Mga Pamangkot Gikan sa mga Bumalasa

◼ Ngaa pila lamang sa mga Saksi ni Jehova ang nagaambit sa tinapay kag alak sa tuigan nga pagsaulog sing Panihapon sang Ginuo?

Amo sini bangod tuhay sa mga iglesia sang Cristiandad, ginabaton ang panudlo sang Biblia nga pila lamang ka tawo ang makatigayon sing langitnon nga kabuhi kag ang nabilin sa matutom nga mga alagad sang Dios pagapadyaan sing kabuhi nga walay katapusan sa duta.

Madugay na ginatudlo sang mga iglesia nga ang langit amo ang padya para sa tanan nga nagapahamuot sa Dios; ang nabilin nagakadto sa kalayuhon nga impierno. Baliskad ang ginasiling sang Biblia. Maathag nga ginapakita sang Kasulatan nga pila lamang ka tawo, subong sang mga apostoles, ang magahari upod kay Cristo sa langit. Nagsiling si Jesus nga ini sila “diutay nga panong.” Ginasiling sang Biblia nga ang ila kadamuon 144,000. (Lucas 12:32; Bugna 14:3, 4) Madamo nga nag-alagad kay Jehova sing matutom kag nahamut-an niya ang napatay sa wala pa ginbuksan ni Jesus ang dalan padulong sa langitnon nga kabuhi. (Mateo 11:11; Hebreo 10:19-21) Kag sa tapos mapili ang “diutay nga panong,” minilyon nga iban pa ang nangin matuod nga mga Cristiano. Para sa sining mga matutom nga indi bahin sang “diutay nga panong,” ang Biblia nagatanyag sing paglaum nga dayon nga kabuhi sa isa ka napasag-uli nga dutan-on nga paraiso. (Salmo 37:20, 29; Bugna 21:4, 5) Apang ngaa wala man sila nagaambit sa tinapay kag alak? Ginpakita ni Jesus nga ang pag-ambit sa Panihapon sang Ginuo para lamang sa mga gintawag sa kabuhi sa langit, sa mga yara sa bag-o nga katipan.

Sa pagkamatuod, ang pagtuo sa halad ni Jesus importante para sa tanan agod makatigayon sang kapatawaran sang Dios kag sing kabuhi nga walay katapusan, kabuhi sa langit ukon kabuhi sa paraiso nga duta. Ginpakita ini ni Cristo sa Juan 6:51-54: “Ako ang buhi nga tinapay nga nagkari gikan sa langit; kon bisan sin-o ang magkaon sining tinapay, magakabuhi sia sing dayon; . . . ang tinapay nga akon ihatag tungod sa kabuhi sang kalibutan [matubos nga katawhan] amo ang akon unod . . . Ang nagakaon sang akon unod kag nagainom sang akon dugo may kabuhi nga walay katapusan.”

Apang, talalupangdon nga indi lamang sa iya mga disipulo ginpatuhoy ni Jesus yadtong mga pulong. Isa ka adlaw sa tapos niya ginpakaon sing milagruso ang linibolibo, ang kadam-an nagpalapit kay Jesus sa isa ka duog sang Capernaum. Ining kadam-an nagpakighambal sa iya nga naglakip sang iya mga pulong sa Juan 6:51-54. Gani si Jesus wala nagapakighambal sa iya lamang mga disipulo sang magsiling sia nga sia ang malaragwayon nga “tinapay nga nagkari gikan sa langit” nga makahatag sing mas malawig nga kabuhi sang sa manna nga ginkaon sa kahanayakan.—Juan 6:24-34.

Sa pagbinagbinag sadtong dumaan nga eksperiensia sa kahanayakan, dumduma kon sin-o ang nagguwa sa Egipto padulong sa kahanayakan. Amo ‘ang anom ka gatos ka libo ka lalaki nga naglakat, walay labot sa kabataan, kag isa ka nagasalakot nga kadam-an.’ (Exodo 12:37, 38; 16:13-18) Ining “nagasalakot nga kadam-an” naglakip sa mga Egiptohanon nga nagminyo sa mga Israelinhon kag sa iban pa nga mga Egiptohanon nga nagbuylog sa Israel. Kinahanglan sang mga Israelinhon kag sang “nagasalakot nga kadam-an” ang manna agod mabuhi. Apang, pareho bala ang paglaum sang “nagasalakot nga kadam-an” sa mga Israelinhon? Indi. Bisan pa makasimba sila sa tunga sang mga Israelinhon kag makalaum sa pagsulod sa Ginsaad nga Duta, indi sila mahimo mangin mga hari ukon mga saserdote sa idalom sang Kasuguan nga katipan. Gani ang pagkaon sing literal nga manna sa kahanayakan wala maghatag sa tanan sing pareho nga paglaum.

Isa ini ka kinatuhayan nga tandaan samtang ginabinagbinag mo ang ginsiling ni Jesus sa iya mga disipulo mga isa ka tuig sa tapos niya ginhambal ang mga pulong sa Juan 6:51-54. Sa sining ulihi nga okasyon, ginlaragway ni Jesus ang isa ka bag-o nga buhat nga nagadalahig sa aktuwal nga tinapay kag alak nga magasimbulo sa iya unod kag dugo. Samtang ginasugdan niya ang pagsaulog sing Panihapon sang Ginuo, si Jesus nagsiling sa iya suod nga mga sumulunod: “Ining tagayan nagakahulugan sing bag-ong katipan bangod sang akon dugo, nga iula para sa inyo.” Sa amo man nga diutay nga grupo sang mga apostoles, sia nagdugang: “Kamo ang mga nag-unong sa akon sa mga pagsulay sa akon; kag nagahimo ako sing katipan upod sa inyo, subong nga ang akon Amay naghimo sing katipan upod sa akon, para sa isa ka ginharian, agod nga magakaon kamo kag magainom sa akon latok sa ginharian, kag magalingkod sa mga trono sa paghukom sa napulog-duha ka tribo sang Israel.”—Lucas 22:20, 28-30.

Talupangda sa sining ulihi nga mga pulong nga ang magakaon sa aktuwal nga tinapay kag magainom sa alak subong mga emblema nga nagasimbulo sa lawas kag dugo ni Jesus amo ang mga disipulo nga yara sa “bag-ong katipan.” Ina sila yara man sa isa pa ka katipan, nga himuon ni Jesus upod sa ila agod nga makaambit sila sa paggahom ‘sa iya ginharian.’ Sing maathag, ginapatuhuyan diri ni Jesus ang mga ‘ginhimo nga ginharian kag mga saserdote sa aton Dios, agod maggahom subong mga hari sa duta.’ (Bugna 5:10) Sang nahaunang siglo, ginsugdan sang Dios ang pagpili sa 144,000 nga magaambit sa langitnon nga Ginharian. Ang mga Cristiano sa Corinto nalakip sa sadto nga grupo, kay ginlaragway sila subong “ginpakabalaan kay Cristo Jesus, nga ginatawag nga mga balaan.” (1 Corinto 1:2; ipaanggid ang Roma 1:7; 8:15-17.) Ina nga “mga balaan” magaambit sa Panihapon sang Ginuo, nga nagaambit nga may apresasyon sa emblema nga tinapay kag subong man sa alak nga nagakahulugan sing “bag-ong katipan bangod sa bili sang [iya] dugo.”—1 Corinto 11:23-26.

Isa na lamang ka diutay nga nagkalabilin sang mga pinili sang Dios para sa langitnon nga kabuhi ang buhi pa karon sa duta. Ang mga katapo lamang sang “bag-ong katipan” ang awtorisado sa pag-ambit sa mga emblema, ang tinapay kag ang alak, sa tion sang pagsaulog sing Memoryal kada tuig.

Sa pagkamatuod, ang tanan nga matuod nga mga Cristiano karon nga nagalaum nga mabuhi sing dayon sa duta sa idalom sang paggahom sang Ginharian nakahibalo nga posible ini paagi sa pagpakita sing pagtuo sa halad ni Jesus. Subong ginsiling ni Jesus sa kadam-an, sia “ang buhi nga tinapay nga nagkari gikan sa langit.” (Juan 6:51) Apang, wala ina nagakahulugan nga ang mga may dutan-on nga paglaum dapat mag-ambit sa literal nga mga emblema sang Memoryal, kay sila wala sa “bag-ong katipan,” ukon wala sa katipan nga upod kay Jesus agod mangin ‘sa iya ginharian, nga nagalingkod sa mga trono.’

Busa, ining daku nga grupo nga may dutan-on nga paglaum wala nagaambit sa mga emblema, ang tinapay kag ang alak. Apang indi gid ini pagpakita sing kakulang sing pagtuo ukon apresasyon sa lawas kag dugo. Sa kamatuoran, bangod sang ila daku nga apresasyon sa iya halad kag makalilipay nga paglaum sa duta, nagatambong sila kada tuig subong matinahuron nga mga tumalan-aw sa pagsaulog sang Panihapon sang Ginuo. Sa sining paagi, ginapakita nila ang ila pagtuo kag nagahatag sing makalilipay nga pamatuod nga ang nagkalabilin sang “diutay nga panong” kag ang kadam-an sang “iban nga mga karnero” nahiusa.—Juan 10:16.