‘Ipamulong ang Pulong sang Dios nga may Kasidla’

SI Jehova nga Dios makahatag sing gahom sa iya mga alagad sa ‘pagpamulong sang Pulong sang Dios nga may kasidla.’ (Binuhatan 4:31) Bisan ang mga bata pa sa mga dalanon sang kamatuoran sang Biblia kag wala pa sing eksperiensia sa pag-ebanghelyo nga hilikuton indi dapat magpangalag-ag sa pagpamulong sing maayong balita nga may kasidla. Sa Côte d’Ivoire, duha ka manugbantala sing maayong balita ang nagapamalaybalay sang makilala nila ang isa ka propesor sa unibersidad. Bangod ginbatyag sang mas bata nga Saksi nga si Se­riki nga indi sia sangkol sa pagpakighambal sa sadtong edukado nga tawo, gintugutan niya ang kaupod niya nga Saksi sa pagpakighambal.

Ginatublag ang propesor sang pagdampigdampig sa rasa kag ginabasol niya ang Dios sa mga problema sa rasa nga nagaluntad, bangod siling niya sia ang nagtuga sang lainlain nga rasa. Sa tapos sang malawig nga paghambalanay nga daw wala sing direksion, si Se­riki sang ulihi nakatipon sing kaisog sa paghambal, kag matinahuron nga nagsal-ot sia sa paghambalanay. (1 Tesalonica 2:2) Sang matalupangdan nga matahom ang pinili nga kolor sa balay sang propesor, ginpamangkot ni Se­riki ang propesor, “Ngaa indi isa ka kolor lang ang gingamit mo sa imo bug-os nga balay?”

“Ginhunahuna mo siguro nga buang ako!” sabat sang propesor. Nagsabat si Se­riki: “Indi, apang ngaa ginapaabot mo ang Dios nga isa lamang ang ikolor sa tanan?” Maathag ang punto. Yadtong simple nga ilustrasyon nangin epektibo, kag maayong panaksi ang nahatag sang mahuluy-on anay nga si Se­riki.