Mga Pamangkot Gikan sa mga Bumalasa
◼ Ano “ang maayo” nga indi mahimo ni apostol Pablo, nga ginsambit niya sa Roma 7:19?
Sing sadsaran, ginpatuhuyan ni Pablo ang iya diikasarang sa paghimo sang tanan nga maayong butang nga nabalay sa Mosaikong Kasuguan. Imposible yadto para kay Pablo kag para sa tanan, lakip kita, bangod sang pagkadihimpit kag pagkamakasasala. Apang indi dapat madulaan sing paglaum. Ang halad ni Cristo nagbukas sang dalan para sa pagpatawad sang Dios kag sa isa ka maayo nga tindog sa atubangan Niya.
Ang Roma 7:19 mabasa: “Kay ang maayo nga luyag ko wala ko ginahimo, apang ang malaut nga indi ko luyag amo ang ginahimo ko.” Ginapakita sang konteksto nga ang “maayo” nga ginahambal ni Pablo napasad sa kon ano ang ginsugo sa Kasuguan. Sa bersikulo 7 sia nagsiling: “Sala bala ang Kasuguan? Malayo ina! Sa pagkamatuod wala ako kuntani makakilala sing sala, kon indi tungod sa Kasuguan; kag, subong halimbawa, wala ako kuntani makakilala sang paghamkon kon ang Kasuguan wala magsiling, ‘Dili ka maghamkon.’ ” Huo, maathag nga ginpakita sang Kasuguan nga sanglit indi nila matuman ini sing bug-os, ang tanan nga tawo makasasala.
Nagpadayon si Pablo sa pagsambit nga sia ‘nagkabuhi sang una nga walay kasuguan.’ San-o yadto? Ti, sang yara pa sia sa mga balikawang ni Abraham sa wala pa ginhatag ni Jehova ang Kasuguan. (Roma 7:9; ipaanggid ang Hebreo 7:9, 10.) Bisan pa si Abraham indi himpit, ang Kasuguan wala pa mahatag, gani wala sia mapahanumdom sang iya pagkamakasasala paagi sa kapaslawan sa pagtuman sang madamo nga sugo sini. Nagakahulugan bala ina nga sa tion nga nahatag ang Kasuguan kag ginpakita ang pagkadihimpit sang tawo, nagpatubas ini sing malain nga mga resulta? Indi. Si Pablo nagpadayon: “Gani, ang kasuguan balaan, kag ang sugo balaan kag matarong kag maayo.”—Roma 7:12.
Talupangda nga ginlaragway ni Pablo ang Kasuguan subong “balaan” kag “maayo.” Sa masunod nga mga bersikulo, ginpaathag niya nga “ang maayo”—ang Kasuguan—maathag nga nagpakita nga sia makasasala, kag ining sala naghimo sa iya nga takus sa kamatayon. Si Pablo nagsulat: “Ang maayo nga luyag ko wala ko ginahimo, apang ang malaut nga indi ko luyag amo ang ginahimo ko. Karon kon ang indi ko luyag ginahimo ko, indi na ako ang nagahimo sini, kundi ang sala nga nagapuyo sa akon.”—Roma 7:13-20.
Sa sini nga konteksto, kon amo, wala ginahambal ni Pablo ang pagkaayo sa kabilugan, ukon ang maluluy-on nga mga buhat. (Ipaanggid ang Binuhatan 9:36; Roma 13:3.) Ang partikular nga ginapatuhuyan niya amo ang paghimo (ukon indi paghimo) sang mga butang nga nahisanto sa maayong Kasuguan sang Dios. Sang una makugi nga ginbuhat niya ang Judiyong relihion kag—kon ipaanggid sa iban—nangin “disalawayon.” Walay sapayan, bisan pa sa iya hunahuna nangin ulipon sia sadtong maayong Kasuguan, sa gihapon wala sia maghikot nga nahisanto sa sini sing bug-os. (Filipos 3:4-6) Ang Kasuguan nagpakita sang himpit nga mga talaksan sang Dios, kag nagpakita sa apostol nga samtang unod pa sia ulipon gihapon sia sang kasuguan sang sala kag sa amo napamatbatan sing kamatayon. Apang, nagpasalamat si Pablo nga tungod sang halad ni Cristo sia ginpahayag nga matarong—ginluwas gikan sa kasuguan sang sala kag sa nagakaigo nga resulta sini, ang pamatbat nga kamatayon.—Roma 7:25.
Ang mga Cristiano karon wala sa idalom sang Mosaikong Kasuguan, kay ginlansang ini sa usok sang pag-antos. (Roma 7:4-6; Colosas 2:14) Apang maayo nga kilalahon naton nga indi yadto isa ka mabug-at nga sugo nga maayo kalimtan na lang naton. Indi, sing sadsaran maayo ang Kasuguan. Sa amo may rason kita nga basahon ang mga tulun-an sang Biblia nga nagaunod sang Kasuguan kag tun-an kon ano ang ginpatuman sini sa Israel. Ang mga Saksi ni Jehova sa bilog nga duta magahimo sina sa indi madugay, paagi sa ila semanal nga pagbasa sing Biblia.
Samtang ginabasa naton ang Kasuguan, dapat naton pamalandungon ang mga prinsipio sa likod sang nanuhaytuhay nga mga pagsulundan sini kag ang mga kaayuhan nga natigayon sang katawhan sang Dios samtang nagtinguha sila sa pagtuman sadtong maayong mga sugo. Dapat man naton apresyahon nga kita dihimpit kag sa amo wala sing ikasarang sa pagsunod sing bug-os sang maayo nga ginatun-an naton gikan sa Pulong sang Dios. Apang samtang nagapakig-away kita batok sa kasuguan sang sala, makakalipay kita sa paglaum nga maluwas paagi sa pag-aplikar sang halad ni Cristo sa aton.