong masubo nga kahimtangan ang nagaatubang sa katawhan karon?

ANG katawhan madugay na nga ginsustenar sang tinapay, ang ginakaon sing lapnag nga kalan-on sa duta. Sing nagakaigo, gintawag ini nga panguna nga kalan-on sa kabuhi. Apang karon ang pagkagutom sa tinapay nangin masubo nga hulusayon. Ang gutom nagaapektar karon sa un kuwarto sang mga pumuluyo sang duta. Sining karon lang, ang The Globe and Mail sang Toronto, Canada, nagsiling, “Ang gutom, kaangay sang inaway, wala sing dulonan.” Ginkutlo sang pamantalaan ang ehekutibo sang hilikuton sang emerhensia sang NU sa Aprika subong nagapaandam nga ang Aprika yara sa bibi sang “isa sang pinakadaku nga mga trahedya sang tawo, isa sang pinakadaku tawhanon nga mga hangkat, nga ginaatubang naton.”

2, 3. (a) Bahin sang anong tanda ang kakulang sing kalan-on? (b) Paano malubad ang problema sa kalan-on? (c) Ano pa ang kinahanglan, kag anong malipayon nga pasalig ang ginahatag sang Isaias 25:8?

² Gintagna ni Jesus nga ang kakulang sang kalan-on mangin bahin sang tanda sang iya presensia sang paggahom sa Ginharian. (Mateo 24:3, 7, 32, 33; 25:31, 32; Lucas 21:11) Mapasalamaton gid kita nga ang iya Ginharian malapit na! Sa dili madugay, daugon sining mahimayaon nga Hari ang tanan nga mga kaaway sang katawhan, nagadula sa mga inhustisya sa politika kag ekonomiya nga nagadala sinang mapintas nga pag-antos. Nian ang tanan nga katawhan malipay sa pagbaton sang ila tinapay sa kada adlaw.—Mateo 6:10, 11; 24:21, 22; Daniel 2:44; Hulubaton 29:2.

³ Sa idalom sang matarong nga pangulohan, ang maayo nga duta makasarang sa pagpatubas sing “nagaawas” nga pagkaon, nga bastante sa pagpaayaw sa mas madamo pa sa karon nga populasyon sang kalibutan. (Salmo 72:12-14, 16, 18) Si Jehova magahiwat sing “sinalusalo” sang maayo nga mga butang sa iya katawhan. (Isaias 25:6) Apang may dugang pa nga kinahanglan. Samtang nagaligad ang tinuig, magamasakit kag mapatay pa bala gihapon ang mga tawo? Sing malipayon, ang Isaias 25:8 nagpadayon sa pagsiling tuhoy kay Jehova: “Ginlamon niya sing dayon ang kamatayon, kag pahiran sang Soberanong Ginuong Jehova ang luha sang tanan nilang nawong.” Paano ini mahanabo?

Ang Mahigugmaon nga Aman ni Jehova

4. Anong mahigugmaon nga aman ang ginhimus ni Jehova sa Egipto?

⁴ Sang si Jose amo ang administrador sang pagkaon sa Egipto, bugana ang uyas. Amo ini bangod si Jose, sa tapos matangdo ni Paraon, maalamon nga naghanda para sa gintagna nga pito ka tuig nga tiggulutom, kag mahigugmaon nga gindugang ni Jehova ang iya pagpakamaayo. (Genesis 41:49) May bugana para sa tanan, kag may sarang pa nga matago. Sang ang amay ni Jose nga si Jacob, mga utod ni Jose, kag ang ila panimalay nagkadto sa pagbuylog kay Jose sa Egipto, nakabenepisyo sila sing daku sa sinang aman sang Dios. Walay duhaduha yadtong mga Israelinhon diri nakahibalo man katama tuhoy sa ginpakumbo nga tinapay nga trigo, subong nga ini maathag nga naghalin sa Egipto.

5. (a) Paano si Jehova nag-aman sing pagkaon sa kamingawan? (b) Sin-o ang nakig-ambit upod sa Israel sa sining pagpakamaayo, kag ngaa?

⁵ Sang ulihi, si Jehova naghimo sing dugang mahigugmaon nga aman para sa iya katawhan. Natabo ini sang ang minilyon ka Israelinhon nagbiya sang Egipto agod magkadto sa kamingawan sang Sinai. Paano ining dakung kadam-an makakita sing panakdag sa sinang masubo, dimainabyanon nga desyerto? Bisan pa nga naakig si Jehova bangod sang ila pagkawala sing pagtuo, iya “ginbuksan ang mga gawang sang langit. Kag ginpaulan niya sa ila ang mana nga kalan-on, kag ginhatagan sila sing kalan-on gikan sa langit.” “Ginbusog sila sang tinapay sang langit” sa 40 ka tuig. (Salmo 78:22-24; 105:40; Exodo 16:4, 5, 31, 35) Kag indi pagkalimti nga ang mga Israelinhon wala nagaisahanon sa pagkaon sang mana. “Isa ka nagasalakut nga kadam-an” sang mga indi Israelinhon ang nagtuo kay Jehova kag nagbuylog sa ila sa pagguwa gikan sa Egipto. Gin-amanan man sila ni Jehova sing mana.—Exodo 12:38.

6. (a) Anong daku pa nga kinahanglanon ang iya sang tawo, kag ngaa? (b) Ano ang ginapadaku sang mga halad sang Israel, kag ano ang ginalandongan sini?

⁶ Apang, ang katawhan pirme nagakinahanglan sing labi pa sang sa literal nga “tinapay gikan sa langit.” Bisan yadtong nagkaon sang gin-aman sing milagruso nga mana nagtigulang kag napatay, kay ang ginpanubli makasasala nga kahimtangan sang tawo nagahimo sang kamatayon nga dimalikawan, bisan ano man ang iya ginakaon. (Roma 5:12) Ang mga halad sa Israel nag-aman sing paagi nga mahuptan ang maayo nga kaangtanan sa Dios, apang yadtong mga halad nagpadaku man sang pagkamakasasala sang pungsod. Sila “indi gid makakuha sang mga sala.” Dugang pa, yadtong mga halad naglandong sa “isa ka halad” ni Jesus, nga nagaaman sa pagdula sang sala “sing dayon.” Gikan sa iya nabayaw nga kahimtangan sa langit, makasarang na karon si Jesus sa pagpatuman sa benepisyo sina nga halad.—Hebreo 10:1-4, 11-13.

“Matuod nga Tinapay Gikan sa Langit”

7. (a) Ang pinamulong ni Jesus sa Juan kapitulo 6 dapat tamdon sa anong bag-o nga konteksto? (b) Ngaa ginsaway ni Jesus ang kadam-an?

⁷ Tan-awon naton karon ang Juan kapitulo 6. Ang mga komento ni Jesus diri indi pagsugpon sa kon ano ang narekord sa kapitulo 5. Ang konteksto tuhay, kay nagligad ang isa pa ka tuig. 32 C.E. na karon. Ang kahimtangan indi na sa tunga sang nagapakamatarong sa kaugalingon nga mga Judiyo sa Jerusalem kundi sa tunga sang kinaandan nga katawhan sa Galilea. Bag-o lang si Jesus makahimo sing milagruso nga pagpakaon sa 5,000 ka mga lalaki gikan sa lima ka tinapay nga sebada kag duha ka magagmay nga isda. Sang masunod nga adlaw, ginsundan sang kadam-an si Jesus, nagpaabot sing dugang pa nga pagkaon nga wala sing bayad. Gani ginsilingan sila ni Jesus: “Nagapangita kamo sa akon, indi bangod nga nakakita kamo sing tanda, kundi nga nakakaon kamo sang mga tinapay kag nabusog. Pangabudlay kamo, indi tungod sang kalan-on nga nagakawala, kundi tungod sang kalan-on nga nagapadayon sa kabuhi nga walay katapusan.” Si Jesus ginpadala sang iya Amay sa paghatag sina nga pagkaon para sa tanan nga nagatuo sa iya. Ini mangin “ang matuod nga tinapay gikan sa langit,” nga may mapinadayunon nga epekto sang sa literal nga mga mana nga ginkaon sang dumaan nga mga Israelinhon.—Juan 6:26-32.

8. Paano matigayon sang isa ang kabuhi nga walay katapusan?

⁸ Padayon nga ginpaathag ni Jesus ang mga benepisyo nga makuha gikan sa sinang “kalan-on,” nga nagasiling sa ila: “Ako amo ang tinapay nga nagahatag sang kabuhi. Ang nagakari sa akon indi paggutumon, kag ang nagatuo sa akon indi na gid pag-uhawon. . . . Kay ini amo ang kabubut-on sang akon Amay, nga ang tagsatagsa nga nakakita sa Anak kag nagatuo sa iya may kabuhi nga walay katapusan, kag banhawon ko sia sa katapusan nga adlaw.”—Juan 6:35-40.

9, 10. (a) Paano mapaanggid ang “tinapay sang kabuhi” sa mana? (b) Suno sa Juan 6:42-51, kay sin-o ginhatag ni Jesus ang iya unod? (c) Paano nila ‘ginakaon ang iya unod’?

⁹ Ginhimo nga hulusayon sadtong materyalistiko nga mga Judiyo ining pinamulong. Gintamod nila si Jesus nga isa lamang ka anak nanday Jose kag Maria. Ginpaandaman sila ni Jesus: “Dili kamo magkumod sa inyo kaugalingon. Walay tawo nga makakari sa akon kon indi sia pagbuyukon sang Amay, nga nagpadala sa akon; kag banhawon ko sia sa katapusan nga adlaw.” Nian nagsiling pa gid sia: “Ako amo ang tinapay nga nagahatag sang kabuhi. Ang inyo mga ginikanan nagkaon sang mana sa kamingawan, walay sapayan nagkalapatay sila. Ako ang buhi nga tinapay nga nagkari gikan sa langit; kon bisan sin-o ang magkaon sining tinapay, magakabuhi sia sing dayon; kag, ang tinapay nga akon ihatag tungod sa kabuhi sang kalibutan amo ang akon unod.”—Juan 6:42-51.

¹⁰ Busa, para sa “kabuhi sang kalibutan”—ang bilog nga kalibutan sang tulubson nga katawhan—nga ginhatag ni Jesus ang iya unod. Ang “bisan sin-o” sa katawhan nga nagakaon sing malaragwayon sa sinang “tinapay,” paagi sa pagpakita sing pagtuo sa nagagawad nga gahom sang halad ni Jesus, magasulod sa dalan padulong sa kabuhi nga walay katapusan. Diri, ang “isa ka nagasalakut nga kadam-an” nga nakig-ambit sa mga Israelinhon sa pagkaon sing mana sa kamingawan nagalaragway sa dakung kadam-an sang “iban nga mga karnero” ni Jesus nga, upod sa hinaplas nga nagkalabilin sang “Israel sang Dios,” nagakaon karon sang unod ni Jesus sa malaragwayon nga kahulugan. Ginahimo nila ini paagi sa pagtuo sa iya halad.—Galacia 6:16; Roma 10:9, 10.

11. Anong dugang nga pinamulong ni Jesus ang nagpakibot sa mga Judiyo, kag ngaa?

¹¹ Didto sa Galilea, madamo sang tagpalamati ni Jesus ang nakibot sa iya pamulongpulong. Gani samtang ginahambalan gihapon ang tuhoy sa iya unod, nagpadayon pa gid sia, nga nagasiling sa ila: “Sa pagkamatuod, nagasiling ako sa inyo, Kon indi kamo magkaon sang unod sang Anak sang tawo kag mag-inum sang iya dugo, wala kamo sing kabuhi sa inyo kaugalingon. Ang nagakaon sang akon unod kag nagainum sang dugo may kabuhi nga walay katapusan, kag banhawon ko sia sa katapusan nga adlaw; kay ang akon unod kalan-on gid, kag ang akon dugo ilimnon gid.” (Juan 6:53-55) Makakilibang gid sa pagkamatuod! Indi lamang nga ang ideya tuhoy sa kanibalismo makangilil-ad sa mga Judiyo kundi ang Kasugoan sang Levitico 17:14 positibo nga nagadumili sang pagkaon sing “dugo sang bisan ano nga sahi sang unod.”

12. (a) Ano ang ginapadaku diri ni Jesus? (b) Ano nga mga kasulatan ang nagapakita nga wala ini ginalatiri sa mga masigka manunubli ni Jesus?

¹² Siempre pa, ginapadaku diri ni Jesus nga ang bisan sin-o nga magatigayon sang kabuhi nga walay katapusan dapat magahimo sini sa sadsaran sang iya pagtuo sa halad nga ginhimo ni Jesus sang ulihi sang ginhalad niya ang iya himpit tawhanon nga lawas kag ginbubo ang iya dugo. (Hebreo 10:5, 10; 1 Pedro 1:18, 19; 2:24) Ini nga aman wala ginalatiran sa mga masigka manunubli ni Jesus. Magalakip man ini sa “dakung kadam-an,” nga makalampuwas sa “dakung kapipit-an,” kay sila “nagbunak sang ila mga panapton kag nagpaputi sini sa dugo sang Kordero.” Ang pagtuo nila sa halad ni Jesus, subong sang ginpasundayag man sang ila paghimo sa Dios sing “balaan nga pag-alagad,” nagaresulta sa pag-amlig sa ila sa labing daku nga panahon sang kasisit-an sa duta. Sing kaanggid, si Rahab ginpahayag nga matarong kag nakalampuwas sang gintagna ni Josue ang kalaglagan sang Jerico.—Bugna 7:9, 10, 14, 15; Josue 6:16, 17; Santiago 2:25.

“Kabuhi sa Inyo Kaugalingon”

13. (a) Kon ginapaanggid ang Juan 5:26 sa Juan 6:53, ano ang matalupangdan? (b) Anong kinaandan nga konstruksion sang Griegong gramatika ang magabulig sa aton sa paghangop sa Juan 6:53? (c) Gani, ano ang buot silingon sang pagtigayon sang “kabuhi sa inyo kaugalingon,” kag kay sin-o naaplikar ining mga pinamulong?

¹³ Sa Juan 6:53, 54, ginpaanggid ni Jesus ang “kabuhi nga walay katapusan” sa pagtigayon sang “kabuhi sa inyo kaugalingon.” Gani, sa sining konteksto, ang ekspresyon “kabuhi sa inyo kaugalingon” may tuhay nga importansia gikan sa kon ano ang gingamit ni Jesus sa Juan 5:26. Ang mga ekspresyon nga may kaanggid nga konstruksion sa gramatika subong nga may “kabuhi sa inyo kaugalingon” makita man sa Griegong Kasulatan. Halimbawa, “magtigayon sing asin sa inyo kaugalingon” (Marcos 9:50) kag “nagabaton sa ila mga kaugalingon sang silot” (Roma 1:27).a Sa sining mga halimbawa, ang prase wala nagakahulugan sing ikasarang sa pagbutang sing asin ukon pagsilot sa iban. Sa baylo, ginapakita ang nasulod nga pagkakompleto ukon pagkabug-os. Sa amo, suno sa konteksto sa Juan 6:53, ang pagtigayon sing “kabuhi sa inyo kaugalingon” nagakahulugan diri sang pagsulod sa ulihi sa kabug-osan mismo sang kabuhi. Ang “diutay nga panong” sang mga manunubli sang Ginharian nagaeksperiensia sini sa ila pagkabanhaw pakadto sa langit. Ang “iban nga mga karnero” magaeksperiensia sini pagkatapos sang isa ka libo ka tuig, kon sila matilawan na kag mapahayag nga matarong para sa kabuhi nga walay katapusan sa Paraiso nga duta.—1 Juan 3:2; Bugna 20:4, 5.

14. Sin-o pa ang makabenepisyo sa “tinapay gikan sa langit,” kag paano?

¹⁴ Ang iban man makabenepisyo gikan sa “tinapay gikan sa langit.” Si Jesus nagsiling tuhoy sa isa nga ‘nagakaon sang iya unod kag nagainum sang iya dugo’ apang nagakapatay: “Banhawon ko sia sa katapusan nga adlaw.” Ginahangop nga ang hinaplas nga mga Cristiano nga nagakatulog sa kamatayon banhawon sa pagtunog sang “katapusan nga budyong,” nga mahanabo sa “pagpahayag” ni Jesucristo sa himaya sang Ginharian. (1 Corinto 15:52; 2 Timoteo 4:1, 8) Apang kamusta ang palaabuton nga “iban nga mga karnero” nga nagakatulog sa kamatayon? Ang pinamulong ni Marta sadtong mapatay si Lasaro makawiwili diri, kay sadto nga tion ang mahinadlukon sa Dios nga mga Judiyo wala sing iban nga paglaum luwas sa dutan-on nga pagkabanhaw. Ang pagtuo ni Marta ginpabutyag sa mga pulong: “Nahibaloan ko sia [si Lasaro] pagabanhawon sa pagkabanhaw sa katapusan nga adlaw.” (Juan 11:24) Kita nga nagakabuhi karon sa presensia ni Cristo makalaum man nga ang mga matutom sang “dakung kadam-an” nga nagakatulog sa kamatayon makatigayon sing temprano nga pagkabanhaw diri sa duta, agod nga makig-ambit sila liwat sa “tinapay gikan sa langit,” nga nagahulat sang kabuhi nga walay katapusan. Daw ano ka daku nga paglaum ina, isa ka paglaum nga ginpasalig sa bagay nga si Jesus mismo ginbanhaw gikan sa minatay!—1 Corinto 15:3-8.

“Nahiusa kay Cristo”

15. Ang pinamulong ni Jesus nga “nahiusa kay Cristo” naaplikar kay sin-o, kag ngaa amo sina ang imo sabat?

¹⁵ Si Jesus nagapadayon: “Ang nagakaon sang akon unod kag nagainum sang akon dugo nagapabilin sa akon, kag ako sa iya.” (Juan 6:56) Nian, matuod ini sa “bisan sin-o” nga nagatuo sa halad ni Jesus, nga may paglaum nga makatigayon sing ‘kabuhi sa iya kaugalingon.’ Ang tanan nga nagapadayag sina nga pagtuo “mahiusa kay Jesus.” Sa pagkamatuod, ang “dakung kadam-an,” nga may dutan-on nga paglaum, wala ‘nahiusa kay Cristo’ sa kahulugan nga mangin masigka manunubli niya, mga katapo sang iya nobya nga nagabaton sing langitnon nga pagkabanhaw kaangay niya. (Roma 8:1, 10; 1 Corinto 1:2; 2 Corinto 5:17; 11:2; Galacia 3:28, 29; Efeso 1:1, 4, 11; Filipos 3:8-11) Apang ang tanan nga may dutan-on nga paglaum sarang mangin, sing aktuwal dapat mangin, nahiusa sing bug-os sa Amay kag sa Anak sa paghibalo kag paghimo sang “himpit nga kabubut-on sang Dios,” subong nga amo man sini sa diutay nga panong.—Roma 12:2; ipaanggid ang Juan 17:21.

16. (a) Sa anong importante nga mga paagi ang tanan nagatuo sa halad ni Cristo nga “nahiusa” kay Jesus? (b) Sa ano ginapakita ang ila pagkaisa sa katuyoan kag panikasog?

¹⁶ Gani, ang mahalaron nga balor sang unod kag dugo ni Cristo matigayon sang tanan karon nga nagatuo, kag ang tanan nga nagatigayon sini sarang, sa importante nga mga paagi, “mahiusa” kay Jesus. Ang tanan mangin bahin sang bug-os uniberso nga panimalay ni Jehova nga Dios. Sa sining makahalanguyos nga “katapusan nga mga adlaw,” nagaagom sila sing bug-os kalibutan nga paghiusa sang pagtuo, katuyoan, kag hilikuton. Nagatuo kay Jesus, nakasarang sila sa “paghimo sang mga hilikuton nga mas daku” sa kasangkaron sang sa ginhimo ni Jesus diri sa duta. Kag talupangda nga ang minilyon sang “dakung kadam-an” nagahuman karon sang 99.7 porsiento sadtong nagahimo sang buluhaton ni Jehova sini nga tion. (Juan 14:12; Roma 10:18) Ining pagkaisa sa katuyoan kag panikasog ginpakita sa bug-os globo nga panaksi kag handa nga pagsakdag sa programa sang pagtukod sang Watch Tower Society. (Salmo 110:3) Kon pila pa kadamo sang katawhan ang magatuo kag magasulod sa sining hamili nga paghiusa, wala pa mahibaloi. Ang pinakaulihi nga report nagapakita sang 3,024,131 ka aktibo nga mga Saksi.

17. Ano nga mga punto ang dapat apresyahon sang tanan nga nagatambong sa Memoryal?

¹⁷ Ginalauman nga madamong mga interesado ang magatambong sa pagsaulog sang Memoryal sa 1986. Minilyon sang “iban nga mga karnero” ang magatambong, upod sa nagadiutay nga linibo sang “diutay nga panong”—ang tanan tudok nga nagaapresyar sang mahigugmaon nga aman ni Jehova paagi kay Cristo, nagakilala kon daw ano ka importante ang unod kag dugo ni Cristo. Apang, dapat hantupon sing maathag sang tanan kon diin sila nagatindog. Ang pagpakigbahin sa mga emblema sa Memoryal wala nagakahulugan sing kabuhi nga walay katapusan. Mga simbulo ini sang halad ni Jesus, nga naaplikar primero may kahilabtanan sa “bag-ong katipan.” Ang mga hinaplas nga ginpasulod sa sinang katipan, kag sila lamang, ang nagakaigo nga makigbahin sa mga emblema. Ang isa mahimo nga yara sa sinang bag-ong katipan ukon indi. (1 Corinto 11:20, 23-26) Yadtong wala sa bag-ong katipan kag wala ginpasulod ni Jesus sa katipan para sa isa ka ginharian wala nagapakigbahin sa mga emblema sang Memoryal, kundi ginakilala gihapon nila kon daw ano ka importante sa ila ang ginhalad nga unod kag dugo ni Jesus. (Lucas 22:14-20, 28-30) Ini nga halad amo ang paagi nga sa diin matigayon nila ang kabuhi nga walay katapusan sa duta.

18. Ano nga kalipay ang nagaresulta gikan sa maathag nga paghantop sa tanan nga buot silingon sang halad ni Jesus?

¹⁸ Busa kabay nga saulugon naton ining okasyon sang Memoryal nga may maathag nga paghantup sa tanan nga buot silingon sang halad ni Jesus para sa katawhan. Kabay nga pakabahandion sang “diutay nga panong” ang pagtawag sa ila, kag kabay nga magakalipay ang nagadugang nga kadam-an sang “iban nga mga karnero” sa palaabuton nga makatigayon sang himpit dutan-on nga ‘kabuhi sa ila kaugalingon,’ samtang ginapabaloran nila sing daku ang ila paghiusa, karon mismo, sa Amay, sa Anak, kag sa nagadiutay nga kadamuon sang hinaplas nga nagkalabilin nga yari pa sa duta. Daw ano ka malipayon kita nga ang “tinapay sang kabuhi” matigayon karon sang tanan!

[Footnote]

Mga Pamangkot sa Pagrepaso

◻ Sang 32 C.E., anong duha ka sahi sang mana ang ginhambalan ni Jesus, subong gin-aman para kay sin-o?

◻ Sin-o ang gin-agda ni Jesus nga ‘magkaon sang iya unod kag mag-inum sang iya dugo,’ kag paano nila ini ginahimo?

◻ Ano ang buot silingon sang pagtigayon sang “kabuhi sa inyo kaugalingon,” kag paano kag san-o ini matigayon?

◻ Ano nga kalipay ang mapaambitan sang tanan tuhoy sa “tinapay sang kabuhi”?