Ang Pagtamod sang Biblia

Daw Ano ka Importante ang Tuig 2000?

WALA gid ginahatagan sang kalabanan nga tawo sing relihioso nga kahulugan ang tuig 2000 subong sang ginahimo sa kadutaan sa Nakatundan kag sa madamo nga iban pa. Halimbawa, ang mga Judiyo, Muslim, kag Hindu, tanan may ila kaugalingon relihiosong mga kalendaryo nga tuhay sa kalendaryo sang Nakatundan. Ang mga Intsik nagasunod sang relihioso kag tradisyunal nga mga petsa sa lunar nga kalendaryo. Tungod sina, binilyon ka tawo karon, ayhan kalabanan nga populasyon sang kalibutan, ang wala nagahatag sing pinasahi nga kahulugan sa tuig 2000.a

Walay sapayan sina, madamo ang malangkagon nga nagahulat ilabi na gid sa Nakatundan nga mga kadutaan, sa nagahilapit nga pag-umpisa sang masunod nga milenyo suno sa Gregorianhon nga kalendaryo. Indi lamang ini pagkalangkag para sa iban. Ginatamod nila ang tuig 2000 subong tanda sang bag-ong dag-on, sang isa ka daku nga pagbalhin sa maragtas. Madamo sang nagapangangkon nga nagapati sa Biblia ang nagaangot sang katumanan sang mga tagna sa tuig 2000. Ang pila nagapaabot sing dakung espirituwal nga pagpadayag. Ang iban nahadlok sa kalaglagan​—ang katapusan sang kalibutan. Nagahatag bala ang Biblia sing sadsaran sa sining mga pagpaabot?

Si Jehova, ang Manugbantay Sang Tion

Ang Dios sang Biblia ginalaragway subong “ang Dumaan sang mga Adlaw.” (Daniel 7:⁠9) Ginakontrol niya ang tion sing sibu gid, subong makita sa pagpanghikot sang madamo niya nga mga tinuga, halin sa pagtiyog sang mga planeta tubtob sa paghulag sang mga bahin sang atomo. May orasan sia nga ginasunod niya sing sibu. “Gintalana niya ang natangdo nga mga panag-on kag ang mga dulunan sang mga puluy-an sang mga tawo,” siling sang Biblia. (Binuhatan 17:26) Si Jehova isa ka sibu nga Manugbantay sang Tion.

Busa, ang Biblia nagahatag sing espesipiko nga igtalupangod sa kronolohiya. Nagaaman ini sing mapinadayunon nga rekord nga nagapahanugot sa isa ka sistematiko nga pag-isip pabalik sa ginsuguran sang tawhanon nga maragtas. Ina nga pagbulubanta nagatudlo sa 4026 B.C.E. subong ang tuig nga gintuga sang Dios si Adan. Mga 2,000 ka tuig sang ulihi, nabun-ag si Abraham. Si Jesus natawo pagligad sang 2,000 ka tuig.

Ang pila nga nagatuon sang kronolohiya sang Biblia nagbalay sing dimakatarunganon nga pagpaangay nga nagatudlo sa espesipiko nga mga petsa sa palaabuton. Halimbawa, nagagamit subong sadsaran sang alagisod nga dag-on sang halos 2,000 ka tuig sa ulot nanday Adan, Abraham, kag Jesus, ang iban nagpanagna sing tuman ka importante nga hitabo sa hingapusan sang 2,000 ka tuig kutob sang natawo si Jesus. Isa lang ini ka halimbawa sang pila ka pagbulubanta sing tion nga napasad kuno sa kronolohiya sang Biblia.

Ibutang ta nga ang Biblia nagahambal nahanungod sa tion nga si Jehova nga Dios magapasilabot sa tawhanon nga mga panikasog paagi sa pagdula sa kalautan kag sa pagpaluntad sing isa ka bag-ong kalibutan. Ang tagna sang Biblia nagasiling tuhoy sa “tion sang katapusan,” “katapusan sang sistema sang mga butang,” “katapusan nga mga adlaw,” kag “adlaw ni Jehova.” (Daniel 8:​17; Mateo 24:3; 2 Timoteo 3:1; 2 Pedro 3:​12) Apang, ang “katapusan” nga gintagna sa Biblia wala sing bisan ano nga kaangtanan sa tuig 2000. Wala sing bisan ano sa Kasulatan ang nagpahitungod sing pinasahi nga kahulugan sa katapusan sang ikaduha nga milenyo subong sang ginbulubanta sang Gregorianhon nga kalendaryo.

“San-o Mahanabo Ining Mga Butang?”

Nagpadayag sing malangkagon nga interes ang mga apostoles ni Jesus nahanungod sa orasan sang Dios sang nagpamangkot sila kay Jesus: “Sugiri kami, san-o mahanabo ining mga butang, kag ano ang mangin tanda sang imo presensia kag sang katapusan sang sistema sang mga butang?” (Mateo 24:⁠3) Madamo sa karon ang interesado man sa palaabuton. Natural lang nga mangin tuman ka interesado sa sinang talalupangdon nga mga tagna sang Biblia kag sa tion sang ila katumanan. Apang, maalamon nga batunon kag tahuron ang pagtamod sang Dios sa sini nga bagay.

Si Jehova nagpahayag sang iya katuyuan kag naghatag sing direkta nga sabat sa sini nga hulusayon paagi sa iya Anak. Antes gid lang si Jesus nagkayab sa langit, liwat nga ginpamangkot sia sang iya mga disipulo nahanungod sa tion sang katumanan sang mga saad sang Dios. Si Jesus nagsabat: “Indi inyo ang paghibalo sang mga tion ukon mga dag-on nga ginbutang sang Amay sa iya kaugalingon nga pagbulut-an.” (Binuhatan 1:⁠7) Sa nahauna pa nga kahigayunan, si Jesus nagsiling sa iya mga disipulo: “May kaangtanan sa sinang adlaw kag oras wala sing nakahibalo, bisan pa ang mga anghel sang mga langit ukon bisan pa ang Anak, kundi ang Amay lamang.”​—Mateo 24:⁠36.

Maathag nga ang “paghibalo sang mga tion kag mga dag-on,” ilabi na ang nahanungod sa palaabuton nga katumanan sang mga tagna sang Biblia, indi masarangan sang tawo. Ang Dios namat-od nga indi pag-ibuyagyag ini nga impormasyon sa aton. (Mateo 24:​22-​44) Mahimo ayhan naton maapektuhan ang katuyuan sang Dios paagi sa paghaumhaom naton mismo sa “sinang adlaw kag takna,” nga supak sa iya kabubut-on? Maathag nga imposible ini. (Numeros 23:19; Roma 11:​33, 34) Ang Biblia nagasiling: “Tubtob sa walay katubtuban ang laygay ni Jehova magapadayon.” (Salmo 33:11) Subong ang labing gamhanan nga Dios, madinalag-on sia pirme.​—Isaias 55:​8-​11.

Walay sapayan sang gahom sang Dios sa paghupot sang “paghibalo sang mga tion kag mga dag-on . . . sa iya kaugalingon nga pagbulut-an,” madamo sa gihapon ang luyag magbulubanta. Nagtangdo ang iban sang ila kaugalingon nga mga manalagna sang kalaglagan. Amo kon ngaa si apostol Pablo naghatag sing espesipiko nga instruksion sa mga taga-Tesalonica nahanungod sa katalagman sang pagpamati sa mga nagabanabana tuhoy sa mga petsa. Sia nagsulat: “Ginapakiluoy namon sa inyo nga indi kamo sa gilayon matay-ug sa inyo pangatarungan ukon matublag bisan paagi sa gin-inspirar nga pahayag ukon paagi sa pulong ukon paagi sa sulat nga daw gikan sa amon, subong nga yari na ang adlaw ni Jehova. Walay tawo nga maglimbong sa inyo sa bisan anong paagi.”​—2 Tesalonica 2:​1-3.

Ang mga Saksi ni Jehova malig-on nga nagapati nga ang mga katuyuan sang Dios para sa palaabuton pat-od gid nga matuman suno sa iya napat-od nga tion, suno gid sa iya natalana nga adlaw kag oras. (Habacuc 2:3; 2 Pedro 3:​9, 10) Kag nagapati kita nga ining mga hitabo magaabot sa malapit nga palaabuton. (2 Timoteo 3:​1-5) Apang, wala kita nagabanabana ukon nagasuporta sa mga teoriya nga nagalapnag karon.b Pat-od gid nga ang tuig 2000, ukon 2001, ukon ang iban pa nga pag-umpisa sang tion nga gintalana sang tawo wala sing kahilabtanan sa orasan ni Jehova.

[Mga footnote]