Mga Pamangkot Gikan sa mga Bumalasa

Sin-o ang mga Judiyo nga mga pulis sang templo? Ano ang ila mga responsibilidad?

Ang pila ka Levinhon nga indi mga saserdote madamo sing responsibilidad. Ang isa sa sini amo ang paghimo sang hilikuton nga pareho sa ginahimo sang mga pulis. Ginadumalahan sila sang kapitan sang templo. Amo ini ang ginsiling sang Judiyo nga manunulat nga si Philo parte sa ila mga responsibilidad: “Ang pila sa sini nga mga Levinhon nagabantay sa mga puertahan nga ginaagyan sang mga tawo pasulod sa templo. Ang iban naman nagabantay sa atubangan sang santuaryo. Ginasigurado nila nga indi makasulod sa santuaryo ang mga tawo nga wala ginapahanugutan didto, pati ang mga tawo nga posible wala kabalo nga indi sila dapat magsulod sa santuaryo. Ang iban nagaronda sa palibot sang templo para magbantay. Nagabulosbulos ang mga nagaronda adlaw kag gab-i.”

Puede masugo sang Sanhedrin ini nga mga pulis. Amo lang ini ang Judiyo nga grupo nga gintugutan sang gobierno sang Roma nga magdala sing espada.

Ang isa ka eksperto sa Biblia nga si Joachim Jeremias nagpaathag nga sang gindakop si Jesus sang mga opisyal, ginpamangkot niya sila kon ngaa wala nila sia gindakop sang nagapanudlo sia sa templo. Wala kuntani ini ginpamangkot ni Jesus kon ini nga mga opisyal indi mga pulis sang templo. (Mat. 26:55) Nagapati man ini nga manunulat nga ang mga opisyal nga ginsugo nga dakpon si Jesus antes sang sini nga hitabo mga pulis man sang templo. (Juan 7:32, 45, 46) Sang ulihi, ginsugo sang Sanhedrin ang kapitan sang templo kag ang pila ka opisyal nga dalhon sa ila ang mga disipulo ni Jesus. Mahimo gid nga ang mga pulis man sang templo ang nagganoy kay apostol Pablo pagua sa templo.—Binu. 4:1-3; 5:17-27; 21:27-30.