“Nakilala Nila ang Iya Tingog”
“SI Jehova ang akon Manugbantay.” Amo ini ang nagabukas nga mga pinamulong sang Salmo 23. Ginapaanggid liwat sang mga Kasulatan si Jehova nga Dios sa isa ka manugbantay sa tagna ni Isaias, nga nagasiling: “Kaangay sang isa ka manugbantay pagabantayan niya ang iya kaugalingon nga panong. Kungkungon niya sa iya butkon ang mga kordero; kag dalhon sila sa iya dughan. Tuytuyan niya sing mahinalungon ang mga may tinday.”—Isaias 40:11.
Sa kaanggid, si Jesucristo ginpaanggid sa isa ka manugbantay. Sia nagsiling: “Ako ang maayo nga manugbantay; ang maayo nga manugbantay nagahatag sang iya kalag tungod sa mga karnero.” (Juan 10:11) Si Jesus nagsiling nga “ang mga karnero nagapamati sa tingog [sang manugbantay], kag ginatawag niya ang iya kaugalingon nga mga karnero sa ngalan kag ginatuytuyan sila paguwa.” Sia nagdugang nga “ang mga karnero nagasunod [sa manugbantay], kay nakilala nila ang iya tingog. Sa dumuluong indi sila magsunod kundi magapalagyo sa iya, kay wala sila makakilala sang tingog sang mga dumuluong.”—Juan 10:2-5.
Si Jehova nga Dios kag ang iya Anak, nga si Jesucristo, nagpanghikot suno sa larawan nga ginlaragway sa nasambit na nga mga kasulatan. Ginaatipan nila ang ila malaragwayon nga mga karnero nga may kalum-ok kag mahigugmaon nga pag-ulikid. Subong resulta, ang mga katulad-karnero nagabatyag nga ginahigugma, malig-on, kag ginaamligan.
Ini nga kaangtanan nagakaigo nga mapaanggid sa iya sang literal nga mga karnero sa ila manugbantay. Sadto anay sang 1831, si John Hartley nagsulat sang iya mga obserbasyon nahanungod sini. Nagsiling sia nga sa Gresya kinabatasan na para sa mga manugbantay ang hatagan sing ngalan ang ila mga karnero. Kon tawgon sa ngalan, ang mga karnero nagasabat sa tingog sang manugbantay. Mga 51 ka tuig sang ulihi, sang 1882, si J. L. Porter naghatag man sing kaanggid nga mga obserbasyon. Nasaksihan niya sing personal ang mga manugbantay nga “nagabungat . . . sing pinasahi katagsing nga panawag” nga sa sini ang mga karnero nagasabat paagi sa matinumanon nga pagsunod sa mga manugbantay. Sadto man nga tuig si William M. Thomson nagsulat nahanungod sa liwat-liwat nga mga eksperimento nga nagapamatuod nga ang mga karnero sarang matudluan sa pagsunod sa ila manugbantay kag sa pagkilala sa iya tingog.
Nakita bala ining pinasahi nga kaangtanan sa ulot sang mga manugbantay kag sang ila mga karnero sa sining ulihi nga mga tinuig? Huo. Sa Septiembre 1993 nga guwa sang National Geographic, ang Australiano nga adbenturero nga si Robyn Davidson nagsulat nahanungod sa Rabari nga mga manugsagod sing sapat sa aminhan-katundan nga India: “Ang tagsa ka manugbantay may tuhay diutay nga mga pagpanawag, mga pagkananuhaytuhay sa tema. May mga panawag sa aga sa paglakat, panawag sa pagdala sa mga karnero sa tubig, kag padayon. Nakilala sang tagsa ka tawo ang iya kaugalingon nga mga karnero kag nakilala man sang mga karnero ang iya manugbantay, kag ang iya partikular nga panong magabulag sa dalagku pa nga panong kag magasunod sa iya sa aga.”
Sa walay duhaduha, napanilagan ni Jesus ang ginlaragway sang apat ka manlalakbay nga bag-o lang ginsambit. Ang iya mismo mga obserbasyon nagdugang sa pagkamatinuuron sang iya ilustrasyon tuhoy sa mga karnero nga nakakilala sang iya tingog. Isa bala ikaw sa mga karnero ni Jesus? Kilala mo bala ang iya tingog kag nagapamati sa sini? Kon kilala kag ginabaton mo ang iya mga panudlo subong ang kamatuoran kag kon ginatuman mo ang iya mga sugo kag ginasunod ang iya panuytoy sa pagsimba kay Jehova, nian maagom mo ang mahigugmaon kag mapinalanggaon nga pagbantay ni Jehova nga Dios kag sang iya Anak, si Jesucristo.—Juan 15:10.