Paghusay sa Bug-os Uniberso nga Hulusayon sing Dayon
“Si Jehova sa imo tuo magadugmok sa mga hari sa adlaw sang iya kasingkal.”—SALMO 110:5.
1, 2. Sang tuig 70 C.E., ano nga hitabo ang mahimo nagtuga sing duhaduha sa pagkabug-os uniberso sang pagkasoberano ni Jehova nga Dios, apang sa kay sin-o sadto, ginliso ang iya kahamuot?
ANG bug-os uniberso nga pagkasoberano sang Manunuga sang langit kag duta amo ang nahauna nga hulusayon sa atubangan sang mga tawo kag mga anghel. Sa indi madugay, ang hulusayon lubaron sing dayon, apang ginhangkat sang mga kaaway ni Jehova ang iya pagkasoberano sa sulod sang madamo nga siglo. Sa pagkamatuod, ang kalaglagan sang 70 C.E. sang siudad sang Jerusalem upod ang templo sini nga nadedikar kay Jehova mahimo nga nagtuga sing duhaduha sa pagkabug-os uniberso sang pagkasoberano sang Manunuga. Walay sapayan, may yara makatarunganon nga rason kon ngaa sadto wala magdesisyon si Jehova nga mangin isa ka mangangaway nga Dios para sa undanon nga Israel.
2 Ano ang rason? Sadto nga tion ginliso na ni Jehova nga Dios ang iya kahamuot sa isa ka bag-o nga pungsod, ang espirituwal nga Israel, “ang Israel sang Dios,” suno sa pagtawag ni apostlol Pablo sa kongregasyon ni Jesucristo. (Galacia 6:16) Apang, sa sulod sang ginatawag nga Cristianong dag-on, si Jehova wala magpakig-away para sa espirituwal nga Israel subong isa ka mangangaway nga Dios subong sang ginhimo niya anay nga pagpakig-away para sa kinaugali nga Israel sa idalom sang Mosaiko nga Kasuguan nga katipan. Gintugutan pa gani niya nga patyon sang Romanong mga soldado, nga ginsugyutan sang mga Judiyo, si Jesucristo sa usok sang pag-antos sa Kalbaryo. Natabo ina 37 ka tuig sa wala pa ang ikaduha nga kalaglagan sang Jerusalem paagi sa mga Romano, sang 70 C.E.
3, 4. Kutob sang mga adlaw ni Moises tubtob kay Hari Ezequias, paano ginpakita sang Dios ang iya kaugalingon subong isa ka mangangaway, apang sa bahin sang espirituwal nga mga Israelinhon, ano ang kamatuoran tuhoy sa iya pagpakig-away kag sa ila pagpakig-away?
3 Kutob sang mga adlaw ni manalagna Moises tubtob sa paggahom ni Hari Ezequias sang Jerusalem, si Jehova nga Dios milagruso nga nagpakig-away para sa pungsod sang Israel, kag ang mga Israelinhon nagpakig-away sa idalom niya paagi sa makamamatay nga mga hinganiban. (Deuteronomio 1:30; 3:22; 20:3, 4; Josue 10:42) Apang indi subong sini sa bahin sang espirituwal nga Israel! Kutob sang pagkapatay ni Jesucristo sa guwa sang Jerusalem tubtob sa aton Kumon nga Dag-on, ining mangangaway nga Dios wala magdesisyon sa paghimo sing pisikal nga pagpakig-away para sa Israel sang Dios. Sing nagakahisuno, wala niya gin-awtorisahan ang espirituwal nga mga Israelinhon nga nagahuman sang Cristianong kongregasyon sa pagpakig-away paagi sa materyal nga mga hinganiban. Ang mga Cristiano may tuhay nga sahi sang pagpakig-away.
4 Nagaugyon sa sini, ang isa sang nagapanguna nga mangangaway para sa Cristianong pagtuluuhan nagsulat sa mga masigka-Cristiano sa Corinto, Gresya: “Ang mga hinganiban sang amon pagpakig-away indi undanon, apang gamhanan bangod sa Dios sa pagguba sang mga pamakod. Kay ginaguba namon ang indi matuod nga mga rason kag tagsa ka bugalon nga kaupangan nga ginagamit batok sa pagkilala sa Dios; kag ginadaug namon ang tagsa ka panghunahuna agod magtuman ini kay Cristo; kag sa tapos nga napamatud-an ninyo ang inyo bug-os nga pagkamatinumanon, handa kami sa pagsilot sang bisan ano nga buhat sang pagkadimatinumanon.” (2 Corinto 10:4-6) Sa una nga bahin sini gihapon nga sulat, may ginsambit si Pablo tuhoy sa “mga hinganiban sang pagkamatarong sa tuo kag sa wala.”—2 Corinto 6:7; tan-awa man ang Efeso 6:11-18.
Si Jehova Magapakig-away sa Armagedon
5. Sa hardin sang Getsemane, ano ang tindog ni Jesus tuhoy sa paggamit sing materyal nga mga hinganiban sa pagdepensa sang kaugalingon, kag ano nga dalanon ang ginpili sang iya mga disipulo?
5 Si Jesucristo, sang yari sa duta, wala gid maggamit sing makamamatay nga mga hinganiban sa pagdepensa sang iya kaugalingon. Sang gab-i nga gintugyan sia sa hardin sang Getsemane, ang iya mahugod nga disipulo nga si Simon Pedro naggabot sing espada kag gin-utas niya ang dulunggan sang alagad sang Judiyo nga mataas nga saserdote. Apang milagruso nga gin-uli ni Jesus ang dulunggan sang alagad kag nagsiling: “Ang tanan nga nagagamit sing espada sa espada mapatay. Ukon nagahunahuna ka bala nga indi ako makapangayo sa akon Amay kag sa gilayon padalhan ako niya sing kapin sa napulog-duha ka legion nga mga anghel? Ugaling kon amo ina, paano matuman ang Kasulatan?” (Mateo 26:52-54) Sa atubangan sining tanan, ang matuod nga mga manug-ilog sang nagsakripisyo sang kaugalingon nga Anak sang Dios nagahupot sang ila neutralidad, sing direkta kag indi direkta, kon tuhoy sa kalibutanon nga pagpakig-away.—Juan 17:16; 18:36.
6. Sa tion sang inaway sang dakung adlaw sang Dios nga Labing Gamhanan sa Armagedon, ano ang mangin tindog sang mga Saksi ni Jehova?
6 Sa sini, nian, pahibaluon ang mga pungsod nga sa tion sang “inaway sang dakung adlaw sang Dios nga Labing Gamhanan” sa “duog nga ginatawag sa Hebreo Har–Magedon,” ang mga Saksi ni Jehova indi magabuylog sa pagpakig-away. Ibilin nila ini sa mangangaway nga Dios, si “Jehova sang kasoldadosan,” upod sa iya mga legion sang mga anghel sa idalom sang pagdumala ni Jesucristo.—Bugna 16:14-16; 19:11-21; Salmo 84:12.
Malapit Na Padayunon Liwat ni Jehova ang Iya Pagpakig-away
7. Subong mangangaway nga Dios, nakilala si Jehova sa ano nga titulo, kag amo bala sia gihapon sini?
7 Ang Dios sang dumaan nga Israel nakilal-an kag gintawag nga Jehova tseva·’ohthʹ, ukon Jehova sang kasoldadosan. (1 Samuel 1:3, 11) Sa Roma 9:29 (King James Version) ginapatuhuyan sang Cristianong apostol nga si Pablo ang Isaias 1:9 kag nagsulat: “Kon ang Ginuo sang Sabaot (kasoldadosan) wala magbilin sa aton sing binhi, nangin kaangay na kita kuntani sa Sodoma kag Gomorra.” Subong man, ang Cristianong disipulo nga si Santiago nagsulat: “Ang mga singgit sang mga nagpang-ani naglambot sa mga dulunggan sang Ginuo sang kasoldadosan.” (Santiago 5:4, KJ; American Standard Version) Gani ginklase ni Pablo kag ni Santiago ang Dios subong si Jehova sang kasoldadosan sa tion sang nahauna nga siglo sang aton Kumon nga Dag-on. Sa sulod sang nagsunod nga 18 ka siglo, ang Dios wala magpakig-away sa pisikal nga paagi para sa espirituwal nga Israel, ang Israel sang Dios, subong sang ginhimo niya anay para sa dumaan nga Israel, apang sia gihapon si Jehova sang kasoldadosan.
8-10. (a) Sin-o ang nagtugot sang inaway sa langit, kag ngaa si Miquel ang sangkol gid sa pagpakig-away? (b) Ano ang resulta sang inaway sa langit, kag daw ano pa nga tion ang nabilin sa wala pa ang inaway sang dakung adlaw ni Jehova?
8 Sang mabun-ag ang Mesianikong Ginharian sang 1914 sa katapusan sang “panahon sang mga Gentil,” ang inaway nagdabdab sa langitnon nga duog ni Jehova nga Dios. (Lucas 21:24, KJ) Sin-o ang nagtugot sadto nga inaway? Si Jehova nga Dios mismo. Ginpadala niya ang iya nakalingkod na sa trono nga Anak sa patag-awayan sa idalom sang ngalan nga Miguel kay ining Isa amo ang sangkol gid sa pagsabat sa pamangkot nga naunod sa sina nga ngalan, nga amo, “Sin-o ang Kaangay sang Dios?” Naghikot sa gilayon si Miguel subong nagapakig-away nga tiglawas ni Jehova sang kasoldadosan.
9 Sing nagakahisuno, aton mabasa sa Bugna 12:7-10: “Kag may inaway sa langit: si Miguel kag ang iya mga anghel nagpakig-away batok sa dragon kag sa iya mga anghel apang gindaug sila, kag wala sing duog sa ila sa langit. Gani ginhulog ang dakung dragon, yanang dumaan nga man-ug, nga ginatawag nga Yawa kag Satanas, nga nagapatalang sa bug-os napuy-an nga duta; ginhulog sia sa duta, kag ang iya mga anghel ginhulog kaupod niya. Kag nabatian ko ang mabaskog nga tingog sa langit nga nagasiling: ‘Karon nag-abot ang kaluwasan kag ang gahom kag ang ginharian sang aton Dios kag ang awtoridad sang iya Cristo, kay ginhulog ang manugsumbong sang aton mga kauturan.’ ”
10 Sa karon, pagligad sang kapin sa 70 ka tuig sa tapos sadtong inaway sa langit, ‘malip-ot lamang nga tion’ ang nabilin antes magdabdab ang dakung adlaw sang inaway ni Jehova kag maathag nga ipasundayag sang Dios ang iya kaugalingon subong si Jehova sang kasoldadosan sa karon nga kaliwatan sang katawhan.—Bugna 12:12; Zacarias 14:3.
Ang Mangangaway sa Pagbindikar kay Jehova
11. Anong gintangdo nga tion ang ginahulat sang nagkalabilin sang diutay nga panong kag sang dakung kadam-an, kag sa ano sila magahugyaw?
11 Sa idalom sang inspirasyon, ang maalam nga si Hari Solomon sang dumaan nga Israel nagsulat: “Sa tagsa ka butang may panag-on, kag tion sa tagsa ka katuyuan sa idalom sang langit: . . . tion sa pag-inaway kag tion sa paghidait.” (Manugwali 3:1-8) Sa duta ang mga disipulo sang nagagahom nga Hari nga “labaw pa kay Solomon” nagahulat sang tion kag okasyon nga pangunahan Niya ang madaugon nga langitnon nga mga anghel sa pagpakig-away sa Har–Magedon. (Mateo 12:42; Bugna 19:11-16) Didto ‘bantayan [niya ang mga pungsod] paagi sa bilugon nga salsalon,’ kag buungon sila “paagi sa setro nga salsalon.” (Bugna 19:15; Salmo 2:9) Magahugyaw gid ang iya mahidaiton kag naamligan nga mga disipulo sa iya makapulunaw nga pagluwas sa ila! Magalakip ini sa nagkalabilin sang “diutay nga panong” sang iya mga masigkamanunubli sa Ginharian kag sa “dakung kadam-an” sang iya “iban nga mga karnero” nga nagalaum sa pagpanubli sang Paraiso nga duta sa idalom sang iya mahidaiton nga paggahom sa isa ka libo ka tuig. (Lucas 12:32; Bugna 7:9-17; Juan 10:16) “Sa idalom sang landong gid sang Labing Gamhanan,” magahugyaw sila sa bug-os nga kadalag-an sang Manugbantay nga Hari, si Jesucristo, sa pagbindikar sang bug-os uniberso nga pagkasoberano ni Jehova nga Dios.—Salmo 91:1.
12. Gikan diin ang inaway nga nagapadulong sa mga pungsod, kag ano ang resulta suno sa Salmo 68:1, 2?
12 Indi pagpahabok ang pagsiling karon nga ang inaway gikan sa duog nga malayo sa puluy-an sang tawo kag magagamit sing napuntariya na nga mga hinganiban nga labaw pa sa iya nukleyar nga mga bomba, nagapadulong sa tanan nga pungsod sang duta, sa sulod ukon sa guwa sang Nasyones Unidas nga organisasyon. Pamatii: “Magtindog ang Dios, mag-aplaag ang iya mga kaaway, kag magpalagyo man sa atubangan niya ang mga nagadumot sa iya. Subong sang aso nga ginapalid, sa amo tabuga sila; subong sang kandila nga nagakatunaw sa atubangan sang kalayo, sa amo mawala ang malauton sa atubangan sang Dios.”—Salmo 68:1, 2.
13. Samtang nagapadayon ang mga paghanda para sa inaway, sa kay sin-o ang mga pulong sang Salmo 45:1-6 ginapatuhoy karon sa isa ka sibu gid sa tion nga inaway?
13 Ang mga paghanda para sa inaway sang tanan nga inaway ginahimo na karon. Subong nagapanguna nga Mangangaway sang Dios, ang Manug-away sa pagbindikar kay Jehova ginapatuhuyan sa masunod nga mga pulong nga ginkomposo sa idalom sang inspirasyon sang isa ka katapo sang pungsod sang Israel: “Ikaw matahom pa sa mga anak sang mga tawo. Ang bugay ginaula sa imo mga bibig. Busa ang Dios nagpakamaayo sa imo tubtob sa wala sing katubtuban. Itaklos ang imo espada sa imo balikawang, O gamhanan, ang imo pagkahalangdon kag imo himaya. Kag sa imo himaya magmadinalag-on ka; sakay ka sa pag-apin sang kamatuoran kag pagkamapainubuson kag pagkamatarong, kag ang imo nga kamot magatudlo sa imo sa makahaladlok nga mga butang. Ang imo mga baslay mataliwis—ang katawhan nagakapukan sa idalom nimo—sa tagipusuon sang mga kaaway sang hari. Ang Dios imo trono tubtob sa wala sing katubtuban, sing dayon; ang setro sang imo pagkahari amo ang setro sang pagkatadlong.”—Salmo 45:1-6.
Ang mga Pungsod Nagatingob Batok kay Jehova
14, 15. Sa tapos mabuy-an, ano nga mga pulong gikan sa Salmo 2 ang ginbalikwat sang mga apostoles nga nagakatuman, kag ano ang ginpangabay nila sa Dios?
14 Wala madugay sa tapos matukod ang Cristianong kongregasyon sang adlaw sang Pentecostes 33 C.E., nahantop sang hinaplas nga mga Cristiano ang aplikasyon sang Salmo 2:1, 2. Ining kasulatan nagasiling: “Ngaa bala ang mga pungsod nagasingkal kag ang mga katawhan nagahimbon sing butang nga wala sing pulos? Ang mga hari sang duta nagapahamtang sang ila kaugalingon kag ang mga manuggahom nagahilisapol sing tingob batok kay Jehova kag batok sa iya hinaplas.” Sa tapos ang mga apostoles sang Hinaplas ni Jehova gindakop kag ginpintasan sang kaaway nga mga Judiyo, nagbuylog sila liwat sa ila mga masigka-Cristiano kag ginbalikwat nila dayon ining mga pulong sang Salmo 2 nga ginkomposo ni Hari David. Ginareport sang Binuhatan 4:23-30 ang natabo, nga nagasiling:
15 “Sang mabuy-an sila nagbalik sila sa ila mga kaupdanan kag ginsugiran nila sila kon ano ang ginsiling sang pangulo nga mga saserdote kag sang mga gulang. Sang pagkabati nila sini, gintib-ong nila sing hiusa ang ila tingog sa Dios kag nagsiling: ‘Soberano nga Ginuo, ikaw ang Isa nga nagtuga sang langit kag sang duta kag sang dagat kag sang tanan nga butang sa ila, kag nga paagi sa balaan nga espiritu, sa baba sang amon amay nga si David nga imo alagad nagsiling, “Ngaa bala nagsingkal ang mga pungsod kag ang katawhan naghunahuna sing wala sing pulos nga mga butang? Ang mga hari sang duta nagapangaman kag ang mga manuggahom nagtingob batok kay Jehova kag batok sa iya hinaplas.” Kay matuod gid si Herodes kag si Poncio Pilato upod ang mga tawo sang mga pungsod kag ang mga katawhan sang Israel nagtipon sa sini nga siudad batok sa imo balaan nga alagad nga si Jesus, nga imo hinaplas, sa paghimo sang mga butang nga ginpat-od na nga daan sang imo kamot kag sang imo kabubut-on nga mahanabo. Kag karon, Jehova, tan-awa bala ang ila pamahog, kag itugot sa imo mga ulipon ang pagpamulong sang imo pulong sa bug-os nga kasidla, samtang ginauntay mo ang imo kamot sa pagpang-ayo kag samtang ginahimo ang mga tanda kag mga kalatingalahan paagi sa ngalan sang imo balaan nga alagad nga si Jesus.’ ”
16, 17. (a) Sa bug-os nga maragtas sang tawo, may natabo na bala nga mapaanggid sa butang nga nagsugod sang 1914? Ipaathag. (b) Ano nga dalanon ang padayon nga ginahimo sang mga pungsod, paagi sa amo ginaobligar si Jehova nga Dios sa pagsulat sing ano, tuhoy sa ‘tulun-an sang iya mga inaway’?
16 Apang, kon tuhoy sa nagasingkal nga mga pungsod, mga hari nga nagapangaman sing hiusa, politikal nga mga lider nga nagatingob batok kay Jehova kag sa iya Hinaplas nga Isa, si Jesucristo, ano sa bug-os nga maragtas sang tawo ang mapaanggid sa butang nga nagsugod sang 76 ka tuig nga nagligad sang 1914? Indi lamang amo yadto ang tuig nga nagdabdab ang nahauna nga inaway kalibutanon sa bug-os nga pagluntad sang tawo kundi labi na amo yadto ang tuig sang matapos ang panag-on sang mga Gentil, “ang gintangdo nga panag-on sang mga pungsod!” (Lucas 21:24) Maathag nga ang Salmo 2 natuman sa daku pa nga bahin sugod sadto nga tuig.
17 Sang matapos ang panag-on sang mga Gentil sang 1914, wala sing bisan isa sa mga pungsod—wala bisan sa mga pungsod sang ginatawag nga Cristiandad, nga madamo sang banwahanon sini relihioso nga nagatamod sang ila kaugalingon subong espirituwal nga mga Israelinhon—ang may huyog sa pag-abiabi sa Hinaplas nga Isa ni Jehova, si Jesucristo, sa trono sang paggahom sa ibabaw sang duta. Kag karon, 71 ka tuig sang ulihi sa tapos “ining maayong balita sang Ginharian” “ginbantala sa bug-os napuy-an nga duta subong panaksi sa tanan nga pungsod,” kutob sang 1919 padayon, ang mga pungsod sa sulod kag sa guwa sang Cristiandad pat-od nga indi magaabiabi sa madugay na ginpahibalo nga Hari ni Jehova kag magasumpa sing pagkatutom sa iya paagi sa pagsikway nila sang ila kaugalingon nga paggahom sa ibabaw sang duta. (Mateo 24:14) Sa kabaliskaran, sila sa katapusan makadangat sa tion kag kahimtangan nga sa diin ginaobligar nila si Jehova sa pagsulat sang daw daku nga katapusan sang “tulun-an sang mga Inaway ni Jehova.”—Numeros 21:14.
Mahimayaon nga Kadalag-an sang Mangangaway nga Dios
18. Pabor kita sa ano nga himuon ni Jehova, kag sin-o ang yara sa kiliran niya, kon sa aton pa, bilang katumanan sang Salmo 110?
18 Abante, sa pagpakig-away, O Jehova sang kasoldadosan, upod sa imo nagahari nga Anak, si Jesucristo, sa imo kiliran! Sa iya ginapatuhoy ang matagnaon nga mga pulong: “Gahom ka sa tunga sang imo mga kaaway. Si Jehova sa imo tuo magadugmok sang mga hari sa adlaw sang iya kasingkal. Magahukom sia sa tunga sang mga pungsod; nagapuno sia sang mga duog sing mga bangkay. Dugmukon niya ang pangulo sang madamo sing pumuluyo nga duta.”—Salmo 110:2, 5, 6.
19. Tuhoy sa inaway sang dakung adlaw sang Dios nga Labing Gamhanan nga yara lang sa unhan, ano ang ginapangamuyo naton para sa dakung kadam-an sang iban nga mga karnero?
19 O Jehova sang kasoldadosan, itugot sa imo matutom nga mga alagad sa duta nga mangin masinadyahon nga mga saksi sang imo wala sing tupong nga kadalag-an paagi sa imo mangangaway nga Hari, si Jesucristo, sa tion sang inaway sang dakung adlaw sang Dios nga Labing Gamhanan sa duog nga ginatawag sa Hebreo nga Har–Magedon! (Bugna 16:14) Upod sa nagkalabilin sang matuod nga espirituwal nga mga Israelinhon, itugot sa dakung kadam-an sang mga tulad karnero nga ‘naglaba sang ila malaba nga panapton kag nagpaputi sini sa dugo sang Kordero’ nga ‘magguwa [nga may paghugyaw] sa dakung kapipit-an’ agod mangin dutan-on nga mga saksi mo sa duta sing dayon! (Bugna 7:14) Sa idalom sang imo mahigugmaon nga pag-atipan, itugot nga maluwas sila nga indi na mapatay padulong sa wala na sing inaway nga duog sang imo madaugon nga Anak, nga magagahom sa ibabaw sang natinluan nga duta nga himuon nga isa ka matahom nga paraiso, nahisanto sa imo katuyuan sa ginsuguran. Himua sila nga mangin isa ka kitaon nga pamatuod sa tanan nga banhawon nga mga patay sa pagbindikar sang pagkasoberano nga imo gid sa bug-os nga uniberso! Nagapasalamat kami sa imo nga sa amo nga tion mahusay na nimo ang bug-os uniberso nga hulusayon sing dayon, huo, tubtob sa wala sing katubtuban!
Madumduman Mo Bala?
◻ Ano ang nahauna nga hulusayon sa atubangan sang mga tawo kag sang mga anghel?
◻ Ano ang kinatuhayan sang pagpakig-away ni Jehova para sa dumaan nga Israel kag para sa espirituwal nga Israel?
◻ Sa tion sang Armagedon, ano ang mangin tindog sang mga Saksi ni Jehova, kag ngaa?
◻ San-o ang Salmo 2:1, 2 natuman sa paagi nga wala sing tupong?
◻ Paano mahusay sing dayon ang bug-os uniberso nga hulusayon?
[Piktyur sa pahina 24, 25]
Ang “dakung kadam-an” magahugyaw sa madaugon nga Manugbantay nga Hari sang Dios