Ang Tion sa Pagpangita sa Dios

ANG laragway sa sining pahina amo ang Acropolis sang Atenas, nga isa anay ka sentro sang pagsimba sa madamo nga mga dios kag mga diosa. Sa ubos sang Acropolis amo ang Areopago, nga ginasiling nga amo anay ang lokasyon sang korte sang katarungan sang dumaan nga mga tion. Diri sini, nga halos 2,000 ka tuig na ang nagligad, nagtindog si apostol Pablo kag naghatag sing talalupangdon gid nga diskurso. Ang masunod amo ang isa sang iya ginsiling:

“Ginhimo [sang Dios] gikan sa isa ka tawo ang tagsa ka pungsod sang mga tawo, sa pagpuyo sa bug-os nga nawong sang duta, kag ginpat-od niya ang gintangdo nga mga panag-on kag ang mga dulunan sang puluy-an sang mga tawo, agod nga pangitaon nila ang Dios, kon kapkapon nila sia kag makita sia, bisan pa, sa kamatuoran, indi sia malayo gikan sa tagsatagsa sa aton. Kay paagi sa iya nagakabuhi kita kag nagahulag kag nagaluntad.”—Binuhatan 17:26-28.

Daw ano kuntani ka tuhay ang maragtas kon gintalupangod sang katawhan sa kabilugan ang mga pulong ni Pablo! Daw ano kadamo nga mga inaway, daw ano ka daku nga pag-antos, ang nalikawan kuntani kon ginkilala lamang sang mga tawo ang ila kinaandan nga interes subong kaliwat sang isa ka tawo nga gintuga sang Soberanong Ginuo, nga si Jehova.

Sa karon, ang katawhan ginabahinbahin sang nasyonalismo, pagkatuhay sang mga klase, pagdumtanay sang mga rasa, kag pagkadialangay sa katilingban. Apang, naaplikar gihapon ang mga pulong ni Pablo. Kita tanan mga kaliwat sadtong isa ka tawo nga gintuga sang Dios. Kita tanan, sa sina nga kahulugan, mag-ulutod nga mga lalaki kag mga babayi. Kag indi pa gihapon atrasado nga pangitaon ang Dios samtang makita pa sia.

Ang mga pulong ni Pablo kapin pa ka serioso kon binagbinagon naton ang hingapusan nga mga pulong sang iya diskurso. Sia nagsiling: “[Ang Dios] nagtangdo sing isa ka adlaw nga hukman niya ang napuy-an nga duta sa pagkamatarong paagi sa isa ka tawo nga iya gintangdo, kag nakahatag sia sing kalig-unan sa tanan nga tawo paagi sa pagbanhaw niya sa iya.”

Ang pagkabanhaw ni Jesus isa ka maragtason nga kamatuoran, kag subong ginapakita ni Pablo, isa ini ka kalig-unan nga magaabot ang adlaw sang paghukom para sa katawhan. San-o? Ti, nahibaluan naton nga halos 2,000 ka tuig na ang nagligad sang si Pablo nagtindog sa Areopago kag ginbungat ining mga pulong. Sa pagkamatuod, ang katumanan sang tagna sa Biblia nagapakita nga tuman na ini kalapit. Daw ano ka makapaserioso nga panghunahuna! Daw ano ka hilingagawon nga mangin sinsero kita sing bug-os sa pagpangita sa Dios, kay, subong sang ginsiling ni Pablo sa mga taga-Atenas, “karon ginasilingan niya ang katawhan bisan diin nga maghinulsol sila tanan”!—Binuhatan 17:30, 31.